تۇرغۇن پەيزۇللا يۇلغۇن 
چۆللەرنىڭ باغرىدا تاتلىق كۈلىسەن،
كۈلكەڭنىڭ كۈيىگە ئۆزۈڭ كۆيۈسەن،
كۆيگۈدىن خۇشپۇراق – ھىدلار تۆكۈسەن،
چېچەكلەر چېچىكى يۇلغۇن چېچىكى.
باغرىڭدا لاۋۇلداپ يانىدۇ ئوتقاش،
نە ئوتقاش، پارلايدۇ گوياكى قۇياش،
شادلىقىم شۇ ئوتقاش، قۇياشقا تۇتاش،
چېچەكلەر چېچىكى يۇلغۇن چېچىكى.
نەپىسىم ئوت پۈركەر سېنى پۇرىسام،
تۇمۇچۇق تەڭكەشتۇر ناخشا توۋلىسام،
نە ناخشا توۋلايمەن شەيدا بولمىسام؟
چېچەكلەر چېچىكى يۇلغۇن چېچىكى.
ئەجدادىم كەچمىشى سېنىڭدە ئايان،
بىر ئۇزۇن كەلمىشنى قىلىسەن بايان،
سەن گويا مىڭ يىللىق قاتقان ھاياجان،
چېچەكلەر چېچىكى يۇلغۇن چېچىكى. بۇ يازمىنى ئاخىرىدا 138 تەھرىرلىگەن. ۋاقتى 2012-5-26 13:02
| 
يوللانغان ۋاقتى 
