جۇڭگو ئاخبارات تورىنىڭ 25-سىنتەبىر يوللىغان تېلگىراممىسى:
چەتئەل تاراتقۇلىرىنىڭ خەۋەر قىلىشىچە، بىر دوكلاتتا مېكسىكىدىكى %60 تىن ئارتۇق تۈرمىنىڭ قارا جەمئىيەتنىڭ كونتروللۇقىدا ئىكەنلىكى كۆرسىتىلگەن بولۇپ، ئۇلار تۈرمىدىكى كامىرلارنىڭ ئاچقۇچلىرىنى كونترول قىلىۋالغان ئىكەن. شۇنداقلا تۈرمىدىكى مەھبۇسلارنى خورلاپ، ئۇلاردىن قوغداش ھەققى ئالىدىكەن. مانا بۇ مېكسىكىدىكى تۈرمە قالايمىقانچىلىقىنىڭ تۈگىمەسلىكىدىكى مۇھىم سەۋەب ئىكەن.
مىكسىكا ھۆكۈمىتى دۆلەتلىك كىشىلىك ھوقوق كومتىتى مىكسىكىدىكى 100 دىن ئارتۇق تۈرمىنى تەكشۈرگەن بولۇپ، ئۇلارنىڭ تەكشۈرۈش دوكىلاتىدا كۆرسىتىلىشىچە، نۇرغۇن تۈرمىلەردە ھەددىدىن زىيادە قىستاڭچىلىق ئەھۋاللىرى بار ئىكەن. ھەممە تۈرمىدە دىگۈدەك تۈرمىنىڭ ئىچكى تەمىنلەش ۋە باشقۇرش تارماقلىرىدا قارا جەمئىيەتنىڭ قۇلى بار ئىكەن. ھەتتا بەزى تۈرمىلەر زەھەر ئەتكەسچىلىرى تەرىپىدىن كونتىرول قىلىنىدىكەن. مىكسىكا ھۆكۈمىتى تەپتىشى ئەمەلدارى رائۇل.پىلاسىنسىيانىڭ ئېيتىشىچە، مىكسىكىدىكى %60 تىن ئارتۇق تۈرمە ئۆزىنى-ئۆزى باشقۇرىدىكەن. جىنايەتچىلەر يانفۇن، يىمەكلىك قاتارلىق بويۇملارنى سېتىش بىلەن شۇغۇللىنىدىكەن. ئۇنىڭ يەنە ئۆتكەن بىرنەچچە يىلدا، تۈرمىلەرنىڭ ئەھۋالىنىڭ ناچارلىشىپ كەتكەنلىكىنى ئىنكار قىلغىلى بولمايدىغانلىقىنى، ئارقا-ئارقىدىن يۈز بەرگەن تۈرمە ۋەقەلىرى، جېدەل چىقىرىش، ساقچىلارغا ھۇجۇم قىلىش قاتارلىق ئىشلار تۈرمە ئەھۋالىنىڭ ناچارلىشىپ كەتكەنلىكىنىڭ ئەڭ ياخشى ئىسپاتى ئىكەن.
شۇ يەر ۋاقتى 17-سېنتەبىر چۈشتىن كېيىن، كۇئاخۇيلا ئۆلكىسىدىكى بىر تۈرمىدە توپلىشىپ تۈرمىدىن قېچىش ۋەقەسى يۈز بەرگەن بولۇپ، 131 نەپەر جىنايەتچى تۈرمىدىن قېچىپ كەتكەن. تۈرمىدىكى 16 نەپەر تۈرمە خادىمى جىنايەتچىلەرنىڭ قېچىشىغا ياردەملەشكەن دەپ قارىلىپ، تۇتۇپ تۇرۇپ سوراق قىلىنغان.
پىلاسىنسىيانىڭ ئېيتىشىچە، ئۆتكەن ئىككى يىلدا مېكسىكىدا 14 قېتىم جىنايەتچىلەرنىڭ تۈرمىدىن قېچىش ۋەقەسى يۈز بەرگەن. جەمئىي 521 نەپەر جىنايەتچى تۈرمىدىن قېچىپ كەتكەن. جەمئىي 352 قېتىم تۈرمە ئىچىدە ئادەم ئۆلتۈرۈش ۋەقەسى يۈز بەرگەن.
مېكسىكىدا جەمئىي 419 تۈرمە بار بولۇپ، بۇنىڭ ئىچىدە 13 تۈرمىنى فېدېراتسىيە ھۆكۈمىتى باشقۇرىدىكەن. قالغانلىرىنى بولسا شۇ تۈرمە قاراشلىق شەھەر ياكى ئۆلكە باشقۇرىدىكەن.