سەئۇدى ئەرەبىستانى پادىشاھى فاھىد (Fahd Ibn Abdul-Aziz)

بايلىقى: 25 مىليارد ياۋرو

   دۇنيادىكى ئەڭ باي بۇ پادىشاھ غايەت زور سوممىلىق نېفىت كىرىمىنى باشقۇرىدۇ ، سودا ۋە بانكىنى كونترول قىلىدۇ ، پايچەك ۋە شىركەتكە ئىگىدارچىلىق قىلىدۇ ، ئۇ يەنە دۇنيانىڭ ھەرقايسى جايلىرىدىن كۆچمەس مۈلۈك سېتىۋالغان . 1000 دىن ئارتۇق ئۇرۇق–تۇغقىنى ئۇنىڭغا تايىنىپ ھايات كەچۈرىدۇ .

بىرۇنېي سۇلتانى ھاجى (Haji Hassanal Bolkiah Mu'izzadin Waddaulah)
بايلىقى: 13 مىليارد ياۋرو
 
   بۇ كىچىك پادىشاھلىق بورنېئو ئارىلىنىڭ شىمالىغا جايلاشقان بولۇپ ، كۆلىمى ئىسپانىيەنىڭ ماللوركا ئارىلىدىن ئازراقلا چوڭ ، نوپۇسى 400 مىڭغا يەتمەيدۇ ، لېكىن بۇ دۆلەتنىڭ يەر ئاستى نېفىت زاپىسى مول بولغاچقا، ئاتا–بوۋىسىنىڭ ھوقۇقىغا ۋارىسلىق قىلغان سۇلتان دەرىجىدىن تاشقىرى بايغا ئايلانغان . ئۇنىڭ خوتۇن–توقاللىرى كۆپ ، دۇنيا بويىچە ئەڭ چوڭ ئوردىسى بار . ئوردىنىڭ زىياپەت زالىغا 4000 مېھمان سىغىدۇ . ئۇ دۇنيادىكى ئەڭ داڭلىق بىباھا گۆھەرلەرنى يىغىپ ساقلىغان ، Rolls-Royce ماركىلىق ئاپتوموبىلىدىن 181 ى ۋە 20 نەچچە خۇسۇسىي ئايروپىلانى ھەم ئۆزىنىڭ ئاۋىياتسىيە شىركىتى بار.

ئومان سۇلتانى قابۇس (قابوس بن سعيد آل سعيد‎‎)
 
بايلىقى: 12 مىليارد ياۋرو
 
   ئومان پادىشاھلىقى سەئۇدى ئەرەبىستان يېرىم ئارىلىنىڭ جەنۇبىغا جايلاشقان بولۇپ ، ئۇنىڭ بومبا ساقاللىق مۇستەبىت پادىشاھى نېفىتقا ئىگىدارچىلىق قىلىپلا قالماي ، يەنە دۇنيادىكى باشقا دۆلەتلەر بىلەن سودا قىلىدۇ . قابۇس مالىيە ئىشلىرىنى باشقۇرۇشقا بەك ئۇستا ، ئۇ مەبلەغنى ساياھەت ، بانكا ۋە بىر قىسىم چوڭ شىركەتلەرگە سالغان . ئۇنىڭ 22 مىڭ 500 پۇقراسىنىڭ كۆپى ‹‹ئىنجىل›› دا تەسۋىرلەنگەندىكىدەك ئىپتىدائىي ھالەتتە ياشاۋاتىدۇ . ئۇ كىلاسسىك مۇزىكىلارنى ياخشى كۆرگەچكە ، بىر خۇسۇسىي مۇزىكا زالى سالدۇرغان.

قاتار ئەمىرى ھاماد (Sheikh Hamad Bin Khalifa Al-thani)
بايلىقى: 11 مىليارد ياۋرو
 
   بۇ دۆلەتنىڭ يەر كۆلىمى گېرمانىيەنىڭ تۇرىنگېر ئۆلكىسىدىنمۇ بەك كىچىك بولۇپ ، نوپۇسى بىر مىليونغىمۇ يەتمەيدۇ ، لېكىن نېفىت بۇ دۆلەتنىڭ ھۆكۈمرانلىرىنى باي قىلىۋەتكەن . باشقا كىچىك دۆلەتلەرنىڭ پادىشاھلىرىغا ئوخشاش ھامادمۇ شان - شۆھرەتكە ئامراق : ئۇ قاتارنىڭ خەلقئارادىكى شۆھرىتىنى ئاشۇرۇشنى ئۈمىد قىلىدۇ. شۇڭا ئىزچىل تۈردە تېننىس توپ مۇسابىقىسى ، گولف توپ مۇسابىقىسى ، ئاپتوموبىل مۇسابىقىسى ۋە كېمە ھەيدەش مۇسابىقىلىرىنى تەسىس قىلىپ ، ئۇتقانلارنى يۇقىرى سوممىلىق مۇكاپات بىلەن مۇكاپاتلاۋاتىدۇ .

كۇۋەيت ئەمىرى جابىر (Jabir)
بايلىقى: 10 مىليارد ياۋرو
 
   سادام كۇۋەيتكە تاجاۋۇز قىلىپ كىرىپ ، جابىرنىڭ مۈلۈك گۇرۇپپىسىنى بۇزۇۋەتتى: ئىراقلىقلار ئۇنىڭ دۆلەت خەزىنىسى ۋە بانكا ئامانەت پۇلىنى بۇلاپ ، قاق سەنەم قىلىپ قويدى . بىراق ، سەئۇدى ئەرەبىستانى ۋە بەھرەيىنگە ئوخشاش ، جابىرمۇ خۇددى جەمەتىنىڭ شىركىتىنى باشقۇرغاندەك نېفىت ئۈستىدە لەيلەپ تۇرغان بۇ قۇملۇق دۆلىتىنى باشقۇرۇۋاتىدۇ . ئۇ پايدىسى كۆپ سودىنى كونترول قىلىدۇ ، چەت ئەل شىركەتلىرى ۋە ئاكسىيە بازارلىرىغا كۆپ مىقداردا مەبلەغ سالغان ، دۇنيانىڭ ھەرقايسى جايلىرىدىن يەر سېتىۋالغان ، يەنە نۇرغۇنلىغان بانكىلاردا پېيى بار . قارىغاندا جابىر سادامنىڭ بۇلاڭ–تالىڭىدىن ئاللىقاچان قۇتۇلۇپ ، دەرمانىغا كەلگەندەك قىلىدۇ .

لۇكسېمبۇرگ كىنەزى ھېنرى (Henri)
بايلىقى: 5 مىليارد ياۋرو
 
   بۇ چوڭ كىنەز ھازىرقى بارلىق پادىشاھلار ئىچىدىكى ئەڭ تۆۋەن مۆلچەرلىنىپ قالغانلارنىڭ بىرى . ئەمەلىيەتتە ، ئۇنىڭ جەمەتى لۇكسېمبۇرگ زېمىنىنىڭ يېرىمىنى ئىگىلەپ بولدى ، ئۇ بانكا ۋە كانلارغا پاي قوشقان بولۇپ ، بىر تالاي پايچېكىگە ئىگە بولغان ، نۇرغۇنلىغان خەلقئارالىق چوڭ شىركەتلەرگىمۇ مەبلەغ سالغان . ئەلۋەتتە ، ئۇ باجدىن قاچقىلى بولىدىغان بۇ جەننەتكە جەلپ قىلغان چەت ئەل مەبلىغىدىنمۇ كۆپ پايدىغا ئېرىشكەن .

ئەنگىلىيە ئايال پادىشاھى ئېلىزابت Elizabeth) II)
بايلىقى: 4 مىليارد ياۋرو
 
   ئۇ كىشىلەر ئويلىغاندەك ئۇنچە باي ئەمەس ، ئەگەر سەللا بىخەستەلىك قىلسا ، ‹‹خاررى پوتتېر›› نىڭ ئاپتورى J.K. Rowling ئۇنىڭدىن ئېشىپ كېتىدۇ . بىراق ، ئۇنىڭ نىمىلا بولسۇن يەنە ئالتە ئوردا–سارىيى بار ، يىغىپ ساقلىغان سەنئەت ئەسەرلىرى ۋە پوچتا ماركىلىرىنىڭ قىممىتى بىباھا بولۇپ ، ھېچكىم ئۇنىڭ بىلەن بەسلىشەلمەيدۇ . ئۇنىڭ يەنە ئۈنچە– مەرۋايىتلىرى ، كەڭ يەر–زېمىنى ۋە 100 مىليون ياۋرو قىممىتىدىكى پېيى بار . پۈتۈن خان جەمەتى ئىچىدە ، ئۇنىڭ ئەۋلادلىرى ئەڭ كۆپ ، بۇمۇ ئۇنىڭ بايلىقى.

ماراكەش پادىشاھى مۇھەممەد Sidi Mohammed) VI)
بايلىقى: 3 مىليارد ياۋرو
 
   ئۇنىڭ پادىشاھلىقى بۇ دۆلەتكە ھۆكۈمرانلىق قىلىۋاتقىلى ئۈچ ئەسىر بولغان بولۇپ ، بەزىدە ئىنتايىن مۇتلەق ھاكىمىيەتكە ئايلىنىپ قالغان . ماراكەش خان جەمەتىنىڭ ئون نەچچە ھەشەمەتلىك ئوردىسى بار ، ئوردىنىڭ ۋەزىرلىرى خۇددى ‹‹ مىڭ بىر كېچە›› دە تەسۋىرلەنگەنگە ئوخشاش شۇنداق كۆپ . ماراكەش خان جەمەتىنىڭ فىرانسىيە ، ئىسپانىيە ۋە ئامېرىكىلاردا يەر– زېمىنى بار.

بەھرەيىن ئەمىرى ھاماد (Sheikh Hamad Bin Isa al-Khalifa)
بايلىقى: 2 مىليارد 500 مىليون ياۋرو
 
   بۇ ‹‹ھۆكۈمران›› نېفىت ۋە كۆپلىگەن سانائەت كارخانىلىرىغا ئىگىدارچىلىق قىلىدۇ . ئۇنىڭ ئۈستىگە بۇ دۆلەتنىڭ ساياھەتچىلىكى تەرەققىي قىلغان بولۇپ ، پايدىسى بەك كۆپ . ھاماد بەھرەيىننىڭ مۇستەبىت پادىشاھى، دۆلەت ئۇنىڭ جەمەتىدىن قالغان مىراسى . بەھرەيىن پارلامېنت ۋە سىياسىي پارتىيە مەۋجۇت بولمىغان بىر مۇستەبىت دۆلەت بولۇپ، بارلىق ئىشلار ھامادنىڭ ئىجازىتى بىلەن ئېلىپ بېرىلىدۇ. ئۇ شەخسەن ئۆزى نۇرغۇنلىغان خەلقئارالىق چوڭ شىركەتلەرگە پاي قوشقان، ئەنگىلىيە ، ئامېرىكا ۋە ئەرەب دۆلەتلىرىدىن يەر–زېمىن سېتىۋالغان ، بىر تالاي پېيى بار . بۇنىڭدىن باشقا ، ئۇنىڭ قولىدا يەنە روناق تاپقان ئىمپورت–ئېكىسپورت سودىسى بار.

ليېچتېنستېين كىنەزى خانس ئادام Hans - Adam) II)
بايلىقى: 2 مىليارد 500 مىليون ياۋرو
 
   بۇ ۋارسلىق ھوقۇقىغا تايىنىپ ئەمەس ، بەلكى سېتىۋېلىش ئارقىلىق بۇ دۆلەتكە ئېرىشكەن دۇنيادىكى بىردىنبىر خاندانلىق. كىنەز ھانس ئادام II باجدىن قاچقىلى بولىدىغان بۇ جەننەتكە يالغۇز دېگۈدەك ھۆكۈمرانلىق قىلىۋاتىدۇ. ئۇ كۆپلىگەن پايدىسى كۆپ سودىلارغا قاتناشقان ، ساقلىغان سەنئەت بۇيۇملىرىنىڭ كۆپلىكى بىلەن دۇنيادا ئالدىنقى قاتاردا تۇرىدۇ . ئۇ ئاۋستىرىيە ، شىۋېتسارىيە ۋە چېخلاردىن كۆپلەپ يەر–زېمىن سېتىۋالغان ھەمدە ئۆز ئائىلىسىنىڭ بانكىسىدىكى نەچچە يۈز مىليون ياۋروغا ۋارسلىق قىلغان ، ئۇ نۇرغۇن پاي سېتىۋالغان ھەمدە نۇرغۇن كارخانىلارغا پاي قوشقان .