ئادىلجان ئابدۇرېھىم: ئىشق رىۋايەتلىرى

ئادىلجان

	ئىشق رىۋايەتلىرى ئادىلجان ئابدۇرېھىم ئاشىق بايان دىلبىرىم، ۋەسلىڭگە ھېچكىم مەن كەبى مايىل ئەمەس، جاننى ئۈزدۈڭ تەن شېخىدىن ،سەن لېكىن قاتىل ئەمەس. چاڭقىدى باغرىمدىكى تاشتەك ئىشقنىڭ سۇلىرى، باقمىغىل ياتلارغا، سۆيگۈم زەررىچە باتىل ئەمەس. چايقىسا چۆللەر شەپەقنىڭ نازىنى تەشۋىش ئارا، ئارمىنى سۇنغان خىيالدا جۈپ تىلەك ھاسىل ئەمەس. سايىلەرنىڭ ئەينىكىدىن شارقىراپ ياغسا گۇمان، زەر قۇياش ئۈنگەن قەلبتە شۈبھىلەر پاسىل ئەمەس. تۈن چېچەكلەتكەن يىگانە يۈرىكىم ئايۋان ئېرۇر، بىر قونۇپ ئۆتمەككە زىنھار ئۆزگىلەر نائىل ئەمەس. چۈشلىرىم كۆيگەن سۈكۈتنىڭ تامچىسى ئالەمچە بار، مەن ۋىسالنىڭ داستىخانىغا نېچۈن داخىل ئەمەس؟ ئەي نىگارا، سەن كۆيۈكنى ئارمىغان قىلدىڭ ماڭا، قانغۇچە ئاقماي ئوتۇڭدا، بەلكى مەن ئادىل ئەمەس... بىر قىزغا تىز سىزما جان خۇمار شەھلا كۆزۈڭنى قاپقارا گۈلخان دېدىم، كىرپىكىڭنىڭ ھەر تېلىنى ياپيېشىل بوستان دېدىم. ھىدلىرىڭنىڭ شاخلىرىدا سايرىشار يورۇق شامال، لەۋلىرىڭنىڭ غۇنچىسىنى قېپقىزىل رەيھان دېدىم. كۈن نېمە، يۇلتۇز نېمە، سېھراتلىرىڭنىڭ ئالدىدا، يۈزلىرىڭنىڭ ئاپتىپىغا قاقلىنار ئاسمان دېدىم. ئىزلىرىڭنىڭ ئۇپقىنىدا نۇر چاچار رەڭدار شەپەق، قاشلىرىڭنىڭ ئارىسىدىن تۆكۈلەر داستان دېدىم. مەي بولۇپ پىشتى چېچىڭنىڭ دەشتىدە بىر تامچە جان، ھېسلىرىم ئاپئاق سۈكۈتتە ئەيلىدى غەليان دېدىم. چايقىلىپ ئاقتى ھاياجان ئەڭ گۈزەل يوقلۇق ئارا، يۈرىكىمنىڭ ياپرىقىدىن ئوقچۇدى ئارمان دېدىم. سۆزلىرىم ئاستى ئۆزىنى قاتمۇ-قات دارغا، نېتەي، بىر پىيالە دەردكە ئادىل چۆكتىلەر پىنھان دېدىم. يىراقتىكى يار ئىزلىگەيمەن يار سېنى باغرىمغا بىر ياقماق بولۇپ، تۆكۈلەر قەلبىمگە لەپ-لەپ ھېسلىرىڭ ياپراق بولۇپ. گۈلدىكى ھىدىڭنى ھىدلاپ يۈرىمەن مەجنۇنىۋار، تەنلىرىم يىغلاپ ئىزىمدا توزۇغاي توزغاق بولۇپ. سېغىنىشنىڭ ئوتلىرى ئاقسا ئىچىمگە تامچىلاپ، كۆزلىرىم ئۈزگەي يېشىمدا بىر يوچۇن قولۋاق بولۇپ. چاقىرىپ ئىسمىڭنى تىلسىز لەرزىگەن ئاۋازلىرىم، كىرپىكىڭنىڭ ئاسمىنىدا چېقىلار چاقماق بولۇپ. چۈشلىرىمنىڭ سايىسىدا لەۋلىرىڭگە لەۋ يېقىپ ، ئۇچىمەن چېھرىڭدە سەرسان بىر ئوچۇم تۇپراق بولۇپ. ئايدىكى ھۆسنۈڭنى كۆرمەي كۈندىكى جىلۋەڭنى ھەم، ھەسرىتىم كۆكلەر جېنىمدا ياپيېشىل يايلاق بولۇپ. ئەي نىگارا، كەل كۆڭۈل دەشتىمگە ۋەسلىڭ ياغدۇرۇپ، تەلمۈرەر يىراقتا ئادىل بىر ساڭا مۇشتاق بولۇپ... يارنىڭ رەسىمىگە كىرىش سىنچىلاپ باقسام ساڭا قەلبىمدە پىنھان، جانىمەي، رەسىمىڭ سۆزلەپ تۇرار تۇيغۇمدا ھەرئان، جانىمەي. كۆكتىكى قۇياشقا سەن، ياق، ئەسلىدە بىر تال خىيال، كىرپىكىڭگە چىرمىشىپ ئۇخلار ھاياجان، جانىمەي. چاچلىرىڭ سۇ، ئۇندىكى تەنھا قېيىقمەن بىقارار، كۆزلىرىڭدە ئولتۇرۇر بىر دەستە گۈلخان، جانىمەي. گۈل ئەمەسسەن، سۆزلىسەم سۆزلەر تىلىمدا يارىدار، ئاي دېسەم گەر مەن سېنى يىغلايدۇ ئاسمان، جانىمەي. لەۋلرىرىڭدە چايقىلار رەڭدار شەپەقنىڭ جىلۋىسى، يۈزلىرىڭنىڭ نۇرىنى ھىدلايدۇ رەيھان، جانىمەي. قاشلىرىڭنىڭ بەرگىدىن ئۇچسا مۇھەببەت تاشقىنى، يۈرىكىمدە سېغىنىش ئۆسكەي باراقسان، جانىمەي. مەن سېنى كۆرمەك بولۇپ يۇمدۇم كۆزۈمنى، ئەي گۈزەل، يوقلۇقىڭ بەرگەي ھامان ئادىلغا ھىجران، جانىمەي. ئاھ ئۇرارمەن... «ئاھ ئۇرارمەن، ئاھ ئۇرارمەن، ئاھلىرىم تۇتقاي سېنى، كۆز يېشىم دەريا بولۇپ بېلىقلىرىم يۇتقاي سېنى.» ئاسسا ئاۋازىمنى دارغا لەۋلىرىڭنىڭ چاقمىقى، تۈندىكى قۇشنىڭ كۆزىدە ئاسمىنىم ئۇچقاي سېنى. ئايدا يوق، يۇلتۇزدا يوق كىرپىكلىرىڭنىڭ سۈلكىتى، يالتىراپ دەردىم قۇياشتا نۇرلىرى قۇچقاي سېنى. سۇلىرىڭنىڭ ئىسمىدا سۆزلەر پەرىشان تاشلىرىم، چايقىلىپ ئاققان ئوتۇمدا يۈرىكىم ئۇتقاي سېنى. تەنلىرىم سۇنسا قاراسلاپ كۆكتىكى گۈل بەرگىدە، ئۆرتىنىپ تۇپراقتا ئادىل لەرزىگە قوشقاي سېنى... يوشۇرۇن كۆيۈش ئوتۇڭدا ئۆرتىنىپ ئەي يار، دىلىم ئاتەشكە ئايلاندى، ئىشىقنىڭ بەھرىگە شۇڭغۇپ قېنىم ئۆركەشكە ئايلاندى. قۇياشمۇ ئېرىگەي شۇر-شۇر جامالىڭ ئاپتىپى بىرلە، خىيالىڭدا چۈشۈم تۇرماق، ئوڭۇم مەڭدەشكە ئايلاندى. ۋۇجۇدۇم كۆز بولۇپ پىنھان تۆكۆلدى سەندىكى يولغا، تىلىمنى يەلپۈسە سايەڭ، سۇئال ئۈندەشكە ئايلاندى. كۈتۈشنىڭ دەشتىدە جاندىن تۆكۈلدى تەنلىرىم لەپ-لەپ، غېرىبتۇرمەن، پەقەت يەكتا ئازاب دىلكەشكە ئايلاندى. پىراقىم شاخلىنىپ ئۈنسىز چېچىلدى كۆككە يۇلتۇزدەك ھىلالسىز تۈنلىرىم ئۆزرە يۈزۈڭ مەھۋەشكە ئايلاندى. ۋىسالنىڭ ئاسمىنى ياغسا ئېچىلغايمەن قىزىلگۈلدەك، سېنىڭسىز قەلبى ئادىلنىڭ تامامى غەشكە ئايلاندى. گۇمان ۋە ئارمان سېغىنسام كەلمىدىڭ دىلبەر، يۈرەككە لىق پىغان كەلدى، يولۇڭغا نۇر بولۇپ ئاقسام، ئازابلار مەن تامان كەلدى. جېنىمنى يەيدۇ تەنھالىق چېچىڭنىڭ تۈنلىرى ئىچرە، تۆكۈپ ئاھىمنى يۇلتۇزغا، تىلىمغا مىڭ بايان كەلدى. شامالنى كەشتىلەپ تەندە سەھەرگە يوللىسام مەكتۇپ، قۇياشتىن ساقىدى ئاسمان، چىرايىمغا تۇمان كەلدى. ئىچىمگە يۆلىنىپ ياتتىم تۆكۈلسە ئەسلىمەم سىم-سىم ، پىراقنى قىينىدى قەلبىم، كۆزۈمگە لەختە قان كەلدى. ھىدىڭنىڭ دارىغا گۈللەر ئېسىلغاي زارۇ-زار يىغلاپ، رەشىكنىڭ ئوتلىرى ئۆرتەپ، دىلىمغا كۆپ گۇمان كەلدى. كۈتۈشنىڭ خەتلىرى ئۈنسىز ئوقۇر ئادىلنى ۋاراقلاپ، يېنىمغا ئۈنمىسەڭ ئەمدى ئۆلۈمدىن بىر نىشان كەلدى. بىر قىزغا كۆيۈپ قېلىش تەرەببال بىر نىگاھ بىرلە ئەسىر بولدۇم ساڭا، ئەي قىز، ئوتۇڭ ياماشتى ئول جانغا، قىيا باقساڭ ماڭا، ئەي قىز. تاپالماستىن ساڭا تەسۋىر تىلىمدا يىغلىدى سۆزلەر، ئىشىقنىڭ زەۋقىدىن بۇدەم ۋۇجۇدۇم ئوت- لاۋا، ئەي قىز. لېۋىڭدە ئولتۇرۇپ غەمكىن چېچىڭدا لەڭ ئۇرۇپ ئاقتىم، جامالىڭ قىلدىلەر دىلنى پىراققا مۇپتىلا، ئەي قىز. چېچەكلەپ ئاھلىرىم تۈندە تۆكۈلدى كىرپىكىم بويلاپ، مۇھەببەت ئەيلىدى روھنى تېنىمدىن ئاھ، جۇدا، ئەي قىز. قېنىمدا چايقىلار يالقۇن، كۆڭۈل رەغدىم ساڭا تۇتقۇن، سېنىڭسىز كۇللىياتىمنى يۇتار تەھتىسارا، ئەي قىز. كۆزۈڭدە قاغجىراپ يۇلتۇز قۇشۇڭدا ئۇچتى ئاسمانىم، ۋىسالنىڭ بۇرجىنى كۆزلەپ يۈرەك بولدى يارا، ئەي قىز. تىلەپ ۋەسلىڭنى سۈبھىدە ئىگەمگە ئىلتىجا ئەتتىم، جاھان ئىچرە پەقەت سەندىن تاپار ئادىل داۋا، ئەي قىز! ئىشق شەرھى ئىشىق ئۈنگەن كۆڭۈللەردە قۇياشتەك نۇر-زىيا بولمىش، ئەزەلنىڭ ھۆكمى ئاشىققا كۆيۈپ ئۆتمەك راۋا بولمىش. ساداقەت بەھرىگە چۆككەن داۋام ئۆركەش ياساپ ئاققاي، ئەقىدە يۇلتۇزى ئۆڭسە چېچەك باغرى يارا بولمىش. دىدارغا قانسا جۈپ كۆزلەر زىمىستان كۈلگە ئايلانغاي، باھارنىڭ جىلۋىسى تامغان قەلبلەردە جۇلا بولمىش. بۇلاقلارنىڭ نىگاھىدىن باياۋان چاڭقىقى قانغاي، كۈلۈپ باقسا مەگەر جانان جىمى دەردكە داۋا بولمىش. سۇنۇق تۈندە مۇھەببەتنىڭ ئازابى جانغا سانجىلغاي، سەھەردە كىشنىگەن گۈلنىڭ شېخىدا كۈي-ناۋا بولمىش. قاناتى سۇنمىغان ئاشىق سۈزۈك ئاسماندا پەر قاققاي ، ۋاپاسى شاخلىغان دىلغا چىمەنلەر مەھلىيا بولمىش. پىراقلار تەكتىدە ئادىل نىگارنىڭ ۋەسلىنى تاپقاي، كۆيۈشنى ئىستىگەن ئويغاق يۈرەكلەردە سادا بولمىش... ( تارىم ژۇرنىلىنىڭ 2014-يىللىق 7-سانىدىن ئېلىندى)

udun

	غەزەلخاننىڭ مۇۋاپىقىيىتى دىللارنى سۆيۈندۈردى.ئادىلجاننىڭ مەغرۇرلانماي تىخىمۇ بەكرەك ئىزدىنىشگە تىلەكداشمەن.

yadikar

	دىللاردا قىيام بولۇپ،"تارىم" ئۆركەشلىرىدە تاۋلىنىپ چىققان "ئىشىق رىۋايەتلىرى"گە مەرھابا!

چوغدىل

	ئىسىل غەزەللەرگە مۇبارەك!

مىرزائايدىڭ

	شائىرنىڭ تىل ئىشلىتىش ماھارىتىگە ،پىكىردىكى مەنا چوڭقۇرلۇقىغا ئاپىرىن .

مىرزائايدىڭ

	شائىرنىڭ تىل ئىشلىتىش ماھارىتىگە ،پىكىردىكى مەنا چوڭقۇرلۇقىغا ئاپىرىن .

dohturbiz

	رىۋايەتلەر بىر-بىرىدىن ياخشى چىقىپتۇ مۇبارەك بولسۇن