ئادىل تۇنىياز كىم؟

yadikar

ئادىل تۇنىياز كىم؟

1

ئادىل تۇنىياز قاغىلىقتا تۇغۇلغان، رايونىمىزنىڭ مەركىزىي شەھىرىدە رادىئو ئىستانسىسىدا خىزمەت قىلىدۇ. ئادىل تۇنىياز ھەققىدە بىلىدىغىنىم بارى-يوقى مۇشۇنچىلىك.
ئادىل تۇنىياز يانفون ئىشلەتمەيدۇ. چۈنكى، ئۇنىڭ بىزدەك سائەتلەپ پاراڭلىشىدىغان ۋاقتى يوق. بىز بىراۋلار بىلەن قۇرۇقتىن-قۇرۇق تېلېفون سۆھبىتى قۇرۇۋاتقان چاغدا، شائىر تىنىمسىز ئىلمىي ئەمگەككە بەند ھالەتتە بولىدۇ.
شائىرنى ئىزدىسىڭىزلا تاپالمايسىز. چۈنكى، ئۇنىڭ ئۆزىگە خاس دۇنياسى بار. ئۇ ۋاقتىنى ئەھمىيەتلىك ئۆتكۈزۈشكە كۆنگەن.
ئۇنى ھاراق سورۇنىدىن، ئايىقى چىقماس مېھماندارچىلىقتىن تاپالمايسىز. چۈنكى، ئۇنىڭ ئۆزىگە خاس روھىيىتى، ئۆز ئېتىقادى بار. ئادىمىيلىك، شەرم-ھايا، ئېتىقاد سۇسلۇقى ھۆكۈم سۈرۈۋاتقان زامانىمىزدا، ئۇ ئېتىقادلىق شائىر سالاھىيىتىدە، مۆھتەرەم مۇھەممەد سالىھ ھاجىمنىڭ كۈيئوغلى سالاھىيىتىدە، تېخىمۇ توغرىسى چىن ئىنسان سالاھىيىتىدە ياشاپ كېلىۋاتىدۇ.
شائىر ئالدىنقى ئەسىرنىڭ 80-يىللىرىدا باشلانغان «يېڭىچە شېئىر» ھادىسىسىنىڭ سەركىلىرىنىڭ بىرى بولۇش سۈپىتى بىلەن، بۈگۈنگە قەدەر ئۆزىنى بۇلغىماي كەلدى. «تالانتلىق شائىر»، «داڭلىق شائىر» دېگەندەك ئەسلى نامنى غۇۋالاشتۇرىدىغان سۈنئىي ئېنىقلىما نامدا ئەمەس، «شائىر-چىن ئىنسان» نامىنى جۇلالاندۇرۇپ ياشاپ كەلدى.

2

ئادىل تۇنىياز بىلەن ئىككى يىلدەك بىر مەھەللىدە ئولتۇرۇپتىمەن. ئۇ كىشىنى ھەر كۈنى دېگۈدەك ئۇچرىتىپ كەلدىم. سەھەردە ئىشقا ماڭىمەن، ئۇ كىشى قولتۇقىغا كىتاب قىستۇرۇپ، بىر نەرسىلەرنى يادلىغاچ يۈگۈرۈپ كېلىۋاتقان ھالەتتە ئۇچرايدۇ. بېشىمىزنى لىڭشىتىپ سالاملىشىمىز، ئۆتۈپ كېتىمىز.
مۇشۇ تەرىقىدە ئىككى يىلنى ئۆتكۈزدۈق. شائىرنىڭ بۇ ئادىتى ئۆزگىرىپ باقمىدى.
يېڭى ئۆيۈمگە كۆچكىلى بىر ئايدىن ئاشتى. بۇ جەرياندا يەنە ئوخشاشلا ئىشقا بېرىپ-كېلىپ ياشاۋاتىمەن. لېكىن، يولۇمدا بىر نەرسە كەم. نېمە كەمدۇ؟
ئەسلىدە، مەن ئادىل تۇنىيازنىڭ ئالدىمغا ئۇچرىشىغا، كۈلۈمسىرەپ تۇرۇپ سالام بېرىشىگە كۆنۈپ كېتىپتىمەن. ئىككى يىلدىن بېرى شائىرنىڭ يۈگۈرگەچ بىر نەرسە يادلىشى تۇرمۇشۇمنىڭ بىر قىسمىغا ئايلىنىپ كەتكەنىكەن.
شۇ چاغلاردا دىققەت قىلمىغانىكەنمەن، بۈگۈن ئويلاپ قالدىم: شائىر نېمە يادلاۋاتقاندۇ؟!
مەنبە:قىسمەت بلوگى.قىسمەت يازمىسى