مەن بۇ يازمىنى كۆرمەي، تۆۋەندىكى پىكىرلىرىمنى ئايرىم تىما قىلىپ يوللاپ ساپتىمەن ئەمەسمۇ.
ئەسسالامۇ ئەلەيكۇم ھۆرمەتلىك ئەزىزلەر.
مەن تەڭرى تاغ تورىنىڭ ناھايىتى كونا ئوقۇرمىنى، مۇنبەر قۇرۇلۇشتىن بۇرۇنمۇ، توربەتنىڭ ULY نۇسخىسىدىكى خەۋەرلەرنى دايىم كۆرۈپ تۇراتتىم، تور تاقالغان مەزگىللەردە مېنىڭ دايىم كىرىدىغان ماكانىم بولغان ئىدى، پىكىر قالدۇرۇش سەھىپىسىگە مۇنبەر ئورنىدا كۆرۈپ ئانچە-مۇنچە پىكىرلەرنىمۇ يېزىپ تۇراتتىم، مۇنبەر قۇرۇلغاندا ھۆكۈمەت باشقۇرۇشىدىكى نوپۇزلۇق بىر مۇنبەرنىڭ بارلىققا كەلگەنلىكىدىن كۆپ خۇرسەن بولدۇم. مېنىڭ كۆرگەنلا توربېتىگە ئەزا بولىدىغان ئادىتىم بولمىغاچ، يېڭى قۇرۇلغان مۇنبەرلەرگە ئاسانلىقچە خەتلەتمەيتىم، ماۋۇ مۇنبەرگە دەرھال ئەزا بولدۇم، يازمىلارنى كۆرۈپ تۇردۇم، باشقۇرغۇچىلارنىڭ ھەرخىل قىيىنچىلىقلارنى يېڭىپ، مۇنبەرنى مۇمكىن قەدەر ئادەتتىكى ئاۋام خەلققە يېقىنلاشتۇرۇشقا خىلى تىرىشىۋاتقانلىقىنى سىزىپ تۇردۇم. بۇ مۇنبەرنى باشقۇرۇش ھەرقانداق مۇنبەرنى باشقۇرۇشتىن قىيىن بولىشى مۇمكىن، باشقا مۇنبەرلەردە خاتالىق كۆرۈلسە تاقاپ قويسا بولىدۇ، تاقاپ قويۇشمۇ تەس بولمىسا كېرەك، ھىچكىممۇ ئېغىز ئاچمايدۇ، سۈكۈت بىلەن ئۆتۈپ كىتىۋىرىمىز، ئەمما بۇ مۇنبەرنى تاقاپ قويسا بولمايدۇ، كىچىككىنا بىرەر خاتالىق سەۋەپلىك تاقاپ قويسا ھۆكۈمەتنىڭ ئوبرازىغا سەت تۇرىدۇ، شۇڭا باشقۇرغۇچىلار ناھايىتى زىل بولمىسا بولمايدۇ، يەنە بىر تەرەپتىن باشقۇرغۇچىلار سەل "قېلىن"راق، سەۋىرچانراق بولمىسىمۇ بولمايدۇ، ئىشنىڭ ئالدى-كەينىنى ئويلاپ، ئۆزىنى ۋە ئۆزگىنى ئايايدىغان تورداشلاردىن باشقا، قىززىققان، سەۋىرسىز تورداشلارمۇ ئاز ئەمەس، باشقۇرغۇچىلاردا كىچىككىنا ئىۋەن كۆرۈلدىمۇ بولدى، باشقۇرغۇچى بولغانغا تويغۇزۇپلا قويىدۇ. تېخىمۇ نازۇك يېرى، گەپنى بەك ئاچمىساممۇ، بىر ياقتىن يوتا قىستىدى، يەنە بىر ياقتىن سوتا دېگەندەك، قىسىنچىلىقلارمۇ ئاز ئەمەس. شۇڭا سىلەرنىڭ جاپايىڭلارنى بىلگەنلىكىم ئۈچۈن، باشقا توربەتلەرگە قويغان تەلەپ- پىكىرلەرنى بۇ يەردە دېمەيمەن، ئەمما دېمىسەم بولمايدىغان بىرقانچە پىكىرىم بارتى بۇ يەردە ئوتتۇرىغا قويۇپ ئۆتسەم:
1- مۇنبەردە تىما تەستىقلاشتا تېخىمۇ ئەستايىدىل بولۇنسا، تەستىقلانغان تىمىلار كۆز قاراش سەۋەپلىك ھەرقانداق ئەھۋالدا ئۆچۈرۈلمىسە. بۇنداق ئەھۋالغا ئىتىبار قىلىنمىسا ھۆكۈمەت توربېتى بىلەن ئادەتتىكى تور بەتنىڭ پەرقى بولماي قالىدىكەن.
2- خەنزۇچە توربەتلەردە ناھىيە دەرىجىلىكتىن تارتىپ، ئاپتونۇم رايۇن دەرىجىلىككىچە رەھبەرلەرنىڭ مەخسۇس خەت ساندۇقى بار بولۇپ، خەلقنىڭ ھەرخىل ھال-ئەھۋالى بىۋاستە يوللۇنۇپ، يوللانغان ئەھۋاللار تەكشۈرۈلۈپ، ۋاقتىدا بىر تەرەپ قىلىنىپ، كەڭ خەلق ئاممىسنى خوشال قىلىۋاتىدۇ، ئەمما ئۇيغۇرچە تىل، يېزىقتا ئەھۋال يوللايدىغان خەت ساندۇقلىرى بولمىغاچ، قىيىنچىلىققا، ناھاقچىلىققا ئۇچرىغان ئاممىنىڭ دەرت - ئەھۋالىنى ئاڭلايدىغان دادخاھ ئىزدەپ، نەچچە مىڭ كېلومېتىر يولنى بېسىپ، ئاپتونۇم رايۇن مەركىزى ئۈرۈمچىگە ھەتتا بېيجىڭغىچە بارىدىغان ئەھۋاللار كۆرۈلىۋاتىدۇ، يول كىراسى ۋە باشقا ئىمكانىيەتلەرگە چىقىش قىلالمىغانلىرى بۇنداقمۇ قىلالماي، دەردىنى ئىچىگە يۇتۇپ، سەرەڭگە يېقىلسىلا ئوت ئالىدىغان، بىنزىن چېچىلغان ئوتۇنغا ئوخشاپ قىلىۋاتىدۇ. شۇڭا مۇشۇ مۇنبەردە بىر خەت ساندۇقى تەسىس قىلىنغان بولسا، تۆۋەندىكى قانۇنسىز، بىوكىراتلارنىڭ قىلمىشى سەۋەپلىك، خەلق ھۆكۈمەتتىن ئۈمىتسىزلىنىپ كەتمەي، مۇشۇ يول ئارقىلىق بولسىمۇ ئۆزىنىڭ دەرت ئەھۋالىنى يەتكۈزەلەيدىغان بولسا.
3- قانۇن-سىياسەتكە خىلاپ بولمىغان، باشقا مىللەتلەرنى كەمسىتىش خاراكتىرىدە بولمىغان، بەلكى ئىناق جەمىيەت بەرپا قىلىشقا پايدىلىق بولغان، قىسمەن ئەمەلدارلارنىڭ قانۇن-سىياسەتكە خىلاپ چىقارغان قارارلىرىغا قارىتا ئىلمىي يول بىلەن نارازىلىق بىلدۈرۈلگەن سۆزلەرگە زىيادە سەزگۈرلۈك قىلىپ كەتمەي، مۇشۇ مۇنبەردە بولسىمۇ ھۆكۈمەت ئوبرازىغا داغ چۈشۈرىۋاتقان قانۇنسىز قىلمىشلارنى پاش قىلغىلى، دېگىلى بولىدىغان يورۇقلۇق بېرىلگەن بولسا.
4- ماۋۇ مۇنبەرنى مەن باشبەت قىلىۋالغان ئىدىم، يېقىندىن بىرى توربەتنى ئاچساملا، مېنىڭ ئىجازىتىمسىز ناخشا قويۇلۇپ كېتىپ، كەچلىرى تورغا چىققان چاغدا ئائىلەمدىكى ئۇخلاۋاتقان چوڭلارنى ئويغۇتىۋىتىپ، مېنى بىئارام قىلىپ قويدى، توربەتكە ناخشا ئورۇنلاشتۇرۇلغىنى ياخشى بولۇپتۇ، ئەمما ھەركىم ئۆزىنىڭ ئىختىيارىچە ئاڭلايدىغان قىلىپ تەڭشەپ قويۇلغان بولسا.
بۇ يازمىنى ئاخىرىدا Bidar-Qutlan تەھرىرلىگەن. ۋاقتى 2012-1-9 21:48 
يوللىغان ۋاقتى 2012-1-8 22:40:43
يوللىغان ۋاقتى 2012-1-9 00:51:32
