دۇنيا مەدەنىيەت مىراسى - لىجىياڭ قەدەمىي شەھىرى (سۈرەت)

haltakoqa

	دۇنيا مەدەنىيەت مىراسى - لىجياڭ قەدىمىي شەھىرى     لىجياڭ قەدىمىي شەھىرى جۇڭگونىڭ غەربىي جەنۇبىدىكى يۈننەن ئۆلكىسىنىڭ لىجياڭ ناشى ئاپتونوم ناھىيەسىگە جايلاشقان بولۇپ، سۇڭ سۇلالىسىنىڭ ئاخىرقى يىللىرى ياسالغان(مىلادى 13- ئەسىرنىڭ ئاخىرى). قەدىمىي شەھەر يۈننەن-گۈيجۇ ئېگىزلىكىگە جايلاشقان بولۇپ، دېڭىز يۈزىدىن ئېگىزلىكى 2400 مېتىرغا يېتىدۇ. پۈتۈن شەھەرنىڭ كۆلىمى 3.8 كۋادرات كىلومېتىر، ھازىرقى ئائىلىسى 6200، نوپۇسى 25 مىڭ، بۇنىڭ ئىچىدە ناشى مىللىتى كۆپ سانلىقنى ئىگىلەيدۇ.     1997- يىلى 12- ئايدا، لىجياڭ قەدىمىي شەھىرى دۇنيا مەدەنىيەت مىراسىغا مۇۋەپپەقىيەتلىك ئىلتىماس قىلىنىپ، جۇڭگونىڭ دۇنيا مەدەنىيەت مىراسلىرى قامۇسىدا تارىخىي مەدەنىيەتلىك شەھەر بولماسلىقتەك بوشلۇقنى تولدۇردى.      2003- يىلى 4- ئايدا، لىجياڭ ۋىلايىتى ئەمەلدىن قالدۇرۇلۇپ، لىجياڭ شەھىرى تەسىس قىلىندى ھەمدە ئەسلىدىكى لىجياڭ ناشى ئاپتونوم ناھىيەسى ھازىرقى لىجياڭ قەدىمىي شەھىرى بىلەن يۈلۇڭ ناشى ئاپتونوم ناھىيەسىگە ئايرىلدى.     لىجياڭ قەدىمىي شەھىرى 1996- يىلىدىكى قاتتىق يەر تەۋرەشتە پۈتۈنلەي بۇزغۇنچىلىققا ئۇچرىغان بولۇپ، ھۆكۈمەت 1 مىليارد 300 مىليون يۇەن مەبلەغ سېلىپ ئۆز ئورنىغا ئەسلىدىكى مەدەنىيەتكە ۋارىسلىق قىلغان ھالدا قايتا قۇرۇپ چىققان.     لىجياڭ قەدىمىي شەھىرى ئىلگىرى-كېيىن بولۇپ، جۇڭگو تۇنجى تۈركۈمدىكى ساياھەت ماركا شەھىرى، جۇڭگودىكى مۇنەۋۋەر ساياھەت شەھىرى، مەملىكەت بويىچە مەدەنىي مەنزىرە نۇقتىسى، جۇڭگودىكى تارىخىي مەدەنىيلىك مەشھۇر شەھەر، دۇنيا غەيرىي ماددىي مەدەنىيەت مىراس يۇرتى، دۇنيا تەبىئىي مىراس يۇرتى، دۇنيا مەدەنىيەت مىراسى ئورنى قاتارلىق ناملارغا ئېرىشتى.     لىجياڭ شەھىرى لىجىياڭ قەدىمىي شەھىرىنى قوغداش خىزمىتىنى كۈچەيتىش ئۈچۈن مەخسۇس قەدىمىي شەھەرنى قوغداش ئىدارىسى قۇرۇپ، 2003- يىلدىن باشلاپ 236 ئائىلىنىڭ ئەنئەنىۋى ئۆي قۇرۇلۇشىنى رېمونت قىلىپ ئەسلىگە كەلتۈرگەن، «ناشىلىقلار ئائىلىسى»، «مىللىي مەدەنىيەت ئالاھىدە كوچىسى» قاتارلىق تۈرلەرنى يولغا قويغان. لىجياڭ مەدەنىيەت تەتقىقات ئۇيۇشمىسى، لىجياڭ ناشى مەدەنىيتىنى تەتقىق قىلىش ئورنى قاتارلىقلارنى قۇرغان. ھەر يىلى قەدىمىي شەھەرنىڭ مۇھىت تازىلىقىنى ياخشىلاش ۋە ئوت ئۆچۈرۈش چىقىملىرى ئۈچۈن 10 مىليون يۇەن خەجلەيدىكەن.     بۇ شەھەردىكىلەر قەدىمىي شەھەرنى قوغداش خىزمىتىنى مەبلەغ كاپالىتىگە ئىگە قىلىش ئۈچۈن، لىجياڭ نوپۇسىدا بولمىغان ھەر قانداق كىشىلەرنىڭ لىجياڭ زېمىنىغا دەسسىگەن ھامان ھەر بىر ئادەم بىر قېتىمدا 80 يۇەندىن قەدىمىي شەھەرنى قوغداش ھەققى تاپشۇرۇشنى بەلگىلىگەن. 2003- يىلدىن ھازىرغىچە، مۇشۇ ئۇسۇلدا 700 مىليون يۇەن قەدىمىي شەھەرنى قوغداش ھەققى يىغىۋالغان.    يېقىندا مەن خىزمەت مۇناسىۋىتى بىلەن بۇ قەدىمىي شەھەرنى كۆرۈش، زىيارەت قىلىش، ئايلىنىش پۇرسىتىگە مۇيەسسەر بولدۇم ھەم تورداشلار بىلەن ئورتاق بەھر ئېلىش ئۈچۈن، لىجياڭ قەدىمىي شەھىرىنىڭ سۈرەتلىرىنى يوللاپ قويدۇم.    لىجياڭ شەھىرىنىڭ قەدىمىي شەھەرنى قوغداش، ئاسراش، ئۇنى ئىقتىسادىي بايلىققا ئايلاندۇرۇش تەجرىبىسى باشقا ئورۇنلارنىڭمۇ ئۆگىنىشىگە ئەرزىيدىكەن.    سۈرەتتە: لىجياڭ قەدىمىي شەھىرى كوچىلىرى                                              (خالتا كوچا فوتوسى) لىجياڭ قەدىمىي شەھەر كوچىلىرىدا تاشنى پارچىلاپ ياتقۇزغان كوچىلارنى، تاشتا ئېتىلگەن تاملارنى ماڭدامدا بىر كۆرگىلى بولىدىكەن، ئۇنىڭ ئۈستىگە بىزنىڭ شەھەردىكىدەك تاشقا «رەندە» سېلىپ تۈزلەپ سىلىقلاشتۇرمايدىغان، يۈزى قوتۇر بولسىمۇ يەنىلا شەھەرگە ماسلىشىپ، يول ماڭغان كىشىگە ھارغىلىق ھېس قىلدۇرمايدىكەن لىجياڭ قەدىمىي شەھەر كوچىسىدىكى ھەر بىر ئاممىنىڭ ئۆيى ھەم تۇرالغۇ، ھەم دۇكان، ھەم مېھمانخانا سۈپىتىدە لايىھەلەنگەن بولۇپ، شەھەر ئاممىسىنىڭ كىرىمىنى ئەڭ ئالدىنقى ئورۇنغا قويىدىكەن گەرچە قەدىمىي شەھەر بولسىمۇ ماڭدامدا بىر ھەر خىل گۈل-گىياھ، دەرەخلەرنى كۆرگىلى بولىدىكەن كوچىغا قارايدىغان ئۆيلىرىنى ئۆزى دۇكان ئاچقاندىن سىرت، باشقىلارغا ئىجارە بەرسىمۇ بولىدىكەن، بۇ سۈرەتتىكىسى بىر ئېغىزلىق ئۆيدە رەسىم سىزىش نۇقتىسى ئېچىپ، ھەم ناشى مىللىتىنىڭ مەدەنىيتىنى نامايەن قىلغاچ، يەنە بىر تەرەپتىن رەسىم سېتىپ كىرىم قىلىدىكەن قەدىمىي شەھەر كوچىلىرىدا يولدىن ئادىشىپ قالغانلارغا يول كۆرسىتىپ بېرىدىغان مەخسۇس ھەقسىز يول باشلىغۇچىلار باركەن كىچىككىنە بوشلۇقتىمۇ يېشىللىق بولىدىكەن بۇ ھەم ئۆي، ھەم چايخانا قەدىمىي شەھەر كوچىلىرىدا مەخسۇس ساياھەتچىلەر ئۈچۈن مۇلازىمەت قىلىدىغان كۈتۈۋېلىش ئۆيلىرى تەسىس قىلىنغان قەدىمىي شەھەر كوچىلىرىنى ئايلىنىپ ئاقىدىغان ئېرىقلار بار ئىكەن، لېكىن كېرەكسىز سۇ بۇ ئېرىقلارغا تۆكۈلمەيدىكەن كوچىنىڭ ھەر500 مېتىر ئارىلىقتا بىردىن ئاممىۋى ھاجەتخانا بار ئىكەن، ھاجەتخانىغا ھەق ئالمايدىكەن، لېكىن ئىچىدە قەغەز ھەقسىز تەمىنلىنىدىكەن، بۇ ھاجەتخانا بىزنىڭ يۇرتتىكى ئالىي دەرىجىلىك زىننەتلەنگەن تېز تاماقخانىلارنىڭ ئايرىمخانىلىرىدىنمۇ پاكىز ئىكەن، قاراڭ، بۇ ئىككى قەۋەتلىك ئاممىۋى ھاجەتخانىغا، ئەگەر ئىشىك بېشىغا ئاممىۋى ھاجەتخانا دېگەن خەت بولمىسا، بۇنى ھەرقانداق كىشى بىركىمنىڭ مېھمانخانىسى دەپ قالىدۇ قەدىمىي شەھەر رايونىدا يەر تەۋرەشتە ئامان قالغان كونا تاملار ساقلاپ قېلىنغان دۇكاندىكى ناشى قىزلىرى توقۇغان بۇيۇملار قەدىمىي شەھەر رايونىدا بىر كىچىك مەيدان بولۇپ، پېشقەدەم ناشى ئاياللىرىدىن تەشكىللەنگەن ھەقسىز ئويۇن قويۇش ئەترىتى توختىماي ناشى ئۇسۇلىنى ئويناپ تۇرىدىكەن، كىم ھېرىپ قالسا ئارقىغا چىقىپلا ئارام ئالىدىكەن، بەزىلىرى بالا-نەۋرىلىرىنى يۈدۈۋالغىنىچە ئوينايدىكەن، ئۇلارنى ھېچكىم تەشكىللىمىگەن ياكى ھەقمۇ بەرمەيدىكەن، ئۇلار بىر تەرەپتىن بەدەن چېنىقتۇرغاچ، بىر تەرەپتىن مىللىي مەدەنىيەتنى تەشۋىق قىلىدىكەن، ئىشى بولسا كەتسە بولىدىكەن، يەنە بىرى كېلىپ تۇرىدىكەن، قوشۇن ئۈزۈلۈپ قالمايدىكەن چەتئەللىك ساياھەتچىلەرمۇ ناشى ئۇسۇلىغا چۈشۈپتۇ شەھەر ئىچىدىن ئېقىپ ئۆتۈدىغان بۇ ئۆستەڭنىڭ سۈيى بەكمۇ سۈزۈك، تېخى قىپقىزىل ئالتۇن بېلىقلار ئۈزۈپ تۇرۇپتۇ، جاھاننىڭ چېتىدىكى بۇ ناشى مىللىتىنىڭ ئېڭى خېلى يۇقىرىكەن، بىرمۇ ئادەم بۇ بېلىقلارنى تۇتمايدىكەن قەدىمىي شەھەردىكى مۇزىكىلىق ئاشخانا، چايخانا، كىتابخانا بۇ يەردىكى كىشىلەرمۇ خۇراپاتلىققا ئىشىنىدىكەن، شەھەر مەركىزىدىكى بۇ پېشايۋانغا ئېسىلغان نۇرغۇن تاختىلار سىرتتىن كېلىپ ئۆزىگە بەخت تىلەپ ياكى ئۆز مۇرادىنى ھاسىل قىلىش ئۈچۈن دۇئا قىلىپ ئېسىپ قويغان تاختىلاركەن قەۋەت-قەۋەت كونا ئۆيلەر تاش ياتقۇزۇلغان كوچا شەھەر ئاممىسى ئىشىك ئالدىغا چىقىپلا تاماق ئېتىپ، قول ئىشىنى قىلىۋېرىدىكەن ياغاچ ئويما رەسىملەر ئاشخانا ناشى يېزىقى، ئۇلار ھەر بىر گەپنى خۇددى ھايۋاننىڭ رەسىمىدەك بىر نېمىدە يېزىپ ئىپادىلەيدىكەن دۇكاندا ئىجادىيەت قىلىش مېھمانخانا، ئىشىك ئالدىدىكى ئاۋۇ ۋېلسىپىت ئىجارىگە بېرىلىدىكەن، كونا شەھەر رايونىنى پىيادە ئايلىنىش تەس كەلگەنلەر ۋېلسىپىت ئىجارە ئېلىپ چۆرگىلەيدىكەن شەھەردىكى ئاھالىلەرنىڭ ئۆيى         (خالتا كوچا ساياھەت خاتىرىسىدىن، 2011- يىل 11- ئاي)

Barcelona

	ساياھەت ئۈچۈنلا يارالغان شەھەر ئوخشايدۇ . تاغ - دەريالارمەنزىرىسىنىمۇ بەك گۈزەل دەپ ئاڭلاپتىكەنمەن .

uyghun

	مەن بېرىپ ساياھەت قىلغاندەكلا بولدۇم رەھمەت.

sukut

	خالتاكوچا ئەپەندى ،فۇتۇگىرافلىقتاخېلە يتىشىپ قېپلاجۇمۇ، تارتقان رەسىملىرى ناھايىتى ئۇچۇق ،بەدىيلىك چىقىپتۇ

haltakoqa

	Barcelona يوللىغان ۋاقتى  2011-12-2 22:52 ساياھەت ئۈچۈنلا يارالغان شەھەر ئوخشايدۇ . تاغ - دەريالا ...   شۇنداق، بۇ شەھەر جۇڭگودىكى شۇنداقلا دۇنيادىكى كىشىلەر ئولتۇرۇشقا، ساياھەت قىلىشقا ئەڭ باپ كىلىدىغان شەھەر دەپ نام ئالغان. چۈنكى بۇ شەھەرنىڭ يىللىق تىمپىراتۇرسى ئەڭ يۇقىرى بولغاندا 29 گىرادۇس، ئەڭ تۆۋەن بولغاندا 0 گىرادۇس بولىدىكەن، ئاساسەن قىش ياز بىر ئىللىق سالقىن ھاۋا بولىدىكەن، شۇڭا ساياھەتچىلىكى بەك تەرەققى قىلغانكەن، ساياھەتچىلىك كىرىمى يىلىغا 14 مىليارت 400 مىليۇن يۇەن (2011- يىل 11- ئايدىكى سان) كىلىدىكەن

haltakoqa

	sukut يوللىغان ۋاقتى  2011-12-3 02:46 خالتاكوچا ئەپەندى ،فۇتۇگىرافلىقتاخېلە يتىشىپ قېپلاجۇ ...   ماختىغىنىڭىزغا رەھمەت، كەسپىي ھەۋەس خالاس، سەۋىيەدىن سۆز ئاچقىلى بولمايدۇ

haltakoqa

	uyghun يوللىغان ۋاقتى  2011-12-2 23:08 مەن بېرىپ ساياھەت قىلغاندەكلا بولدۇم رەھمەت.    رەھمەت، دوستلارنىڭ سۈرەتلەرنى كۆرۈپ بىردەم بولسىمۇ ھاردۇقى چىققان بولسا مەن شۇنىڭدىن خوش

haltakoqa

	sukut يوللىغان ۋاقتى  2011-12-3 02:46 خالتاكوچا ئەپەندى ،فۇتۇگىرافلىقتاخېلە يتىشىپ قېپلاجۇ ...   بۇ ئادەتتىكى «ئەخمەق» ئاپاراتتا تارتىلغان سۈرەت، شۇڭا بەزى نۇقتىلارنى يەنىلا فوتوگىرافىيە نۇقتىسىدىن ئىپادىلىگىلى بولمىدى

sarsanroh

	ھەقىقەتەن گۈزەل شەھەركەن خالتا كوچا ئەپەندى بۇ سۈرەتلەردە سىلى كۆرۈنمەيلىغۇ

haltakoqa

	sarsanroh يوللىغان ۋاقتى  2011-12-3 12:56 ھەقىقەتەن گۈزەل شەھەركەن خالتا كوچا ئەپەندى بۇ سۈرەتل ...    شۇنداق، ئۆزگىچە مەدەنىيەتلىك شەھەركەن، لىكىن يەنىلا قەشقەر شەھىرىگە تەڭ قىلمىدىم جۇمۇ، ئۆزۈمنىمۇ سۈرەتكە تارتاي دىگەن، شۇ ئاپاراتنى ھەرقاچە توغرىلىساممۇ پەقەت چىقماپتىمەن دىسىلە