ئوغلۇمنى ساڭا تاپشۇردۇم!

zamzam

	ئوغلۇمنى ساڭا تاپشۇردۇم    ئوقۇش باشلانغان كۈنى ئوغلۇمنى مەكتەپكە ئاپىرىپ قويدۇم. ئوغلۇم بۇدرۇق قوللىرىنى پۇلاڭلاتقىنىچە ماڭا خوش ئېيتىپ، مەكتەپ دەرۋازىسىدىن كىرىپ كەتتى. مەندىن يىراقلاپ، ئۆزىدىنمۇ يوغان سومكا ئېسىشقان بالىلار توپىغا قوشۇلۇپ كېتىۋاتقان بالامغا قاراپ، نىمىشقىدۇر كاللامنى گادىرماچ خىياللار ئوراپ، يۈرۈكۈم بىرخىل تەشۋىش بىلەن ئۆرتەندى. ھەر بىر قەۋىتىگە بىرەر مىڭ ئوقۇغۇچىنى قاچىلاپ مەغرۇر تۇرغان ھەيۋەتلىك ئوقۇتۇش بىناسىغا قاراپ كۆڭلۈمدە ئۇنىڭغا نىدا قىلدىم:    ئوغلۇم ئۇ- مېنىڭ يۈرەك پارەم، ئۇيغۇرنىڭ پۇشتى. ئۇ بۇ دۇنياغا كۆز ئېچىپلا خوشاللىقتىن بېشى ئاسمانغا يەتكەن دادىسىنى،  ئاللاھ ئاتا قىلغان بۇ سوۋغاتقا چوڭقۇ مىھرى بىلەن  قاراپ تۇرغان ئانىسىنى كۆردى. ئۇ تولىمۇ ئىناق ھەم ئىللىق ئائىلە مۇھىتىدا تولىمۇ خۇش تەبىئەتلىك- ئاقكۆڭۈل ئۆسۈپ يېتىلدى. ئۇنىڭ جىسمى، ئۇنىڭ قەلبى زەررىچە چاڭ-توزان، مەينەتچىلىكتىن خالى.    بۈگۈندىن ئېتىۋارەن مەن ئۇنى ئۆز قولۇم بىلەن ساڭا، سېنىڭ تەربىيلىشىڭگە تاپشۇردۇم. ئۇ سەندە مۇشۇ مۇھىىتتا تۇغۇلغان ھەر بىر ئادەم ئۆگىنىشكە تېگىشلىك بىلىملەرنى ئۆگەنمەكچى؛ سېنىڭ قوينۇڭدا ئادەم بولۇش قائىدىلىرىنى ئۆگەنمەكچى. ئۇ نۇرغۇن ئۈمىد-ئىستەك، گۈزەل ئەتىگە بولغان ئارزۇ-ئارمانلار بىلەن پۈتكەن كىرىسز- ئاپپاق قەغەز. سەن ئۇنى ئۆزەڭنىڭ مول مەزمونلىرىڭ بىلەن تولدۇرىسەن.     ئاللاھ خالىسا ئۇنىڭ ئون نەچچە يىللىق ئوقۇش ھاياتى ئاخىرلاشقان كۈنى مەن ئۇنى سەندىن تاپشۇرۇپ ئېلىۋالىمەن. شۇنى بەكمۇ بىلگۈم كېلىدۇ:  شۇ چاغدا ئۇ سېنىڭ دەرۋازاڭدىن بۈگۈنكىدەك بەختىيارلىق تۇيغۇسى بىلەن مېڭىپ چىقالارمۇ؟ بىر ماقالىدە <ئوغۇل بەدئەخلاق بولسا ، جەمئىيەتنىڭ شۇ ئوغۇلنىڭ دادىسىدىن «جەمئىيەتكە بولغان مەجبۇرىيىتىڭنى نېمىشقا ياخشى ئادا قىلمىدىڭ؟» دەپ سوراق ئېلىش ھەققى بار > دەپ كۆرگىنىم ئېسىمدە. ئەمدى نۇرغۇن بىلىملەر قاتارىدا كىشىلىك ئالاقە، ئادىمىلىك يوللىرىنى ئۆگىنىش ئۈچۈن زور ئۈمىدلەردە بوسۇقىڭغا قەدەم  قويغان بۇ ساپ نوتىنى ناۋادا ئۈمىدسىز قويساڭ،  ناۋادا ئۇنىڭغا بوۋامنىڭ بوۋىسى ئېيتقان ناخشىلارنى ئۆز پېتى يەتكۈزەلمىسەڭ،  ناۋادا ئۇنىڭغا زەئىپ مەنىۋىيەت ھەدىيە قىلساڭ، ناۋادا ئۇنىڭ تومۇرىدىكى ئېقىۋاتقان ساپ قان ئەبجەشلىشىپ كەتسە، ناۋادا... ئۇ چاغدا سەن ماڭا جاۋاب بېرىشكە پېتىنالامسەن؟ سەن مېنىڭ كۆزۈمگە تىكىلىپ قارىيالامسەن؟    ئويلىغانلىرىم تولىمۇ كۆپ، دەيدىغانلىرىم تۈگەيدىغاندەك ئەمەس. ئوغلۇمنى ئاۋال ئاللاھقا، ئاندىن ساڭا تاپشۇردۇم! مېنى نائۈمىد قويمىساڭكەن دىگەن ئۈمىدىم بار...

wtajalli

	ھازىر ياخشى ئىش قىلمىسىمۇ يامان ئىش قىلمايدىغان ئادەمنى ياخشى دەيدىكەنمىز شۇنىڭدىن قارىغاندا سالىھلار ئاز بولسا كىرەك شۇنىڭ ئۈچۈن كەلگۈسىنىڭ ئېگىلىرىنى تەربىيلەشكە كۆڭۈل بۆلىشىمىز بەكمۇ زۈرۈر ؛

$$TupRak$$

	wtajalli يوللىغان ۋاقتى  2012-9-8 13:28 ھازىر ياخشى ئىش قىلمىسىمۇ يامان ئىش قىلمايدىغان ئادەم ... راس دەيسىز.

margimux

	ھازىر ياخشى ئىش قىلمىسىمۇ يامان ئىش قىلمايدىغان ئادەمنى ياخشى دەيدىكەنمىز.............راس گەپ زادى.