مىكرو پاراڭلار(5)(6)(7)

noshirwan

	مىكرو پاراڭلار(5) ▲ئاممىۋى بىلەن ئاغۋات دېگەننىڭ پەرقى بەك چوڭ. ئاغۋات دېگىنى ھەرەم ئاغىسى دېگەن شۇ. ئاغۋات زىيالىي دېگىنى ئەرلىكىنى كەستۈرۈپ ئوردىدا مۇلازىملىق قىلىدىغان ئەركەكلەرگە ئوخشاش زىيالىيلار شۇ، ئۇنداقلار ئاۋام-پۇقرا ئۈچۈن ھەققانىيەتنى ياقلىمايدۇ، خان-غوجاملارغا قەسىدە-مەدھىيە ئوقۇيدىغان بولسا ئۇلارنىڭ ماھارىتى ۋە روھىقا قاراپ، ھۆكۈمدارلار كۆزلىرىگە ئىشەنمەي، ئۆزلىرىنى تونۇيالماي قېلىشىدۇ. ئاغۋات زىيالىي دېگەن ئاتاق ئاممىۋى زىيالى ئۈچۈن ئەڭ چوڭ ھاقارەتتۇر.37 ▲ئەقىدىسىز ئادەملەر قانداق بولىدۇ؟ ئۇلاردا پىداكارلىق، دوستلۇق ۋە مۇھەببەت بولمايدۇ؛ رەھىمسىز، ياۋۇز، رەزىل، نەپسانىيەتچى، ھاياسىز، نومۇسسىز، خىيانەتكار بولىدۇ؛ نام-ئاتاق ئۈچۈن ھەرقانداق رەزىللىكنى قىلىدۇ؛ مال-دۇنيانى دەپ، قېرىندىشىغا، كىشىلەرنىڭ ئامانىتىگە خىيانەت قىلىدۇ؛ ئۆكتەم، مۇتتەھەم، زالىم، رەھىمسىز بولىدۇ؛ بىر-بىرىگە ئىشەنمەيدۇ، يالغانچى، مۇناپىق، تۇزكور، كۆڭلى قارا بولىدۇ؛ شەخسىيەتچى، گۇمانخور، ساتقىن-مۇناپىق بولىدۇ.38 ▲نورۇز-شادلىق بايرىمى، ئۆملۈك-ئىناقلىق، بىرلىك-ئىتتىپاقلىق، ئامانلىق ۋە ئەمگەك بايرىمى بولغاچقا، ئۇ خەلقىمىز ئارىسىدا ئەسىرلەردىن بېرى ئۆزىنىڭ خاسىيىتىنى يوقاتماي، خەلقىمىزنىڭ مەنىۋى بايلىقى سۈپىتىدە ئارزۇلىنىپ ھازىرغىچە داۋام قىلىپ كەلدى.39 ▲تۇغۇلۇش ۋە ئۆلۈش بىزنىڭ مەيلىمىز ئەمەس. ئەمما، ياشاش، ياشىغاندىمۇ قانداق ياشاش بىزگە باغلىق، ھاياتنىڭ خۇشاللىقى ۋە ئازابى، لەززىتى ۋە ھەسرىتى بار،  ئازاب بىلەن خۇشاللىق ھامان قوشكېزەك.40 ▲دۇنيا-بىر باغ، باغۋىنى-ئىنسان، ھايات-بىر يول، كارۋىنى-ئىنسان. دۇنيا-تىلسىم، ئاچقۇچى-ئىنسان، تەبىئەت-كۆز، قارچۇقى-ئىنسان.41 ▲ئىنسان-قۇياش، سۆيۈلەر ئالەم، ئىنسان-باھار، كۆكۈرەر دۇنيا. ئىنسان-غېرىپ، دۇنيا-بىر سەنەم، ئىنسان ئېيتار، ھايات، ئۇ-ناخشا.42 ▲چەكسىز دۇنيا، ئىنسان-ھەقىقەت، ھايات-دەريا، ئىنسان-بىر كېمە. ياشاش-سەنئەت، ئىنسان-پەزىلەت، دۇنيا-بىر باغ، ئىنسان، ئۇ-مېۋە.43 ▲خرۇششېف غەرب دۆلەتلىرىدىن بىرىنىڭ رەھبىرىنى كۈتىۋېلىشقا ئايرودرومغا چىققاندا تارتىلغان فوتو سۈرەتنى گېزىتتە ئېلان قىلىدىغان چاغدا، مۇناسىۋەتلىك خادىملار  «سوۋېت ئىتتىپاقىنىڭ دۆلەت رەھبىرى غەربلىكلەرگە قالپىقىنى قولىغا ئېلىپ تۇرۇپ تەزىم قىلغىنى نېمىسى؟» دەپتۇ. شۇنىڭ بىلەن سىياسىي ئابرۇينى نەزەردە تۇتۇپ، سۈرەت تەييارلىغۇچى خادىم خرۇششېفنىڭ بېشىغا بىر قالپاقنى سىزىپ قويۇپتۇ. شۇ سۈرەت ئەتىسى گېزىتكە چىققاندا، ئۇنى كۆرگەنلەرنىڭ ھەممىسى ھاڭ-تاڭ بولۇشۇپ قاپتۇ. قارىسا، خرۇششېفنىڭ بېشىدا بىر قالپاق، قولىدىمۇ بىر قالپاق تۇرغان!44 ▲بىر خادىم ئىدارىسىدىكى بەزىلەرنىڭ خىيانەت بىلەن، بەزى ئادەملەرنىڭ پارە بېرىش-ئېلىش بىلەن چېرىكلىشىپ كېتىۋاتقانلىقىنى كۆرۈپ، ئىدارە باشلىقىغا پاش قىلىپ خەت يازغان ئىكەن، ئىدارە باشلىقى ئۇنىڭ بىلەن ئايرىم سۆھبەتلىشىپ مۇنداق دەپتۇ: «تىل-يېزىق ساۋاتىڭىز تولىمۇ تۆۋەن ئىكەن. ئوبدان ئۆگىنىڭ. بۇنداق گەپ-سۆزلىرى باغلاشمىغان، پەش-چېكىتلىرى جايىغا قويۇلمىغان بىر نېمىلەرنى يېزىپ، رەھبەرلەرنىڭ ۋاقتىنى ھارام قىلماڭ. مانا قاراڭ، مانا بۇ ئۈچ ۋاراق خېتىڭىزدە بەش-ئالتە يەردە گەپ باغلاشماپتۇ، ئىملا توغرا ئەمەس، تىنىش بەلگىلىرىمۇ جايىغا قويۇلمىغان.»45 ئابلاجان تۇردىنىڭ مىكرو بلوگىدىن ئېلىندى http://barmu.cn/index.php?m=blog&uid=22

noshirwan

	مىكرو پاراڭلار(6) ▲بەزىلەر باشقىچە پىكىرلەرنى قوبۇل قىلالماي، بىر-بىرىنى تىللاشقا، شەخسىيىتىگە ھۇجۇم قىلىشقا چۈشۈپ كېتىدۇ، ھە دېگەندە قالپاق كىيدۈرۈشكە، ھېسسىياتىنى ھەقىقەتنىڭ ئورنىغا دەسسىتىكە ئۇرۇنىدۇ. بەزىلەر تەنقىت-تەكلىپلەرنى كەمتەرلىك بىلەن ئاڭلاش ئۇياقتا تۇرسۇن، ئەكسىچە، تۆھمەت قىلىشقا، ئەدىبىنى بېرىشكە ئۆتىدۇ، ھەتتا ئىمتىيازىدىن پايدىلىنىپ، باشقىچە سادا چىقارغانلارنى باسىدۇ. ئاۋام-پۇقرا كەڭ قورساق بولمىسا، گەپ-سۆزدە زوراۋان بولۇشى مۇمكىن، لېكىن، ھۆكۈمدارلار كەڭ قورساق بولمىسا، ھەقىقىي زىيان-زەخمەت پەيدا قىلالايدۇ.46 ▲تەنقىت توغرا بولىشىمۇ، خاتا بولۇشىمۇ مۇمكىن، چېكىدىن ئېشىپ كەتكەن پىكىرلەرمۇ بولۇشى مۇمكىن. لېكىن، ياخشى نىيەتتە بولغان بولسىلا، قانۇن-نىزاملارغا خىلاپلىق قىلمىغان بولسىلا، جامائەت مەنپەئىتىگە زىيان سالمىغان بولسىلا، چوقۇم كەڭ قورساق بولماق زۆرۈردۇر. «قارشى مۇقام توۋلىدى» دەۋېلىشقا بولمايدۇ. ئوخشاش بولمىغان سادا ۋە پىكىرلەرگە ھۆرمەت قىلىش ئاۋامنىڭ سۆز ئەركىنلىكىگە ھۆرمەت قىلغانلىق.47 ▲كۆكتاتچى دېھقان كۆكتاتلارغا دېھقانچىلىق دورىسى ئىشلىتىپ پۇل تاپىدىكەن؛ قۇرۇلۇش ھۆددىگىرى ماتىرىيالنىڭ ئەرزانراقىنى ئىشلىتىپ پۇل تاپىدىكەن؛ يېزا-كەنىت كادىرى يۇقىرىنى ئالداپ، تۆۋەننى بېسىپ، دىھقانلارنىڭ ھەققىنى يۇتىۋېلىپ پۇل تاپىدىكەن؛ پارىخور ئەمەلدار پارا ئېلىپ، خىيانەت قىلىپ، ئەمەل-مەنسەب سېتىپ پۇل تاپىدىكەن؛ دوختۇر قىزىل بولاق ئېلىپ پۇل تاپىدىكەن؛ مەكتەپ مۇدىرى ئوقۇتقۇچىلاردىن جەرىمانە ئېلىپ پۇل تاپىدىكەن؛ سۇ مېيى كارخانىسى ئەۋرەز مېيى سېتىپ پۇل تاپىدىكەن. ئىلىمگەر ھېيلىگەر، خوشامەتگۇي بولۇپ پۇل تاپىدىكەن.48 ▲يېڭى ۋەزىيەتتە، ھۆكۈمەت باشلامچىلىق بىلەن راست گەپ قىلىشى، راست گەپنى ئوڭلاپ قىلىشى كېرەك. «ھۆكۈمەت ئۇچۇرلىرىنى ئاشكارىلاش نىزامى» يولغا قويۇلغاندىن كېيىن، ئاشكارا-ئېنىق بولۇش ھەققىدىكى سادالار ئاساسى ئېقىمغا ئايلاندى. لېكىن، سۈپىتى تۆۋەن بولدى، مەسئۇلىيەتنى سۈرۈشتۈرۈش قاتتىق بولمىدى. قانداق قىلىپ تېخىمۇ ياخشى تۈزۈلمە مۇھىتى ھازىرلاپ، ئاممىغا تېخىمۇ چىن بولغان ئۇچۇرلارنى ئاشكارىلاش، ئاۋامنىڭ راست گەپ قىلىشىغا تېخىمۇ كۆپ شارائىت يارىتىپ بېرىش ھۆكۈمەتنىڭ راست گەپ قىلىش ئىرادىسى ۋە ئىقتىدارىنى سىنىماقتا.49 ▲خرۇششېف بىر كۈنى رەسىم كۆرگەزمىسى كۆرۈۋېتىپ: «قانداق رەسىم بۇ؟ چىۋىننى رەڭگە چىلاپ قويۇپ بەرسەڭ ئۇنىڭدىن ئوبدان سىزىدۇ» دەپتۇ. كۆرگەزمىگە مەسئۇل كىشىمۇ بوش كەلمەي: «سىز تەسۋىرىي سەنئەت تەنقىدچىسى ئەمەس، تەسۋىرىي سەنئەتنىڭ ھېچنىمىسىنى بىلمەيدىكەنسىز!» دەپ گەپ ياندۇرۇپتۇ. خرۇششېف: «مەن كان ئىشچىسى بولغاندا بىلمەيتتىم؛ پارتىيىنىڭ تۆۋەن دەرىجىلىك ئەمەلدار بولۇپ تۇرغاندا بىلمەيتتىم؛ شوتىنىڭ ۋاخىنىلىرىدا تۇرغاندىمۇ بىلمەيتتىم. لېكىن مەن بۈگۈنكى كۈندە باش مىنىستىر مەن، پارتيىنىڭ داھىيىسىمەن، ئەمدى ئەلۋەتتە بىلىمەن، شۇنداق ئەمەسمۇ؟» دەپتۇ.50 ▲دادىسى ئەمەلدار بولسا، ئوغلىمۇ ئەمەلدار بولۇر، دادىسى چوڭ ئەمەل تۇتسا ئوغلىمۇ چوڭ ئەمەل تۇتۇر، دادىسىنىڭ ئەمىلى كىچىك بولسا، ئوغلى كىچىك ئەمەل تۇتۇر. دادىسى ئەمەل تۇتمىسىمۇ ئوغلى ئەمەل تۇتۇشنى ئويلىسا، مىڭلىغان-ئونمىڭلىغان ئادەملەر قوشۇنى ئەمەل كۆۋرۈكىگە قىتىلىۋالسا، بۇ ئەلۋەتتە ئىجتىمائىي ئىمتىيازنىڭ كۆپۈپ ئەۋجىگە چىققانلىقىنىڭ نەتىجىسىدۇر.51 ▲قانۇن تۈزگەندە بەزىلەر ئومۇمىي ھوقۇقنى كېڭەيتىش زۆرۈر بولغاندا، خەلقئارا قائىدىلەرنى نەقىل كەلتۈرۈپ سۆزلەپ كېتىدۇ. ئومۇمىي ھوقۇقنى چەكلەش گېپى بولسا، دۆلەت ئەھۋالىنى تىلغا ئېلىپ تۇرىۋالىدۇ. شۇنىڭ بىلەن، ئومۇمىي ھوقۇق داۋاملىق كېڭىيىدۇ، پۇقرالىق ھوقۇقى داۋاملىق قىسىلىدۇ. 52 ▲سوتنىڭ ۋەزىپىسى دەۋا ئۈستىدە ھۆكۈم-كېسىم قىلىشتىن ئىبارەت. دەۋالاشقۇچىلار ئوتتۇرىسىدا ماجىرا كۆرۈلۈپ، ئۆزلىرى كېلىشىم يولى بىلەن ھەل قىلالمىغان ئەھۋالدا ئاندىن سوتقا مۇراجىئەت قىلىدۇ، شۇندىلا سوت مەھكىمىسىنىڭ ئارىلىشىش زۆرۈرىيىتى تۇغۇلىدۇ. ئېغىر جىنايەتگە چېتىلمىغان ئەھۋالدا، دەۋالاشقۇچىلار ئۆزلىرى ھەل قىلالايدىغان تالاش-تارتىشلارغا ئەدلىيەنىڭ ئارىلىشىشى پۈتۈنلەي ئارتۇقچە ئىش بولۇپ، ئەدلىيە بايلىقىنى ئىسراپ قىلىپلا قالماي، دەۋالاشقۇچىلارنىمۇ نارازى قىلىشى مۇمكىن.53 ▲ئەدلىيە- جەمئىيەتتە مۇستەقىل مەۋجۇد بولۇپ تۇرىدىغان رېپىر بولۇپ، ھەرقانداق مۇئەييەن سىياسەتكە مايىل بولماي، پۇقرالار ئوتتۇرىسىدىكى ۋە ھۆكۈمەت بىلەن پۇقرالار ئوتتۇرىسىدىكى زىددىيەت ۋە توقۇنۇشنى بىر تەرەپ قىلىشقا مەسئۇل بولىدۇ. ئەدلىيە ھۆكۈمەتنىڭ تەركىۋى قىسمى بولۇپ قالسا ياكى ھۆكۈمەتنىڭ مەلۇم سىياسىتىنى قوللىغۇچى بولۇپ قالسا، ھۆكۈمەت بىلەن پۇقرالار ئوتتۇرىسىدىكى دەۋالار ئادىل بىر تەرەپ بولماي قالىدۇ.54

noshirwan

	مىكرو پاراڭلار(7) ▲ئەرز قىلىش ئاۋام-پۇقرانىڭ دېموكراتىك ھەق-ھوقۇقىدۇر، پارتىيە-ھۆكۈمەتنىڭ ئاۋام-پۇقرا بىلەن ئالاقە باغلاشتىكى كۆزنىكى ۋە بەلبېغىدۇر. ئەرز قىلىشتىن ئاۋام-پۇقرانىڭ پارتىيە-ھۆكۈمەتكە بولغان ئىشەنچى نامايان بولىدۇ. ئاساسىي قانۇندا: پۇقرالارنىڭ دۆلەت ئورگانلىرى ۋە دۆلەت خىزمەتچى خادىملىرى ئۈستىدىن شىكايەت قىلىش، ئەرز قىلىش، پاش قىلىش ھوقۇقى بار، دەپ بەلگىلەنگەن. پۇقرانىڭ ئەرز قىلىش ھوقۇقى قانۇن تەرىپىدىن قوغدىلىنىشى زۆرۈر.55 ▲موشۇ ئاي-موشۇ كۈنلەردە بەزىلەر ئەرزىيەتچىلەرنى جىن-ئالۋاستىدەك كۆرىدۇ، نۇرمال ئەرز قىلغۇچىنى جەمئىيەت تەرتىپىنى بۇزغۇچى، مۇقىمسىزلىق ئامىلى، چاتاقچى پۇقرا، دەپ قارايدۇ، مۇقىملىقنى ساقلاشنى باھانە قىلىپ، ئەرز قىلغان ئاۋام-پۇقراغا زەربە بېر ئۆچ ئېلىش، بېسىۋېتىش بىلەن مەسىلە ھەل بولمايدۇ.56 ▲ئارخىپنى ئۆزگەرتىش ئۇياقتا تۇرسۇن، خالىغانچە كۆرگىلى بولمايدۇ، لېكىن بەزىلەر ئۆزگەرتەلەيدىكەن. ئالىي مەكتەپنى پۈتتۈرۈپ، ئىمتىھانىدىن ئۆتەلمەي، مەمۇرلۇق چۈشى بەربات بولىۋاتقانلار ئاز ئەمەس، لېكىن، تولۇقسىز ئوتتۇرىنى پۈتتۈرگەن بەزىلەر دۆلەت مەمۇرى بولالايدىكەن.كادىرلارنى ئۆستۈرۈش تەرتىپلىرى بەك چىڭمىش، بەزىلەر شۇنداق ئۆتكەللەردىن توسالغۇسىز ئۆتۈپ كېتىدىكەن. مۇمكىن بولمايدىغان ئىشلارنى بەزىلەر مۆجىزىلەرچە قىلالايدىكەن. بۇنىڭدىكى سىر ھوقۇقنىڭ زىيادە مەركەزلىشىپ، نازارەتسىز قالغانلىقى، سودىغا ئايلىنىپ قالغانلىقىدىندۇر.57 ▲ب د ت نىڭ باش كاتىپى تورداشلار بىلەن توردا گوڭۇر-موڭۇر پاراڭ سېلىشتى، باش مېنىستىر ۋېن جيا باۋمۇ ھەر يىلى تورداشلار بىلەن سىردىشىپ تۇرىۋاتىدۇ. ھاكىمبەگ، ۋالىيبەگلىرىمىز بىلەن توردا پاراڭلىشىش ھازىرغىچە نېسىپ بولمىدى. ئۇلار شۇنچە ئالدىراشمىدۇ ياكى تور دېگەننى ئانچە چوڭ بىلىپ كەتمەمدىغاندۇ؟ ئالدىراش بولسا، ئاۋام-پۇقرانىڭ ئىشلىرىغا باش قاتۇرۇپ ئالدىراشمىكىن ياكى...58 ▲بەزىدە ئويلاپ قالىمەن: خەلقنىڭ ئوتىدا كۆيۈپ، سۈيىدە ئېقىپ، خەلق ئۈچۈن يۈرەك قېنىنى سەرىپ قىلغان ۋە قىلىۋاتقان ئەدىبلىرىمىز يوق ئەمەس، لېكىن، سانى بەك ئاز. ئەسەر يېزىش كىم ئۈچۈن، نېمە ئۈچۈن؟ راست گەپنى قىلغاندا، جانباقتىلىق يولىغا كىرىۋالغان ئەدىبلەرمۇ ئاز بولمىسا كېرەك.59 ▲ئېلان مەسىلىسى مەسئۇل ئورۇنلارنىڭ، ئاخبارات ۋاستىلىرىنىڭ، خەلق ۋەكىللىىرىنىڭ دىققىتىنى قوزغىسا بولاتتى. رادىئو شۇ ئىستانسىدىكىلەرنىڭ مەنپەئىتى ئۈچۈن خىزمەت قىلامدۇ؟ مەزىبېزى ياللۇغىنىڭ كار قىلماس دورىسىنى ئېلان قىلىۋەرسە، ئىجتىمائىي ئۈنۈم نەدە قالىدۇ؟ پۇقرالارنىڭ رادىئو ئاڭلىيالماسلىق مەسىلىسىنى ھەل قىلىش ئۈچۈن سىگنالنى سۈنئىي ھەمراھ ئارقىلىق تارقىتىپ بېرىۋاتسا، شۇ ئىستانسىدىكى ئادەملەر رادىئونى ئېلان ئارقىلىق پۇل تېپىشنىڭ ۋاستىسى قىلىۋالسا بولمايدۇ.60 ▲خىيانەتچىلىككە قارشى تۇرۇش ئىدارىسىنىڭ باشلىقى خىيانەتچى بولۇپ چىققانلىقىغا ھەيرانمەن؛ ئوغرىنى تۇتىدىغان ساقچىنىڭ ئوغرى بولۇپ چىققانلىقىغا ھەيرانمەن؛ دەنالارنى مۇھىم ئىشقا قويۇشنى ئاغزىدىن چۈشۈرمەيدىغان بىر باشلىقنىڭ چالا ساۋات شوپۇرىنى ئەمەلدارلىققا ئۆستۈرگىنىگە ھەيرانمەن؛ ناھىيىمىز خەلقىنى بېيىتىۋېتىدۇ، دەپ داغدۇغا بىلەن قارشى ئېلىنغان كاتتا سودىگەرنىڭ ئالدامچى بولۇپ چىققانلىقىغا ھەيرانمەن؛ دەۋانى ئادىل سوراشنى تەكىتلىگەن باشلىقنىڭ دېلو بېجىشكە ئارىلاشقىنىغا ھەيرانمەن؛61 ▲كەنت كومىتېتىنى نۆۋەتلىك ئالماشتۇرۇش سايلىمىنىڭ ۋاقتى بوپتۇ. كەنتتە 70 ياشلارغا كىرىپ قالغان، كېسەلچان، بىر تۇل موماي بار ئىكەن. كەنت ئاھالىلىرى بۇ تۇل موماي سوۋغا-سالام كۆتۈرۈپ، ئەمەل تاماسىدا يۇقۇرىغا ياماشمايدۇ، يېزا باشلىقىنى ناھىيە بازىرىغا باشلاپ بېرىپ رەڭلىك ئولتۇرۇش قىلىپ بېرەلمەيدۇ، سەيلى-ساياھەتكە بارالمايدۇ، ھاراق-شاراپ ئىچەلمەيدۇ، كەنتنىڭ مال-مۈلكىنى يۇتىۋالغۇدەك چوتوسى يوق، دېيىشىپ، ئۇنى كەنت باشلىقى قىلىپ سايلىۋاپتۇ.62 ▲باشلىق ھۆكۈمنامىلەرنى تورغا چىقىرىش ھەققىدە تەكىتلەپ: باشقىلارغا كوكۇلىمىزنى تۇتقۇزۇپ قويىدىغان، مەسخىرە ئوبېكتى بولۇپ بېرىدىغان ھۆكۈمنامىلەرنى تورغا چىقىرىۋەتسەك قەتئىي بولمايدۇ، دېدى. بۇ گەپتىن ئادالەت نامى بىلەن چىقىرىلىۋاتقان ھۆكۈملەرنىڭ قاتارىدا «كوكۇلىمىزنى تۇتقۇزۇپ قويىدىغان، مەسخىرە ئوبېكتى بولۇپ قالىدىغان» ھۆكۈملەرمۇ بار دېگەن مەنە چىقامدۇ؟ قىلغۇلۇقنى قىلىپ قويۇپ، ئۇنى يوشۇرۇش ئۈچۈن كاللا قاتۇرغىچە، كوكۇلىمىزنى تۇتقۇزۇپ قويىدىغان، باشقىلارغا مەسخىرە ئوبېكتى بولۇپ قالىدىغان ئىشلارنى قىلمىساقلا بولمىدىمۇ؟63

★Jackie★

	خرۇششېف چوشقا فېرمىسىغا خىزمەت تەكشۈرۈپ بېرىپتۇ ، مۇخبىر پەقەت بىر پارچىلا سۈرەت تارتالاپتۇ . مۇھەرىر بەت تەستىقلاشتىن بۇرۇن تەڭلىكتە قاپتۇ ، چۈنكى سۈرەتتە  خرۇششېف بىلەن چوشقىلارلا بارئىكەن . بىر تەھرىر (خرۇششېف چوشقىلار بىلەن بىللە) دەپ يېزىشنى تەكلىپ بېرىپتۇ ، يەنە بىر تەھرىر (چوشقىلارنىڭ ئارىسىدا تۇرغىنى خرۇششېف ) دەپ يېزىشنى تەكلىپ بېرىپتۇ ؛ ئەمما مۇھەرىرنىڭ ئۇنداق يازغىلى بېشى ئون ئەمەستە . ئاخرى بىر ياش تەھرىر مۇھەرىرنى بۇ باش ئاغىرىقىدىن خالاس قىپتۇ . ئەتىسىدىكى گېزىتكە خەۋەر بىلەن قوشۇلۇپ سۈرەت ۋە سۈرەت ئېلاۋىسى بېرىلىپتۇ ، سۈرەت ئېلاۋىسىگە : (ئوڭدىن سانىغاندا ئۈچىنچىسى يولداش خرۇششېف) دەپ يېزىلغانكەن .