سېغىنىش

yukselix

                                 

           سېغىنىش

مېھرىبان ئانا!
مېنى تاشلاپ كەتتىڭ يىگانە.
سەنسىز كۈنلىرىم
ئۆتتى مەنىسىز،
ئۈششۈك تەككەن يۇپۇرماق كەبى ،
سەندىن ئايرىلىپ بولدۇم سەرسانە.


جاپاكەش ئانا!
مېھرىبان سىمايىڭ ھامان يادىمدا ،
ئۇماق نەۋرىلەر
ھەرقېتىم ئىسمىڭنى چاقىرغىنىدا .
ئاھ،ھەسرەتتىن پىغانىم ئۆرلەپ،
لىغىرلايدۇ ياش بىر جۈپ كۆزۈمدە.

غەمگۇزار ئانا........!
بىلمەپتىمەن قەدرىڭنى ئەجەپ،
مانا بۈگۈن
يۈكۈنۈپ قەبرەڭ ئالدىدا.
مېنى باققان ھۆرمىتىڭ ئۈچۈن،
قىلىمەن دۇئا يېنىش-يېنىشلاپ،


2014يىل كەلپىن

مەرىپەت

شئېرنى ياخشى يېزىپسىز، ئانا دۇنيادىكى ئەڭ ئۇلۇغ ئىنسان ، ئاتا-ئانىغا قانچىلىك قىلساقمۇ يەنىلا بىز ئۇلارنىڭ ئالدىدا قەرزدارمىز.

           
            پۇرىۋال، بەختىڭدۇر ئاناڭنىڭ ھىدى

              

            ئاۋايلاپ توققۇز ئاي كېچە- كۈندۈزى،
             مېھرىنى بىر ساڭا ئاققۇزۇپ ئۆزى،
             پەپىلەپ جاھانغا ياراتتى سېنى،
             شۇ ئانا ئەجرىگە باققىنىڭ قېنى؟
             پۇرىۋال، بەختىڭدۇر ئاناڭنىڭ ھىدى.      

              تۇغۇلۇپ تۇنجى رەت كۆرگىنى ئاناڭ،
              ئاۋايلاپ مەڭزىڭگە سۆيگىنى ئاناڭ،
              مېھرىنى زەمزەمدەك تۆككىنى ئاناڭ،
              ئۇۋادەك باغرىغا چۆككىنى ئاناڭ،
              پۇرىۋال، بەختىڭدۇر ئاناڭنىڭ ھىدى.

              تەرلىسەڭ سايىۋەن تۇمۇزدىن توسقان،
              چاڭقىساڭ بۇلاق ئۇ شىلدىرلاپ ئاققان،
               توڭلىساڭ جۇدۇندا ئۇ ساڭا گۈلخان،
               قۇياشتۇر بى مىننەت نۇرىنى چاچقان،
               پۇرىۋال، بەختىڭدۇر ئاناڭنىڭ ھىدى.

               ئاچ قالساڭ ئۇ ساڭا مىزلىككىنا ئاش،
               ھالۋىدۇر ئۇ سىلاپ قويغان تاغۇ-تاش،
               كارۋانسەن، ئۇ ساڭا مۇڭداش، سەپەرداش،
               يېقىلساڭ يېنىڭدا مادار، يۆلەكداش،
               پۇرىۋال، بەختىڭدۇر ئاناڭنىڭ ھىدى.

               ئۇ بولغاچ سەن يەكتا جاھان ئەركىسى،
               سورۇننىڭ، مەشرەپنىڭ بېشى، سەركىسى،
              دوستلارنىڭ ھۆرمىتى ئاشنىڭ تۇنجىسى،
              ئاناڭ ئۇ سۇلماس گۈل، سەن بىر غۇنچىسى،
              پۇرىۋال، بەختىڭدۇر ئاناڭنىڭ ھىدى.

              ئۇ بولغاچ يېنىڭدا دىلىڭ، باغرىڭ توق،
             ئوينايسەن،يايرايسەن ئەسلا غېمىڭ يوق،
             رەقىبىڭ گىدىيىپ قىلالمايدۇ دوق،
             مەزمۇتسەن تاغلاردەك، تېشەلمەيدۇ ئوق،
             پۇرىۋال، بەختىڭدۇر ئاناڭنىڭ ھىدى.

   
            ئۇ ماڭغان يوللاردىن ئىپار گۈپۈلدەپ،
           ياشىدىڭ بەختتە جېنىڭ چېچەكلەپ،
           ئۇ ماڭدى ئالدىدا سېنى يېتەكلەپ،
          ئەگەشتىڭ كەينىدىن كىيىكتەك سەكرەپ،
           پۇرىۋال، بەختىڭدۇر ئاناڭنىڭ ھىدى.

            يىتىلدىڭ ،ئەشۇنداق كۆيۈش سۆيۈشتە،
           چانمىدىڭ مۇشكۇلات، ئۇزۇن سەپەردە،
           تىك تۇرۇپ غۇرۇردا خەۋپ-خەتەرگە،
           باشلىرىڭ يەتسىمۇ ئەرىشكە،كۆككە،
           پۇرىۋال، بەختىڭدۇر ئاناڭنىڭ ھىدى.

          چوڭ بولدۇڭ، چوڭ بولۇپ ئىشلىرىڭ تولا،
          ھەركۈنى بەزمىدە ياڭرىتىپ ناۋا،
          دىمىدىڭ بىرەر رەت قايدىسەن ئانا؟
          يۈرەكنى تۇتۇپ باق سەن قانداق بالا؟
          پۇرىۋال، بەختىڭدۇر ئاناڭنىڭ ھىدى.

          ئۇ پۈتۈن ئۆمرىدە بىر سېنى دىدى،
          نەدە بول ھەركۈنى غېمىڭنى يىدى،
          سەن ئۈچۈن يىغدىيۇ ئۆزى يىمىدى،
         سەن پۇزۇر بايۋەتچە، ئۆزى كىيمىدى،
         پۇرىۋال، بەختىڭدۇر ئاناڭنىڭ ھىدى.

         دەم ئېلىش يات ئاڭا باقار بالاڭنى،
         سۇغۇرۇپ، يەم بېرىپ ھېيتلىق كالاڭنى،
         تۈگۈتەر بىر ياقتىن ئىشىڭ چالاڭنى،
         كۆرسە خوش شۇندىمۇ سېنىڭ قاراڭنى،
         پۇرىۋال، بەختىڭدۇر ئاناڭنىڭ ھىدى.

         ئويلاپ باق چوڭ بولۇپ ئاناڭغا بىر رەت،
        چاڭقىسا سۇندۇڭمۇ سوغۇق سۇ ،شەربەت...
        يېلىنىپ باشقىنى قىلغاندەك ئىززەت،
        يۈكۈنۈپ ئالدىدا قىلدىڭمۇ ھۆرمەت،
        پۇرىۋال، بەختىڭدۇر ئاناڭنىڭ ھىدى.

         ھاياتلىق چەكلىكتۇر مەڭگۈلۈك ئەمەس،
         دۇنيا بىر قونالغۇ، ئۇ قايتا كەلمەس،
         ئۇنۇتۇپ ئاناڭنى يۈرمە مەس-ئەلەس،
         ئانىسىز بەندىنىڭ بەختى كۆلىمەس،
         پۇرىۋال، بەختىڭدۇر ئاناڭنىڭ ھىدى.

         ئۇ ھايات بارىدا سۆيگىن قولىغا،
        تۇزانلار ئۆچمىسۇن سۇ سەپ يولىغا،
        بالىلىق مېھرىڭنى تۆككىن باغرىغا،
        ئۇ ساڭا مۇھتاجدۇر، ئەمەس ئاش-نانغا،
        پۇرىۋال، بەختىڭدۇر ئاناڭنىڭ ھىدى.

        سۆزىنى ئاڭلىغىن ،كايىپ سۆزلىمە،
        تەكرارلاپ سۆزلىسە گەپنى، تىرىكمە،
        ھەمرا بول ئۇزاقراق يېنىدىن كەتمە،
        سېنى دەپ مۈكچەيدى، ئۇنى خار ئەتمە،
        پۇرىۋال، بەختىڭدۇر ئاناڭنىڭ ھىدى.

        قېرىدى، تىنىدىن ماغدۇرى كەتتى،
       چاڭقىدى، ھاياتنىڭ يامغۇرى كەتتى،
       جەلىپكار خۇش ناۋا كۈيلىرى كەتتى،
       چۆللەرنى باغ قىلغان چاغلىرى كەتتى،
       پۇرىۋال، بەختىڭدۇر ئاناڭنىڭ ھىدى.

       تۇتۇپ قوي پۇتىنى مەڭزىڭنى يېقىپ،
       سۆيۈپ قوي مەڭزىگە مېھرىڭدە بېقىپ،
       ئۇتىغا ئۇتان بول، سۈيىدە ئېقىپ،
       ۋايسىماي ھاپاش قىل مۆرەڭگە ئېلىپ،
       پۇرىۋال، بەختىڭدۇر ئاناڭنىڭ ھىدى.

       ئۇ كەتسە يىتمىسۇن، چىگىلگەن بەختىڭ،
       ئۇ كەتسە غېرىپسەن، لىڭشىغاي تەختىڭ،
       ئۇ كەتسە مەجرۇھسەن، سارغىيار چېھرىڭ،
       ئۇ كەتسە گاچا سەن، ئۆتمەيدۇ تىلىڭ،
       پۇرىۋال، بەختىڭدۇر ئاناڭنىڭ ھىدى.

        ئانا ئۇ مۇقەددەس بالا جەننىتى،
        ئانىسىز نەدە ئۇ بالا راھىتى،
        ئانىسىز نەدە ئۇ بالا شەۋكىتى،
        ئانىسىز نەدە ئۇ بالا سۆلىتى،
        پۇرىۋال، بەختىڭدۇر ئاناڭنىڭ ھىدى.

        شەيتانغا ئالدىنىپ ئۇنىڭدىن چانما،
        كۈتمەستىن، كەتكەندە ئازاپقا قالما،
        ئۇ ھايات بارىدا باققىن، ۋايسىما،
        ئانا ئۇ بالىچۈن بايلىق بىباھا،
        پۇرىۋال، بەختىڭدۇر ئاناڭنىڭ ھىدى.

        مۇڭداش بول تۈنلەردە كېلىپ باغرىغا،
        قۇشۇق بول ئۇنىڭكى ئىچەر ئېشىغا،
        تارغاق بول كۈمۈشتەك ئاپئاق چېچىغا،
        ياغلىق بول كۆزىدىن ئاققان يېشىغا،
        پۇرىۋال، بەختىڭدۇر ئاناڭنىڭ ھىدى.

        ئىزىنى سۆي ئۇنىڭ سەجدىگاھ بىلىپ،
        ئۇ كەتسە كەلمەيدۇ بالام دەپ يېنىپ،
        يېتىۋال پۇتىدا باغرىغا قېنىپ،
        غۇربەتتە قالمىسۇن كۆزى ياشلىنىپ،
        پۇرىۋال، بەختىڭدۇر ئاناڭنىڭ ھىدى.

        چېھرىنى قاپلىغان قورۇقلار تامام،
        يەر سۆيۈپ ھەركۈنى قىل ئاڭا سالام،
        ئۇ دەيدۇ شۇندىمۇ ئوينا جان قوزام،
        ئۇ شۇنداق سېنى دەپ كۆيگەن يۇرۇق شام ،
        پۇرىۋال، بەختىڭدۇر ئاناڭنىڭ ھىدى.

  بۇ شئېرنى يازغۇچى مۇھەممەدجان راشىدىنغۇ دەيمەن شۇنداقتەكلا ئېسىمدە قاپتۇ.
                 

yukselix

رەھمەت سىزگە،ماڭا ياخشى بىر شېئر سوغا قىلىپسز .مەنمۇ مۇشۇنداق ياخشى شېئرلارنى يېزىشقا تىرىشىۋاتىمەن .تورداشلار ياقتۇرىدىغان تېخىمۇ نادىر ئەسەرلەرنى ۋۇجۇتقا چىقىرىش ئۈچۈن ئىزدىنىۋاتىمەن .سىلەرنىڭ قوللىشڭلار بولسىلا............

yukselix

‹‹پۇرىۋال، بەختىڭدۇر ئاناڭنىڭ ھىدى››دىگەن شېئېر ھەقىقەتەن ياخشى يېزىلغان شېئېر بولۇپ ،ھەربىر ئادەم بۇھەقتە چوقۇم ئويلىنىش زۆرۈر دەپ قارايمەن.ئەسلىدە
        
بۇشېئرنى ئايرىم تېما ئاستىدا يوللىغان بولسىڭىز تېخمۇ ياخشى بولاتتىكەن .

سىھىر

ھەقىقەتەن ياخشى يېزىپسىز ،دۇنيادا ئانىدەك ئۇلۇغ يەنە بىر ئىنسان بولمىساكىرەك،يەنىمۇ ۇتۇقلارنى تىلەيمەن

مەرىپەت

yukselix يوللىغان ۋاقتى  2014-11-20 17:56
‹‹پۇرىۋال، بەختىڭدۇر ئاناڭنىڭ ھىدى››دىگەن شېئېر ھەقى ...

بۇ شئېرنى ئەسلىدە يوللاش مەقسىتىم يوق ئىدى، سىز يازغان شئېرنى ئوقۇۋېتىپ بۇ شئېر ئېسىمگە كېلىپ قالدى. شۇڭا يوللاپ قويغان.

مەرىپەت

yukselix يوللىغان ۋاقتى  2014-11-20 17:45
رەھمەت سىزگە،ماڭا ياخشى بىر شېئر سوغا قىلىپسز .مەنمۇ م ...

ئەلۋەتتە سىزنى قوللايمىز، تېخىمۇ ياخشى يېزىلغان  شئېرىڭىزنى كۆرۈشكە  تەشنامىز.

جام

مەرىپەت يوللىغان ۋاقتى  2014-11-20 12:43
شئېرنى ياخشى يېزىپسىز، ئانا دۇنيادىكى ئەڭ ئۇلۇغ ئىنسا ...

توغرا، ئانىلار ئۇلۇغ، ئانىلار بۈيۈك. ئەلمىساقتىن تارتىپ تالايلىغان قەلەمكەشلەر ئانا توغرىسىدا سانسىزلىغان مىسرالارنى تىزىشتى، تالايلىغان ناخشىچىلار ئانا توغرىسىدا ناخشا- قوشاقلارنى قېتىشتى. ئانىلارنىڭ ئەمگەك- ئەجرىنى كۈيلەشتى. بىزمۇ بۇ يەردە شۇنداق كۈيلەپ- ئەسلەپ ئولتۇرۇپتىمىز، بىزدىن كېيىنكى ئەۋلادلىرىمىزمۇ بۇنى ئەبەدىي داۋام قىلىدۇ. شۇنداق بولسىمۇ بىز ھەرقانچە كۈيلىسەكمۇ ئانىلارنىڭ پەرزەنتلەر ئالدىدىكى ئەجرىنى قايتۇرۇشقا مەڭگۈ ئامالسىزمىز. ئەپسۇسلىنارلىقى شۇكى، ئەشۇ ئانىلىرىمىزنىڭ قەدرىنى بىلمەي قالىدىغان، نازۇك دىللىرىغا بىھۇدە ئازار بېرىپ قويىدىغان چاغلىرىمىزمۇ يوق ئەمەس، بىراق كۆڭلى- كۆكسى ئالەمچە كەڭرى ئەشۇ ئانىلىرىمىز بىزنىڭ بىرقىسىم نادانلارچە قىلىقلىرىمىزنى- خاتالىقلىرىمىزنى ھامان كەچۈرۋېتىدۇ. ئانىلارنىڭ يەنە بىر ئۇلۇغلىقى مانا مۇشۇ بولسا كېرەك............
(ھۆرمەتلىك «مەرىپەت» خانىم، سىز ھەقىقەتەن قالتىس ئىكەنسىز جۇمۇ، توپتوغرا 23 كۇبلىت- 115 مىسرا ئۇشبۇ شېئىرنى سىز قانداقمۇ يادقا ئېلىپ بولغانسىز دەيمەن- ھە   ).

مەرىپەت

نىمە دەيدىغانسىز جام ئەپەندى ، مېنىڭ كاللام كومپيۇتېر بولمىسا بۇلارنى يادلاپ بولىدىغانغا ئەمەلىيەتتە مەن ئۇنچە بەك قالتىسمۇ ئەمەس  
ئۈچ يىل بۇرۇن بۇ شئېرنى باشقا مۇنبەرگە يوللىغان ئىدىم، يۈكسىلىش ئەپەندى يوللىغان شئېرنى ئوقۇۋېتىپ مەن  يوللىغان شئېر ئېسىمگە كېلىپ، شۇ مۇنبەردىكى مەن يوللىغان يازمىلارنى  ئاچسام شۇ يەردە  بار ئىكەن ، شۇ يەردىن كۈچۈرۈپلا ئەكەلدىم لېكىن شئېرنى يازغان شائېرنىڭ ئىسمىنى يازماپتىكەنمەن ئويلاپ باقسام ئاتاقلىق شائېرىمىز مۇھەممەدجان راشىدىننىڭ شئېرلار توپلىمىدىن يازغاندەكلا ئېسىمدە قاپتۇ، شۇڭا شۇنداق يېزىپ قويغانتىم.

yukselix

‹‹پۇرىۋال، بەختىڭدۇر ئاناڭنىڭ ھىدى››دىگەن  بۇشئېر ‹‹ئالتۇن ئۈزۈككە ياقۇت كۆز قويغان ››دەكلا ‹‹ سېغىنىش ››قا تولىمۇ ماس كەپتۇ.تېمىنى ۋە مەزمۇننى تېخىمۇ بېيىتىشتا ياخشى رول ئوينىدى. رەخمەت سىزگە.