ھەر بىر بالا- چولپان جۇلالىق ( بالىلارغا بايراملىق )

نۇرلان

ھەر بىر بالا-چولپان جۇلالىق
(بالىلارغا بايراملىق )

بەختلەرگە چۆمۈپ لىقمۇ-لىق،
خۇلقىڭلاردىن چىقىرىپ قىلىق.
قىيغىتىڭلار ئوماق بالىلار،
بۈگۈن ئالەم سىلەرگە تالىق.

تاپشۇرۇقلار تىتىلىپ كەتسۇن،
غەم-ئەندىشە سېتىلىپ كەتسۇن.
چۇقانىڭلار پەلەككە يەتسۇن،
شادلىنىڭلار بايرامغا لايىق.

سىلەر ئۈچۈن قۇياش توختىسۇن،
ئاي كۈنجۈتلۈك نانغا ئوخشىسۇن.
بۇلۇت كۈنلۈك بولۇپ قوغدىسۇن،
بارىكاللا ئېيىتسۇن خالايىق.

تۇتقىنىڭلار زەرگە ئايلانسۇن،
ئاسفالىتلار مايسا رەڭ يانسۇن.
پۇتلىرىڭلار ئۇيۇنغا قانسۇن،
سىلەر بار جاي بوستان-ھاۋالىق.

ئېقىنلاردا غۇلاچلاپ ئۈزۈپ،
قىيالارنى ھالدىن كەتكۈزۈپ.
مەجنۇنتالنى تەسلىم ئەتكۈزۈپ،
يارىتىڭلار تاتلىق بىر تارىخ.

سىلەرگە خاس گۈزەل تىلەكلەر،
بالىلىقتا ئارمان چېچەكلەر.
مۇھەببەتتە سۆيەر يۈرەكلەر،
ھەر بىرىڭلار چولپان-جۇلالىق.

ھەر كۈن بايرام بولسۇن سىلەرگە،
ساقلىق تۇلپار بولسۇن مىنەرگە.
بايراملىقتۇر نەزمەم بېرەرگە،
مىسرالىرى چاپچار خۇمالىق!

ADiL

بەك ياخشى يېزىلىپتۇ، بايرام ئۆتكۈزىدىغان مەكتەپلەردىكى مەكتەپ مۇدىرلىرى ياكى ئوقۇتقۇچىلار قۇرۇق گەپمىڭ ئورنىغا مۇشۇ شېئىرىڭىزنى بالىلارغا سوۋغە قىلسا شۇنداق ياخشى چىققۇدەك.

نۇرلان

ئادىل ئەپەندىمگە رەھمەت. بالىلار بايرىمى ھارپىسىدا بالىلىرىمىزغا ئاتاپ بىر نەرسە دىمىسەك بولماس؟!
مەكتەپلەردە بالىلارنى ئاپتاپقا سېلىپ، بايرىمىنى تەبرىكلەش مودا بولۇپ قېلىۋاتىدۇ.

ئەزھەر36

ياخشى يېزىپسىز ، قەلەم قۇۋۋىتىڭىز خىلى ياخشىكەن . تېخىمۇ ياخشى تېمىلارنى يوللىشىڭىزنى ئۈمىد قىلىمەن .

دىلىغۇل

ھەقىقەتەن  ياخشى يىزىلىپتۇ.قەلەم قۇۋىتىڭىز ياخشىكەن ،ئەسەرلىرىڭىزنى ئايمىغايسىز!

ئىدرسجان

ياخشى يىزىپسىز ھارمىغايسىز ئەشۇ سەبى بالىرمىز ئۇچۇن جاپا چىكىپ بىر ياخشى يازمىنى سۇنۇپسىز رەھمەت سىزگە.