ۋاپا تەبىرى

نۇرلان

          ۋاپا تەبىرى

     (ۋاپا ئىزدىگۈچىلەرگە)

ۋاپانى ئىزدەپ يۈرمە قەدىناسىم،
تارىختىن، فىلىملەردىن، رومانلاردىن.
سۆيگۈمىز ۋاپا چېچىپ ئۆتتى بەلكىم،
ئۇزۇن يىل بىللە باسقان داۋانلاردىن.

نىكاھتا تەڭ چىشلىگەن تۇزلۇق ناندا،
بىلگەنسەن، سىڭدى تەنگە «ۋاپا» تەمى.
قىسمەتلىك تۇرمۇش بىلەن ئېلىشقاندا،
غالىپ بىز، ھېكمىتى دەل « ۋاپا» پەمى.

سۆيگۈمىز ۋاپا بىلەن بىخ چىقىرىپ،
ئائىلىگە چەكسىز بەخت بەخىش ئەتتى.
قوشماق پەرزەنت يۇلتۇزلاردەك نۇر چېچىشىپ،
دىلىمىزغا ئىنساب- ئىمان نەقىش ئەتتى.

گۈپۈلدەپ ۋاپا پۇرار، بىلىۋالغىن،
سەن دەزمال سالغان ھەر قۇر كىيىمىمدە.
سۆسۈن رەڭ ھالقىلارنى ئېسىۋالغىن،
ئۇنى مەن سوۋغا قىلغان، تۇت ئېسىڭدە.

ھەر سۆزۈم ئەقىدەمدۇر، ۋاپا ئەسلى،
سەن ئەتكەن تاماقلارنى ماختىغاندا.
بولغاچقا سەنمۇ شۇنداق، ئەزىز نەسلى،
قىيالماي تاشلىمىدىڭ، باتنىغاندا.

ۋاپا ئۇ- ئىشەنچتۇر، ساداقەتتۇر،
ساداقەتنى كۆزلىرىمدىن كۆرمىدىڭمۇ؟
«ھالاللارغا بىنومۇسلۇق ھاقارەتتۇر...» ،
پىچىرلاپ، ئوتلۇققىنە سۆيمىدىڭمۇ؟

ۋاپانى ئىزدەپ يۈرمە يىراقلاردىن،
مۇجەسسەم ئاشۇ لەئلى ئىككىمىزدە.
گۆھەرلەر يالتىرايدۇ قىياقلاردىن،
سۆيگۈدىن نۇر ياغىدۇ كۆكسىمىزدە !

جام

بۇ بىر ۋەزنى ياخشى، چوڭقۇر پەلسەپىۋى مەنىگە تويۇنغان شېئىر ئىكەن، مەنبەسىنى ئەسكەرتىپ قويغان بولسىڭىز (ئۆز ئىجادىيىتىڭىزمۇ ياكى باشقىلارنىڭمۇ؟)

ئەزھەر36

قاپىيە شەكىللىرى ناھايىتى ياخشى ماسلىشىپتۇ ، قەلەم تولپارىڭىز ھارمىغاي .

نۇرلان

جام ئەپەندىنىڭ ئىلھامىغا تەشەككۈر. مەن ( نۇرلان) ئۆزۈمنىڭ يازمىسى ئەمەسلىرىنىڭ مەنبەئەسىنى چوقۇم ئەسكەرتىمەن.

ئىدرسجان

ياخشى چىقپتۇ داۋاملىق تىرشىڭ.