بىر قەلەندەرمەن

نۇرلان

نەپسىگە قۇل بىر قەلەندەرمەن
(ئادەم بولۇپ بىلگەن ھىكمەتلەر)
تەڭسىز دۇنيا، غەمسىزلەرنىڭ چىرىغى يۇرۇق،
نىمىنى دەي، تاشقا ئوخشار ئەمما يوقسۇزلۇق.
قەھرىتان قىش-زىمىستاندا قىينايدۇ سوغۇق،
چوغ ئىزدىمەس، قەلب ئىزدەر بىزدىن ھاجەتمەن.

تەنلەر ئۇرۇق، ئاچلىق قىينار، « نان» دەيدۇ بىرى،
ھاياتلىقتىن ئۈمىد ئۈزمەي،« قان» دەيدۇ بىرى،
ۋا دەرىخا، مۇھتاجلىق ئۇ قىينار كۈنسىرى،
نەچچە يەردىن تىتىلغاندۇر شاكراپ تەر چەكمەن.

قەدەم ھالسىز، سەنتۈرۈلۈپ، تەڭلىك ئىزدەيدۇ،
تىنىق ئېغىر، غەمنى يۈدۈپ كەڭلىك ئىزدەيدۇ،
نىيەت توغرا، مېھنىتىمدە رىزقىم بار دەيدۇ،
قولى قاداق، كۆزى ياشلىق جاپاكەش دەرتمەن.

ئۆرتەنسىمۇ ئازابلاردا، قوقاس كەبى جان،
تىرىكلىككە يىپ ئۇلايدۇ، پەرزەنتى ئارمان،
شۇنداق ئوت بۇ ئەلمىساقتىن، ئىگىمىز سالغان،
ئۇ بىلىدۇ: ۋاز كېچىشكە بولمايدۇ جەزمەن.

غېرىپلارمۇ ھالاللىقتا يۇرۇقلۇق بار دەپ،
ئىمانىنى ئىنسابىنىڭ تېشىدا بىلەپ،
ئاز يىسىمۇ قانائەتچان، يىمىدى تىلەپ،
پىچىرلايدۇ دىلخانىسى-غورۇرلۇق ئەرمەن.

شۇنداقلارنى مازاق ئەيلەپ، مەنمۇ بىر مەھەل،
نائەھلىگە تەڭكەش بولۇپ توۋلىدىم غەزەل،
ئەمدى بىلسەم، قېرىندىشىم يوقسۇل ئىكەن دەل،
«تۇزىنى يەپ تۇزلۇق چاققان» مەخلۇقمەن، پەسمەن.

سۇنالمىدىم پىخسىقلىقتىن، ھاقەتمەنگە قول،
قاراڭغۇدا شامنى ئاياپ، كۆرسەتمىدىم يول،
ساددىلارنى نادان چاغلاپ، قىلىپ يۈردۈم گول،
«بالا كەلسە قېرىنداشتىن»، ئاينىغان نەسمەن.

كېچىككەندە بىلىپ يەتتىم: ئادەملەر ئۇلۇغ،
ئەمما، ئادەم بەندىلىكتە بولماسكەن تولۇق،
مەندىن ئىبرەت: مېھىر دىگەن سۆيۈشكە ئۇرۇق،
خىجالەتتە، ئۆزرىلىكتە، ئاشۇنداق دەرمەن.

قارا دۇنيا، شىرمەت سۈپەت ئادەملىرىڭگە،
ئۆزى يوقسۇل، كۆڭلى ئاپئاق بەردەملىرىڭگە،
لەنەت مەندەك، كۆزى كور، «ھاتەملىرىڭ»گە،
شۆھرەت ئىزدەر، نەپسىگە قۇل –بىر قەلەندەرمەن.

kirimulla

رەھمەت،بەك ياخشى يېزىپسىز!يېزىپسىز!
Android  يانفۇندا يوللانغان

ئىدرسجان

ياخشى يىزىپسىز داۋاملىق تىرشىڭ.شىئرىڭىز ئۇزۇلۇپ قالمىسۇن.

مەخمۇت3

ياخشى يېزىپسز مۇشۇنداق شىئىرلىرىڭىز ئۈزۈلۈپ قالمىسۇن

پەشتاق

ھەقىيقەتەن ياخشى يىزىپسىز، قولىڭىز تىلىپ قالمىغاي!

نۇرلان

قىسمەن يەردە ئىملا خاتالىقى يۈز بېرىپتۇ. مۇنبەرداشلارنىڭ تۈزىتىپ ئوقۇشىنى ئۈمىد قىلىمەن.

Ayshemgul

"ئەمما ئادەم بەندىلىكتە بولماسكەن تولۇق"بۇ گەپ پەچەت چۈشۈپتۇ شېئىرىڭىزغا.ناھايتى ياخشى يېزىپسىز.ئاللاھ بەرىكەت بەرسۇن.ئامىن
来自安卓客户端

نەۋرۇز

قەلەندەر بىز غۇرۇر ۋېجدانغا.....................................
ياخشى يېزىپسىز قېرىندىشىم.