يېشىل ئىلھام

نۇرلان

       يېشىل ئىلھام
مىسرالاردىن يۈرەك كۆيسە تومۇرلاردا،
ئېدىتلىق تەپەككۇرنى قىلسا ئىنئام.
ياپيېشىل نۇر تەپچىسە غورۇرلاردا،
مۇشۇ دەل قەلەمكەشكە يېشىل ئىلھام.

پۇرىقى ئىپار چاچسا ھەر بىر سۆزنىڭ،
ھېكمىتى مەستخۇش قىلىپ، دىل سەگىتسە.
تامچىسى يېشىل بولسا قارا كۆزنىڭ،
مەنىسى روھ ئويغىتىپ، يول ئەگىتسە.

ھەر جۈملە يېشىل رەڭلىك چىمەن بولسا،
ئوقۇرمەن ياپراق ئەگسە ئىجىللىقتا.
ھەر شېئىر يالغان ئەمەس، راستقا تولسا،
كەمىنە يۈرمەس ئىدى خىجىللىقتا.

يېشىل رەڭ سوراپ يۈرەر مەندىن قەلەم،
راستچىللىق يېشىللىقنىڭ لىباسىدۇر.
تەبىئىيلىك يېشىل دىمەك، جانغا مەلھەم،
يېشىل ئىلھام- شائىرلارنىڭ سىماسىدۇر!

koktugh

ئۇكام   گەپ قىلماي دىسەم  خاتالىقنى كۈرۈپ تۇرۇپ سۈكۈت قىلغۇم كەلمىدى. شېىرىڭىزنىڭ 1-كۇبلىت 1-مىسراسىغا بىر قاراپ باقامسىز ؟
«مىسرالاردىن يۈرەك كۆيسە تومۇرلاردا ››  سىز  بۇ مىسرالاردا مەنتىقە جەھەتتىن  مەسىلە يوق دىيەلەمسىز  ؟ياكى بۇ گۇڭگا شېىئىرى مىسرالارمۇ؟ ۋە ياكى تاققا -تۇققالارمۇ؟ ئەگەر قايىل بولسىڭىز شېىرىدىكى تىل تاۋلاشقا ئەستايىدىل مۇئامىلە  قىلسىڭىز  

Ayshemgul

تۇنجى رەت ئىشتتىم بۈگۈن‹يىشىل ئىلھام›!
يەشمىسى قاراپ ئۆتسەم زەپ ئېسىلكەن.
گەر بولسا ھەربىر شائىر ۋۇجۇدىدا،
مىللىتىم كەلگۈسىدە ئۈمۈد كۆپكەن.

دېھقان

راس كىچىككىنام خاتالىق ئوتكۇزىپسىز. تىخىمۇ تىرىشىڭ،

نەۋرۇز

تورداشلار دىگەندەك ئاشۇ مىسرالاردا ئازراق كەمچىللك باردەك قىلىدۇ. ئەمما بەك ياخشى يېزىپسىز .

نۇرلان

كۆكتۇغ  ئەپەندىم قاتارلىق تورداشلارنىڭ پىكرىگە رەھمەت. كوكتۇغ ئەپەندىمنىڭ تەكلىپىگە قارىتا كۆز قارىشىم: بىر شېئىردىكى مەزمۇننى بىر مىسرادىكى مەنتىقە بىلەن ئەمەس، بىر پۈتۈن شېئىردىكى مەنتىقە بىلەن ئۆلچىسە بولارمىكىن دىگەن قاراشتىمەن.
" مىسرالاردىن يۈرەك كۆيسە تومۇرلاردا" دەرۋەقە ئاڭلىماققا مەنتىقىسىز، جۆيلۈشتەك تۇيۇلىدىكەن. ئەمما، پىكىرنى ئۇدۇللا ئىپادىلەشكە قارىغاندا، مۇشۇنداق " گۇڭگا" لارمۇ ئوقۇرمەننى تەپەككۇرغا باشلاشتا مۇئەييەن رول ئوينايدۇ. ئۇنىڭ ئۈستىگە " گۇڭگا" مۇ يامان ئاتالغۇ ئەمەسقۇ؟ گەپ ھەر كىمنىڭ قانداق چۈشىنىشىدە.  ئەلۋەتتە،  بۇ پەقەت مېنىڭ شەخسىي كۆز قارىشىم.  
بۇندىن كېيىنكى يازمىلىرىمدا " تىل تاۋلاش" قا چوقۇم ئەھمىيەت بېرىمەن.