خوتۇن ئۆيدە تۇرامدۇ(پاسىل)

پاسىل

        خوتۇن ئۆيدە تۇرامدۇ
ــــ  2-ئاينىڭ 14-كۈنى خوتۇن -بالىلىرىنى تاشلاپ  بايرام ئوينىغىلى كىتىدىغان دوستۇمغا
      
قۇياش ئىللىق كۈلمىسە گۈل چىرايلىق كۈلەمدۇ،
يېقىلغۇسى بولمىسا ئۇچاقتا ئوت كۈيەمدۇ،
نەۋ باھارسىز تەبىئەت شايى ئەتلەس كىيەمدۇ،
يارداڭلىقنى كۆرمىسە قاغا كىلىپ قونامدۇ،
كۆڭلى ئەمىن تاپمىسا خوتۇن ئۆيدە تۇرامدۇ.

كىم چاقىرسا كەينىدىن پالاقلىساڭ ئالدىراپ،
ھايتاقلارغا ئەگىشىپ شالاقلىساڭ ھاسىراپ،
كۈنۈڭ ئۆتسە كوچىدا باللىرىڭدىن ياتسىراپ،
خوتۇنۇڭنى ئىزدىسەڭ قالسا يانچۇق ھالسىراپ،
خورلانسا پاك ئەقىدە خوتۇن ئۆيدە تۇرامدۇ.

پۈتۈن سۈرۈك ئەر تۇرۇپ ئۆز ئىشىڭنى قىلمىساڭ،
ئەرلىك بۇرۇچ ۋىجداننى  پايخان قىلىپ خارلىساڭ،
كەلسە ئۆيگە قەيناتاڭ بىر قوغۇنمۇ تىلمىساڭ،
كۈندە ئۆيگە مەست كېلىپ پەدىشەپنى قويمىساڭ،
ئويلۇنۇپ باق بىرادەر خوتۇن ئۆيدە تۇرامدۇ،

تېلفۇن كەلسە ئۆيۈڭدە ئالالمىساڭ دۇدۇقۇپ،
يۈرەك پوك-پوك ئوغرىدەك ئۆزئۆيۈڭدە ھۇلۇقۇپ،
«كىمكەن»دىگەن گۇناھقا خوتۇن كەتسە ئۇجۇقۇپ،
ئەر-خوتۇنلۇق مۇھەببەت قالسا ئۆيدە تۇنجۇقۇپ،
ئويلاپ بېقىڭ بۇرادەر خوتۇن ئۆيدە تۇرامدۇ.

ئىشتىن كەلسە چارچىدىم دىسەڭ دەملە چېيىڭنى،
ئەتەئۆيدە مېھمان بار غەملە گۆش،ياغ كېمىڭنى،
تۈزەشتۈرگىن ئۇچامنى، ئېلىپ يېڭى كىيىمنى،
يەل قاچىدۇ موتودىن يەملە تېپىپ يىلىمنى،
ھەممە يۈكنى يۈكلىسەڭ خوتۇن ئۆيدە تۇرامدۇ.

ئاي توشقاندا مۇئاشىڭ تۇتۇلغاندا قەرزىگە،
توك،سۇ دىگەن كارتىلىق يانماس قۇرۇق ۋەزىگە،
خوتۇن قاخشاپ ماڭمامدۇ چوڭ ئۆيىگە ئەرزىگە،
يىغلىمامدۇ پۇشماندا تەككىنىگە رەزگىگە،
ئەردە ۋىجدان بولمىسا خوتۇن ئۆيدە تۇرامدۇ.

ئائىلىدە كۆكلەيدۇ ئەجداتلارنىڭ تىلىكى،
ئىناق ئۆيدە توق بولۇر ئەۋلاتلارنىڭ يىلىكى،
ياخشى ئەردە ياشىرار ئاياللارنىڭ يۈرىكى،
چىراق بولسا ئەر ئۆيدە ئايالدۇر ياغ-پىلىكى،
پىلىك-يېغى بولمىسا ئۆيدە چىراغ  يانامدۇ.

كۈندە ئۈچ ۋاق گېلىڭنى تاماق ئېتىپ باقتى ئۇ،
كېر-قېتىڭنى ئادالاپ،ئاغرىپ قالساڭ باقتى ئۇ،
تىنىم تاپماي ئىشلەيدۇ قاچان باتناپ باقتى ئۇ،
بالىلارنى،سېنى دەپ ساراڭ بولدى ساقتى ئۇ،
ئازاربەرسەڭ كۆڭلىگە خوتۇن ئۆيدە تۇرامدۇ.

مەنبە: ئۆز قەلىمىم

zulpikar0998

ۋاھ،ئەجەپ ياخشى شئىر ئىكەن.رەھمەت.

ADiL

دەششەت يېزىۋېتىپسىز جۇمۇ ئۇستاز.

نەپرەت

بارىكاللا   قەلىمىڭىزگە كۆز تەگمىسۇن

ئوكيانى

كۆچرۈپ باشقىلارغا تارقاتساق رۇخسەتمۇ

tohtaji

بەك ياخشى يېزىپسىز ، تىلى شۇنداق ئۆتكۈر ،قەلىمىڭىز ھەقىقەتەن كۈچلۇككەن . يارايسىز .

بىجىرىم

ئۈندىدار ئارقىلىق دوستلار چەمبىرىكىگە يوللىۋەتتۇق، يارايسىز

674267839

رەسمىي جايىغا كەپتۇ .

ئەلتبەر

ۋاخ  شۇنداق كەلتۈرۈپسىز. ئۇستاز .

ئىدرسجان

پاھ ئىسىل نادىر شىئىر ئىكەن رەھمەت سىزگە