ئانا تىل(پاسىل)

پاسىل · ۋاقتى: 2014-2-21 10:12:02

ئانا تىل
ــــــ دۇنيا ئانا تىل بايرىمىغا بېغىشلايمەن
پاسىل

دىلنى دىلغا چەمبەرچاس باغلىغىنى ئانا تىل،
ھەر قەلىپتە بۇلاقتەك قاينىغىنى ئانا تىل.

ئاڭلاپ لەرزان ناخشىنى خۇشاللىققا چۈمۈسىز،
ھەر ئېغىزنى بۇلبۇلدەك سايراتقىنى ئانا تىل.

ئانا تىلدىن ئەۋلاتنىڭ كېلەر يۈرەك تىۋىشى،
شۇ تىۋىشنى ئەۋلاتقا ئاڭلاتقىنى ئانا تىل.

ئاناتىلدا تاۋلانغان ۋىجدان،غۇرۇر،ئىتىقات،
ئانا يۇرتنى،خەلقىڭنى سۆيدۈرگىنى ئانا تىل.

ئادەمىلىك خىسلەتتە يۈكسەك تۇرار ئويغۇرۇم،
قەلىپلەردە خىسلەتنى كۆكلەتكىنى ئانا تىل.

ئاشىقىنى مەشۇقنىڭ دىدارىغا زار قىلىپ،
بىرنى بىرنىڭ ئوتىدا كۆيدۈرگىنى ئانا تىل.

سەن بولغاقا دۇنيادا مەۋجۇتلىقىم كېپىلدۇر،
تەقدىرىنى مىللەتنىڭ كۈلدۈرگىنى ئانا تىل.

كۆڭلۈڭدىكى پەرىگە ئۇچراپ قالساڭ ناۋادا،
ئىزھارىڭغا تەم-تېتىم قوندۇرغىنى ئانا تىل.

سەن بولغاچقا ئۆركەشلەر تۇمۇرۇمدا قېنىممۇ،
تەن-ۋۇجۇدى ئەۋلاتنىڭ كۈلەر سەندە ئاناتىل.

ئەجداتلاردىن ئالغاننى ئەۋلاتلارغا بېرىشتە،
قەلىپلەردىن قەلىپكە ئۆتەر راۋان ئانا تىل.

پاساھەتلەر ھېكمەتلەر تۆكۈلگەندە ئاغزىڭدىن،
بۇلبۇل كەبى يېقىملىق سايراتقىنى ئانا تىل.

ئىمان،ۋىجدان،غۇرۇرنى ئۆگەندىممەن سېنىڭدىن،
ھاياتىم سەن،جېنىم سەن ئىپتىخارىم ئانا تىل.

مەنبە: ئۆز قەلەم

مۇرات007 · ۋاقتى: 2014-2-21 10:13:56

ھاياتىمسەن جىنىمسەن ئىپتىخارىم ئاناتىل

سەلكىن01 · ۋاقتى: 2014-2-21 15:06:18

ئۇستازنىڭ غەزەل يازغىنىنى كۆرۈپ باقماپتىكەنمەن، بۇ غەزەلدىن كۆڭلۈم بەكمۇ سۆيۈندى. ھەر تەرەپلىمە ئىقتىدارىڭىزغا بارىكاللا، ئىجادىيەتنىڭ يوقۇرى پەللىسىدە داۋاملىق پەرۋاز قىلغايسىز!...