ئەلتۇغ: ماتاڭچى (ساتېرا)

ئەلتۇغ

ئابدۇرۇسۇل مۇھەممەد ئەلتۇغ

ماتاڭچى
(ساتېرا)

كەلدى بىر كۈن بەش-ئالتە دالتەك،
كۆتۈرۈشۈپ قولىدا كالتەك:
دېدى: «كىمنىڭ ماۋۇ سەت غالتەك؟
توسۇۋاپسەن چوڭ يولنى، سولتەك،
كەينىمىزدىن يۈرە، ماتاڭچى!»

سەكرەپ يەنە ئېگىز پوچىسى،
(قارىماققا لەببەي، «خو»چىسى)،
دېدى: «بۇچۇ؟ بازار كوچىسى،
سەن ئىكەنسەن بەكمۇ نوچىسى،
ئەمدى بىزنى كۆرە، ماتاڭچى!

ئۆتەلمەستىن خەقنىڭ ھارۋىسى،
يا ماڭالماي راۋان چارۋىسى،
قايناپ كەتتى گاھى ھازىسى،
زەھەر بولدى يېگەن ھالۋىسى،
يىقىلغاننى يۆلە، ماتاڭچى!

نازىنىنغا چىققاندەك پوقاق،
توسۇۋالساڭ يولنى مۇشۇنداق،
خەق ماڭىدۇ بۇ يولدىن قانداق؟
ئاۋۇ يەرگە ئاپارغىن مانداق،
بىر چەتكىرەك قويە، ماتاڭچى!

گۇناھىڭنى قىلماي ئېتىراپ،
يىغلىساڭمۇ بىكار مىرقىراپ،
بىز قويىمىز ساڭا شىتىراپ،
يوقىلىسەن چوقۇم پېتىراپ،
ئۈچ يۈز تەڭگە تۆلە، ماتاڭچى!»

دېيەسلىتىپ قانۇن-كالامنى!
بۇزماق بولدى ئىسسىق ئۇۋامنى!
دەرھال تەتۈر كىيىپ جۇۋامنى،
ئالدىغىلا ئاتتىم بالامنى،
دېدى:«گېپىڭ ئۆرە، ماتاڭچى!»

غەزەپ بىلەن ئوينىتىپ قىڭراق،
ئاۋازىمنى چىقىرىپ چىڭراق،
ھۆركىرىدىم: «تۇرۇشقىن جىمراق!»
ئۇلار سەپنى قىلىشىپ ھىمراق،
دېدى: «گالغا ئۇرە، ماتاڭچى!

يامان بولساڭ كېلە نەچچىدىن،
بىز قورقمايمىز سەندەك گەپچىدىن.
گەر ئولاشساق بولۇپ يەتتىدىن،
بۇزۇلىدۇ ھەر كىم ئەپتىدىن،
بولسىمۇ گەر تۆرە، ماتاڭچى!»

تۇرۇپ قالدىم بىر ھازا مەڭدەپ،
تاپالماستىن ئىشىمغا ھېچ ئەپ،
ئەھۋالىمنى قايتىدىن دەڭسەپ،
ئاۋازىمنى مۇلايىم تەڭشەپ،
دېدىم: «مەن بىر چۆرە ماتاڭچى!»

ئوخشىمايلا قالدىم ھېچ ئەرگە،
سەل تىترىدىم چۆمۈلۈپ تەرگە،
تۇمىقىمنى تاشلىدىم يەرگە،
دېدىم:«ئەقلىم توشمايدۇ سەرگە،
مەن زېھنى بەك خىرە ماتاڭچى!

تىجارىتىم ئەمەس بەك راۋان،
ئۈچ بالامنى باقىمەن ئاران،
بۇ دوقمۇشتا قويساڭلار ئامان،
چاي تۇتىمەن كەلسەڭلار قاچان،
مەن ئۈكلىگەن تېرە، ماتاڭچى!»

يەڭ شىمايلاپ ماتاڭ كەسلىدىم،
ئېغىزىغا تىقتىم، كەپلىدىم،
يەنە ئازراق يوللۇق سەپلىدىم،
يانچۇقىغا ئوبدان ئەپلىدىم،
دېدى: « بوپتۇ تۇرە، ماتاڭچى!»

مىڭ شۈكرىكىم قالماي غەزەپكە،
قايتتى ئۇلار بىردەك «ئەدەب»كە،
كېتىپ قالدى باشقا تەرەپكە،
مەن ئېرىشتىم دوستلۇق شەرەپكە،
دېدى:«ھۇزۇر سۈرە، ماتاڭچى!»

ئۆرۈلسىمۇ خەقنىڭ تەللىسى،
ئاۋۇسىمۇ كوت-كوت غەلۋىسى،
مەن دوقمۇشنىڭ بولۇپ سەركىسى،
دېدىم: «بولۇپ زامان تەلۋىسى،
ياشىۋالغىن بۆرە ماتاڭچى!»

2013-يىل 11-ئاينىڭ 17-كۈنى.يەكەن

zulpikar123

ياخشى چىقىپتۇ

azat007

نامىڭ دۇنياغا پىر كەتتى  ماتاڭچى!!!

7كۆكبۆرە

ياخشى يىزىلىپ ، دەل تىگىپتۇ .

ساتېرىك

سۆز -جۈملىلىرى بەك جايىغا چۈشۈپتۇ,ھەقىقەتەن ياخشى يېزىلغان ساتېرا بوپتۇ!

ئىدرسجان

ئا ماتاڭنى دوقمۇشتىن سەل يىراق قويلى تۇپا قونۇپ يۇرمىسۇن يەنە ياخشى يىپسىز قولڭىزغا دەرت كەلمىسۇن ماتاڭچى چاقچاق

سادا0998

راس ئېسىل چىقىپ كىتىپتۇ. ماتاڭچى كزۆرمىگەنمىدۇ. بۇنى ھې  ھې  ھې...
روھلان تورى Android يانفون تېرمىنالىدا يېزىلغان ئىنكاس

DIYARIM0997

روھلان تورى Android يانفون تېرمىنالىدا يېزىلغان ئىنكاس

قاراقاش

ياخشى يېزىلىپتۇ
روھلان تورى Android يانفون تېرمىنالىدا يېزىلغان ئىنكاس

salamjan33

تالانت باركەن جۇمۇ