مىكرو تىپتىكى مۇزىكىلىق تىياتىرى - بۆرە كەلدى

سىرداش

مىكرو تىپتىكى مۇزىكىلىق تىياتىرى - بۆرە كەلدى

روللاردا:

پادىچى بالا

قويلار

بۆرىلەر

دېھقانلار

ئورۇن : -

مەلۇم بىر يايلاق

سەھنە تۆزىلىشى : - سەھنىنىڭ ئوتتۇرىسىغا بىر قاشا قۇيۇلىدۇ . ئەتراپقا ئوت-چۆپلەر تىزىلىدۇ .




(پەردە ئېچىلىپ ياندىن بايان بېرىلىدۇ ، پادىچى بالا يايلاقنىڭ ۋە قويلارنىڭ شوخ تىتىك ھالىتىدىن ھۇزۇرلانماقتا)

ياندىن بايان –

گۈزەل كەتكەن بۇ زېمىندا ئۈمىد ھەر كۈنى كۈنلىرىنى مۇشۇ يايلاقتا قويلار بىلەن ئۆتكۈزەتتى ، كۈندە كىلىدىغان بىر خىل رېتىمدىن ئۇ گاھ خۇشال بولسا گاھ ئىچى پۇشاتتى . ئۇنداقتا بۆگۈن ئۇ كۈنىنى قانداق ئۆتكۈزىدۇ ؟

(مۇزىكا بېرىلىدۇ ، ئۈمىد راۋابىنى چېلىپ قويلىرىنىڭ شوخ تىتىكلىكىدىن ھۇزۇر ئالىدۇ ، قويلار مۇزىكىغا ئەگىشىپ ئۇسسۇل ھەرىكەتلىرى بىلەن سەھنىگە چىقىدۇ)

( ئۈمىد قويلىرى بىلەن ئويناپ ئىچى پۇشۇپ بىر ئىشنى كۆڭلىگە پۈكىدۇ )

ئۈمىد : - بۆرە كەلدى ! بۆرە كەلدى !!! ( قويلار قورىققىنىدىن بىر يەرگە يىغىلىشىپ تۇرىۋالىدۇ (ئېتىز – ئېرىقلاردا ئىشلەۋاتقان دېھقانلار يۈگۈرۈشۈپ بۆرىنى يۇقىتىش ئۈچۈن كېلىدۇ )

دېھقان ئا : - قېنى بۆرە قېنى ( ئۇ ھەر تەرەپنى ئىزدەيدۇ)

دېھقان ب : - قېنى گەپ قىلە ئۇكام بۆرە نەگە كەتتى ؟

ئۈمىد : - ھا ھا ھا ھا مەن سىلەرنى ئالداپ قويدۇم ، ئەسلى بۆرە كەلمىگەن ، مەن شۇ ئىچىم پۇشۇپ ...

دېھقان ئا : - نىمداق بالا سەن ؟ كىچىك تۇرۇپ يالغانچىلىقىنى قارا بۇنىڭ .

دېھقان ب : - ھەي ! قىلغىلى باشقا ئىش تاپالمىدىڭما ؟مۇشۇمۇ قىلىق بولدېمۇ ؟

(دېھقانلار ئاچچىقلاپ سەھنىدىن چۈشۈپ كېتىدۇ)( ئۈمىد ئۇلارنىڭ ئالدانغانلىقىنى كۆرۈپ قاتتىق كۈلىدۇ . )

ئۈمىد : -قوزىلىرىم مەن سىلەرنى ئالداپ قويدۇم بۆرە كەلمىدى بۇ يايلاقتا بۆرە نىمىش قىلسۇن ؟

( قويلار ئۆزلىرىنىڭ ئالدانغانلىقىنى ھىس قىلىشىپ ئۈمىدكە باتناپ ، پەرۋاسىز ئوتلايدۇ ،)( ئىچى سىقىلغان ئۈمىد يەنە بىر قېتىم قويلىرىنى ئالداپ بېقىشنى كۆڭلىگە پۈكىدۇ )

ئۈمىد : - بۆرە كەلدى !! بۆرە كەلدى !!! ( قويلار ئۇنىڭغا پىسەنىت قىلماي ، يەنە ئۆزلىرىنىڭ ئىشى بىلەن مەشغۇل بولىدۇ )

مۇزىكا رېتىمى ئۆزگىرىدۇ

( يىراقتىن بۆرىنىڭ ئاۋازى ئاڭلىنىدۇ )

ئۈمىد: - (جىددىيلىشىپ) بۆرە كەلدى !!!! ۋاي بۆرە .... بۆرە كەلدى !!!!

مۇزىكا رېتىمى ئۆزگېرىدۇ

( بۆرىلەر قاتتىق ھوۋلىشىپ ، ئۇسسۇل ھەرىكەتلىرى بىلەن چىقىدۇ . )( ئۆزلىرىنىڭ ئۇزۇق تاپقىنىدىن خۇشال بولىشىدۇ . بىر بۆرە مەخسۇس قويلار بىلەن يەنە بىرى ئۈمىد بىلەن قاتتىق جەڭ قىلىدۇ ، ئۈمىد قورىققىنىدىن قاچىدۇ بۆرە 1 ئۇنى قوغلاپ چىقىپ كېتىدۇ . بۆرە 2 قويلارنى بوغۇپ ئۆلتۈرىدۇ . بۆرە 1 ئارلىقتا كىرىپ بۆرە 2 بىلەن بىرلىكتە قويلارنى بوغۇپ ئۆلتۈرىدۇ . ئۈمىد كىرىپ بۆرە 1



نى نىشانلاپ ئېتىپ ئۆلتۈرىدۇ ئۇ سەھنە ئىچىدە ئۆلىدۇ ، بۆرە 2 نى ئۈركۈتۈپ سەھنە سىرتىدا ئېتىپ ئۆلتۈرىدۇ)

مۇزىكا رېتىمى ئۆزگىرىدۇ

(ئۈمىد ئۆلگەن قويلىرىغا قاراپ قاتتىق پۇشايمان قىلىدۇ ، ئاخىرىدا بىر قويىنىڭ ئازراق مىدىرلىغىنىنى كۆرۈپ ئۇنىڭ بېشىنى كۆتۈرۈپ تۇرۇشىغا ئۇ قوي ئېچىنىشلىق مەرەپ ئۈمىدنىڭ قولىدا جان بېرىدۇ ، ئۈمىد .ئىنتايىن ھەسرەت چىكىدۇ )

ئاخىرقى ياندىن بايان –

ساۋاقداشلار ,ئۈمىد ئۆزىنىڭ كۆڭلىنى خوش قىلىش ئۈچۈن بىر قېتىملىق يالغانچىلىق سەۋەپلىك ھەسرەت - نادامەتلەرگە دۇچار بولدى يالغان گەپ قىلغان ئادەمنىڭ راس گېپىگىمۇ باشقىلار ئىشەنمەيدۇ. شۇڭا بىز تۇرمۇشىمىزدا راسىتچىللىقنى ، ئەستايىدىللىقنى ھەر ۋاقىت ئۆزىمىزگە ئۆلچەم قىلىشىمىز كېرەك ئەلۋەتتە.



(بۇئەسەر 2011-يىلى 8-ئايدا ئۈرۈمچىدە يېزىلغان.ئۈرۈمچى شەھەرلىك 19-باشلانغۇچ مەكتەپ ئوقۇغۇچىلىرى رەپىتىس قىلغان)