بارلىق تورداش دوستلارغا‹6›(چوقۇم كۆرۈڭ)

ئامان

بارلىق تورداش دوستلارغا‹6›

بايقاش مائارىپ مۇنبىرىدىكى كونا-يېڭى بارلىق تورداش دوستلار، ياخشىمۇسىلەر؟

بايقاش مائارىپ مۇنبىرىمىز مۇنبىرىمىزدىكى كونا-يېڭى تورداش دوستلارنىڭ يېقىندىن قوللىشى ۋە تىرىشچانلىق كورسىتىشى نەتىجىسىدە سىجىل، ساغلام تەرەققىيات يولىدا كېتىۋاتىدۇ. بۇنىڭ بىلەن ئەزالار قوشۇنىمىز كۈنسېرى زورىيىپ، مۇنبىرىمىزدىكى مائارىپ ماتىرىياللىرىنىڭ پايدىلىنىشچانلىقى، سان ۋە سۈپىتى تەدرىجى تولۇقلىنىش ۋە مۇكەممەللىشىشكە قاراپ يۈزلەنمەكتە. بۇ نەتىجىلەر ھەممىمىزنى خوشال قىلىدۇ ۋە پەخىرلەندۈرىدۇ.

ئەمما بۇ نەتىجىلەر بىلەن بىللە يەنە مۇنبىرىمىزدە، مۇنبىرىمىزدىكى تورداشلاردا جىددى تۈزۈتىش ۋە  ئالدىنى ئېلىشقا تېگىشلىك بولۇۋاتقان بىر قاتار مەسىلىلەرمۇ ساقلانماقتا. ئۇ بولسىمۇ ئانا تىلىمىزغا، ئانا تىل-يېزىقىمىزغا ھۆرمەت قىلماسلىق مەسىلىسى.
بايقاش مائارىپ مۇنبىرىمىز- ئۇيغۇر تىل-يېزىقىنى ئۆزىگە قورال قىلغان، ئۇيغۇر مىللى مائارىپى ئۈچۈن خىزمەت قىلىشنى مەڭگۈلۈك نىشان قىلغان مائارىپچىلار مۇنبىرى. شۇڭا مۇنبىرىمىز ئانا تىلىمىزنى، ئانا تىل-يېزىقىمىزنىڭ ساپلىقىنى قوغدايدۇ! بىزنىڭ يازمىلىرىمىزدىكى خەت-ئىملانىڭ توغرىلىقىغا، سۆز-جۈملىلەرنىڭ توغرا ئىشلىتىلىشى ۋە راۋانلىقىغا، تىنىش بەلگىلەرنىڭ توغرا قويۇلىشىغا دىققەت قىلىش - ئۇيغۇر تىل-يېزىقىدا ساۋات چىقارغان، ئۇيغۇر تىل-يېزىقىدا ئوقۇتۇش خىزمىتى بىلەن شۇغۇللىنىۋاتقان بىزدەك ئوقۇتقۇچىلار  ئۈچۈن ئەڭ ئاددى ئەقەللى ساۋات! شۇنداقتىمۇ بىز بۇ نوختىنى بايقاش بىلدۈرگۈسى ۋە مۇناسىۋەتلىك تېما-ئىنكاسلار ئارقىلىق ھەر ۋاقىت تورداشلارنىڭ سەمىگە سېلىپ كېلىۋاتىمىز. ئەمما بۇ مەسىلە تورداش دوستلىرىمىزدا بۈگۈنگىچىلىك ساقلىنىپ كەلمەكتە. بولۇپمۇ بىر قىسىم تورداش دوستلارنىڭ مۇنبەردىكى تېما-ئىنكاسلىرىدا سۆزلەردە تاۋۇشلارنى ئارتۇق ياكى كەم يېزىش،  سۆز-جۈملىلەر توغرا ئىشلىتىلمەسلىك، سۆز-جۈملىلەر باغلاشماسلىق، تىنىش بەلگىلەرنى قويماسلىق، قويسىمۇ مۇۋاپىق ئورۇنغا قويماسلىق... قاتارلىق مەسىلىلەر ئېغىر دەرىجىدە ساقلىنىپ، تېما-ئىنكاس يوللىغۇچى تورداشلارنىڭ، جۈملىدىن مۇنبىرىمىزنىڭ ئىناۋىتى ۋە شان-شەرىپىگە داغ تەككۈزمەكتە. ھەممىمىز كۈندە دىگۈدەك مۇنبەرنى ئارىلاپ، تېما-ئىنكاسلارنى كۆرۈپ تۇرۇۋاتىمىز. «مەمەتنىڭ مۇنداق تېمىسىدا مۇنداق مەسىلە ساقلانغان»، «سەمەتنىڭ ماۋۇ ئىنكاسىدا مۇنداق مەسىلە ساقلانغان».... دەپ، بىر-بىرلەپ ئەمىلى مىساللارنى كەلتۈرۈشنىڭ ئورنى يوق.

بايقاش مۇنبىرى «مانداق دىمەكچى ئوخشايدۇ»، «مۇنداق دىگەن گەپمىكىن».... دىگەندەك قارغۇلارچە ئېنىقسىز تەسەۋۇرغا تايىنىپ ئوقۇيدىغان باشلانغۇچ مەكتەپ تۆۋەن يىللىق ئوقۇغۇچىلىرىنىڭ تاپشۇرۇق دەپتىرى ئەمەس، ياكى ھەركىم قولنىڭ ئۇچىدا، ئاغزىغا كەلگىنىچە جىجىلاپ قويىدىغان كىچىك بالىلارنىڭ مەشق دوسكىسىمۇ ئەمەس! ۋە ياكى چالا ساۋاتلار مۇنبىرىمۇ ئەمەس! بەلكى پۇتۇن دۇنيادىكى ئۇيغۇر يېزىقىنى تونۇيدىغان كىشىلەر كۆرىدىغان، ئۇيغۇر مىللىتىمىزنىڭ يېزىق، تور مەدەنىيىتىگە ۋەكىللىك قىلىدىغان، ئۇيغۇر مىللىتىنىڭ ئويغاق زىيالىلىرى ھىساپلىنىدىغان، ئۇيغۇر مىللىتىنىڭ مەدەنىيىتى ۋە تىل-يېزىقىنى سۆيىدىغان، ئۇيغۇر مىللىتىنىڭ مەۋجۇتلىقى ۋە گۈللىنىشىگە كۆڭۈل بۆلىدىغان، ئۆزىنىڭ سۆز-ھەركىتى ۋە ئەمەلىيىتى ئارقىلىق باشقىلارغا تەسىر كۆرسىتىدىغان ئوقۇتقۇچىلار مۇنبىرى!! باغۋەنلەر جەمگاھى!!!

بىزنىڭ مۇنبەردىكى تېما-ئىنكاسلاردا قالدۇرغان يېزىقىمىز يالغۇز ئۆزىمىزگە ۋەكىللىك قىلىپلا قالماستىن، بەلكى يەنە مىللى مەدەنىيىتىمىزگە، مىللى تىل-يېزىقىمىزنىڭ مەۋجۇتلۇقىغا، بىزنىڭ مىللى تىل-يېزىقىمىزغا بولغان پوزۇتسىيىمىزگە ۋەكىللىك قىلىدۇ. بىز ئانا تىل-يېزىقىمىزغا مۇناسىۋەتلىك بېرەر سۆز ئېچىلغاندا ھاياجىنىمىزنى باسالماي سۆزلەپ كېتىمىز: «قوش تىللىق بولۇش شەرەپ، ئانا تىلنى ئۇنتۇش نومۇس»، «ئانا تىل ئانام ئۈگەتكەن تىل»، «ئانا تىل-يېزىقىمىزنى قوغدايلى»....ۋاھاكازا.... ئەمما شۇ ئانا تىل-يېزىقنى ئىشلەتكەن ۋاختىمىزدا ئۆز گېپىمىزگە ئۆزىمىز ئەمەل قىلالمايمىز. بۇ نىمە ئۈچۈن؟!! مۇشۇنداق دەب-دەبىلىك قۇرۇق شۇئارلارنى توۋلاپ قويساق ئانا تىل-يېزىقىمىزنى ھۆرمەتلىگەنلىك، قەدىرلىگەنلىك ۋە سۆيگەنلىك بۇلامدۇ؟؟؟.... مىللى تىل-يېزىقىمىزغا ھۆرمەت قىلغانلىق ئۆزىمىزگە، مىللىتىمىزگە ھۆرمەت قىلغانلىقنىڭ مۇھىم ئىپادىسى ھىساپلىنىدۇ. چۈنكى ئۇيغۇر تىل-يېزىقىمىز ئۇيغۇر مىللىتىمىزنىڭ ئەڭ مۇھىم، شۇنداقلا بىردىن بىر بەلگىسى بۇلۇپ قالدى. ئۇيغۇر تىل-يېزىقىمىزنىڭ ساپلىقىنى، توغرىلىقىنى قوغداش- ئۆزىنى ئۇيغۇر ھىساپلىغۇچىلارنىڭ باش تارتىپ بولمايدىغان بۇرچى ۋە مەسئۇلىيىتى!

مۇشۇ مۇناسىۋەت بىلەن مۇنبىرىمىزدىكى بارلىق كونا-يېڭى تورداشلاردىن  كۈتىدىغىنىمىز: ئانا تىل-يېزىقىمىزنى قوغداش- ھەرگىزمۇ ئېغىزىمىزدىكى قۇرۇق شۇئارغا ئايلىنىپ قالمىسۇن! ئانا تىل-يېزىقىمىزغا بولغان ھۆرمىتىمىز ۋە مۇھەببىتىمىزنى ئۆزىمىزنىڭ تىل-يېزىق ئەمەلىيىتىمىزدە كۆرسىتەيلى!!!

بۈگۈندىن باشلاپ مۇنبەرگە يوللانغان تېما-ئىنكاسلار ئىچىدە ئۇيغۇر تىل-يېزىقىمىزغا ھۆرمەتسىزلىك قىلىدىغان يۇقارقىدەك ئەھۋاللار كۆرۈلسە ئەھۋالنىڭ ئېغىر-يىنىكلىكىگە قاراپ:▲دىققەت قىلىش ئەسكەرتىلىپ، تۇزۈتۇپ قويۇلىدۇ، ▲تېما-ئىنكاس ئىگىسىنىڭ مۇنبەر جۇغلانمىسىدىن مۇۋاپىق مىقتاردا مۇنبەر تىللاسى قايتۇرۇۋېلىنىدۇ، ▲پايدىلىنىش قىممىتى قانچىلىك يۇقۇرى بولۇشىدىن قەتئى نەزەر شۇنداق تېما-ئىنكاسلار بىردەك ئۆچۈرلىدۇ.

تېما-ئىنكاس يوللىغاندا «يوللاش» كۆزنىكىنى بېسىشتىن بۇرۇن يوللىماقچى بولغان تېما-ئىنكاسلارنىڭ خەت-ئىملاسى، سۆز-جۈملىلەرنىڭ راۋانلىقى، مەزمۇنى ۋە قۇر ئارلىقى قاتارلىق تەرەپلەرگە دىققەت قىلىشىڭلارنى، يوللىنىپ بولغاندىن كېيىن بىر قېتىم ئوقۇپ كۆزدىن كەچۈرۈشىڭلارنى تەۋسىيە قىلىمىز.

ئىستەك

ناھايىتى ئەھمىيەتلىك ، ئادەمنى ئويغا سالدىغان پىكىر بوپتۇ ، مەن بىرىنجى بۇلۇپ قوشۇلىمەن ، ئەگەر مەندە سىز دىگەندەك ئەھۋال كۆرۈلسە بارلىق جۇغلانما نۇمۇرنى ئېلۋالساڭلارمۇ مەن رازى ، ئۇ ماڭا نىسبەتەن بىر ئاھاھلاندۇرۇش سېگنالى بۇلۇپ قالىدۇ .

بەختىيار(بايقاش

ئامان ئاتامان تېمىڭىزغا كۆپ رەھمەت،مەنمۇ بۇ پىكىرلىرىڭىزنى قوللايمەن ھەمدە بۇنىڭىدىن كېيىن تېمىلارغا ئىنكاس يازغاندا ئاپتۇماتىك ئىملا تەكشۈرۈشنى بېسىپ،ئاندىن ئىنكاس يوللاشقا ئادەتلىنىمەن...

سەييارە0

مەنمۇ قوللايمەن،بۇندىن كىيىن تىما،ئىنكاس يازغاندا ئانا تىلغا ھۆرمەت قىلايلى،ئىملانى تەكشۇرۇپ ئاندىن يوللايلى.

قاراقۇرۇم

مەن ئاتامانىنىڭ پىكرىنى قۇللايمەن ، ئۆزىمىزنىڭ ئۇيغۇر تىل-يېزىقىمىزنىڭ ساپلىقىنى، توغرىلىقىنى قوغداش-ھەربىرىمىزنىڭ مەسئوليىتى ۋە بۇرۇچى.

يۈسۈف

مەنمۇ قوللايمەن،ۋە چوقۇم شۇنداق قىلىمەن

مەرىپەت

پىكرىڭىزنى قوللايمەن، ئۆزىمىزنىڭ تىل-يېزىقىنى ئۆزىمىز قەدىرلىمىسەك باشقىلار قەدىرلىمەيدۇ...
تىل-يېزىقىمىزنى قەدىرلەشنى ئاۋال ئۆزىمىزدىن باشلايلى!

pari

ئەسسالامۇ ئەلەيكۇم ، ئاتامان ، ياخشىمۇ سىز ؟ ناھايىتى ياخشى تېما يوللاپسىز  ، بۇ تېما بايقاش مۇنبىرىدىكى بارلىق ئەزالارغا ، جۈملىدىن ماڭا بىر قېتىملىق جىددى سىگنال بولدى ، راست دەيسىز بىز ھەممىمىز ، پۇتۇن دۇنيادىكى ئۇيغۇر يېزىقىنى تونۇيدىغان كىشىلەر كۆرىدىغان ،  ئۇيغۇر مىللىتىمىزنىڭ يېزىق، تور مەدەنىيىتىگە ۋەكىللىك قىلىدىغان، ئۇيغۇر مىللىتىنىڭ ئويغاق زىيالىلىرى ھىساپلىنىدىغان، ئۇيغۇر مىللىتىنىڭ مەدەنىيىتى ۋە تىل-يېزىقىنى سۆيىدىغان، ئۇيغۇر مىللىتىنىڭ مەۋجۇتلىقى ۋە گۈللىنىشىگە كۆڭۈل بۆلىدىغان، ئۆزىنىڭ سۆز-ھەركىتى ۋە ئەمەلىيىتى ئارقىلىق باشقىلارغا تەسىر كۆرسىتىدىغان ئوقۇتقۇچىلار مۇنبىرى!! باغۋەنلەر جەمگاھى!!! ئىشتىراكچىلىرى ، شۇڭا بىز شۇ « ئانام ئۆگەتكەن » ئۇيغۇر تىل -يېزىقىمىزنى سۆيەيلى ، قەدىرلەيلى ، قوغدايلى !! بۇ ئاغزىمىزدىكى قۇرۇق گەپ بولۇپ قالمىسۇن !
مەنمۇ بۇرۇن ۋاقىت ئالدىراشچىلىقىنى كۆزدە تۇتۇپ ئانچە دىققەت قىلماي كەلگەن ئىدىم ، شۇڭا مېنىڭدىمۇ كۆپىنچە ئىملا خاتالىقى كۆرۈلۈپ تۇردى . مەنمۇ بۇنىڭدىن كېيىن چوقۇم دىققەت قىلىمەن . ھەم باشقا كونا -يېڭى ئەزالارنىڭمۇ دىققەت قىلىشىنى ئۈمۈد قىلىمەن .

گۈلزار

<< ئانا تىلىڭ غۇرۇر ، مۇھەببەت ، ۋىجدان ، ئەقىدىنىڭ تىلى . ئۇ يىلىك ، مەرىپەت ، ھەقىقەت ، قۇدرەت ئۇنىڭدىن باشلىنىدۇ . باشقا تىللار گۇۋاھنامە ، شاھادەتنامە ، كاپالەتنامە ، ھوقوقنامە تىللاردۇر .
ئانا تىلىڭ ئۆز كۆزۈڭگە ئوخشايدۇ .قالغان تىللار كۆزەينەك ، دۇربۇن ، تېلىكسوپ ، مىكروسكوپ ... دېگەنلەرگە ئوخشايدۇ . ئۇلار ھەر قانچە ئىلغار بولسىمۇ ، كۆزۈڭ يەنىلا ساق بولىشى كېرەك .
ئانا تىل بىر ئادەمنىڭ ئادەمىيلىكىنى بەرپا قىلىشتا كەم بولسا بولمايدىغان ئامىل ، كېيىنكى مۇرەككەپ بىلشلەرنىڭ ئاساسى پەقەت ئانا تىل بىلەنلا سېلىنىدۇ . ئانا تىل ئادەمگە ئادەم بولىشنى ، نېمىنى سۆيۈشنى ۋە نېمىدىن نەپرەتلىنىشنى ئەڭ ياخشى ئۆگىتىدۇ . ئىنسان خاراكتىرى ئانا تىل ئارقىلىقلا ئۆزىنىڭ تاكاممۇللىقىنى يارىتىدۇ . ( ئۆزىنى ئىزدەش بوسۇغىسىدا ئابدۇقادىر جالالىدىن ) >> .

دىمەك، ئانا تىلىم ئانام بەرگەن تىل ، ئانام ھالال سۈتى بىلەن تېنىمگە سىڭدۈرگەن جان تىلىم. ئۇ ماڭا ئادەم بولۇشنى ، نىمىنى سۆيۈشنى  ۋە  نىمىدىن نەپرەتلىنىشنى ئۆگەتكەن  تىلىم .
سىز ئېيتقاندەك بۇ جان تىلىمىزنى قەدىرلىشىمىز ۋە ئۇنىڭ ساپلىقىنى قوغدىشىمىز كېرەك ھەم ئەمىليىتىمىزدە كۆرسىتىشىمىز كېرەك . جۇملىدىن مەنمۇ ئانا تىلىمىزنىڭ  ساپلىقىنى قوغداشنى ئۆزۈمدىن باشلايمەن .  ھەم بۇندىن كېيىنكى ھەر بىر سۆز -جۈملىلىرىمدە خاتالىق كۆرۈلسە، مۇنبەرداشلارنىڭ تەنقىدىي - پىكىر بېرىشىنى چىن كۆڭلۈمدىن ئۈمىد قىلىمەن ھەم تۈزىتىمەن .
   ئاگاھلاندۇرۇش بەرگىنىڭىزگە رەھمەت .

بايقاش

ھەمىمىز ئۆز ھەرىكىتىمىز ئارقىلىق ئانا تىلىمىزنى قوغدايلى! مۇنبەردىكى بارلىق ئەزالارنىڭ ئاتامان، باشقۇرغۇچى ۋە باشقا ئەزالار ئۈستىدىن نازارەت قىلىش ھۇقۇقى بولىدۇ. بۇ جەھەتتە مەسىلە بايقىغان ھامان ئەسكەرتىش بېرىش ئارقىلىق  ۋاقتىدا تۈزىتىۋېلىشغا ياردەم بىرەيلى!