ئابدۇقادىر جالالىدىن بىلەن يالقۇن روزى كۇچا مائارىپ سېستىمىسىدى...

tawpik521

ئابدۇقادىر جالالىدىن بىلەن يالقۇن روزى كۇچا مائارىپ سېستىمىسىدىكىلەرگە لېكسىيە سۆزلىدى

     كۇچا ناھىيىلىك « قوش تىل » ئوقۇتقۇچىلىرىنى تەربىيىلەش مەركىزىنىڭ ئالاھىدە تەكلىبىگە ئاساسەن  2013- يىل 5 – ئاينىڭ 14 – كۈنى چۈشتىن كېيىن ، شىنجاڭ پىداگوگىكا ئۇنىۋېرسىتېتى ئەدەبىيات ئىنىستىتوتىنىڭ پىروفېسسورى ، ئۇيغۇر ھازىرقى زامان ۋە بۈگۈنكى زامان ئەدەبىياتى يۆنۈلىشى بويىچە ماگىستىر ئاسپىرانتلار يېتەكچىسى ، ئەلنىڭ نەزىرىدىن ئۆتكەن ئىجتىھاتلىق ئەدىب ، يېتىلىۋاتقان ياش پەيلاسوپ ئابدۇقادىر جالالىدىن بىلەن دەرسلىك قۇرۇلۇشى مۇتەخەسىسى ، بۈگۈنكى دەۋر ئۇيغۇر ئەدەبىياتىدىكى ئۆتكۈر پىكىرلىك ، تەنقىدىي روھقا باي ئوبزورچى؛ مەسئۇلىيەت تۇيغۇسى كۈچلۈك پوبلىست ؛ خاسلىقى كۈچلۈك ، ئىزدىنىش روھىغا باي جەدىدىزىم تەتقىقاتچىسى ، كۈچلۈك قايىل قىلىش كۈچىگە ئىگە ناتىق يالقۇن روزى كۇچا ناھىيىلىك « قوش تىل » ئوقۇتقۇچىلىرىنى تەربىيىلەش مەركىزىدە مەخسۇس تېمىلىق لېكسىيە سۆزلىدى . بۇ قېتىمقى لېكسىيەگە « قوش تىل » ئوقۇتقۇچىلىرىنى تەربىيىلەش مەركىزىدىن 600 نەپەر ، كۇچا ناھىيىلىك مائارىپ سېستىمىسى ۋە قوشنا ناھىيەلەردىن كەلگەن ھەۋەسكار ، قەلەم ساھىبىلىرىدىن 400  نەپەر بولۇپ ، جەمئى 1000 نەپەردىن ئارتۇق كىشى قاتناشتى.

    بۇ قېتىمقى پائالىيەتتە ئالدى بىلەن ئۇستاز ئابدۇقادىر جالالىدىن « قوش تىل  ئوقۇتۇتۇشى » دىگەن ئۇقۇمنىڭ تارىختىن بۇيانقى ھەرخىل ئىپادىلىنىش ۋارىيانتلىرى ، تىل ئۆگىنىشكە ئەجداتلارنىڭ ئەزەلدىن ناھايىتى ئەھمىيەت بېرىپ كەلگەنلىكى ، شۇنداقلا تىل ئۆگىنىشنىڭ ئىنسانلارنىڭ ئۆسۈپ يېتىلىش باسقۇچىدىكى ئەڭ مۇۋاپىق مەزگىلى ، تىل ئۆگىنىشتىكى ياخشى ئۇسۇل ۋە ئىلغار تەجىرىبىلەر ... قاتارلىقلارنى چۆرىدەپ ، كۆپ تىللىق بولۇش ، كۆپ تىل ئۆگىنىشنىڭ موھىملىقى ۋە تارىخىي تەخىرسىزلىكىنى جوڭگو ۋە چەتئەلنىڭ سىياسى ئەھۋالى ، مائارىپ ئەھۋالى ۋە ئىلغار تەجىرىبىلىرى بىلەن بىرلەشتۈرۈش ئاساسىدا سېستىمىلىق ، ئىلمىي ، جانلىق ۋە قايىل قىلارلىق ھالدا شەرھىلەپ ئۆتتى .
    ئاندىن ئەدىب يالقۇن روزى « بىزگە قانداق ئوقۇتقۇچىلار كېرەك » دېگەن تېمىنى چۆرىدەپ ، ئوقۇتقۇچىلاردىكى ئۆزىنى بېغىشلاش روھى ، ئوقۇتقۇچىلاردا بولۇشقا تېگىشلىك ساپا ، ئەخلاق - پەزىلەتلەر ، پەرزەنت تەربىيىسى ... قاتارلىقلار ھەققىدە توختىلىپ ، بۈگۈنكى بىرقىسىم ئوقۇتقۇچىلىرىمىزنىڭ روھى ھالىتى بىلەن تارىختىكى ئابدۇقادىر داموللا ، مەمتىلى ئەپەندى ... قاتارلىق يېڭى مائارىپ باشلامچىلىرىنىڭ مائارىپ ئەقىدىسى ۋە كەسپكە ئۆزىنى بېغىشلاش روھىنى ئۆزئارا سېلىشتۇرۇپ ،  ئوقۇتقۇچىلىق ئەقىدىسىنى كۈچەيتىشنىڭ نۆۋەتتىكى مىللىي مائارىپنى يۈكسەلدۈرۈشتىكى تەخىرسىز زۆرۈرىيەت ئىكەنلىكىنى جانلىق پاكىتلار بىلەن دەلىللىدى . ئاخىرىدا « بىزگە بېسىم بىلەن باشقۇرۇلۇشقا ئادەتلەنگەن ئوقۇتقۇچىلار ئەمەس ، ئاڭلىقلىققا تايىنىپ ئۆزىنى ئىدارە قىلالايدىغان يۇقىرى ساپالىق ، ئىزدىنىش روھى كۈچلۈك ، ئەقىدىسى مۇستەھكەم ئوقۇتقۇچىلار قوشۇنى ؛ قائىدە – تۈزۈمگىلا ، بېسىمغىلا ئەمەس ، مەدەنىيلىككە تايىنىپ باشقۇرۇلىدىغان ئازادە مەكتەپ مۇھىتى كېرەك » دېگەن ئىدىيەنى ئالغا سۈردى .
ئاخىرىدا ئىككى ئۇستاز يىغىن ئىشتىراكچىلىرىنىڭ بىر قىسىم سۇئاللىرىغا جاۋاب بېرىپ ئۆتتى . كۇرسانتلار ۋەكىلى ئۇلارغا ئۆز ھۆرمىتىنىڭ سىمۋولى سۈپىتىدە گۈل ۋە دوپپا تەقدىم قىلدى . ئۈچ سائەتكە يېقىن داۋام قىلغان بۇ قېتىمقى لېكسىيە كۇچا ناھىيىلىك مائارىپ سېستىمىسىدىكى ئوقۇتقۇچىلار ئۈچۈن ئېيتقاندا بىر قېتىملىق ئىدىيە يېڭىلاش دەرسى بولۇپ قالدى .
مەنبە:يازغۇچىلار تورى

دىلكەش

نىمىدىگەن ياخشى ،بۇياقلارغىمۇ كىلىپ لىكسيە سۆزلىگەن بولسا بەك ياخشى بولاتتى .

/xs!下一个梦

بەك ياخشى . شۇنداق بولسا زە

بايقاش

لىكسىيەنىڭ سىن نۇسخسى بولغان بولسا بەك ياخشى بولاتتىكەن.

زەپەر

ئۇلارنىڭ لىكسىيەلىرىنىمۇ خۇتەن ۋىلايەتتىكى ھەر قايسى ناھيە شەھەرلەردىكى مائارىپچىلارمۇ تۇلۇق ئاڭلاۋاتىمىز . بۇ جەھەتتە ئىدارە رەھبەرلىرى ئۇلارنى بىرۋاستە ھەر قايسى ناھيە شەھەرلەردىكى مەكتەپلەرگە تەكلىپ قىلىپ لىكسىيە سۆشلەشنى ئۇرۇنلاشتۇرۇپ بىرىپ كىلىۋاتىدۇ . يىلدا بىر ئىككى قېتىم ئۇلارنىڭ لىكسىيەسىنى ئاڭلايمىز . راستىنلا ياخشى سۆزلەيدۇ

زەپەر

ئۇلارنىڭ لىكسىيەلىرىنىمۇ خۇتەن ۋىلايەتتىكى ھەر قايسى ناھيە شەھەرلەردىكى مائارىپچىلارمۇ تۇلۇق ئاڭلاۋاتىمىز . بۇ جەھەتتە ئىدارە رەھبەرلىرى ئۇلارنى بىرۋاستە ھەر قايسى ناھيە شەھەرلەردىكى مەكتەپلەرگە تەكلىپ قىلىپ لىكسىيە سۆشلەشنى ئۇرۇنلاشتۇرۇپ بىرىپ كىلىۋاتىدۇ . يىلدا بىر ئىككى قېتىم ئۇلارنىڭ لىكسىيەسىنى ئاڭلايمىز . راستىنلا ياخشى سۆزلەيدۇ

ئالماس

ناھايىتى ياخشى لىكسىيە بۇلۇپتۇ .مۇمكىن بولسا لىكسىيەنىڭ يازما ياكى ئاۋازلىق نۇسخىسى بولسىمۇ تەمىن ئەتكەن بولساق .

سىرداش

لىكسىيەنىڭ  ئاۋازلىق   نۇسقىلىرىنى  تاپقىلى  بۇلارمۇ؟

سىرداش

سىرداش يوللىغان ۋاقتى  2013-5-25 00:17
لىكسىيەنىڭ  ئاۋازلىق   نۇسقىلىرىنى  تاپقىلى  بۇلارمۇ؟

  مەن    ئۇستازنىڭ  لىكسىيەلىرىنى  توپلاۋاتقانتىم.