چەت ئەللەردە بايلار ئىز باسارلىرىنى قانداق تەربىيەلەيدۇ؟

سۈزۈك

چەت ئەللەردە بايلار ئىز باسارلىرىنى قانداق تەربىيەلەيدۇ؟

ئېلىمىزدە «بايلىق ئۈچ ئەۋلادتىن ئاشالمايدۇ» دەيدىغان گەپ بار. بۇ قەدىمدىن تارتىپ تەجرىبىلەر ئاساسىدا چىقىرىلغان يەكۈن.

غەرب ئەللىرىدە بۇنىڭ ئەكسىچە بولماقتا. غەرب ئەللىرىدىكى چوڭ كارخانىلارنىڭ كۆپىنچىسى پېيى بازارغا سېلىنغان شىركەتلەر بولغاچقا ، جەمەت شەكلىدىكى باشقۇرۇش ئەندىزىسى قوللىنىلمايدۇ. ئەگەر بايلارنىڭ پەرزەنتلىرى تىجارەتكە قىزىقسا ۋە باشقۇرۇش ئىقتىدارى بولسا، جەمەت كەسپىگە ۋارىسلىق قىلسا بولىدۇ؛ ئىقتىدارى بولمىسا ياكى تىجارەتكە قىزىقمىسا، كارخانا تىجارىتىگە كەسپىي باشقۇرغۇچى تەكلىپ قىلىدۇ.

ئون نەچچە يىل ئىلگىرى، ۋال كوچىسىدىكى مەلۇم ئاكسىيە شىركىتىدە ئىشلەيتتىم. بىر كۈنى شىركەت خوجايىنى سام مېنى لونگ ئارىلى (ئۇزۇن ئارال)دىكى ئۆيىدە ئۇيۇشتۇرۇلغان يازلىق يىغىلىشقا تەكلىپ قىلدى. سام كىچىكىدە گوللاندىيەدىن ئامېرىكىغا كۆچمەن بولۇپ كەلگەن ھەم 20 نەچچە يىل ئىلگىرى شىركەت قۇرغان ئىكەن. سامنىڭ مانخاتتاندىكى ئۆيى نيۇ يورك شەھىرىنىڭ باشلىقىنىڭ ئۆيىنىڭ يېنىدا بولۇپ، قىممىتى 50 ~ 40 مىليون دوللار ئىدى؛ لونگ ئارالىدا ئۇنىڭ يەنە بىر سۇ ئۈزۈش كۆلچىكى بار ھەشەمەتلىك داچىسى بولۇپ، قىممىتى 10 مىليون دوللاردىن ئاشاتتى، ئۇنىڭ بۇ ھەشەمەتلىك تۇرالغۇسى بايلار رايونىدا ئىدى.
سامنىڭ ئۆيىدە مېھمانخانا تېمىغا ئېسىلغان ماي بوياق رەسىم دىققىتىمنى تارتتى، بۇ ماي بوياق رەسىملەر چوقۇم ئىنتايىن قىممەت بولسا كېرەك، دەپ ئويلىدىم ئىچىمدە. كېيىن

بۇ ماي بوياق رەسىملەرنى سامنىڭ يالغۇز ئوغلى جامىسنىڭ سىزغانلىقىنى بىلدىم. شۇ كۈنىدىكى كەچلىك تاماقتا مەن جامىسنىڭ يېنىدا ئولتۇرۇشقا ئورۇنلاشتۇرۇلدۇم. ئۇ ئەمدىلا ئوتتۇرا مەكتەپنى پۈتكۈزگەن بولسىمۇ، ئەدەپلىك بولۇپ، دادىسىنىڭ بايلىقى بىلەن ئۆزىنى چوڭ تۇتىدىغان ھاكاۋۇر بەگزادىگە ئوخشىمايتتى.

جامىس مەن تۇنجى ئۇچراتقان ئامېرىكىلىق باينىڭ بالىسى ئىدى، كېيىن سامنىڭ ئۆيىدىكى پائالىيەتلەرگە دائىم قاتنىشىدىغان بولدۇم ۋە جامىسنىڭ دوستلىرى بىلەن تونۇشتۇم، ئارىسىدا سەنئەتكار، يازغۇچىلارنىڭ پەرزەنتلىرىمۇ بار ئىدى. ئۇلار ئۆزلىرى ياقتۇرغان كەسىپنى ئۆگىنىپ، ئۆزلىرى ياقتۇرغان ئىشنى قىلىدىكەن، ئادەتتىكى ئامېرىكىلىقتىن پەرقلەنمەيدىكەن.

شىمالىي ئامېرىكىدا، بولۇپمۇ ئامېرىكىدا بايلارنىڭ پەرزەنتلىرى خۇسۇسىي مەكتەپلەردە ئوقۇيدۇ. خۇسۇسىي مەكتەپلەر بىلەن ھۆكۈمەت قارىمىقىدىكى مەكتەپلەر ئاساسىي دەرسلەر ۋە ئوقۇش سۈپىتى جەھەتتە پەرقلەنمەيدۇ، بەلكى ئوقۇغۇچى، ئوقۇتقۇچىلار ساپاسىنىڭ تەكىتلىنىشى ۋە ئەدەپ - قائىدىگە ئەھمىيەت بېرىلىش جەھەتتە پەرقلىنىدۇ، بۇ ئەدەپ - قائىدىلەر ئەنئەنىدىن كېلىدۇ. بۇ يەردە تۇنجى خۇسۇسىي مەكتەپ ئىتون مەكتىپىنى تىلغا ئېلىشقا توغرا كېلىدۇ. ئىتوندا كۆزگە كۆرۈنگەن مەكتەپداشلارنىڭ تىزىملىكى بار، بۇ مەكتەپ باش ۋەزىردىن 19 نى تەربىيەلەپ چىققان. لېكىن ئىتوننىڭ كۆزگە كۆرۈنەرلىك نەتىجىلىرى بۇلارلا ئەمەس، بۇ مەكتەپ ئوقۇغۇچىلارنى جاپاغا چىدايدىغان، قىيىنچىلىققا باش ئەگمەيدىغان قىلىپ تەربىيەلەيدۇ. مەسىلەن، ئوقۇغۇچىلار ياغاچ كارىۋاتتا ئۇخلايدۇ، ھەركۈنى ئەتىگەن سائەت 5 تە ئورنىدىن تۇرۇپ ئېغىر جىسمانىي ئەمگەك قىلىدۇ...

ئېلىمىزدىكى بىر باي بالىسىنى ئىتوندا ئوقۇتماقچى بولغان، لېكىن ئۇ دېئاننانىڭ كىچىك شاھزادىسىنىڭ ئىتوندا ياغاچ كېسىۋاتقان سۈرىتىنى كۆرۈپ بۇ نىيىتىدىن يانغان. بۇنىڭدىن كۆرۈۋېلىشقا بولىدۇكى، جۇڭگولۇق بايلار بىلەن ئامېرىكىلىق بايلارنىڭ قىممەت قارىشىدا يەنىلا زور پەرق بار.
مەنبە ؛ بايقاش تورى