ئەڭ قەدىمىي رەسىم

20 مىڭ يىللار ئىلگىرىكى تاش قوراللار دەۋرىنىڭ ئاخىرقى مەزگىللىرىدە كىشىلەر تەبىئىي غارلاردا ياشايتتى، رەسساملىق ئەنە شۇ چاغلاردىلا بارلىققا كەلگەنىدى. 1879 - يىلى ئىسپانىيىنىڭ شىمالىي قىسمىدىكى سانتاندېرنىڭ شەرقىگە 35 كىلومېتىر كېلىدىغان جايدا ئارتامىرا غارى بايقالغان. غار ئىچىدە نۇرغۇن رەسىملەر بار بولۇپ، غاردىكى قىيا تاشلارنىڭ ئېگىز-پەسلىكىگە ئاساسەن، بۇغا، ئات، كالا قاتارلىق ھايۋانلارنىڭ رەسىمى ناھايىتى ئۇستىلىق بىلەن سىزىلغان. فرانسىيىنىڭ جەنۇبىدىكى مونتېگنېكنىڭ جەنۇبىغا توغرا كېلىدىغان راسىك غارى 1940-يىلى بايقالغان. غاردىكى قىيا تاشلارغا نۇرغۇن رەڭلىكرەسىملەر سىزىلغان، قىيا تاشلارنىڭ ئارىسىدىن ئېقىپ چىققان ھاك تېشى پاراشوكىنىڭ كرىستاللىرى رەسىملەرنىڭ يۈزىدە قېتىپ قېلىپ خۇددى سۈزۈك سۇۋالغۇ سۈرگەندەك پەردە ھاسىل قىلغاچقا، رەسىملەر ئىنتايىن ياخشى ساقلانغان. رەسىملەرنىڭ چوڭ-كىچىكلىكى بىردەك ئەمەس، سانى100 دىن ئاشىدۇ. رەسىملەرنىڭ ئىچىدە ئات سىزىلغان رەسىم ھەممىدىن كۆپ. ئۇنىڭدىن قالسا كالا،بۇغا، كەركىدان، قۇش قاتارلىقلار سىزىلغان ھەمدە قوپال سىزىلغان ئادەم رەسىملىرىمۇ بار. بۇ رەسىملەرنىڭ كۆپىنچىسى سىزىقلىرى قوپال ئىزنا رەسىم ۋە تەسۋىر رەسىم بولۇپ، قارا سىزىق ئىچىگە ئېلىنغان دائىرىگە قىزىل، قارا، قوڭۇر رەڭلەر ئارقىلىق ھايۋانلارنىڭ رەسىمى ناھايىتى جانلىق سىزىلغان. قىيا تاش رەسىملىرىنىڭ ئىچىدە يەنە ئۇچى ئۆتكۈر ئەسۋاب ئارقىلىق جىجاپ سىزىلغان رەسىملەرمۇ خېلى كۆپ. رەسىملەرنى خىمىيىلىك ئۇسۇل ئارقىلىق تەكشۈرۈپ ئۆلچىگەندە، رەسىملەرنىڭ سىزىلغىنىغا 15 مىڭ يىل بولغانلىقى ئىسپاتلانغان. فرانسىيىنىڭ مەدەنىيەت يادىكارلىق ئورۇنلىرى بۇ قىيا تاش رەسىملىرىنى ساقلاپ قېلىش ئۈچۈن بۇ غارنى تاقاپ غارنىڭ يېنىغا «راسىك غارى كۆرگەزمىخانىسى» ناملىق غار ياساپ قويغان.