ئۈرۈمچى قاتناش ساقچى تارماقلىرى نىمكەش ئاپتوموبىل سودىسىدا «ۋاكالىتەن بېجىرگۈچىلەر» گە ئىشەنمەسلىكنى ئەسكەرتتى
18–ئىيۇن، مۇخبىرنىڭ ئۈرۈمچى شەھەرلىك جامائەت خەۋپسىزلىك ئىدارىسى قاتناش ساقچى تارماق ئەترىتى ئاپتوموبىل باشقۇرۇش ئورنىدىن ئىگىلىشىچە، نۆۋەتتە ئاپتوموبىل باشقۇرۇش ئورنى ئايدا تەخمىنەن 1500 موتورلۇق قاتناش ۋاسىتىلىرىنى يۆتكەپ تىزىملاش رەسمىيىتىنى بېجىرىۋاتقان بولۇپ، بۇنىڭ 85% ى نىمكەش ئاپتوموبىللارنىڭ نوپۇسىنى يۆتكەش رەسمىيىتى ئىكەن. ئاپتوموبىل باشقۇرۇش ئورنىدىكى خادىم يېقىندا ئارقىمۇ ئارقا ساختا رەسمىيەت بىلەن ئاپتوموبىل باشقۇرۇش كەسپىنى بېجىرگەن ئەھۋالنى بايقىغان. شۇنىڭ بىلەن ئاپتوموبىل باشقۇرۇش ئورنى ئاپتوموبىل باشقۇرۇش بۆلۈمىنىڭ باشلىقى مېڭ ۋېنۋۇ تۆت خىل ساختا ئەھۋالنى خۇلاسىلەپ، شەھەر ئاھالىلىرىنىڭ ئاپتوموبىللارنىڭ نوپۇسىنى يۆتكەشتە ياكى نىمكەش ئاپتوموبىل سودىسىدا ئالدىنىپ قېلىشنىڭ ئالدىنى ئېلىشىنى ئەسكەرتتى.
6–ئىيۇنغىچە، ئۈرۈمچى شەھىرىدىكى موتورلۇق قاتناش ۋاسىتىلىرىنىڭ سانى 694 مىڭ 920 گە يەتكەن ، بۇنىڭ ئىچىدە شەخسىي ئاپتوموبىللارنىڭ سانى 510 مىڭ 342 ئىكەن. 2012–يىلدىن باشلاپ، نىمكەش ئاپتوموبىل سودىسى يىلسېرى كۆپىيىشكە باشلىغان. شۇ يىلى شەھەر بويىچە 47 مىڭ 300 دانە موتورلۇق قاتناش ۋاسىتىسىنىڭ نوپۇسىنى يۆتكەش (يەنى، نىمكەش ئاپتوموبىللارنىڭ نوپۇسىنى يۆتكەش) رەسمىيىتى بېجىرىلگەن؛ 2013–يىلى شەھەر بويىچە 59 مىڭ 568 دانە موتورلۇق قاتناش ۋاسىتىسىنى يۆتكەش رەسمىيىتى بېجىرىلگەن؛ بۇ يىل يانۋاردىن 15–مايغىچە، ئاپتوموبىل باشقۇرۇش ئورنى 26 مىڭ 566 دانە نىمكەش ئاپتوموبىلنىڭ نوپۇسىنى يۆتكەش رەسمىيىتىنى بېجىرگەن.
