ئەڭ يېڭى خەۋەرلەرگە ئاساسلانغاندا، ئەقلىي ئىقتىدارلىق يانفونلارنىڭ ئوغۇرلىنىش دىلولىرى ئىزچىل كۆپىيىۋاتقان مۇشۇنداق بىر ئەھۋال ئاستىدا، «ئاكتىپلاشتۇرۇشنى قۇلۇپلاش» ئىقتىدارى قوشۇلغان يانفونلارنىڭ ئوغۇرلىنىش نىسبىتى تۆۋەنلىمەكتە. بۇ يىل 5-ئايغىچە ھېسابلىغاندا، نىيۇيورك شەھىرىدىكى ئايفونلارنىڭ ئوغۇرلىنىش نىسبىتى %19 تۆۋەنلىگەن، ئوخشاش مەزگىلدە، سامسۇڭ يانفونلىرىنىڭ ئوغۇرلىنىش نىسبىتى %40 ئاشقان.
بۇ يىل 5-ئايدا، ئامېرىكا كالىفورنىيە پارلامىنتى بىر تۈرلۈك قانۇن لايىھىسىنى ماقۇللىغان بولۇپ، ئۇنىڭدا بارلىق ئەقلىي ئىقتىدارلىق يانفونلارغا چوقۇم «ئاكتىپلاشتۇرۇشنى قۇلۇپلاش» ئىقتىدارى قوشۇلۇپ، ئوغۇرلىنىشتىن ساقلىنىشى كىرەكلىكى تەلەپ قىلىنغان. ئۇلارنىڭ قارىشىچە، يانفونغا بۇ خىل ئىقتىدار قوشۇلغاندىن كېيىن ئوغرىلىنىش نىسبىتى تۆۋەنلەيدىكەن.
يېڭى بىر ئەۋلاد ئاندىرويىد سىستېمىسى بۇ يىلنىڭ ئاخىرىدا ئېلان قىلىنىدۇ، بەلكىم، گۇگېل يېڭى نەشىردىكى KitKat سىستېمىسىغا ياكى ئاندىرويىد 5.0 (5.0 Lollipop) گە يۇقاردا تىلغا ئېلىنغان «ئاكتىپلاشتۇرۇشنى قۇلۇپلاش» ئىقتىدارىنى كىرگۈزۈشى مۇمكىن.
ئەمەلىيەتتە، گۇگېل شىركىتى ئاندىرويىد ئۈسكۈنىلىرىنى باشقۇرغۇچ (Android Device Manager) ئىچىگە بىر تۈرلۈك بىخەتەرلىكنى ساقلاش ئىقتىدارىغا ئىگە ئەپ قوشقان بولۇپ، بۇ خىل ئەپ ئابونتلارنى يۈتتۈرۈپ قويغان ئۈسكۈنىلىرىنىڭ جۇغراپىيەلىك ئورنىنى تېپىش ئىمكانىيىتىگە ئىگە قىلالايدىكەن، شۇنداقلا يىراقتىن كونتىرول قىلىش، ئىكرانىغا مەخپىي نومۇر بېكىتىش ۋە يانفوندىكى بارلىق ئۇچۇرلارنى ئۆچۈرىۋېتىش قاتارلىق مەشغۇلاتلارنى ئېلىپ بېرىشنى ئىشقا ئاشۇرغان ئىكەن. بىراق، ئەگەر باشقىلار بۇ يانفونغا قارىتا «زاۋۇتتىن چىققان ھالىتىگە قايتۇرۇش» مەشغۇلاتى ئېلىپ بارغاندىن كېيىن، يۇقارقى بىخەتەرلىكنى ساقلاش ئىقتىدارى ئۈنۈمىنى يوقىتىدىكەن.
