كۇچا ناھىيەسىنىڭ كونا شەھەر رايونىدىن تاڭ سۇلالىسىغا تەۋە 3000 دانىدىن ئارتۇق يارماق تېپىلدى

   كۇچا ناھىيەسىنىڭ كونا شەھەر رايونىدىكى بىر قۇرۇلۇش مەيدانىدىن تاڭ سۇلالىسى دەۋرىگە تەۋە 3000 دانىدىن ئارتۇق قەدىمىي يارماق تېپىلدى . بۇ كۇچا ناھىيەسى كونا شەھەر رايونىدا بۇلتۇر 16-ئىيۇل كەپىلىك مەھەللىلەرنى ئۆزگەرتىش قۇرۇلۇش نەق مەيدانىدىن مىڭ دانىدىن ئارتۇق كۈسەن قەدىمىي يارمىقى تېپىلغاندىن كېيىنكى يەنە بىر قېتىملىق تاڭ سۇلالىسى دەۋرىگە تەۋە قەدىمىي يارماق تېپىلىشى بولۇپ ھېسابلىنىدۇ .

   نەق مەيداندىكى قۇرۇلۇش قىلغۇچى خادىملارنىڭ تونۇشتۇرۇشىچە ، 24-ئاپرېل چۈشتىن بۇرۇن سائەت 10:00 ئەتراپىدا، قۇرۇلۇش ئىشچىلىرى كونا شەھەر رايونىنىڭ 1-نومۇرلۇق قۇرۇلۇش ئورنىدا توپا قېزىۋاتقاندا بۇ يارماقلارنى بايقىغان ۋە ئۆز ۋاقتىدا مۇناسىۋەتلىك ئورۇنلارغا ئەھۋال دوكلات قىلغان .

  ئىگىلىنىشىچە ، بۇ قېتىم قېزىۋېلىنغان يارماقلار 1300 يىلدىن ئارتۇق تارىخقا ئىگە ، تاڭ سۇلالىسى دەۋرىگە تەۋە بولۇپ، قەدىمىي كۈسەننىڭ سىياسىي ، ئىقتىسادىي ، مەدەنىيەت-سەنئەت جەھەتتىكى تەتقىقاتلارنى چوڭقۇرلاشتۇرۇش ۋە كۈسەن بىلەن تاڭ سۇلالىسىنىڭ سودا-سېتىق ، مەدەنىيەت ئالماشتۇرۇش جەھەتتىكى تارىخىي ئىزنالىرىنى ماددىي ئىسپات بىلەن تەمىنلەش جەھەتتە مۇھىم تەتقىقات قىممىتىگە ئىگە ئىكەن

ھەمبەھىرلىنىڭ