جۇڭگو ئاخبارات تورىنىڭ 11-مارت خەۋىرى: 3-ئاينىڭ 11-كۈنى بېيجىڭ ۋاقتى 10 دىن 07 مىنۇت ئۆتكەندە، ليۇئەن شەھىرى توقۇمۇچىلىق زاۋۇتى چوڭ كۆۋرۈكى ئەتراپىدا قوراللىق تۇتقۇن قىلىش ۋەقەسى يۈز بەردى. جىنايەت گۇماندارى قېچىش جەريانىدا ساقچىغا قارىتىپ ئوق ئېتىپ، يولدىن ئۆتۈۋاتقان ئىككى ئوتتۇرا ياشلىق ئايالنىڭ يارىلىنىشىنى كەلتۈرۈپ چىقاردى. نۆۋەتتە يارىدارلا دوختۇرخانىدا قۇتقۇزىلىۋاتقان بولۇپ، يارا ئەھۋالى تۇراقلاشقان.
ئىگىلىنىشىچە، ۋەقە ليۇئەن شەھىرى گاۋچېڭ يولى چوڭ كۆۋرىكىدە يۈز بەرگەن بولۇپ، شۇ ۋاقىتتا ساقچى ئاپتوموبىلى بىر كۈلرەڭ مىنىبۇسنى قوغلىغان؛ جىنايەتچى ساقچىلار تەرىپىدىن توختىتىلغاندىن كېيىن، جىنايەت گۇماندارى ئاپتوموبىلدىن چۈشۈپ بىر ئۈچ چاقلىق ۋېلسىپىتنى گۆرۆگە ئېلىۋالغان، ۋېلىسىپىت مىنگەن ئايال يارىلانغان، جىنايەت گۇماندارى پۇرسەتتىن پايدىلىنىپ قېچىپ كەتكەن.
قورال تۇتۇپ باشقىلارنى تۇتقۇن قىلغان جىنايەت گۇماندارى ليۇئەن شەھىرى گاۋچېڭ يولى كۆۋرۈكىنىڭ غەربىي قىسمىدىكى بىر تورخانىغا كىرىۋالغان. قوراللىق ساقچى، ئالاھىدە ساقچى، قاتناش ساقچىسى، جىنايى ئىشلار ساقچىسى قاتارلىقلارنىڭ ھەممىسى يېتىپ كېلىپ، ئەتراپنى قورشىغان. مەرگەنلەر تورخانىنىڭ ئەتراپىدىكى ئېگىز بىنالارغا ئورۇنلاشتۇرۇلغان.
ليۇئەن ساقچىلىرىنىڭ بېيجىڭ ۋاقتى 18 دىن 40 مىنۇت ئۆتكەندىكى ئۇچۇرىغا ئاساسلانغاندا، سەككىز سائەتلىك تىركىشىشتىن كېيىن، قوراللىق تۇتقۇن قىلش ۋەقەسىدىكى تۇ فامىلىلىك (屠某) جىنايەت گۇماندارى ساقچىلار ۋە ئۇنىڭ ئۆيىدىكىلەرنىڭ نەسىھەت قىلىشى نەتىجىسىدە ئاكتىپلىق بىلەن تۇتقۇن قىلىنغۇچىنى قويۇپ بېرىپ، قورالنى تاشلاپ تەسلىم بولۇپ، تورخانىدىن مېڭىپ چىققان، ئۇنىڭدىن كېيىن ليۇئەن ساقچىلىرى ئۇنى تېز سۈرئەتتە كونترول قىلغان. شۇنىڭ بىلەن 3.11 قوراللىق تۇتقۇن قىلىش دېلوسى مۇۋەپپەقىيەتلىك بىر تەرەپ قىلىنغان.
تەرجىمىدە: ھاجىم
