مېترو 1 - لىنىيىسىدىكى ھەرقايسى بېكەتلەرنىڭ سخېمىلىق خەرىتىسى

ئاسىيا كىندىكى تورى خەۋىرى : تۈنۈگۈن ، يەنى 21 - يانۋار مۇخبىرنىڭ ئۈرۈمچى شەھەرلىك قۇرۇلۇش كومىتېتىدىن ئىگىلىشىچە ئۈرۈمچىدىكى مېترو 1 - لىنىيىسىنىڭ توپا قۇرۇلۇش ، نازارەت قىلىپ باھالاپ تەكشۈرۈش ئورۇنلىرىنى خېرىدارلىققا چاقىرىش خىزمىتى ئوڭۇشلۇق ئاياغلاشقان بولۇپ ، پۈتۈن لىنىيە 21 بېكەت ۋە لايىھىدىكى باشقا 6 لىنىيە بىلەن ئالماشقىلى بولىدىكەن ، ئۇندىن باشقا ھەر بىر بېكەت ئۆزگىچە يېڭىلىق بىلەن ياسىلىدىكەن . ئىگىلەشكە قارىغاندا مېترو 1 - لىنىيىسىنىڭ ئومۇمى مۇساپىسى 27.6 كىلومېتىر بولۇپ ، لىنىيىلەرنىڭ ھەممىسى يەر ئاستىدا بولىدىكەن . ئومۇمى لىنىيىگە 21 بېكەت تەسىس قىلىنىدىغان بولۇپ ، ھەر بىر بېكەت ئارىلىق مۇساپىسى 1.3 كىلومېتىر . جەنۇبتا ئۈچتاشتا باشلىنىپ ، شىنجاڭ ئۇنىۋېرسىتېتى، دۆڭكۆۋرۈك ، ئاققوۋۇق ، تۆگەدەڭ ، شىنشىڭ كوچىسى ، يىكەنكۆل مەيدانى ، يىكەنكۆل شىمالى يولى ، ۋاڭجىيالىياڭ ، سەككىز قەۋەت ، كىچىك ساي ، جوڭيىڭگوڭ ، تۆمۈريول ئىدارىسى ، تەنتەربىيە مەركىزى ، ئۆسۈملۈكلەر باغچىسى ، مېھمان كۈتۈش يولى ئېغىزى ، سەنگوڭ ، شۈەنرېندۆڭ ، چوڭ دىۋوپۇ قاتارلىق بېكەتلەرنى بېسىپ ئۆتۈپ خەلقئارا ئايروپورتتا ئاخىرلىشىدىكەن . مېترو 1 – لىنىيىسىگە 7 ئالمىشىش بېكىتى ئورۇنلاشتۇرۇلغان بولۇپ ، بۇ بېكەتلەر ئايرىم - ئايرىم ھالدا ئاققوۋۇق ، يىكەنكۆل مەيدانى ، سەككىز قەۋەت ، تۆمۈريول ئىدارىسى ، ئۆسۈملۈكلەر باغچىسى ، شۈەنرېندۆڭ ۋە خەلقئارا ئايروپورت بولۇپ ، لايىھىدىكى باشقا 6 لىنىيە بىلەن ئالماشقىلى بولىدىكەن . ئىگىلەشكە قارىغاندا يۇقىرىدىكى بېكەت ناملىرى ۋاقىتلىق بېكىتىلگەن بولۇپ ، ئۈزلۈكسىز مۇكەممەللىشىپ ياخشىلىنىدىكەن .