گېرمانىيە «ئەينەك گېزىتى»نىڭ 11-ئاينىڭ 25-كۈنىدىكى دوكلاتىغا ئاساسلانغاندا، ئەڭ يېڭى تەكشۈرۈشتە كۆرسىتىلىشىچە، گېرمانىيدىكى مىليون ئامېرىكا دوللىرى مەبلىغى بار بايلارنىڭ سانى ئامېرىكا بىلەن ياپونىيىدىن قالسىلا دۇنيا بويىچە 3-ئورۇنغا تىزىلغان.
ئەگەر ياۋرو بويىچە ھېسابلىغاندا، ئومۇمىي مۈلكى 740 مىڭ ياۋرو (تەخمىنەن 6 مىليون 105 مىڭ يۈەن)دىن ئاشقان كىشىلەر «مىليونېر» سانىلىدۇ. ستاتىستىكا قىلىنىشىچە، گېرمانىيىدىكى «مىليونېر بايلار»نىڭ سانى 2012-يىلى 1 مىليونغا يەتكەن بولۇپ، 2011-يىلىدىكى 951 مىڭدىن %6.7 ئېشىپ، دۇنيا بويىچە 3-ئورۇنغا تىزىلغان، بۇ دۇنيادىكى ھەر 12 مىليونېرنىڭ ئىچىدە بىر نەپىرى گېرمانىيىلىك ئىكەنلىكىدىن دېرەك بېرىدۇ.
بۇنىڭدىن سىرت، «مىليونېر بايلار»نىڭ سانىدا ئېشىش ئەھۋالى ئەڭ تېز بولغان بىر قانچە دۆلەت ئايرىم-ئايرىم ھالدا جۇڭگو (%14.3)، ئاۋسترالىيە (%15) ۋە كورىيە (%10.9) بولغان بولۇپ، سەۋەبى بولسا ئاسىيا، تىنچ ئوكيان رايونىدا توختىماستىن مۇۋەپپەقىيەت قازانغان سودىگەرلەر مەيدانغا كېلىشكە باشلىغان.
نۆۋەتتە، ئامېرىكا بىلەن كانادادىكى مىليونېرلارنىڭ سانى پۈتۈن دۇنيا ئومۇمىي سانىنىڭ 3/1 قىسمىنى ئىگىلەيدۇ، لېكىن بەزىلەر، شىمالىي ئامېرىكىدىكى مىليونېرلار سانى 2015-يىلى ئەتراپىدا ئاسىيا، تىنچ ئوكيان رايونىدىن ئېشىپ كېتىدۇ، دەپ پەرەز قىلغان. يەنە بەزى مۇتەخەسسىسلەر، گېرمانىيە ھەتتا ياۋروپادىكى مىليونېرلارنىڭ سانى يەنىمۇ ئېشىپ بارىدۇ، دەپ بىلدۈرگەن.