شىنخۇا تورى ۋاشىنگىتون 13-نويابىر تېلېگراممىسى: ئامېرىكا مالىيە مىنىستىرلىقى 13-نويابىر ئىلان قىلغان سانلىق مەلۇماتتا كۆرسىتىلىىشىچە، بۇ يىل 10-ئايدا فېدراتسىيە مالىيە قىزىل رەقىمى 120 مىليارد ئامېرىكا دوللىرى بولغان بولۇپ، بۇلتۇرقى ئوخشاش مەزگىلدىكى 98 مىليارد 500 مىليۇن ئامېرىكا دوللىرىدىن خېلىلا يۇقىرى بولغان.
سانلىق مەلۇماتتا كۆرسىتىلىشىچە، 10-ئايدا، ئامېرىكا فېدراتسىيە مالىيە كىرىمى تەخمىنەن 184 مىليارد 300 مىليۇن ئامېرىكا دوللىرى بولۇپ، بۇلتۇرقى ئوخشاش مەزگىلدىكىدىن 13 پىرسەنت يۇقىرلىغان، مالىيە چىقىمى 304 مىليارد 300 مىليۇن ئامېرىكا دوللىرى بولۇپ، بۇلتۇرقى ئوخشاش مەزگىلدىكىدىن 16 پىرسەنت يۇقىرلىغان.
9-ئاينىڭ ئاخىرى ئاياقلاشقان 2012 مالىيە يىلىدا، ئامېرىكا فېدراتسىيەسىنىڭ مالىيە قىزىل رەقىمى جەمئىي 1 تىرلىيۇن 89 مىليارد ئامېرىكا دوللىرىغا يېتىپ، ئۇدا تۆت مالىيە يىلى تىرلىيۇن ئامېرىكا دوللىرىلىق ئۆتكەلنى بۆسۈپ ئۆتكەن. مالىيە قىزىل رەقىمىنىڭ دۆلەت ئىچى ئىشلەپچىقىرىش ئومۇمىي قىممىتىدىكى سېلىشتۇرمىسى يەتتە پىرسەنت بولۇپ، 2011 مالىيە يىلىدىكى 8.7 پىرسەنتتىن تۆۋەن بولغان.
يۇقىرى نوقتىدىن چۈشمەيۋاتقان مالىيە قىزىل رەقىمى ئامېرىكا ھۆكۈمىتىنىڭ مالىيەسىنىڭ سىجىل رىقابەتكە دۈچ كېلىۋاتقانلىقىنى چۈشەندۈرۈپ بېرىدۇ.