شىنخۇا تورى ، شاڭخەي ، 29–ئاپرېل تېلېگراممىسى : يۈز يىلدىن بۇيانقى كۈتۈش ، سەككىز يىلدىن بۇيانقى تەييارلىق ئارقىلىق ، جۇڭگو 2010–يىللىق شاڭخەي دۇنيا يەرمەنكىسى 30–ئاپرېل كەچتە خۇاڭپۇجياڭ دەرياسى بويىدىكى دۇنيا يەرمەنكىسى باغچا رايونىدا داغدۇغىلىق ئېچىلىدۇ . پۈتۈن يەر شارىدىن كەلگەن 189 دۆلەت ۋە 57 خەلقئارا تەشكىلات يەرمەنكىگە قاتنىشىپ ، دۇنيا يەرمەنكىسىنىڭ 159 يىللىق تارىخىدىكى<< ئەڭ >> نى يارىتىدۇ ،  جۇڭگو شاڭخەيدە دۇنيادىكى مىسلىسىز كاتتا ئۇچرىشىش بولىدۇ.

   بۇ، 1851 – يىلى ئەنگلىيەنىڭ پايتەختى لوندوندا بارلىققا كەلگەن دۇنيا يەرمەنكىسىنىڭ تەرەققىي قىلىۋاتقان دۆلەتكە تۇنجى قېتىم كىرىشى ھېسابلىنىدۇ. ماسلىشىشچانلىق، ئالغا ئىلگىرىلەش ئۇلۇغ بايرىقىنى باشتىن – ئاخىر ئېگىز كۆتۈرگەن دۇنيا يەرمەنكىسىنىڭ دۇنيادىكى نوپۇسى ئەڭ كۆپ دۆلەتكە كېلىشى جۇڭگولۇقلارنىڭ يۈز يىلدىن بۇيانقى ئارزۇسى، بولۇپمۇ 5000 يىلدىن ئارتۇق تارىخقا ئىگەن جۇڭخۇا مەدەنىيىتىنىڭ دۇنيا بىلەن بولغان بىر قېتىملىق ئۇلۇغ ئۇچرىشىشى ھېسابلىنىدۇ. دۇنيا يەرمەنكىسى جۇڭگوغا بىر قېتىملىق دۇنيانى يېقىندىن بىلىش پۇرسىتىنى بېرىدۇ، دۇنيا يەرمەنكىسىنىڭ ئۆزىنىڭ تەرەققىياتىغىمۇ زور دەرىجىدە تۈرتكە بولىدۇ، ئۇزاققىچە تىنچ بولغان، ئورتاق گۈللەنگەن ئىناق دۇنيا قۇرۇشنى ئىلگىرى سۈرۈشكە مۇھىم تۆھپىلەرنى قوشىدۇ.

   جۇڭگو تەييار بولدى، شاڭخەي تەييار بولدى. بىر مەيدان كاتتا يىغىلىش ئېچىلىش ئالدىدا تۇرماقتا.

   تونۇشتۇرۇلۇشىچە، شاڭخەي دۇنيا يەرمەنكىسىنىڭ ئېچىلىش مۇراسىمىغا دۆلەت ئىچى – سىرتىدىكى بىرلەشمە رېژىسسورلار كوللېكتىپى مەسئۇل بولىدىغان بولۇپ، ئېچىلىش مۇراسىمى ئىككى قىسىمغا بۆلۈنىدىكەن: بىرى، ئۇچار تەخسىگە ئوخشايدىغان دۇنيا يەرمەنكىسى مەدەنىيەت مەركىزىدە مۇراسىم ئەدەبىيات – سەنئەت ئويۇنى قويۇلىدىكەن؛ يەنە بىرى، خۇاڭپۇجياڭ دەرياسىنىڭ ئىككى قىرغىقىدىكى رايوندا تالا چىراغ نۇرى، فونتان، ساليوت نومۇرى كۆرسىتىلىدىكەن.

   ئېچىلىش مۇراسىمىدىن كېيىن، 1 – ماي شاڭخەي دۇنيا يەرمەنكىسى باغچا رايونىنىڭ ئېچىلىش مۇراسىمى ئۆتكۈزۈلىدۇ، 184 كۈن داۋاملىشىدىغان يەرمەنكە مەزگىلىدە، تەخمىنەن 70 مىليون ئادەم (قېتىم) جۇڭگو ۋە چەت ئەللىك ئېكىسكۇرسىيەچى كۈتۈۋېلىنىدۇ.

   5.28 كىۋادرات كىلومېتىرلىق دۇنيا يەرمەنكىسى باغچا رايونىدا، رەڭدار دۇنيانى نامايان قىلىپ بېرىدىغان ھەشەمەتلىك ۋە سەلتەنەتلىك مەيدان – سارايلار بار: دانىيە ‹‹ساھىبجامال بېلىق››ىنىڭ برونزا ھەيكىلى، ليۇكسىمبۇرگنىڭ ‹‹ئالتۇن رەڭلىك قىزچاق›› ھەيكىلى، فىرانسىيەنىڭ دۆلەت تەۋەرۈكى دەرىجىلىك يەتتە پارچە ماي بوياق رەسىمى، ھەيكىلى... ھەر قايسى دۆلەتلەرنىڭ ‹‹دۆلەت گۆھىرى›› سانالغان بۇ كۆرگەزمە بۇيۇملىرىنىڭ ھەممىسى دېگۈدەك تۇنجى قېتىم دۆلەت ئاتلىغان؛ دۇنيانىڭ ھەر قايسى رايونلىرىدىن كەلتۈرۈلگەن 800 نەچچە نومۇر نۆۋەت بىلەن تەخمىنەن 20 مىڭ مەيدان (قېتىم) قويۇلىدۇ. ‹‹چېگرىدىن چىقماي تۇرۇپلا دۇنيانى كۆرگىلى بولىدۇ››، جۇڭگو يېرىم يىلغا يېقىن سوزۇلىدىغان، ئىنسانىيەت مەدەنىيىتى جەۋھەرلىرى مۇجەسسەملەنگەن كاتتا مۇراسىمنى كۈتۈۋالىدۇ.(تەھرىرلىگۈچى:admin ئەسەر ئورتاقلاشقاندا مەنبەنى ئۇنۇتماڭ.)