道友博客※ يوليار بلوگ ※Yolyar blog

ئۇيغۇر خەلق ماقال تەمسىللىرى ۋە ئۇنىڭ مەنىلىرى ھەققىدە

قول ھەققىدىكى ماقال-تەمسىللەر

قولدىن ئۆتكۈچە ، ئۆيۈگە يەتكۈچە

بۇ ، ئېلىم-بېرىم ، سودا -سېتىقتا ئادىل ، سەمىمىي ئىش قىلماي ، ئۆتكەلدىن ئۆتۈۋېلىش كويىدا بولغان كىشىلەردىكى ساختىپەزلىك ئالدامچىلىق قىلمىشىنى بىلدۈرىدۇ.

قول قولنى تونۇيدۇ ، شەرىئەت يولنى

بۇ ، بىراۋدىن ئالغان نەرسىنى ئۆز قولىغا قايتۇرۇپ بېرىش ، كىمدىن ئالغان بولسا دەل شۇنىڭغا بېرىش قائىدە ىويىچە ئىش قىلىش كېرەك ، ، دېگەن مەنىنى بىلدۈرىدۇ.

قول قولنى يۇسا ، قول كېلىپ يۈزنى يۇيار

بۇ ، بىراۋغا ياخشىلىق قىلغان كىشى ياخشىلىق كۆرىدۇ ، قىلىنغان ياخشىلىق ، خەيرىلىك ئىش بىكار كەتمەيدۇ ، دېگەن مەنىنى بىلدۈرىدۇ.

قولنى كەسمىگۈچە قان چىقماس

بۇ ، ھەركىم كۆزلىگەن مەقسەتكە يېتىش ، بەلگىلىك نەتىجىگە ئېرىشىش ئۈچۈن ئاز-تولا چىقىم قىلىش ، بەدەل تۆلەش ئەمگەك سىڭدۈرۈش كېرەكلىكىنى بىلدۈرىدۇ.

قولۇڭدىن كەلسە ئەلدىىن ئايىما

بۇ ، ئادەم ھۆرمەت ئابرۇيغا ئېرىشىش ئۈچۈن ھەر ۋاقىت خەلىق ئۈچۈن ئىشلەش ، خەلىق مەنپەئىتىنى كۆزلەش خەيرى-ساخاۋەتلىك ئىشلارنى قىلىش كېرەك، دېگەن مەنىنى بىلدۈرىدۇ.

قولۇڭدىن كەلسە ياغ چاينا

بۇ ، ھەركىم ئىمكانىيىتى يار بەرسە قۇبىتى يەتكەن ئىشنىڭ ھەممىسىنى قىلىپ ، مۇراد-مەقسىتىگە يېتىش كېرەك ، دېگەن مەنىنى بىلدۈرىدۇ.

قولۇڭ ماي بولسا قونچىڭغا سۇۋا

بۇ ، ئادەم بېيىغان ياخشى كۈن كۆرگەندە ئۇرۇق-تۇغقان يېقىنلىرىغا مېھرى-شەپقەت ، ياخشىلىق قىلىش ، يار -يۆلەك بولۇش كېرەكلىكىنى بىلدۈرىدۇ.