› مۇنبەر › ئۇيغۇر ئەدەبىياتى رايونى › ياش «قەلەم» › ئۈمىدۋارنى تونۇمسىز (14)

كېيىنكى 21

تىزىملىككە قايتىش

كۆرۈش: 1119|ئىنكاس: 22

ئۈمىدۋارنى تونۇمسىز (14) [ئۇلانما كۆچۈرۈش]

eybuyaqup

باش مۇھەررىر

Rank: 20

ئەزا ئۇچۇرى

تىزىم نۇمۇرى: 11

يازما سانى: 480

نادىر تېمىسى: 3

تېللا: 1363

تۆھپە : 151

توردا: 422 سائەت

ھالىتى:

ئاخىرقى: 2013-1-18

يوللىغان ۋاقتى 2012-4-11 10:10:56 |ھەممە قەۋەتنى كۆرۈش


	مەھمۇدجان خوجا ئۈمىدۋارنىڭ ئۆزى ھەققىدە ئېيتقانلىرى: ھايات بېغىمدىكى گۈللىرىمنى سانىسام، ئېتىكىمدە 27 گۈل تولۇپ تۇرۇپتۇ، توزۇپ تۇرۇپتۇ. شۇنداق، 1984-يىلى 23-ئاپرېل سەھەردە ئائىلىمىزنىڭ مۇھەببەتلىك بېغىدا ھاياتىمدىكى تۇنجى گۈلنى ئاتام ۋە ئانامنىڭ پەرۋىشىدە ياراتقۇچىنىڭ ھىممىتى بىلەن قولغا ئالغان ئىكەنمەن. مېنى مۇشۇنداق مېھىر – مۇھەببەت چىمەنىگە يەتكۈزگەن ھىممەت ئىگىسىگە ھەمدۇ – سانا ئېيتىشىم كېرەكلىكىنى ئەقلىم كىرگەندىن كېيىن بىلىپ يەتتىم. ئائىلىمىز ھېكايىلەردىكىدەك قىسمەتكە باي بىر ئائىلە ئىدى. 1988-يىلى 28-نويابىر مېھرىبان دادام 71 يىللىق ھايات مۇساپىسىنى ئاخىرلاشتۇرۇپ، بەندىلىكنى بەجا كەلتۈردى. يەتتە پەرزەنتىنىڭ چوڭى 22 ياشتا، كىچىكى 38 كۈنلۈك بوۋاق ھالەتتە، تاغدەك ئېغىر تۇرمۇش غىمى بىلەن قالغان ئانام خۇددى خەلق ناخشىسى «ئانام قۇنىخان»دىكى جاپاكەش ئۇلۇغ ئانىنىڭ ئۆزى ئىدى. ئۇنىڭ تىرىشچانلىقى ۋە مىننەتسىز بەدەللىرى بىلەن ھايات بېغىمىز دائىم ئاۋات بولۇپ كەلدى. ئانام ئەڭ ئېغىر كۈنلەردىمۇ بىزنى ئوقۇتۇشتىن ۋاز كەچمىدى. بالىلىق ھاياتىم باي ناھىيەسىنىڭ مۇزات بويلىرىدا گۈزەل چۆچەكلەر كەبى ئۆتتى. ئىككىنچى ئاكام مۇھەممەدنىڭ تەسىرىدە كىچىكىمدىنلا كىتابقا ناھايىتى مەپتۇن بولۇپ قالدىم. 1992-يىلى 1-سىنىپنى پۈتتۈرگەن يازلىق تەتىلدە «365 كېچە» ناملىق ئالماناخ توپلامنىڭ 1-قىسمىنى ئوقۇپ تۈگەتكەنلىكىمنى ئېنىق ئەسلىيەلەيمەن. ئوقۇغان كىتابلىرىم ئۆزۈمنىڭ كىچىكلىكىگە باقماي قۇرداشلىرىم ئىچىدە خېلىلا كۆپ ئىدى. «قىسسەسۇل ئەنبىيا»، «قاراخانىيلارنىڭ قىسقىچە تارىخى»، «چاھار دەرۋىش»، «مۇھەممەد ئەلەيھىسسالامنىڭ تەرجىمىھالى»، «مىڭبىر كېچە»، «ئىز»، «ئويغانغان زېمىن» ... قاتارلىق كىتابلارنى باشلانغۇچتا ئوقۇپ تۈگەتكەن ئىدىم. شۇنداقلا، ئوقۇغانلىرىم ئېسىمدە مۆھۈر كەبى ئورناپ قالاتتى. تۆتىنچى سىنىپتا ئوقۇۋاتقىنىمدا 1000 كۇپلېتتىن ئارتۇق خەلق قوشاقلىرىنى يادقا ئالغانىدىم. 2000-يىلى 8-فېۋرال كېچە، ئۇيقۇم قېچىپ، قولۇمغا قەلەم ئېلىپ «ئۇستازلىرىمغا» دەپ سەككىز كۇپلېتلىق بىر پارچە شېئىر يازدىم. بۇنى ئەدەبىي ئىجادىيىتىمنىڭ باشلىنىش نۇقتىسى دەپ قارايمەن. باي ناھىيەسىدىكى تونۇلغان قەلەمكەش ئۇستازىم، ئەدەبىيات ئوقۇتقۇچىمىز پەرھات كېرەم مېنىڭ يېزىقچىلىققا ئىشتىياق باغلاپ قالغانلىقىمنى بايقاپ، مېنى كۆپ ماختىدى. شۇنداقلا مېنىڭ بىر قانچە پارچە «شېئىر» ىمنى مەكتەپتىكى ئۆزى دەرس بەرگەن سىنىپلارغا ئوقۇپ بېرىپتۇ. ئەمدى ئويلىسام، شۇ ھۆرمەتلىك ئۇستاز مېنى رىغبەتلەندۈرۈپ، ئەدەبىياتنىڭ كوچىسىغا باشلاپ قويغان ئىكەن. 2000-يىلى ئۆكتەبىردە، باي ناھىيەسىنىڭ ئەدەبىيات بېغىنى سۇغۇرۇپ تۇرىۋاتقان «مۇزات دولقۇنلىرى» ژۇرنىلىدا «زامانداشلىرىمغا خىتاب» ناملىق شېئىرىم ئېلان قىلىندى. بۇ مەتبۇئاتتىكى تۇنجى قەدىمىم ئىدى. 2004-يىلى 8-ئايدا، شىنجاڭ ئۇنۋېرسىتېتىنىڭ جەمئىيەتشۇناسلىق كەسپىگە قوبۇل قىلىندىم. ئۇيغۇر دىيارىدىكى بۇ ئەڭ چوڭ مەرىپەت باغچىسىدا مەن بىلىملىك ئۇستازلارنىڭ ئەقىل پاراسەت مېۋىلىرىدىن كۆپ بەھرىمان بولدۇم، ئۆزۈم ئۇچرىشىشنى ئارزۇ قىلغان ئۇستاز قەلەمكەشلەرنىڭ، زىيالىيلارنىڭ مەنىلىك سۆھبەت، لىكسىيەلىرىگە كۆپ قېتىم داخىل بولدۇم. ئەدەبىيات كوچىسى ماڭا ئەقىدىلىك، ۋىجدانلىق، مەسئۇلىيەتچان دوستلارنى ئۇچراشتۇردى. ھايات مانا شۇنداق قىلىپ بارغانسېرى مەناسىنى تاپتى. 2006-يىلى باھاردا، «شىنجاڭ سەنئىتى» ژۇرنىلىدىكى پەرۋىشكارلار ماڭا ئۆزۈمنى ئىپادىلەيدىغان پۇرسەت يارىتىپ بەردى. شۇنىڭدىن كېيىن مەزكۇر ژورنالدا سەنئەت ئوبزورى، سۆھبەت خاتىرىسى، كۈي نەزمىلىرى (ناخشا تېكىستى) ۋە تەرجىمە ئەسەرلىرىنى ئېلان قىلدىم. بۇ مېنىڭ كېيىنچە ئىجادىيەتتە كۈي نەزمىلىرى ساھەسىگە بەكرەك مايىللىقىمغا سەۋەب بولدى. ھازىرغا قەدەر «تارىم»، «شىنجاڭ سەنئىتى»، «شىنجاڭ ياشلىرى»، «ئەدەبىي تەرجىمىلەر»، «تارىم غۇنچىلىرى»، «ئاقسۇ ئەدەبىياتى»، «قىزىلسۇ ئەدەبىياتى»، «مۇزات دولقۇنلىرى»، «شىنجاڭ ئىقتىساد گېزىتى»، «ئۈرۈمچى كەچلىك گېزىتى»، «ئىشچىلار ۋاقىت گېزىتى»، «ئاقسۇ گېزىتى» ... قاتارلىق مەتبۇئاتلاردا 100 پارچىدىن ئارتۇق شېئىر، نەسىر، سەنئەت ئوبزورى، سۆھبەت خاتىرىسى، ئەدەبىي تەرجىمە ئەسەرلىرىم ئېلان قىلىندى. «سۆيگۈ كېرەك»، «سۆيگىنىگە تەگمىگەن قىزلار»، «چۆچەكلەر»، «ئانا يۇرت»، «سەھرا»، «سىز كەلسىڭىز»، «قارلىغاچ»، «مېھىر بەردىم سىزگە ئادەملەر» ... قاتارلىق 80 پارچىدىن ئارتۇق شېئىرىم ناخشا قىلىپ ئېيتىلدى. ھاياتقا، ئادەملەرگە ۋە ئەدەبىياتقا بولغان مۇھەببەت مېنى مەسئۇلىيەت بىلەن يېزىشقا ئۈندىمەكتە. ئاللاھىنىڭ ھىممىتى بىلەن مۇشۇ مەنزىللەرگە كەپتىمەن. ئامان بولسام، يولۇمنى داۋاملاشتۇرىمەن. مەھمۇدجاننىڭ نۇرغۇن تېكىستلىرىغا مۇزىكا ئىشلىنىپ، سەھنىلەردە ئورۇندىلىپ ناھايىتى ياخشى باھالارغا ئېرىشىپتۇ. مەن ئىلگىرى ئىلگىرى بۇ ئىنىمىزنى ياشتا چوڭ، مەخسۇس ناخشا تېكىستى ئىجادىيىتى بىلەن شۇغۇللىنىدۇ دەپ پەرەز قىلغانىدىم... بىلدىمكى، خاتالىشىپتىمەن. مەن ئۇنىڭ ئەسەرلىرىنى تاپشۇرۇپ ئېلىپ تەھرىرلەۋاتقىنىمدا، ئۇنىڭدا بىر يوشۇرۇن ئىجادىي كۈچنىڭ تولۇپ ياتقىنىنى ھېس قىلدىم ۋە ئىجادىيىتىگە ئۇتۇق تىلەش، ئۇنى قوللاش يۈزىسىدىن بىر قىسىم ئەسەرلىرىنى كەڭ ئەدەبىيات ئىخلاسمەنلىرىنىڭ ھۇزۇرىغا سۇنۇشنى لايىق تاپتىم. ___ مەسئۇل مۇھەررىردىن سىز مېنى ئۇنتۇيسىز ھامان بىر كۈنى مۇھەببەت بېغىدا ۋايىغا يەتسەم، ئاڭلىنار سىز ئېيتقان چىن سۆيگۈ كۈيى. بىز ۋىسال تاپماستىن گەر ئۆلۈپ كەتسەم، سىز مېنى ئۇنتۇيسىز ھامان بىر كۈنى. ئادەملەر يەنىلا يولىغا راۋان، باھاردا تۇرنىلار پەرۋازى ئايان، چېھرىڭىز پىراقتا بولسىمۇ سامان، سىز مېنى ئۇنتۇيسىز ھامان بىر كۈنى. ياشلىقتا ئاشىقلىق مەڭگۈلۈك ئۇدۇم، قان رەڭلىك ئەتىرگۈل ئېچىلار چوقۇم، شۇ سەۋەب بىلىنمەس مېنىڭ يوقلۇقۇم، سىز مېنى ئۇنتۇيسىز ھامان بىر كۈنى. يۈرسىڭىز قەبرەمگە ياش تۆكۈپ زار-زار، بىر يىگىت سورايدۇ ھالىڭىزنى يار، ئېرىيدۇ بەرىبىر قەلبىڭىزدە قار، سىز مېنى ئۇنتۇيسىز ھامان بىر كۈنى. خەۋەر يوق سىزنى ئىزلەپ مەن كەزمىگەن شەھەر يوق، كۆككە بېقىپ ياش تۆكمىگەن سەھەر يوق. كەلدى چەكسىز يىراق كەتكەن تۇرنىلار، بىراق سىزدىن ھازىرغىچە خەۋەر يوق. يېشىل ياپراق خازانلارغا ئايلاندى، ئېگىز تاغلار توزانلارغا ئايلاندى، دەردلىك ئاھىم گۈلخانلارغا ئايلاندى، بىراق سىزدىن ھازىرغىچە خەۋەر يوق. دەريالارنىڭ مەنزىلى بار يىراقتا، سىزنى كۈتۈپ خىيالدىمەن قىرغاقتا، گۈل ياشلىقىم ئوخشاپ قالدى توزغاققا، بىراق سىزدىن ھازىرغىچە خەۋەر يوق. بۇ ئالەمگە سۆيگۈ ئۈچۈن كەلگەنمەن، كېچە-كۈندۈز ۋىسال ئىزلەپ يۈرگەنمەن، كەلمىسىڭىز، پىراقلاردا ئۆلگەنمەن، نېچۈن سىزدىن ھازىرغىچە خەۋەر يوق؟ 2009 -يىل 27-ئاۋغۇست پەيشەنبە كېچە، باي. كېچەلمەيسىز مەندىن پەرىزاد قەلبىڭىزنى ئۆرتىگەن چوغمەن، كېچەلمەيسىز مەندىن، پەرىزاد. سۆيگۈ " ئاتلىق يىقىلماس تۇغمەن، كېچەلمەيسىز مەندىن، پەرىزاد. تۈنلەردە سىز سۈرگەن خىيالمەن، مەڭزىڭىزگە سۆيگەن شامالمەن. خىلۋەتتىكى شېرىن ۋىسالمەن، كېچەلمەيسىز مەندىن، پەرىزاد. مەن كەلمىسەم، ياشايسىز كۈتۈپ، ياشلىقىڭىز ھەسرەتتە ئۆتۈپ، كېتەر مەڭگۈ كۈلكىڭىز ئۆچۈپ، كېچەلمەيسىز مەندىن، پەرىزاد. بىر سىزگىلا يېشىلگەن سىرمەن، سىز ئېرىشكەن ھەيۋەت قەسىرمەن، ھۆسنىڭىزگە مەن ھەم ئەسىرمەن، كېچەلمەيسىز مەندىن، پەرىزاد. 2008-يىل 21 – ئاۋغۇست پەيشەنبە كېچە، ئۈرۈمچى كېچەم قۇچاقلايمەن كېچەمنى مەھكەم، جىمجىت كېچە ماڭا مەنسۇپ يار. كۈندۈزدىكى بىخۇدلۇقۇمنى، سوتلاپ تېرەن پىكىرلەر بىلەن، ھەقىقەتكە بولىمەن خۇمار. ( تەنھا زاتقا ئېيتىپ ئىستىغپار.) ئەسلىتىدۇ نۇرلۇق باھارنى، خاتىرەمنىڭ ئاپئاق بېتىدە، يېشىل پېتى ساقلانغان يالپۇز. ئۆيدە پەقەت مېنىڭ تىۋىشىم ، لېكىن ھەرگىز قالمىدىم يالغۇز ، (ئالبومۇمدا بىر قىز كۈلەر ئۇز.) مېنى كۈتۈپ ياشايدۇ غەمكىن، يىراقتىكى كەنتتە قالغان قىز. مەن قەيەردە؟ بىلمىسىمۇ گەر، بولۇپ قالماس ھەرگىز ئۈمىدسىز. ئەڭ مۇقەددەس ھىجرانىمىز بار، بەلكىم مەڭگۈ ئۇچرىشالمايمىز. شامال، ئوت، سۇ، تۇپراق، ساما بار، مەن قەلبىمنى ئېچىۋەتكەچ كەڭ. كۆپ نەرسىلەر يوقاپ كېتىدۇ، قۇياش غايىب بولۇش بىلەن تەڭ. پىچىرلايمەن مەيۈس روھىمغا: «مۇمكىنسىزلىك مۇمكىندۇر كېچەڭ.» كېچىدە مەن بۈيۈك بارلىقنى، ئېرىپ تۇرۇپ قىلىمەن تاۋاپ. مېنى سۆيگەن قىزغا نەزمەمدە قويدۇم سۈزۈك بىر ھوجرا ياساپ. ئۇخلاپ بولدى ئادەملەر بىر – بىر، مەنلا ئويغاق، سۇنۇپ قارا ئاپتاپ. 2004 – يىل 11- ئىيۇل يەكشەنبە كېچە، باي . گۇگۇمدىكى بىر قىز گۇگۇم ئىچىدە چۈشسىمان بىر قىز، كۈمۈش يالقۇندەك تۇرىدۇ چاقناپ. جۈپ نىگاھىدا بۇژغۇنلار ئازاب، قەلبى شۈبھىسىز ھىجرانلىق دېڭىز. مەيۈس چېھرىدە لەيلەر ئەسلىمە: ئەركىن قۇش كەبى غەمسىز بىر چېغى، ئۇلۇغ سۆيگۈنىڭ قۇرۇماس بىخى، كۆكلىدى كۆركەم، روھى تەكتىدە. بەخت گۈللىرى ئېچىلىپ گۈلگۈن، ۋىسال بېغىدا ئويناپ بىر ئەسنا؛ يۈرگەندە خۇشال، ئالدىنىپ، ئەستا.... قالدى پىغاندا مۇڭلىنىپ، چۈشكۈن. پەرىشان قىزنى سۇئاللار چىرماپ، كەچمىشى قىيناپ، قىلسىمۇ غېرىب. ئاخىرقى شەپەق جاسارەت بېرىپ، ئۈمىد بېغىغا ئەپكەلدى چىللاپ. سىڭىپ جىسمىمغا خىرەلەشمەس نۇر، مىسكىن روھىمۇ يورۇدى، ھەمدە دۇنيا، ۋاپا، كۈن، ھايات... ھەققىدە قىلغان خىيالى ئۆكسۈمەس يامغۇر. نازۇك گىياھقا مەڭزىنى يېقىپ، تىغ ــ ھەسرەتلەردىن كەچتى بىر – بىرلەپ. تەبەسسۇم بىرلە سۈبھىنى كۈيلەپ، تۈننىڭ باغرىغا كەتتى قىز ئېقىپ. 2003-يىل 2- فېۋرال يەكشەنبە كېچە، باي. سۆيگىنىگە تەگمىگەن قىزلار تۈندە ھىلال كەتكەن خىيالغا، خىرە يېنىپ تۇرار يۇلتۇزلار. ئايلىنىدۇ دەردمەن ئايالغا، سۆيگىنىگە تەگمىگەن قىزلار. بىلىنىدۇ كۆڭۈلسىز دۇنيا، مۇزلىغاندەك كۆرۈنەر دەريا، ئۇنتالمايدۇ ئاشىقىنى يا، سۆيگىنىگە تەگمىگەن قىزلار. بېرەلمەيدۇ ئېرىگە مېھىر، نازلىرىدىن چىقمايدۇ سېھىر، كۆز-ياشلىرى ھەسرەتلىك شىئېر، سۆيگىنىگە تەگمىگەن قىزلار. يۈرىكىدە بولماي مۇھەببەت، توي قىلغانلار چېكەر نادامەت، ئۆز-ئۆزىگە قىلار مالامەت، سۆيگىنىگە تەگمىگەن قىزلار. يىگىت قىلسا :"كۆيدۈم " دەپ نىدا، قايتسۇن دەرھال "سۆيدۈم " دەپ سادا، چىن ئاشىقتىن بولمىسۇن جۇدا، سۆيمىگەنگە تەگمىسۇن قىزلار. قەلبىڭىزدە ياشىغۇم كېلەر سىزگە دەسلەپ يولۇققان كۈنلەر، چېھرىڭىزدە تاتلىق كۈلكىلەر. چوغ يۈرىكىم سىزگە ئىنتىلەر، قەلبىڭىزدە ياشىغۇم كېلەر. ۋەسلىڭىزدۇر مەن سۈرگەن خىيال، سىز مەن ئۈچۈن كۆكتىكى ھىلال، ئىشقىڭىزدا يۈرىمەن بىھال، قەلبىڭىزدە ياشىغۇم كېلەر. پەرىشانمەن، ئەھۋالىم خاراب، ئىچىپ قالغاچ ئىشقتىن شاراب. يەتمىدىمۇ سىز سالغان ئازاب؟! قەلبىڭىزدە ياشىغۇم كېلەر. ماڭا تەشنا گۈزەللەر تالاي، بىر سىزگىلا جانان بوپ قالاي. كىرەك ئەمەس ئوردا يا ساراي، قەلبىڭىزدە ياشىغۇم كېلەر. 2008-يىل 24-ئاۋغۇست يەكشەنبە كېچە، ئۈرۈمچى. چۈشۈمدىكى بىر تال ئەتىرگۈل بۇ كۈنلەر قەلبىمدە چەكسىز ئەنسىرەش، ئىز سېلىپ يۈرىمەن پايانسىز يولغا. چۈشۈمدە ئېچىلغان بىر تال ئەتىرگۈل، قالغاندۇ قەيەردە، كۆمۈلۈپ قارغا؟ شۇ كېچە (فېۋرالدا )خىيالچان ئىدىم، زېمىندىن ئۆچمىگەن قىشنىڭ جىلۋىسى. بۇلاق ۋە كەڭ دالا كېسىشكەن جايدىن، روھىمغا كىرمەكتە ئەتىرگۈل ھىدى. سۈبھىنىڭ سۈپسۈزۈك پاكلىقى ئارا، نىگاھىم يورۇيدۇ كۆلبەمدە ھامان. ئىزتىراب، ئۈمىدنىڭ قولىنى تۇتۇپ، تەبىئەت باغرىنى كەزدىم پەرىشان. قەلبىمدىن باشقىسى ئۇچمىغاچ ئەركىن، كۆكلەمدىن زەررىچە ئەسەر يوق شۇ تاپ. ئەي گۈلۈم، سەن شۇنچە يۇمران ۋە نازۇك، ئېچىلدىڭ ئاھ نېچۈن مۇزلۇقنى تاللاپ؟! بىلىمەن، شۇ بىر گۈل بەختىمگە سىمۋول، چۈشۈمنى قىلدى زەپ مەنىلىك جەريان. پاجىئە شۇ: ئۇچراتسام ئۈششۈگەن چاغدا، بولمامدۇ شادلىقىم ئەبەدىي گۇمران؟! ئۇ ھالدا تەنھامەن دۇنيا سىرتىدا، قارلارغا لەۋ يېقىپ ھالسىز خارۇ – زار. يىغلايمەن توختىماي خىلۋەت ئېقىندەك، ئەلەملىك ھاياتىم ئەمدى باشلىنار. ئېھتىمال مەن شۇنداق ھەسرەتلىك يىگىت، نەملەنگەن سۆزۈمنى ئاڭلا، تەبىئەت: گۈلۈمنى ساق ئەكەل ، بەرمىسەڭ ئىمكان، مېنىمۇ زۇلمەتكە دەرھال ئېلىپ كەت. (بەختسىز گۈلۈمگە مەڭگۈلۈك جۈپ ئەت!) 2004-يىل 24-فېۋرال سەيشەنبە، باي . چۆچەكتىكى قىز ( ئۇيغۇر خەلق چۆچىكىدە تەسۋىرلەنگەن بىر پەرىزادقا ) رىۋايەتتە سىرلىق بىر قىزسەن، رېئاللىقتا بولمىغان زاھىر. جاڭگاللارنى كېزىپ يۈرىدۇ، سېنى ئىزلەپ سەرسانە شائىر. چاتقاللىقتا سايرىسا بىر قۇش، سۈكۈت ئىچرە تۇرىمەن بىر پەس. قەبرىستانغا چۈشكەندە گۇگۇم، سەن كېلەرسەن كۆرۈنمەس گۈلۈم، لەيلەپ تەنھا، (شۈكرى، جۈپ ئەمەس.) «ئايان بول» دەپ ئىزلەپ كېچىچە، جىمجىت ئۆلۈپ كەتسەم ئەگەردە؛ سەھەر كەلگەن نۇرانە شەيخ، ماڭا ئاتاپ قىلار قىرائەت. ‹‹غېرىبلىقتا ئۆلگەن ئاشىق ›› دەپ يىغلار سەككىز جەننەتنى تىلەپ. چۈش ئىچىدە يۈرىمەن مەستخۇش، قۇياش مېنى سۆيگەنگە قەدەر. نىگاھىڭدىن ئۈزمىدىم ئۈمىد، سەن چۆچەكتە ياشىساڭمۇ گەر. تەسەۋۋۇردىن پۈتكەن شاماللار، سىمايىڭدىن بەرمەكتە خەۋەر. قۇملۇقتىكى يېشىل توغراقلىق، دەرۋىشلەرگە سۈزۈك مەنزىلگاھ. كۆتۈرگۈسىز ھەسرەتنى ئېلىپ، مەنمۇ باراي جەزىرىگە، ئاھ. ماڭا رەھىمىڭ كەلسە ناۋادا؛ چۆچەكلەردىن ئايرىلىپ چىقىپ، روھىم تامان يېقىنلاپ كېلىپ، گۈلۈم بولۇپ قالارسەن تەنھا. ئەي قىز، تۆكەي دەردىمنى ساڭا، سەندىن كېلەر تىۋىش قاياقتا؟ 2004 – يىل 2- مارت سەيشەنبە، باي بىر قىز ئاشىق بولدۇم، قالدىم باغلىنىپ، لېكىن مېنى كۈتمىدى بىر قىز. تالاي قىزلار ئۆتتى نازلىنىپ، تار كوچامدىن ئۆتمىدى بىر قىز. سۆيگۈ ئىزھار قىلغانلىرىم بار، شامال بولۇپ سۆيمىدى بىر قىز. تۈندە تەنھا قالغانلىرىم بار، ھىلال بولۇپ كۈلمىدى بىرقىز. بەرسەممۇ گەر چەكسىز مۇھەببەت، دىل سۆزىنى ئېيتمىدى بىر قىز. قارلىغاچلار كەلدى نەچچە رەت، تۇرنا بولۇپ قايتمىدى بىر قىز. دەرد-ھالىمغا يەتمىدى بىر قىز، دىلىم خۇرسەن ئەتمىدى بىر قىز. ئۆزى كەتتى يىراققا، لېكىن، خىيالىمدىن كەتمىدى بىر قىز. 2010 - يىل 14- ئاپرېل چارشەنبە كېچە، ئۈرۈمچى. كۈسەندە بىر قىز ھەربىر تاش، گىياھتىن چاچرايدۇ ئاتەش، بۇ قەدىم شەھەردە سەيياھمەن تەنھا. ئۆرتەنگەن دىلىمغا بىرەر تەسەللىي، سەمىمىي پاسىبان، مېھرىبان يوللار. ھەسرىتىم سۆزلەنسە نىگاھلىرىمدا، قەلبىمنى سىيلايدۇ بىر لېۋەن پەرى. ئەسلەتتى گىرىمسەن رىۋايەتلەرنى، شەكسىز ئۇ مىڭئۆيلۈك، شەر*ق گۈزىلى. روھىغا چوڭقۇرلاپ كىرگەن چېغىمدا، يۇلغۇننىڭ رەڭگىنى كۆرسىتەر چېھرى. چۆچەكلەر دەۋرىگە قايتىمەن گويا، ئەڭ پارلاق سەنئەت ئاھ، قىزنىڭ كۈلكىسى. ھېس قىلدىم ئۈشبۇ كۈن ئۇلۇغلۇقۇمنى، ۋىسالنىڭ مۇقەددەس نۇرلىرى ئارا. ھەقىقىي پاكلىنىش كۆلبىسى بەلكىم، ئەپسانە، رېئاللىق كېسىشكەن نۇقتا. 2003-يىل 6-ئىيۇن جۈمە كېچە، كۇچا. يۈزلەنگىن ماڭىمۇ پاك روھىڭ بىلەن سەن چەكسىز يىراقتا، بۇ نۇرسىز كېچە، قەلبىمگە سىمىلداپ ياغماقتا ئازاب. سۈكۈتتە بىپەرۋا لەيلەپ يۈرۈشۈڭ، قىلماقتا ئۈمىدنى تەلتۆكۈس خاراب. بىر چاغلار روھىمنى يورۇتقان ۋەدەڭ، كەتمەكتە گىرىمسەن كەچمىشكە تاراپ. باش قويدۇم تىترىگەن خىلۋەتلىرىمگە، كۈز رەڭگى يۈرەككە شىددەتلىك يامراپ. دېڭىزدەك داۋالغۇپ تۇرار مەۋجۇدلۇق، ھىجراننىڭ يوقالماس جىلۋىسى ئارا. پاك جىسمىڭ كۆلبەمدە بولمىغان بىلەن، سەن تۇتقان ئازابلار قويمىدى تەنھا. غېرىبلىق توساتتىن ئەل قىلدى مىنى، يۈرىمەن قار باسقان ئاپئاق دالىدا. ئەڭ مىسكىن قۇشقاچقا ئايلىنىپ قالدىم، سۆيگۈڭنىڭ بىخ سۈرمەس قاقشال شېخىدا. سەن ئۈچۈن تۆكۈلگەن چوغ كۈيلىرىمگە، كەلمىدى سەمىمىي بىر سادا يېنىپ. مۇغەمبەر شەھەردە ئەقىدەڭ كۆيۈپ، يۈرىكىڭ كەتتىمۇ تاشقا ئايلىنىپ؟! ئۆتەيمۇ ئەبەدىي ساماۋىي ياشاپ، خىيالدىن يېمىرىلمەس ئىمپېرىيە قۇرۇپ؟! يۈزلەنگىن ماڭىمۇ پاك روھىڭ بىلەن، كېچىكىش چۆلىدە كەتمەيلى توزۇپ. 2002-يىل 3-دېكابىر سەيشەنبە كېچە، باي. ماڭا كۆيۈپ قالغان گۈزەللەر مېنى ئوتتا قىلىدۇ خاراب، ماڭا كۆيۈپ قالغان گۈزەللەر. دىلغا مىڭ رەت سالىدۇ ئازاب، ماڭا كۆيۈپ قالغان گۈزەللەر. باغلىرىمدا كۈلۈپ بىر ئوماق، دىل قۇشۇمغا قۇرار مىڭ توزاق، قىيناپ تۇرار كەتكۈزمەي يىراق، ماڭا كۆيۈپ قالغان گۈزەللەر. مىنىپ سۆيگۈ يولىدا ئاتقا، مېنى باشلار گۈزەل ھاياتقا، ياردۇر ئەمما ئاقىۋەت ياتقا، ماڭا كۆيۈپ قالغان گۈزەللەر. يۈرۈشۈمگە قىلىپتۇ ھەۋەس، مەنچەبۇنى«سۆيگۈ»دېيىش تەس، ئۆز ھالىچە قالسۇن ئەمدى بەس، ماڭا كۆيۈپ قالغان گۈزەللەر. 2009-يىل ئىيۇل پەيشەنبە كېچە، ئۈرۈمچى. سېنى كۆرگۈم كېلەر، بەرىبىر ئىشىك چېكىپ پەرىلەر ئۆتەر، سېنى كۆرگۈم كېلەر بەرىبىر. گۈللەر توزۇپ، قۇشلارمۇ كېتەر، سېنى كۆرگۈم كېلەر بەرىبىر. دۇنيادا سەن يېگانە سەنەم، ھۆسنۈڭ كۈيلەپ تالمايدۇ قەلەم، ھەر كۈن ماڭا قىلساڭمۇ ئەلەم، سېنى كۆرگۈم كېلەر بەرىبىر. چىرايىمنى سارغايتىدۇ غەم، قار ياغىدۇ يۈرىكىمگە ھەم، مەن قەلبىڭگە سىغمىغان ئادەم، سېنى كۆرگۈم كېلەر بەرىبىر. يىراقلارغا جىمجىت كېتەرسەن، ئورنى ئاسمان ،بىپەرۋا لېۋەن، قالساممۇ دەرد-ئازابلار بىلەن، سېنى كۆرگۈم كېلەر بەرىبىر. 2008 – يىل 10 – سېنتەبىر چارشەنبە، ئۈرۈمچى. سەرسانە قىز مەن كۆرەرمەن قايدا يۈرسەم، بىر گۈزەل سەرسانە قىز، ئەمدى بىلسەم، ئۇ ئەزەلدىن ماڭا چىن پەرۋانە قىز، بىر تەبەسسۇم ئەيلىسەم، تاپقاي شۇئان دەرمانە قىز، «سۆيگۈ » دەپ بولدى غېرىب، يانماس لېكىن مەردانە قىز، قەلبىدە يانغان پىراق قىلدى ئۇنى دىۋانە قىز. ئۇ پەرىزادتۇر گويا، گۈل ھۆسنىدە يوقتۇر ئېۋەن، شاھسەنەملەر ئىچرە ھەم جاننى ئالار خۇشخۇي لېۋەن، چۆلگە گەر قويسا قەدەم، ئۈنگەي شۇئان خۇشبۇي چىمەن، مەن مېھىر بېرەلمىدىم، كۆڭۈل ئەجەب سىرلىق ئىكەن، بىنەزەر بۇ ھالىتىمدىن بىماجال، ھەيرانە قىز. ئۆزى شوخ بۇلبۇل، لېكىن قىلماس ناۋا باغلار ئارا، تۆت پەسىل يامغۇر ياغار جۈپ كۆزلىرى تۈندەك قارا، باغرىدۇر تاغ لالىسى، سۆيگۈ تىغى قىلغاچ يارا، شۇنچە رەنا ياشلىقى غەمدە ئۆتۈپ بولغاي ئادا ، ئۆزى ساق، دىل ئوردىسى يىللارسېرى ۋەيرانە قىز. چۈشلىرىدە مەن بىلەن يۈرگەي خۇشال باغلار كېزىپ، ئەركىلەر تاتلىق كۈلۈپ، شىرىن سۆزۈمدىن مىڭ ئېزىپ، قەلبىگە سەرخۇش پېتى تۇرغاي يەنە نامىم يېزىپ، ئاتسا تاڭ، نالە قىلار چۈشى ئىكەنىنى سېزىپ، مەن تۇتار سۆيگۈ شارابىغا ئەجەب مەستانە قىز. ئوقسىمان كىرپىكىدە شەبنەم خىرامان ئۇخلىغاي، كۈلسە دىلدىن بىر نۆۋەت ، يەر ئايلىنىشتىن توختىغاي، ھالىنى سوراپ ھامان ئاي ۋە قۇياش تەڭ يوقلىغاي، ئۇ مېنىڭ كويۇمدىلا ، شادلىق نىمە؟ ھېچ ئۇقمىغاي، ھەر كۈنى كۈتتى مېنى، تاپماي بىرەر ھەمخانە قىز. نەۋ باھاردا بېشىغا يەڭگىل كېلىپ قونغاي چېچەك، يازدا ھەم رەيھان بىلەن لىق تولدۇرۇپ يۈرگەي ئېتەك، پەسلى كۈز ياپراقلىرى ئۇچسا، شۇئان يىغلار يۈرەك، قىشتىكى كۆللەر ئاڭا چەكسىز ئازاب بەرسە كېرەك، ئۆزىمۇ دەردلىك تۇرۇپ، دۇنياغا ئەڭ غەمخانە قىز. ۋەسلىگە تەشنا بولۇپ، سانسىز يىگىتلەر ئىزدىگەن، كۈيلىرىدە: «ئەي پەرى، ئالەمدە تەنھا سىز » دېگەن، «قەلبىمىز ئاسمانىدىن ھېچ ساقىماس يۇلتۇز» دېگەن، ئېرىشەلمەي، ئاقىۋەت: « بەكمۇ تەكەببۇر قىز » دېگەن، مەن ئۈچۈن ئازاردىدۇر، ئەل ئاغزىدا ئەپسانە قىز. شوخ شامالدىن ئاڭلىسام، قىزدا شۇتاپ ئېغىر ئازاب، گاھى تۈن كەلدى ئۆزى، مەن قويمىدىم ئەسلا قاراپ، بىر غەزەلخان ئېيتتى: «گەر غېرىبقا دىل بەرسەڭ، ساۋاب»، بولمىسا ئىشقىم ئاڭا، قانداق بىرەي ياخشى جاۋاب؟! كەچمىدى مەندىن، لېكىن ئۆز-ئۆزىدىن بېگانە قىز. ماڭا تەسىر قىلمىدى، مىڭلارچە ئاھ ئۇرغانلىرى، مەن ئۈمىدۋار چارىسىز، كۆپتۇر دىلىم قورغانلىرى، ياغدى قارلار قەلبىگە، بولماي ۋىسال ئىمكانلىرى، ئەمما ئۇ كۈتمەكچىكەن، ئۇلغايسىمۇ ھىجرانلىرى، مەنمۇ كۆيۈپ، سۆيگۈچە يۈرمەكچىكەن يېگانە قىز. مەشرەب غەزىلىگە تەخمىس ئەزەلدىن مەن ساڭا ئاشىق، غېرىب دېۋانە مەشرەبمەن، سېنى ئىزلەپ پەسىللەردىن، يۈرەر ھەر يانە مەشرەبمەن، پەرىشان، قايغۇدا قالغان، كۈنى ۋەيرانە مەشرەبمەن، نە ھالەتدۇر، ئايا دوستلار، ئەجەب ھەيرانە مەشرەبمەن، كۆرەلمەي گۈلئۇزارىمنى بەسى گىريانە مەشرەبمەن. مەھەللەڭدىن ئۆتەر بولسام، قارار ھەممە گۇمان ئەيلەپ، نادانلار تاش ئاتار گاھى، مېنى ئەغيار، يامان ئەيلەپ، كۆرۈنسەڭ كاشكى بىر مەررە، دىلىمنى شادىمان ئەيلەپ؟! قەلەندەرۋار يىغلارمەن، ئىشىكلەردە فىغان ئەيلەپ، خەلايىقغە بۇ ئالەمدە بەسى ئەفسانە مەشرەبمەن. كىيىكتەك ئۆتتى ئاھ، بىر چاغ، شۇئان ھوشتىن ئادا بولدۇم، نىگاھىغا بېقىپ مەستان، ئاڭا بارىم پىدا بولدۇم، لېكىن كەتتى نەزەر سالماي پىراقىدا گادا بولدۇم، نەزاكەتلىك نىگارىمدىن ئاشۇ سائەت جۇدا بولدۇم، كۆيۈپ ھىجران ئوتىدا دائىما سوزانە مەشرەبمەن. تاھىر قالغاي خىجالەتتە، ئەلەمىم سۆزلىسەم گەر مەن، يۈرەكتە بار تۈمەنمىڭ تىغ، ھامان يارنىڭ غېمىن يەرمەن، كوھىقافتا نىگار بولسا، شۇئان ئۇچتۇم قېقىپ پەرمەن، مەن ئاڭا دەردى زار ئايتىپ، ئىشىتىپ يىغلايىن دەرمەن، كۆرەي دەپ ئول ۋەفادارىم، يۈرۈپ جۇيانە مەشرەبمەن. ئاشىقلارنى خاراب قىلغان ۋاپاسى يوق سەنەملەردۇر، زامان ئەگكەي چىنارلارنى، مىنىڭ قەددىممۇ خەملەردۇر، يۈزۈمدە پەسلى كۈز رەڭگى– ئۆزۈڭ قىلغان سىتەملەردۇر، فەلەكنىڭ جەبرى كۆكسۈمدە، ئەلەم ئۆزرە ئەلەملەردۇر، تەرەھھۇم ئەيلەبان كۆرگىل، جاراھەتخانە مەشرەبمەن. ئۆزۈم ئاشىق، مالامەتلەر ماڭا ھەر چاغ ئاتالغاندۇر، دىلىم ئاھى يېتەر مەنزىل، دىلىمدەك ئەڭ پەرىشاندۇر، ناۋا قىلماس بىرەر قۇشمۇ، گۈلىستان ھەم غېرىباندۇر، مىنىڭ كۆڭلۈم قىزىلگۈل غۇنچەسىدەك تەھ-بەتەھ قاندۇر، ئاچىلماستىن خەزان بولغان چۇ ماتەمخانە مەشرەبمەن. ساڭا كۆيمەكلىكىم قىسمەت، ئۆچەرگە يوقتۇر ئىمكانىم، قەسىر قەلبىم، خوجايىنسەن، ئەمەس بىر رەتكە مېھمانىم، ئۈمىدۋارمەن جامالىڭ دەپ، يېزىلغاي يەنە داستانىم، ۋىسالىڭنى تىلەپ، مەشرەب يېتىبدۇر ھەلقۇمە جانىم، كېچە-كۈندۈز قەرارىم يوق، ئەجەب سەرسانە مەشرەبمەن.

جابدۇق ئىشلىتىش پاش قىلىش

ئاينۇرى

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 72

يازما سانى: 228

نادىر تېمىسى: 0

تېللا: 578

تۆھپە : 4

توردا: 99 سائەت

ھالىتى:

ئاخىرقى: 2012-6-16

يوللىغان ۋاقتى 2012-4-11 10:14:01 |ھەممە قەۋەتنى كۆرۈش


	ئۈمۈتۋارنىڭ بۇنۇڭدىن كىيىنكى ئىجادىيەتلىرىگە ئۇتۇق تىلەيمەن.

جابدۇق ئىشلىتىش پاش قىلىش

چوغلانبەگ

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 25

يازما سانى: 24

نادىر تېمىسى: 0

تېللا: 133

تۆھپە : 2

توردا: 14 سائەت

ھالىتى:

ئاخىرقى: 2013-1-11

يوللىغان ۋاقتى 2012-4-11 10:31:57 |ھەممە قەۋەتنى كۆرۈش


	ئۈمىدۋار ئىنىمنىڭ سۈرىتىنىمۇ قوشۇپ قويغان بولساڭلار بەكراق تونۇۋالاتتىم. ئۈمىدۋارنىڭ ئەزىز تېنىگە ساقلىق،ئىجادىيتىگە بەركەت تىلەيمەن!

جابدۇق ئىشلىتىش پاش قىلىش

gulbahar

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 506

يازما سانى: 29

نادىر تېمىسى: 1

تېللا: 102

تۆھپە : 0

توردا: 18 سائەت

ھالىتى:

ئاخىرقى: 2012-5-31

يوللىغان ۋاقتى 2012-4-11 11:40:57 |ھەممە قەۋەتنى كۆرۈش


	ئىنىم مەخمۇتجاننىڭ بۇندىن كېيىنكى ئىجادىيەتىنىڭ تېخىمۇ مولھۇسۇللۇق بۇلىشىنى ئۈمۈت قىلىمەن .

جابدۇق ئىشلىتىش پاش قىلىش

ي.ت.توغراق

تىرىشچان ئەزا

Rank: 10

ئەزا ئۇچۇرى

تىزىم نۇمۇرى: 416

يازما سانى: 502

نادىر تېمىسى: 0

تېللا: 703

تۆھپە : 16

توردا: 84 سائەت

ھالىتى:

ئاخىرقى: 2013-1-18

يوللىغان ۋاقتى 2012-4-11 14:17:07 |ھەممە قەۋەتنى كۆرۈش


	ئۈمۈدۋارنىڭ بۇندىن كېيىنكى ئىجادىيىتىگە ئۇتۇق، قەلىمىگە بەركەت تىلەيمەن

جابدۇق ئىشلىتىش پاش قىلىش

ئايبۈۋى

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 186

يازما سانى: 134

نادىر تېمىسى: 0

تېللا: 306

تۆھپە : 3

توردا: 78 سائەت

ھالىتى:

ئاخىرقى: 2012-6-15

يوللىغان ۋاقتى 2012-4-11 14:32:38 |ھەممە قەۋەتنى كۆرۈش


	ئۈمۈدۋارنىڭ جىسمىنىڭمۇ مەڭگۈ ئىسمىغا ئوخشاش ئۈمۈد بىلەن تولىشىنى تىلەيمەن.

جابدۇق ئىشلىتىش پاش قىلىش

ھۇقۇش

ئەزا

Rank: 2

ئەزا ئۇچۇرى

تىزىم نۇمۇرى: 470

يازما سانى: 11

نادىر تېمىسى: 0

تېللا: 26

تۆھپە : 0

توردا: 3 سائەت

ھالىتى:

ئاخىرقى: 2012-5-25

يوللىغان ۋاقتى 2012-4-11 19:56:19 |ھەممە قەۋەتنى كۆرۈش


	مەن مەخمۇتجاننىڭ ئەستە تۇتۇش قابىلىيىتىگە تولىمۇ ھەيران... تاماق يەپ بولۇپ چاي ئىچىكەچ ئۇنىڭ ھىكايەتلىرىنى ئاڭلاش بەكمۇ راھەت... ئۇنىڭ بىلەن تۇنۇش ئاشخانىغا كىرىپ قالساق مۇلازىم ھىچ ئىككىلەنمەستىن كەم دىگەندە ئۈچ چەينەك چاينى ئالدىمىزغا ئېلىپ كىلىپ تەبەسسۇم بىلەن «ئالدىرماي پاراڭلىشىڭلەر» دەپ قويۇپ كىتىپ قالىدۇ... بۇ ئۇنىڭ ئۆزگەرمەس ئىشقى.

جابدۇق ئىشلىتىش پاش قىلىش

سىدىقجان غۇپۇر

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 27

يازما سانى: 76

نادىر تېمىسى: 0

تېللا: 207

تۆھپە : 2

توردا: 20 سائەت

ھالىتى:

ئاخىرقى: 2013-1-15

يوللىغان ۋاقتى 2012-4-11 21:10:21 |ھەممە قەۋەتنى كۆرۈش


	ئۈمۈدۋار ئاكامنى تۇنۇيمەن، چۈنكى ئۇ قەلبىمدە ئۈچمەس خاتىرلەرنى قالدۇرغان ئاكام... تىنىڭىز سالامەت بولسۇن ئەزىز ئاكا...

جابدۇق ئىشلىتىش پاش قىلىش

ئايسىمە ئىدىرىس

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 368

يازما سانى: 61

نادىر تېمىسى: 0

تېللا: 230

تۆھپە : 6

توردا: 53 سائەت

ھالىتى:

ئاخىرقى: 2012-6-16

يوللىغان ۋاقتى 2012-4-12 00:45:32 |ھەممە قەۋەتنى كۆرۈش


	كۈز پەسلىگە كىرىپ كەلگەن ئۈمىدۋار بىلەن، ئالتۇنرەڭگە پۈركەنگەنچە شۇنچە چىرايلىق. تەبەسسۇمى يۈرەكلەرگە ئورنىغانتىغۇ، يەنە تېخى ئاۋازىمۇ شۇنچە يېقىملىق. «ئىنىم'' دىسەم ياراشقانتى خۇيى-پەيلىگە، ئابدىرەشىت چايلار قويۇپ قوللىغان ھەتتا، ئىككى ئىنىم بەك مەنىىلىك پاراڭلار بىلەن، مەڭگۈ ئۆچمەس رەڭ قالدۇرغان مانا، ھاياتتا. تېكىستلىرى مەنىلەرگە لىپمۇ لىق تولغان، ئۆزى كىچىك، سۆزى چۈچۈك ،تىلى بەك راۋان. قاپىيەگە تويۇنغان شۇ مىسرالىرىنى، ئېيتماقتىدۇر سەھنىلەردە ھەر بىر خۇش زۇۋان. يەنە ئۆزبىك تەرجىمىگە قولى گۈل ئىكەن، ئۇنىڭ بىلەن شېئىر كۈلدى، شائىرلار كۈلدى. ياشتا كىچىك بولغان بىلەن ئەقىل ئىجاتتا، بۇ ئىنىمىز ھەر ئادەمنىڭ قەدرىنى قىلدى. ئۈمىد ئىچرە چېچەك ئېچىپ ياشاۋېتىپتۇ، ھالال تەردىن يوللىرىغا سېلىپ پايانداز. يۈرەكلەردىن ئۇرغۇپ تۇرغان سادالار بىلەن، ئۇنىڭ ھەر بىر قەدىمىگە تىلەيمەن ئاياز!

جابدۇق ئىشلىتىش پاش قىلىش

sadakat

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 106

يازما سانى: 149

نادىر تېمىسى: 0

تېللا: 472

تۆھپە : 4

توردا: 37 سائەت

ھالىتى:

ئاخىرقى: 2013-1-18

يوللىغان ۋاقتى 2012-4-14 15:11:30 |ھەممە قەۋەتنى كۆرۈش


	مۇھەببەت ، سۆيگۈ ...لىرىكىللىرىنى ۋايىغا يەتكۈزۈپ يازدىغان بۇ ئاكاشنى قىرقىتىن ئاشقان ، مۇھەببەت دەردىدە يۈرەك باغرى خۇن بۇلۇپ ، جۇدەپ كەتكەن بىر ئاشىق دەپ ئويلايتىم(ھى..ھى...ھى..چاخچاق ھە ..)2010-يىلى 4- ئايلارغۇ دەيمەن ئۇرۇمچى كونسۇل كوچىسىدا كىتۋاتسام شىنجاڭ ئۇنۋىرسىتىدا ئۇقۇيدىغان بىر دوستۇم ئاشۇ ئۇمىدۋار دەپ كۆرسىتىپ قويدى .كۆزلىرىمگە ئىشەنمەيلا قالدىم . ئۇمىدۋار ئاكامنىڭ (سۆيگۈنىگە تەگمىگەن قىزلار) قاتارلىق شىئېىرلىنى بەك ياختۇرمەن . بۇ يازمىنى ئاخىرىدا sadakat تەھرىرلىگەن. ۋاقتى 2012-4-14 19:02

باشقۇرغۇچىلار كۆرمەيۋاتقان ئوخشايدۇ ، ئىكراندىكى خنچە ئىسملارنى

جابدۇق ئىشلىتىش پاش قىلىش

ئىدىل

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 82

يازما سانى: 108

نادىر تېمىسى: 0

تېللا: 507

تۆھپە : 2

توردا: 122 سائەت

ھالىتى:

ئاخىرقى: 2012-6-16

يوللىغان ۋاقتى 2012-5-6 12:07:02 |ھەممە قەۋەتنى كۆرۈش


	مەن ئۈمىدۋارنىڭ يازغان ئەسەر ، يوللىغان ئىنكاسلىرىدىن تالانتلىق ياش قەلەم ساھىبى ئىكەنلىكىنى بىلگەنىدىم.كېيىنچە چۇڭقۇرلاپ تونۇشۇش ئارقىلىق ئۇنىڭ كىچىكىدىن ياخشى تەربىيە كۆرگەن ،قائىدە–يوسۇنلۇق،ئەدەپ–ئەخلاقللىق، كچىك پېئىل– كەمتاريىگىت ئىكەنلىكىنىمۇ بىلدىم. مەن ئەخلاق. قابىلىيەتتە تەڭ يېتىلگەن بۇ تالانتلىق ئىنىمىزنىڭ ھامان ئۇتۇق قازىنىپ شان–شەرەپلەر قۇچۇشىغا ، ئۇزۇن ئۆمۈر كۆرۈپ ، مول نەتىجە مىۋىلىرىگە ئېرىشىشىگە تىلەكداشمەن . بۇ يازمىنى ئاخىرىدا ئىدىل تەھرىرلىگەن. ۋاقتى 2012-5-6 12:08

مۇساپە مىڭنى شاللايدۇ،مەنزىل مەردنى تاللايدۇ.

جابدۇق ئىشلىتىش پاش قىلىش

گۆھەر ئابلا

تىرىشچان ئەزا

Rank: 10

ئەزا ئۇچۇرى

تىزىم نۇمۇرى: 39

يازما سانى: 429

نادىر تېمىسى: 0

تېللا: 697

تۆھپە : 7

توردا: 61 سائەت

ھالىتى:

ئاخىرقى: 2013-1-18

يوللىغان ۋاقتى 2012-5-6 12:49:22 |ھەممە قەۋەتنى كۆرۈش


	ئۈمۈدۋارنىڭ بۇنۇڭدىن كېيىنكى ئىجادىيەت مۇساپىسى مول ھۇسۇللۇق بولسۇن . سالامەت بولۇڭ . بۇ يازمىنى ئاخىرىدا گۆھەر ئابلا تەھرىرلىگەن. ۋاقتى 2012-5-6 12:49

جابدۇق ئىشلىتىش پاش قىلىش

ئەرقۇت

دائىملىق ئەزا

Rank: 5 Rank: 5

ئەزا ئۇچۇرى

تىزىم نۇمۇرى: 118

يازما سانى: 26

نادىر تېمىسى: 0

تېللا: 103

تۆھپە : 0

توردا: 14 سائەت

ھالىتى:

ئاخىرقى: 2013-1-15

يوللىغان ۋاقتى 2012-5-6 15:32:30 |ھەممە قەۋەتنى كۆرۈش


	ئۈمىدۋارنىڭ ئىجادىيىتىگە تېخىمۇ بەرىكەت تىلەيمەن! (دوستلار: «ئۈمۈتۋار» ئەمەس، «ئۈمىدۋار».)