روبائىيات ‹1-قىسىم›ـــ ئابدۇشۇكۇر مۇھەممەدئىمىن

ئەسسالامۇ ئەلەيكۇم ئەزىزلەر!

مۇھەممەد قادىر بارخان ئۇستاز مەرھۇم ئالىم  ئابدۇشۇكۇر مۇھەممەدئىمىننىڭ  ‹روبائىيات›ىنىڭ  1- قىسىمى ئۆزىدە بولمىغانلىقى ئۈچۈن  2- قىسىمىنى يوللىغانلىقى ئىزاھاتى بىلەن مەرھۇم ئالىم ئابدۇشۇكۇر مۇھەممەدئىمىننىڭ  روبائىيلىرىنى مۇنبەرداشلارنىڭ ھوزۇرىغا سۇنغان ئىدى،   بىر قىسىم ئوقۇرمەنلەرنىڭ بۇ كىتابنى تاپالمايۋاتقانلىقىنى كۆزدە تۇتۇپ، ئۆزۈمدە بار ئەۋزەللىكتىن مۇنبەرداشلارنىمۇ بەھر ئالغۇزۇش مۇددىئاسىدا، يەنە بىر تەرەپتىن ئۇستاز مۇھەممەد  قادىر بارخاننىڭ  ساۋابلىق ئىشىدىنى ‹قىزغىنىپ›  مەزكۇر ‹روبائىيات› نىڭ 1- قىسمىنى  ھوزۇرۇڭلارغا سۇندۇم، ھەم شۇ باھانىدە مەنمۇ بىر قېتىم كۆچۈرۈپ چىقىش ئارقىلىق ئۆزۈمنى كۈچلەندۈرۈشكىمۇ مەنپەئىتى يېتىپ قالار دېگەن ئۈمىدىممۇ يوق ئەمەس!


روبائىيدىنلا باشلىدىم:


1


ئارۇز ۋەزنىنىڭ بەھرى رەمەل شەكلىدە يېزىلغان روبائىيلار


1

مېھمىنىم! بۇ مەينى سۇندۇم سىز ئۈچۈن مەن ئىپتىدا،
زېھنىمىز ھەم قەلبىمىز قىلغاچقا بىر خل ئىقتىدا (1).
شۇنچە ھۆرمەت سىزگە ئىنئام، بۇ شاراب ساقىيسىدىن،
باغرىڭىزدا ئېرىگەن مەيدىن كېلۇر قالمىش سادا.

2

نەدىن ئالسۇن نەۋباھار زىننەتنى ئۇ گۈل بولمىسا،
كىم يېتەر گۈل قەدرىگە شەرھىيچى بۇلبۇل بولمىسا.
ئەشۇ بىر قەرنىدە(2) سىزگە كەلدى دۇچ ھەر خىل رەقىب،
شۇنچە ياۋنى كىم يېڭەر، قەلبىدە نۇر يول بولمىسا.

3

مەن گۈزەللىك ئاختۇرۇپ، رەسسام كەبى ئالەم ئارا،
ھەمدە شىرىنللىكنى ئىزلەپ، كېپىنەك بولدۇم يانا...
تەلپۈنۈپ كۈيلەشكە شادلىقنى بولۇپ شائىر گويا،
ئاقىۋەت بىلدىم بۇلار ئۆتكۈنچى، نىسپىي، بىۋاپا.

4

رۇمكىنى كۆزئەينىكى قىلدىم، ئېشىپ مەيخور ھاۋا،
چايقىلىپ تۇرغان قەدەھتىن ئاختۇرۇپ بىر مەھلىقا.(3)
غەرق ئىدىم زېھنىم ئارا...كۆزۈمدە پەرھاد ئەينىكى،
مەيدە كۆردۈم ئەنە شىرىن! كەلمىدى ئەمما سادا.

5

بولمىسا قەلبىڭدە شام، تۈندە قالۇرسەن بىزىيا، (4)
يانمىسا باغرىڭدا بىر ئوت، نەزمە بولمايدۇ سىيا...
ئەلنى سەن كۈيلەپ، سېنى ئەل كۈيلىسە ئۆلمەس ئىشىڭ،
بەرق ئۇرار ھەسەن-ھۈسەن گويا بولۇپ ئاسماندا يا.

6

بىر پەرى كۆردۈم سەھەر شەلپەر ئۇپۇقنىڭ قوينىدا،
سايىدىن زىننەت ياساپ، زۇمرەت ئېقىننىڭ بوينىدا.
ئاپىرىن ئالەم سېنىڭ زىبالىرىڭ چوغلۇق، بىراق،
سالما چاچى ئەركىلەر قايسى ئېزىزنىڭ بوينىدا.

7

شۇنچە كۆركەم تاغۇ -دەريا ئۈستىدە قۇتلۇق ھاۋا،
گۈل -گۈلىستان باغۇ -بوستان قوينىدا قايناق ناۋا.
بۇ ھاياتنىڭ رەڭگىگە مەردانىلەر زىننەت بېرەر...
بەختۇ-شەۋكەت تىز پۈكۈر دىللاردا يانسا ئوت لاۋا.

8

مۇنتەزىرمەن قۇي ماڭا، رۇخسار شارابى ساقىيا!
جامى ئەينەكتە كۆرۈنسۇن شۇ گۈزەل شىرىن قىيا...
بىر كۆرۈش بىرلە دىلىمنى قىلدى مەپتۇن جادۇ كۆز...
بەرمىدى تۈن ئۇيقۇسى ئۇ قىچقىرىپ بۇلبۇلگويا.(5)

9

گۈل ئەمەس گەر بەرگىدە جۇش ئۇرمىسا خۇش بۇي ھاۋا،
يوق ئىكەن بۇلبۇل ئەمەس، گەر لەۋزىدە كەيپى ناۋا.
باتۇر ئەرمەس تەقدىرى،  گەر كەلمىسە مۈشكۈلگە دۇچ،
بولمىسا ئاي ۋە قۇياش، گۈمبەز بىلەن پەرقسىز ساما.(6)

10

ئەگىدىم مېھرىڭ شېخىنى زوق بىلەن تاڭ ۋاقتىدا،
تەلپۈنۈپ باقتىم چېچەككە خۇددىي كۈتكەندەك نىدا.(7)
مايسىلار ئۈستىدە قاپتۇ تۈنكى سۆھبەتتىن ماكان،
ئاقتى مەڭزىمگە يېشىم، سىماپ بولۇپ كۆزدىن جۇدا.

11

قىسمىتى قامۇس ھاياتنىڭ ھەر بېتى قامۇس ماڭا؛
مەيلى قايغۇ، مەيلى شادلىق، كەلگىنى -ئامەت ماڭا.
بولسا گەر قەلبىڭدە ھىكمەت قىلغۇلۇق جۇتنى باھار،
بولمىسا قەلبىمدە ھىكمەن ئامىتىم ئاپەت ماڭا.

12

ئىنتىزارمەن قۇي ماڭا، لەۋ جامىدىن مەي ساقىيا!
ئوت بولۇپ كۆيگەن يۈرەككە شەربىتى لەۋدۇر شىپا.
بىر قەدەھ ئىچمەك بىلەن بولسام جۇنۇن (8) بىلمەڭ گۇنا،
نەئىلاج؟ تۈن ئۇيقۇدىن كەچكىن دېسە، بۇلبۇلگويا.

13

ئەرك ئۈچۈن جاندىن جۇدا بوماق شەرەپكە ئىپتىدا،
لەنىتى كۈندۇر ياشاش بولماي خالايىققا پىدا؛
ئۆز ئۆيىنىڭ راھىتى ئالدارمۇ مەردنىڭ قەلبىنى،
تېخى غۇربەت زەنجىرى تۇرسا غېرىبنىڭ بوينىدا.

14

خۇنپۇرۇش (9) بولدۇم ھامان، ئەي خۇنپەرەرس جانان ساڭا،
مەيپۇرۇش(10) بولدۇڭ ھامان، بۇ مەي  پەرەس بولغان ماڭا.
گۈل يۈزۈڭ خۇشتارلىغى، خۇنسىزغازاڭ بولدى يۈزۈم،
قىلدىمۇ بەخشەندە ئالەم بىھېساب ئەپغان ماڭا؟


15

گۆھەرۇ  زۇمرەت ۋەياقۇت جەم بولۇپ بىر قۇتىدا،
نۇر چېچىپ تۇرغان كەبى ئالماس پارىلداپ ئورتىدا...
جەم بولۇپ مەي ئىچمىكى دەنا ۋە رەنانىڭ ھوزۇر...
تۇرسادىل رىشتى نەھاجەت تاڭغىلى زەر پوتىدا.(11)

16

ئالمىلار شاخىدا كۆردۈم مەن سېنى ئاي ئورنىدا،
ئايدا يوق مۇنچە چىراي، شىرىن سۇخەن(12) شاتۇتىدا.
كېپىنەك ئاشىقلىقى، سەنچە ئەمەس گۈل ھۆسنىگە،
زەۋقمىدۇر ئۆرتەنمىكى پەرۋانىنىڭ ئىشق ئوتىدا؟

17

مىڭ تەشەككۇر، مەي قۇيۇپ سۇنغان ئېزىز ساقى ساڭا،
ئىشقىدىن مەندەك شېخى سۇنغان ئېزىز ساقى ساڭا.
روھىيەتتە قىلمىدى لوقمانمۇ ساقىچە پىكىر...
تۇرپە(13) جام-ئەسلىيۈرەك سۇنغان ئېزىز ساقى ساڭا.

18

تىغ تۇتۇپ سەن ئوۋغا چىقما، زۇلپىقارىڭ(14) بولمىسا،
قەستىكار سەيلىگە بارما، گەر تۇمارىڭ بولمىسا...
تۇت قولۇڭدا شەربىتى تولغان قەدەھنى ئەتىۋا،
مەيلى تۆك يەرگە ئىچىشكە دىلخۇمارىڭ بولمىسا.

19

ھۆرى-غۇلمانلار كېلىپ، بولدى ئۆيۈم جەننەت گويا،
ئۇندا بار لوقمان، سۇلايمان، بىلقىس ھەم بۇلبۇل گويا ‹1›
ھىكمىتى ــــ دەناغا ئۇستاز، ھۆسنى ــــ رەنا ئۈلگىسى،
بۇ ئېزىزلەرگە دىلىمدىن شەربىتى قۇتلۇق گىيا.

20

بىر قەدەھ شەربەتنى تۇتتۇم ئىككى لەبنىڭ جامىغا،
تەڭ كۈلۈپ قىلدى تەبەسسۇم، ساقىنىڭ ئىنئامىغا.
خۇش نەزەر سالسام بېغىمغا ھەممە گۈللەر مەئنىدار،
ئىچمىگەن لەۋلەرمۇ تولدى سۆيگۈنىڭ ئىلھامىغا.

داۋامى بار

يوللىغۇچىنىڭ ئەجرىگە مىڭلارچە رەخمەتلەر ياغقاي.
1-رۇبائىنىڭ 2-مىسراسىدىكى «بولغاچقا» دىگەن سۆز«قىلغاچقا»دىگەن سۆزگە ئۆزگەرتىۋىتىلسە...

51

يىغلىۋال سىڭلىم كۆزۈڭ ياشىدا يامغۇر ياغدۇرۇپ،
كۆز يېشىڭ چۈشكەن زېمىن بولغاي چىمەن... تاڭ قالدۇرۇپ...
قونغىنىدا نالىلىق سازىڭغا شادلىق بۇلبۇلى،
مەي ئىچەرمىز ئولتۇرۇپ، نەزمى ئارا مەي ياندۇرۇپ.

52

بىر نىگار كۆردۈم زېمىننى چېچى سۈپۈرەر يەلپۈنۈپ،
چاڭقىغان تۇپراقمۇ قاندى، خۇش ئىپارغا پۈركۈنۈپ.
بىر مىنۇت داڭگال بولۇشنى خالىدىم پۇت ئاستىدا،
ئۇرسا كۆكسىنى قەپەزگە تۇتى قۇشمۇ تەلپۈنۈپ...

53

چوغ گۈلۈڭ گۈلزارىنى مەن سەيلىتىپ بولدۇم كاۋاپ،
ئەتىرگۈلدىن قىس چېچىڭغا، تاڭ سەھەر يولغا قاراپ.
كۆكرىكىڭ چوغلۇق گۈلىنى تاكچىسى قىلسام تاۋاپ،
گۈل لېۋىڭدىن ئەي گۈزەل! تامغايمۇ مەست قىلغۇچ شاراب؟

54

غۇنچە مەڭزىڭگە تۆكۈلسەم سۈبھىدە شەبنەم بولۇپ،
گۈل يۈزۈڭ چاشكىدا ئاچساڭ تېخىمۇ كۆركەم بولۇپ.
شامدا مەن بۇلبۇل بولۇپ، شاخىڭدا خەندان ئەيلىسەم،
تۈن بېسىپ تاڭ لۇتپىنى كۈتسەككى بىز ھەمدەم بولۇپ.

55

سەن شاراپ قۇيدۇڭ شۇ كۈن قۇلۇڭغا پىيالە ئېلىپ،
گۈل ئېچىپ باقتىڭ ماڭا ھۆسنۈڭنى سەن لالە قىلىپ.
نەچچە كۈن پىكرۇ-خىيالدىن قايتمىدىم ھالىمغا مەن،
تۈنلىرى كىردىڭ چۈشۈمگە بىر گۈزەل سايە سېلىپ.

56

كۆرمىدىم، كۆرمەكچىمەن،  يار ئۆتسە بۇندىن يول ئېلىپ،
ئالدىغا چىقماقچىمەن جان رىشتىدىن ساز چېلىپ،
قاپقارا چاچى ئۇنىڭ يەلپۈپ  بىھۇش قىلغاي مېنى،
كۆزلىرى ھەتتا ئوغۇرلاپ دىلنى، باغرىمنى يېرىپ.

57

ھېچ قاچان گۈمبەزنى كۆك دەپ قۇش ئاڭا قاقماس قانات،
تار قەپەزگە ئۇۋا سالساق ھەر قاچان بۇلبۇلغا يات.
بۇت بىلەن سۈرەت جاھاندا بولسىمۇ غايەت گۈزەل،
ۋەسلى چۈن ئۆرتەنسىمۇ دىل كۈتمىگەي ئۇندىن نىجاد.

58

ئاي يۈزىدىن ئىزلىمە نۇر، ئاي  يۈزىدە بىر بۇلۇت...
بەرمە دىل گۈل رەڭ سەنەمگە، قەلبى يۇق ئۇ، جىسمى بۇت.
ئۇلپىتىڭ رەنا ئىكەن، جايىڭ  دېمەك باغۇ-ئېرەم،
سۆھبىتىڭ دانا بىلەن ــــ تەختىڭ سېنىڭ مىراجى قۇت.(21)

59

قىلما نابۇت تال ياغاچنى، نۇھنى ‹4›قۇتقازغان ياغاچ،
ئوتقا سالما سەرۋىنى سازىڭغا مۇڭ سالغان ياغاچ،
يوق ياغاچتەك خار، ئېزىز ھەم مۆتىۋەر كەمتەر، سۈپەت.
باغ-بىنا، خەت ــــ مەرىپەتكە تۇنجى يول ئالغان ياغاچ.

60

چۈجىنى كۆرمەك ئۈچۈن تاقەت قىلالماستىن ئەگەر،
باستۇرۇپ قويغان تۇخۇمدىن بىر تۈشۈك ئاچساڭ خەتەر.
كائىناتتىن تا نەپەس سۈرمەككە ئۆز قانۇنى بار،
مىڭ سۆيۈنسەڭمۇ يۈزىن بىر خىلدا ئاچمايدۇ قەمەر.

زارلىما باشىڭغا يەتسە مىڭ بالا،
مىڭ بالامۇ بىر بالاغا مۇپتىلا.
زارلىماس باغۋەن زىمىننى باسسا سەل،
ئوسما كەتسە نە ئەلەم قاشىڭ قالا.

ساجىدە بۇ خاسىيەتلىك ئەجرى بىلەن بۇ رۇبائىلار قەلبىمدە قايتىدىن جاراڭلاۋاتىدۇ.

مەن كىتاپتىن ئەمەس ئىسىمدە قالغانلىرىنى ئىنكاس سۈپىتىدە يوللاپ بىقىۋاتىمەن.

ئاي دىسەم سەن ئاي ئەمەس،ئاق لايغا چۈشكەن شولا سەن،
قارچۇغا كۆزلۇك دىسەم،گوياكى قەلبى كورلا سەن.
مەن سېنڭ ئالتۇن قەدەھ جام دەپ بىلىپ قۇيسام شاراپ،
قىممىتى ئىخلاس كۆتۈرمەس،چىغدا ئەشكەن چويلا سەن.

چەرخنىڭ دەردى تولا ،ئەۋارىسىدىن ئۆرگىلەي،
خار ئېتەرگە بىگۇناھنى چارىسىدىن ئۆرگىلەي.
پىشىۋايىم دەپ ئۇنى كۆكسۇم قاناتسام ،بى ۋاپا،
مەي قۇيۇپ سۇنغان سۇنۇق جام كاسەسىدىن ئۆرگىلەي.

61

«مەن قەلەندەر شاھىمەن، ئوردام قەلەندەر  خانىدۇر»
ئۇشبۇ ئوردام شەمئىگە دەۋران پەقەت پەرۋانىدۇر.
قىلسا «ئەزرائىل‹5›مامات، قالمايدۇ ئەستە شاھمۇ ھەم،
شەنىمىزگە «جىبرىئىل» تىكلەپ مۇنار ئاۋارىدۇر.

62

ئاينى ئىزلەپ كۆككە باقما ئاي سېنىڭ يانىڭدىدۇر،
گۆھەر ئىزلەپ سۇغا كىرمە، گۆھىرىڭ دانىڭدىدۇر...
بەزىدە قاقشال گىيادىن سەن تاپۇرسەن چوڭ قۇۋۋەت،
بول پەخەس: ئاغۇ-زەھەر گايىدا قەندانىڭدىدۇر.

63

سۆزلىرىڭدە بىر لەزىز(22) نازۇك تەبەسسۇم ئەكىلەر،
لالىدەك مەڭزىڭدە كۈلسەڭ غۇنچە مەۋسۈم ئەكىلەر.
بەختىيار كۆرسە كۆزۈم، گەر كۆرمىسەم پىنھان خىيال ــــ
لەززىتى بىرلەن دىلىم تولغاندا كۆكسۈم ئەكىلەر.

64

لايدا ياتسۇن، تاجىدا تۇرسۇن گۆھىرىڭ گۆھەر بولۇر،
پىرقەت، ھىجرەت، بەختۇ-ئامەت دىلبىرىڭ دىلبەر بولۇر.
كېپىنەك پەرۋانە بولماس ئوت ئارا كۆكسىن ئۇرۇپ،
تۇرسىمۇ مەدرىستە باغلاق، كاج خەرىڭ كاج خەر بولۇر.‹6›

65

زەر شەپەق ئىنئامىدىن رەڭگىممۇ زەر-لالە بولۇر،
ساقى بولسا كۆزلىرىم، مەڭزىممۇ پىيالە بولۇر...
قۇت ئىدى ئەڭ زور ۋىسال ئىلكى ماڭا قۇيسا شاراب،
شۇ ۋىسالغا يەتمىسەم ئىلھام ماڭا نالە بولۇر.

66

تىل بىلەن زەخمەيلىگەن دىل، بىناۋادۇر بىر ئۆمۈر،
بەرى بىر داڭگال تۇرۇر تارىخ ئۈچۈن ئاقساق تۆمۈر.
قاپقارا رەڭلىك گۆھەرنى چاغلىما سەن قەدىرسىز،
كۆر، كارامەت گۈل-گۈلىستان كۆرسىتەر قىشتا كۆمۈر.

67

سۇمرۇقۇڭ باشىڭدا بولساڭمۇ قاناتلىق شىر ئۇچار،
ئۇشبۇ پىرقەت دەشتى قىلماس كىمنى ھەر كويغا دۇچار؟
گەرچە زەر تاج ساھىبى بولساڭمۇ ئالەمدە ئېزىز،
يەتسە موھتاجلىق ساڭا بولماق ئاسان بىردەمدە خار.

68

بىر پەرى كۆردۈم ئۇنىڭ ھەر بارمىغى دەرمان قىلۇر،
ئوت كۆزى كۆرگەن كىشىنى سۆيگۈگە پەرمان قىلۇر.
غۇنچە مەڭزىگە قونۇشنى كېپىنەك ئارمان قىلۇر،
بىلمىدىم گۈل تىرنىقى ئاخىر دىلىمنى قان قىلۇر.

69

ۋەسلى يار كۆردۈم ئۇنىڭ لەۋزىدە بال تامچىپ تۇرار،
كۆكرىكىدە چوغ يۈرەك مەشئەل كەبى يالچىپ تۇرار.
كېپىنەك گۈل ھۆسنىگە، ئوت قەلبىگە پەرۋانە گەر،
ئىختىيار ئەتسە ئاڭا كىرپىك ئوقىن سانچىپ تۇرار.

70

جادۇ كۆز كۈلدى دېمە كۈلگەندە ئادەم ئۆلتۈرۇر،
جاننى ئالماقتىن مۇقەددەم، سېنى بىر رەت كۈلدۈرۇر.
بېشىدا سەللايى تاج، ئۈستىدە تەقۋالىق لىباس،
ئىشتىمايى گەر تەقەززا ئەيلىسە، ئايەت ئۆرۇر.

71

بىلمىدىم ساچى ئۇنىڭ سۇمبۇلمىدۇر، سۇمرۇقمىدۇر،
قاشلىرى مىسران قىلىچ، كىرپىكلىرى مىڭ ئوقمىدۇر.
بىر كۆرۈپ بولسام ئەسىر، قىلدى كاۋاپ ئېيتقان سۆزى،
كۆرسىتىپ چوغ ھۆسنىنى، بىر باقمىغى تۇترۇقمىدۇر.

72

ھۆسنىڭىز گۈللەرگە شاھ، بەرگى ئۇنىڭ زەر ئۈنچىدۇر،
بۇلبۇلۇڭ شەيدالىغى ھەر قانچە بولسا مەنچىدۇر.
گۈلگە گۈل بەرگى بىلەن قىلدى تىكەننى كىم قوشۇق؟
كۆر تېنىمدە قان دېغى ھېچبىر تىكەنسىز غۇنچىدۇر.

73

ئاچمىساڭ گۈلزار يۈزۈڭ، ئالەم ئاڭا موھتاج بولۇر،
گەرچە ئاچساڭ نۇر جامال، ھەتتا قۇياش گۈلتاج بولۇر.
ئىزلىسەڭ چىن مەنىسىنى سەن گۈزەللىك، سۆيگۈنىڭ،
قىسمىتى چەرخى پەلەك ھەردەم ساڭا تىلماچ بولۇر.

74

زىننىتى قەلبىدە يوقلار، ئۈستىگە زىننەت تاقار،
ئىدرىكى كۆزىدە يوقلار، ئۇشبۇ «زىننەت»كە باقار.
ئىلمى-ئىرپان بىرلە ياۋلار پىتنەسى زىننەت  ساڭا،
گۈلباھار زىبالىغىڭ، دەنالىغىڭ دەريا ئاقار.

75

دىلبىرىم دىل بەرمىدى تۇرسام ئاڭا مەن دىلخۇمار،
بىر كۈلۈپ تىل بەرمىدى، تاقىسام ئاڭا مەن تىلتۇمار.
لەبلىرىڭ شاھى جەھلىگە لېۋىمدىن تىغ ئۇرۇپ،
ۋەدە ئالسام قورقىمەن شۇدەم يۈزۈمگە قان تامار.

76

باققا كىرسەم گۈل كۆرۈشكە گۈلى رەنا ئولتۇرار،
چېھرىسىدە بىر قوياش، زىھنىدە دەنا ئولتۇرار.
باغدا بۇلبۇل قۇستى قان، نالە قىلىپ گۈل كەيپىدىن،
كۆزىدە ھەسرەت يېشى، لەبزىدە مەنا ئولتۇرار.

77

بىر قىيا ناز ئىشلىتىپ، قەلبىمگە مەئنا قىلسىڭىز،
زەپىرەڭ بەرگىمنى(23) گۈلرەڭ بىرلە رەنا قىلسىڭىز.
جىلۋە ئەيلەپ بەزىدە كىبرۇ-تەمەننا قىلسىڭىز،
تۈندە مەجنۇن، تاڭ سەھەر ئەقلىمنى دانا قىلسىڭىز.

78

بولمىسا شاخىڭدا بۇلبۇل سەرۋى قامەت مەنىسىز،
كۈلمىسە يېنىڭدا جانان، بەختۇ-ئامەت مەنىسىز.
زىھنۇ-كارىڭنى ئەگەر ئەل بەختىگە بەخش ئەتمىسەڭ،
ئۆز غېمىڭ ئۈستىدە قىلغان ئىستىقامەت (24) مەنىسىز.

79

ئى ھۇما!(25) ياشىم كۆرۈپ، جەۋلان ئېتىپ كەلگەيمۇسىز،
قۇشى قەقنۇس! نەزمىگە نامىم قېتىپ كەلگەيمۇسىز.
كۆزلىرىمدىن ئۇرغىسا پونتان بولۇپ ئۈنچى زىيا،
زەر خېرىدارى بولۇپ، ئاندىن يېتىپ كەلگەيمۇسىز؟

80

چاقنىسا شەلپەر شەپەقتەك سەھنىدە گۈل ھۆسنىڭىز،
مەس بولۇپ يەرگە يىقىلسام ئاغرىماسمۇ كۆكسىڭىز.
خۇددى قەقنۇس كەپتۇ دەپ، بولسام بۈگۈن ھەيران يەنە،
مەھلىيالىق غارىغا ئىرغىتتى نازۇك كۈلكىڭىز.


بۇ يازمىنى ئاخىرىدا   ساجىدە سۇلايمان تەھرىرلىگەن. ۋاقتى  2012-6-7 12:20  

گەرچە بولسا ئەزرائىلدىن ئىككىسى،
ھەم تىرىك قالماس ئۇنىڭ ھىچقايسىسى...
ھەم تۇغۇلماق ھەم ئۆلۈممۇ مەنىسىز،
بۇ جاھاننىڭ بولمىسا شات ، قايغۇسى.

زارلىما باشىڭغا يەتسە مىڭ بالا،
مىڭ بالامۇ بىر بالاغا مۇپتىلا.
زارلىماس باغۋەن زىمىننى باسسا سەل،
ئوسما كەتسە نە ئەلەم قاشىڭ قالا.

چەرخىنىڭ دەردى تولا ئەۋارىسىدىن ئۆرگىلەي،
خار ئىتەرگە بىگۇناھنى چارىسىدىن ئۆرگىلەي.
پىشىۋايىم دەپ ئۇنى كۆكسۇمقاناتسام،بى ۋاپا،
مەي قۇيۇپ سۇنغان سۇنۇق جام كاسەسىدىن ئۆرگىلەي.

ئاي دىسەم سەن ئاي ئەمەس،ئاق لايغا چۇشكەن شولا سەن،
قارچۇغا كۆزلۈك دىسەم،گوياكى قەلبى كورلا سەن.
مەن سېنى ئالتۇن قەدەھ-جام دەپ بىلىپ قۇيسام شاراپ،
قىممىتى ئىخلاس كۆتۈرمەس چىغدا ئەشكەن چويلا سەن.

ساجىدەنىڭ بۇ ھىممىتى بىلەن بۇ رۇبائىلار قەلبىمدە قايتىدىن جاراڭلاشقا باشلىدى.شۇڭا كىتاپتىن ئەمەس ئىسىمدە قالغانلىرىنى ئىنكاس سۈپىتىدە يوللاپ قويدۇم.

مەدەت بەرگەنلىكىڭىزگە ھەشقاللا غازى ئوغلى.

خىزمەت ئالدىراشلىقى بىلەن ئىنكاس تەكرار يوللىنىپ كىتىپتۇ. ئۆزرىلىكمەن.