روبائىيات ‹1-قىسىم›ـــ ئابدۇشۇكۇر مۇھەممەدئىمىن

ساجىدە سۇلايمان · ۋاقتى: 2012-6-13 22:00:40


	151 بولمىدىم ياكى مۇيەسسەر كۆرگىلى «لوقمان»نىمۇ، ئىچمىدىم تەڭ يا، ئىبنى سىنا بىلەن بىر جامنىمۇ‹12›، شۇ ئېزىز شەمشى-چىراققا تەلپۈنۈپ پەرۋانىدەك، كاج كېلىپ شۇم تەلىيىم سالدى رەقىپ ھىجراننىمۇ. 152 «بۇدىگە خۇرسەن بولۇپ، غەم قىلمىغىن نابۇدىگە، كىم تەلەپتىن قالمىدى، ئاخىر يېتەر مەخسۇدىگە»‹13› ئۇنتۇما زاھىت خالايىقتىن ئۈمىت كۈت ھەر زامان، بەخشېتىپ ئۆتكۈزمە گۆھەر ئۆمرىنى مەبۇدىگە. 153 كۆيمىسەم مەلئۇن دېمە، كۆيسەم ساڭا مەجنۇن دېمە، كۆيمىگىم ئۆمرۈمچىدۇر، ھەرگىز ئۇنى بىر كۈن دېمە. تەلىيىمنىڭ يوقىدىن كۆيدۈم، سېنى بىر سۆيمۈدۈم، گەر نېسىپ بولسا نىگار سۆيسەم لېۋىڭنى «ئىم» دېمە. 154 بىر گۈزەل كەلمەكتە باغى بىرلە نازى ھۆسنىدە، قوزغىتىپ زوق دولقۇنى، كۆرگەن جىمى كۆز ئۈستىدە، مەۋج ئۇرۇپ تۇرسا گۈزەللىك ئۈلگىسى گۈل كۆكسىدە، ئەكسىتەر يۈكسەك زەپەرنىڭ شاتلىقى كۈلكىسىدە. 155 ئاق يۈزۈڭنى ئاي دېسەم، ئاي نە قىلۇر يول ئۈستىدە، ئاي ۋىسالىڭ بەرق ئۇرۇپتۇ لالە رەڭ گۈل ئۈستىدە، لالە گۈل دەپ قونسا بۇلبۇل، كۆيدى ئۇ، پەرۋانىدەك، بولمىساڭ ئوت نە قىلۇر يالقۇنى بۇلبۇل ئۈستىدە؟ 156 كۆرۈنەر تۈن تەسۋىرى رەيھانۇ-سۇمبۇل چېچىدە، گۈل يۈزى گوياكى ئاي تۇرغان يېنىپ تۈن كېچىدە، تىلسىمى قۇدرەت ماكان ئوخشار ئۇنىڭ ئاھۇ كۆزى، سەبر ئېتەر ئالەمنى كۈندەك قىپ-قىزىل رەڭ ئىچىدە. 157 گايى تىمساق، گايى ھۇقۇش، گايى ئەژدار رەڭگىگە، ئۆزگىرىپ ناكەس بۇلۇت، كۆپ قۇترىدى ئۆز مەيلىگە. ئاي بىلەن چولپاننى نابۇت ئەتمىگى مۇمكىنمىدى!؟ نۇر چېچىپ تۇرسا قۇياش چەكسىز ئۇپۇقنىڭ كەينىگە!؟ 158 ئۆتتى بىر قەرنە چېلىش بىرلە كۈرەش... جەڭ ئۈستىدە، بولدى مەلۇم دوست ۋە دۈشمەن ھەر كىشىنىڭ قەلبىگە. زوق بىلەن سالساق نەزەر كەلگۈنچى ئۇ زور قەرنىگە، قانچە ئۆرنەك دىلدا گۈللەر قوشقىنى يەر ھۆسنىگە. 159 گۈل ئېچىلماس بولمىسا، گۈل بەرگىنىڭ ھېمايىسى، ھۆل يېغىن بولماس مادار، سۇنغاندا گۈلنىڭ پايىسى. گۈل گۈزەل بولغان بىلەن موھتاج يوپۇرماققا دېسەم، دېدى بۇلبۇل: پىكرىڭىز ئىككى جاھان سەرمايىسى... 160 گەر خىيال قىلسام مۇشەققەت ئىچرە راھەت نازىنى، ئەۋجى شاتلىقتىن سېزەرمەن قايغۇنىڭ ئاۋازىنى... مەيلى راھەت، مەيلى كۈلپەت بولمىغاي مىزان ماڭا، ئەلگە شەيدالىق چالۇر چىن ئىپتىخارىم سازىنى.

ساجىدە سۇلايمان · ۋاقتى: 2012-6-13 22:24:56


	161 گۈل ئۇنى بۇلبۇل دېمەس، گەر كەلمىسە سايراشقىنى، قونىدۇ بۇلبۇل چىمەنگە گۈل يۈزىنى ئاچقىنى... بىلمىسە جىلغىدا كەكلىك جان بېقىشتىن باشقىنى، ئىشق ئوتىدا راست كۈلۈپ كاككۇك قۇسار قان تاشقىنى. 162 ھەر زامان چۈشسە ئېسىمگە ھۆسنى جەننەت ئول پەرى، توختىماي تېپچەك ئېتىپ پەرۋاز قىلار دىل كەپتىرى... بىر ئەمەس، ئۆتتى باھارىم ئوپ-ئوچۇق دىۋان كەبى، سۈرىتى مەدھى بىلەن تولدى خىيالىم دەپتىرى. 163 مەيلى ھۆل قىلسۇن تېنىم، يامغۇر يېغىننىڭ نالىسى، پەخرلىك قىسمەت ماڭا، بولماق گۈلىستان پايىسى... ئۈنچىلەر تىزغاچ يېشىمدىن رىشتىگە بۇلبۇل دېدى: جادۇدىن چەككەن جاپانىڭ ئاقىۋەت بار ئەجرىسى. 164 چەرخىنىڭ دەردى تولا، ئاۋارىسىدىن ئۆرگىلەي، خار ئېتەرگە بىگۇنانى چارسىدىن ئۆرگىلەي... پىشىۋايىم دەپ ئۇنى كۆكسۈم قاناتسام، بىۋاپا، مەي قۇيۇپ سۇنغان سۇنۇق جام-كاسسىسىدىن ئۆرگىلەي. 165 ئاڭلىغانتىم بۇ گۈزەلنىڭ تۆت تەرەپتىن داڭقىنى، شەنىگە ياققان ئىدىم، ھەر كۈندە ئىسرىق داڭقىنى. ئول پەرى ئويناپ ئۆتۈپ، يا چاچمىدى باشىمغا زەر، ياكى گۈلزار لەۋلىرىدىن يەشمىدى دىل چاڭقىنى. 166 يا، ھالاكەت دېڭىزى دەيمۇ ئىشىق تەبىرىنى؟ ئەسكە ئالغاندا مۇھەببەت سېھرىنىڭ تەدبىرىنى. يا، لەتاپەت(46) گۈلشىنى دەيمۇ ئۇنىڭ تەسۋىرى؟ ھېچ كىشى قىلماس تەسەۋۋۇر سۆيگۈسىز تەقدىرىنى. 167 تاكى مەلئۇن ئەپسۇنى، قىلغان ئىدى تايغان مېنى، قەۋمىگە قالقان بولۇشنىڭ قەستىدە قۇربان مېنى... ئىت ھىساۋى ئۆتكۈزۈپ بىر قەرنىنى كۆردۈم بۈگۈن، ئاقىۋەت قىلدى ئادالەت قايتىدىن ئىنسان مېنى. 168 يۈزلىرىمدۇر بەرگى گۈل، قان تامچىسىدۇر شەبنىمى، بىخەۋەر مەن ئۆزگى غەمدىن، ئۆز غېمىمدۇر ئەل غېمى؛ بەنت ئېتىلسە قاپقا غەملەر ــــ بولسا ئەل غەمدىن خالاس، تەننى قاپ قىلسام يىغىلسا خەلقئارا غەملەر جېمى. 169 بىر پەرى ئۆتتى يېنىمدىن ئاي قىلىپ رۇخسارىنى، نازۇ-سۈلكەت بىرلە گويا تولدۇرۇپ گۈلزارىنى. جەننىتى زاھىرنى (47) كۆردۈم، نە كېرەك تەقۋايى باغ، لەۋلىرى بىھۇش قىلۇر سالماي تۇرۇپ كۆنارىنى. 170 مۇنچە قەيسەرلەر ئىچىدە نادىرى ئەسئەت (48) ئىدى، كۆتۈرۈپ مەشئەلنى ئاخىر كۆيمىكى قىسمەتمىدى؟ كۈلدى كۆكلەم كۆز يۇمۇپ يانغاندا گۈلشەن بۇلبۇلى، بولسا ھىس گۈل قەلبىدە، بۇ، يەتكۈلۈك ھەسرەت ئىدى.

Abdulla071130 · ۋاقتى: 2012-6-14 00:33:50


	مەيلى ئەۋۋەل مەيلى ئاخىر بىلگىنى خوپتۇر، يەنە ئۆزى بىلگەننى دىيىش ئۆزگىگە پۇرسەت مانا، بۇ مىھنەت بىزگە يېتىپتۇ تور ئارا ئۇشبۇ ۋاقىت، سىزگە رەھمەت ئىيتىدۇ باغرىنى قىلىپ يارا.

ساجىدە سۇلايمان · ۋاقتى: 2012-6-16 02:19:18


	171 گەرچە «ئىبلىس» ئاتسا ئوقنى، تۈگمىچە قالقان بولاي، سۇغا غەرق بولسا «يۇنۇس»‹14›شۇڭغۇپ ئاڭا چورتان بولاي،(49) مەيلى جادۇ ھىلىسىدىن بىر مەھەل قايغان بولاي، ساھىبىم (50) «ئەپسۇن»نى ياندۇر، تۇتىدەك خەندان بولاي. 172 قوغلىدى ئىللىق سابا مۇزدەك تەكەببۇر دەلۋىنى، (51) گۈل، باراڭلار قاپلىدى مۇنبەت ئېتىز ھەم چەللىنى. مىڭلىغان رەڭدار چېچەكنى سۈيۈنۈپ كۆردۈم بۈگۈن، كۆز يۇمۇپ قىلدىم مۇجەسسەم بۇ باھارنىڭ قەدرىنى. 173 سۆرۈلۈپ ماڭغاندا توزدەك چاچلىرىڭنىڭ قۇيرۇقى، قىلدى سەرخۇش خۇددى سەندەل ئەشۇ زۇلپۇڭ پۇرىقى، قاپ-قارا تۈندەك چېچىڭدىن تىڭرىقىپ تۇرسام بىھۇش، دەل زىيا بەردى دىلىمگە ئاي يۈزۈڭنىڭ يورۇقى. 174 چاچلىرىڭ سالدى تىنىمگە سۆيگۈنىڭ زەنجىرىنى، كۆزلىرىڭ قىلدى نامايان، كۆكرىكىڭنىڭ سىرىنى... ئىچمەيىن ئالەم ئارا لەب جامىدىن بىر قەترە مەي، كىم قىلۇر مەندەك پىدا، ئىشقىڭغا ئۆز تەقدىرىنى!؟ 175 بىر پەرى چىقتى ئىشىكتىن سەل ئېچىپ دىدارىنى، يەلپۈنۈپ تۇرغان چېچى توستى ئۇنىڭ رۇخسارىنى، قايتىلاپ باقماققا دىلنى چولغىدى زەۋقى ھەۋەس، كېپىنەكتەك سەيلىتىپ يۈرسەم دېدىم گۈلزارىنى. 176 گەر ئاتام بىرلە ئانام بولسا تىنىم ئىنئامچىسى، روھلىرىمغا روھ قوشار ئۇستاز ئۇنىڭ ئىلھامچىسى. بەتلىرى قامۇس ھاياتنىڭ ئاز ئەمەس ئۇنتۇلغىنى، گەر ھاياتىم بولسا شام، سىز دەل ئۇنىڭ ئوت يالچىسى. 177 بەزىدە ھىجراننى سالسا، تاغ ۋە دەريا ۋادىسى، بەزىدە رۇخسار مۇساپە دەستە گۈلنىڭ ئارىسى. گەرچە ھىجراندىن سوزۇلسا، رىشتىمىزنىڭ تارىسى، شات جامالىدىن يېتەر ئەۋجىگە داستان پارىسى. 178 زېھنىڭىز چوڭقۇر دېڭىز، ئىرپان ئۇنىڭ زور ئۆركىشى، مەنىدار ھەر لەۋھىڭىزدە يالتىرار گۆھەر تېشى. باغرىڭىز ئىللىق ماكان، سەزگەي ئۆزىنى ھەر كىشى، ھىجرىڭىز ھەم ۋەسلىڭىز قوزغايدۇ ئوخشاش كۆز يېشى. 179 بىر پەرىكەن، ھۆسنىگە باقسام قاچۇردى يۈزىنى، ئۆسكىلەڭ كىرپىكلىرى مەندىن يوشۇردى كۆزىنى. ئىشتىياقىدىن بىمار بولسام شىپا ئەيتۇر ھەكىم(52)، ئاڭلىماق پەرزدۇر گۈزەلنىڭ نازۇ-ھىكمەت سۆزىنى. 180 بىر زامان مەي بىرلە قەلبىم شادىمان ئولسا ئىچەي، بىر كۈلۈپ ئالەمدىن ئۆتمەككە كۈنۈم تولسا ئىچەي... سۈرىتى گۈلزارغا ئوخشاش لەۋزى بال مېھمان بىلەن، لالەرەڭ مەينى تۇتۇپ، ھەتتا زەھەر بولسا ئىچەي.

ساجىدە سۇلايمان · ۋاقتى: 2012-6-16 02:45:19


	181 گۈلچى قىز كۆردىمكى ھەيھات! قولىدا گۈل دەستىسى، بولدى گۈلزار شۇ چىمەندىن بۇ شەھەرنىڭ رەستىسى... گۈلچىگە زوقلاندى كۆزلەر، گۈلگە چۈشمەستىن نەزەر، تەڭ كېلەلمەس گۈلچىگە ھېچقايسى گۈلنىڭ بەستىسى(53). 182 بىر پەرى ھۆسنى-جامالى مېنى مەپتۇن ئەيلى، سۇلدۇرۇپ بەرگىنى، گۈل سىنەمنى(54)ئۇ، خۇن ئەيلىدى. ئىشق ئارا ئاندىن نىجات كۈتسەم، دىلى تاشتىن ئۆتەر... ھۆسنى شۆھرەت بەيگىگە جىسمىمنى پەيتۇن ئەيلىدى. 183 گۈل ئېچىلماس بولمىسا ياپراق بىلەن گۈل شاخچىسى، ئەر كۆكەرمەس بولمىسا پەرۋىشچى باغۋەن، باشچىسى. مەيلى ئۇستاز، مەيلى ئۇلپەت بارچىسى قىممەت، بىراق، ئۆزىنى بىلمەك كىشىنىڭ بىر ئۆمۈرلۈك ساقچىسى. 184 كۆينىكىڭىز مىسلى ياراق، يۈزىڭىز گۈل غۇنچىسى، بەرگىڭىزگە تامچىغاندۇ كۆز يېشىمنىڭ ئۈنچىسى؟ گەرچە چاقماقنىڭ ماكانى بولسا ئوتلۇق كۆزىڭىز، چاچ باراڭلىق لېۋىڭىز ئۇسسۇزلۇقۇم سەگۈنچىسى. 185 ھۆسنىڭىز ئەكسى ئەتسە گۈلنى، ھالىتىم تەسۋىرى مەي، شۇ خوشاللىق پەيتىدە غەم-قايغۇ، كۈلپەتتىن كېچەي. قويسا ھىجران ئىككىمىزنىڭ ئارىغا گەر داغ-داۋان، شۇ تەۋەرۈك رۇمكىغا لىق تولدۇرۇپ كۆز ياش ئىچەي. 186 ھۆسنىڭىز ئەسلەتتى گويا بەشكېرەم گۈلزارىنى، چېچىڭىز ھەر يان ئىغاڭلاپ، چالدى رىشتىم تارىنى. بولسا مەجرۇھ كۆزىڭىز ئۇچقۇنىدىن باغرىم ئەگەر، سۈرمە كىرپىك بىرلە تىككەيسىز مۇھەببەت بارىنى... 187 كۆزلىرىڭنىڭ قارىسى ــــ بولدى دىلىمنىڭ يارىسى، ئىدرىكىم بولدى ھامان گۈل قامىتىڭنىڭ سايىسى... بىلمىدىم قاي كۈن بولۇپمەن مۇپتىلا بۇ سۆيگۈگە، قىلدى ئوت تەننى كۆزۈڭ بەرقى-چېقىلداق پارىسى. 188 يار ئۆيى مەيخانە بولسا، باغۇ-ئايۋاندىن كېچەي، شىرىنىم ۋەسلىنى دەپ، تاغلار ئېشىپ دەريا كېچەي. جادۇ كۆز ناز ئىشلىتىپ، گەر تۇتمىسا شەربەت ماڭا، لەۋلىرىنىڭ جامىغا لىق تولدۇرۇپ ئاغۇ ئىچەي. 189 ئارغىماقتەك ئويناپ ئۆتسەڭ، يار ساڭا مەن يول بولاي، چاچلىرىڭنى سۇغا سالساڭ، سۈيى زۇمرەت كۆل بولاي. ھىدلىساڭ گۈل غۇنچىنى، باغىڭدا خۇش بۇي گۈل بولاي، سۆيگۈدىن قەلبىڭدە ئوت يانسا كۆيۈپ ھەم كۈل بولاي. 190 دەستە-دەستە گۈل تۇتۇپ، تۇتماي گۈلىستان نارىنى، چەشمە-چەشمە ياش تۆكۈپ، بىلمەي كۆڭۈل خۇمارىنى. بىلمىدىم شەمشى چىراققا قەدرىسىز پەراۋانە سەن، بىلمىدىڭ ئەسرارى ھىكمەت سەرپ ئېتىپ كۈچ بارىنى.

ساجىدە سۇلايمان · ۋاقتى: 2012-6-16 03:04:09


	191 ئۈچكىنى چاقماق بولۇپ سۇندۇردى گۆھەر تاشىنى، بەختسىز شاھىت بولۇپمەن كۆرگىلى كۆز ياشىنى. يا، ئارامگاھ تاپمىسام يەڭگىتكىلى غەم باشىنى، قايدا بولسۇن زوق، ماجال سىزماققا كىرپىك قاشىنى. 192 بىر قولۇم گۇمران قىلۇر، قورقۇنچى سالغان دارىنى، بىر قولۇم بەرپا قىلۇر يەر ئۈستىگە گۈلنارىنى. گەرچە ئالەم تولسىمۇ، جەڭگۈ-جېدەل توپانىغا، ئەژدىھانىڭ ئىلكىگە بەرمەس بەشەر (55) سەييارىنى. 193 بىر كۈلۈپ گۈل كۆرسىتىپ، سانچىلدى نامەرت تىكىنى، كۆيدۈرۈش پەرۋانىنى بولدى چىراقنىڭ ئەتكىنى. شۇنچە نازلىق ھىس بىلەن چۈشسەم ئۈمىد دەرياسىغا، پاتتى قۇمغا بىراۋان ئۆمرۈم كارابى يەلكىنى. 194 سەككىز ھەپتە سەئىدنىڭ سەككىز قىسىم گۈل بابىنى ــــ زوقلىنىپ كۆرگەندە ئىچتىم جەننەتىدىن ئابىنى... نەزمىڭىز بىرلە ھېكايەت چەكتى قەلبىم تارىنى، ئۇيقۇغا قانماي كۆزۈم ئالدى قىزىل ئوت تابىنى. 195 ياشلىقىڭ ئۆتتى سېنىڭ بىلمەي گۈلىستان قەدرىنى، بىر زامان ھەسرەت بىلەن تارتتىڭ زىمىستان دەردىنى... گەر ھاياتىڭنى سېنىڭ بولسۇن خازانسىز گۈل دېسەڭ، بىر ھەۋەس بىر زوق بىلەن ئۈزدۈرمە بوستان بەرگىنى. ‹15› 196 قالمىدى ئەستە شاراپ، نىمەت ۋە سازنىڭ ھېچ بىرى، چىم ئاياق يول ئۈستىدە ئۇچراشمىدى يا، بىر پەرى. چەشمىزارىڭدىن ماڭا ھاسىل كۆزۈم ئەمالىغى... ۋاقتى يەتسە نەۋ باھار تۇلپار تۇياقتىن ئىلگىرى. 197 گۈل قېشىدا ئولتۇرۇپتۇ چېچى سۇمبۇل بىر پەرى، خۇددى چەشمە بولسا گۈلزار، ئول پەرىدۇر كەۋسەرى. بۇ مېنىڭ كۆكسۈمدىكى مۇسكۇل ـــ يۈرەكمەس، بەلكى ئۇ، بەتلىرى مەدھىڭگە تولغان بىر قۇيۇننىڭ دەپتىرى. 198 بىر پەرى كىردى ئىشىكتىن يەلپۈتۈپ رومالىنى، سۇندى پەتنۇس ئۈستىدە شەربەت قۇيۇپ پىيالىنى. ئۇنتۇدۇم شەربەتنى بەنت ئەتكەچكە ئەقلىمنى سىنەم، يەر بېقىپ كۈلدى گۈزەل كۆرگەچكە مېھمان ھالىنى.

ساجىدە سۇلايمان · ۋاقتى: 2012-6-16 03:36:43


	ئىزاھلار: (1) ئىقتىدا ــــ ئەگىشىش، مەقسەتداشلىق. (2) قەرن ــــ مەلۇم بىر مۇددەتلىك زامان. (3) مەھلىقا ــــ ئاي يۈزلۈك مەھبۇب. (4) بى زىيا ــــ يورۇقسىزلىق. (5) بۇلبۇلگويا ــــ ئەپسانىلەرگە ئېيتىىشىچە ئادەمدەك سۆزلەيدىغان قۇش. (6) ساما ــــ ئاسمان. (7) نىدا ــــ ئاۋاز، چاقىرىق، توۋلاش. (8) جۇنۇن ــــ ساراڭلىق. (9) خۇن پۇرۇچ ــــ قان ساتقۇچى. (10) مەي پۇرۇش ــــ مەي ساتقۇچى. (11) پوتا ــــ بەلۋاغ. بۇ يەردە زەر پوتا ئالتۇن كەمەر مەنىسىدە. (12) سۇخەن ـــ سۆز، شىرىن سۇخەن ـــ تاتلىق سۆز. (13) تۇرپە ـــ ئاجايىپ، غەلىتە، قالتىس. (14) زۇلپىقار ــــ رىۋايەتلەردە ئېيتىلىشىچە ھەزرەت ئېلىنىڭ مەخسۇس خىسلەتلىك قىلىچى، بۇ يەردە ئوۋغا يارارلىق قورال دېمەكچى. (15) سىماسى ــــ يالتىراش، ئالامىتى، نامايان بولۇش نىشانىسى. (16) مەبۇد ـــ ئىبادەت قىلىنغۇچى تەڭرى. (17) ئىتىكاپ ــــ بەلگىلىك مۇددەت بويىچە ئىبادەتخانىدا ئىلتىجا بىلەن ئولتۇرماق. (18) بەيئەت ــــ تەسلىم بولۇش، تەۋە بولۇش، قول بېرىش ۋە ئىختىرا قىلىش. (19) ئۇز ــــ چىرايلىق. (20) مەرھابا ـــ خۇش كەلدىڭىز دېگەن سۆز. (21) قۇت ــــ بەخت، بەرىكەت. (22) لەزىز ــــ شىرىن. (23) بەرگىم ــــ ئەسلى يوپۇرمىقىم دېگەن مەنىدە بولۇپ، بۇ يەردە رەڭگى-رويۇم دېگەن مەنىدە كىنايە. (24) ئىستىقامەت ــــ بىر ئىش بىلەن مۇھىم مەشغۇل بولۇش. (25) ھۇما ـــ چۆچەك، ئەپسانىلاردا ئېيتىلغان بەخت قۇشى. (26) نۇھ ئەلەيھى سالام ــــ رىۋايەت قىلىنىشىچە، 3 مىڭ يىل ئۆمۈر كۆرگەن ئىكەن. (27) جەزب ـــ ئۆزىگە تارتىش. (28) قوناق ــــ قوندۇرۇلغان كىشى، مېھمان مەناسىدا. (29) مۇشپىق ـــ شەپقەتلىك، رەھىمدار، مۇلايىم. (30) ساداق ـــ ياچاقنىڭ ئوقى. (31) مەلەك ــــ پەرىشتە. (32) ئەھلىمەن ـــ دېۋە شاياتۇن. (33) لال ـــ ھەيران بولۇش، تۇرۇپ قېلىش. (34) ھىلال ـــ 3-4 كۈنلۈك يېڭى چىققان ئاي. (35) ئىنس گۈل ـــ ئادەمگە ئوخشاش گۈل، ئادەم گۈلى. (36) پەيۋەند ـــ ئۇلانغان، چېتىلغان، ئىلناشقان، تولغان. (37) نەرى ــــ غەزەپلىك سادا. (38) مۇترەب ـــ سازچى. (39) گەردۇنى ئالەم ــــ جاھاننىڭ كارى، پەلەك گەردىشى. (40) نار ـــ ئوت. (41) گۈل سۇرۇغ ـــ قىزىلگۈل. (42) تەك ـــ باراڭغا ئېلىنغان ئۈزۈم. (43) گۈلرۇخ ـــ گۈل يۈزلۈك. (44) شەمئى ساما ـــ ئاي-كۈن. (45) ئەپسۇن ـــ كونا قىسسەلەردە ئېيتىلىشىچە، سېھرىگەرلىك دۇئاسى. (46) لەتاپەت ــــ سىلىقلىق، نەپىسلىك، مۇلايىملىق. (47) جەننىتى زاھىر ـــ نەق جەننەت، مەھبۇبىنىڭ جامالى. (48) بۇ يەردە مەرھۇم ئەسئەت ئىسھاقوفنىڭ خەلق ئىشلىرىغا بولغان سادىقلىق - پىداكارلىق روھى كۆزدە تۇتۇلغان. (49) چورتان ــــ بېلىقنىڭ بىر خىلى. (50) ساھىبىم ـــ ئىگەم، رەھبىرىم. (51) دەلۋە ـــ پەسىللەردىكى 11- ئاينىڭ ئىسمى بولۇپ، سوغۇق بەزىدە قۇتراپ، بەزىدە يۇمشايدىغان ھالەتنى نامايان قىلىدۇ. شۇڭا خەلق ئۇنى دەلۋە دىۋانى دەيدۇ. (52) ھېكىم ــــ ماھىر تېۋىپ. (53) بەستىسى ـــ بوي تۇرقى. (54) سىينەم ـــ باغرىم، كۆكسۈم. (55) بەشەر ـــ ئىنسانىيەت.

سوھراب · ۋاقتى: 2014-2-15 19:06:42


	ئەجرىڭىزگە بارىكاللا

غازى ئوغلى · ۋاقتى: 2014-2-15 19:53:17


	بۇ تېما بۇ مۇنبەر تاقىلىپ قالغان چاغدا يوقاپ كەتمەپتىكەن ياخشى. ئەسلىدە ياخشى ئىشلار كۆمۈلمەيدۇ-دە.

مەھەممەتجان · ۋاقتى: 2014-2-15 20:13:44


	تېما يوللىغۇچىغا رەھمەت.مەرھۇم ئالىم ئابدۇشۈكۈر مۇھەممەتئىمىننىڭ روبائىيلىرىنى ئىزدەپ يۈرەتتىم.ياخشى بىر پۇرسەتتە بۇ روبائىيلارنى ئۇچرىتىپ قالدىم.تېما يوللىغان قوللىرىڭىزدىن گۈل ئۈنسۇن! مەنمۇ ئۆزۈم تېخىمۇ ياقتۇرىدىغان بىر روبائىيىسىنى يوللاپ قوياي: ئىلىم باشقا،تالانت باشقا،غورۇر-ئىمان يەنە باشقا، بولۇر ساھىپقىرانلىق بۇ ئۈچ پەزىلەت كەلسە بىر باشقا. بۇنىڭ بىرلەن بەخت پۈتمەس،ئۇنىڭسىز كۆپتۇر ئامەتلەر، بەخت بابىدا قۇر ئاچساڭ،يېزىلمىش قىسمىتىڭ باشقا.

مەھەممەتجان · ۋاقتى: 2014-2-15 20:14:22


	تېما يوللىغۇچىغا رەھمەت.مەرھۇم ئالىم ئابدۇشۈكۈر مۇھەممەتئىمىننىڭ روبائىيلىرىنى ئىزدەپ يۈرەتتىم.ياخشى بىر پۇرسەتتە بۇ روبائىيلارنى ئۇچرىتىپ قالدىم.تېما يوللىغان قوللىرىڭىزدىن گۈل ئۈنسۇن! مەنمۇ مەرھۇم ئالىم ئابدۇشۈكۈر مۇھەممەتئىمىننىڭ ئۆزۈم تېخىمۇ ياقتۇرىدىغان بىر روبائىيىسىنى يوللاپ قوياي: ئىلىم باشقا،تالانت باشقا،غورۇر-ئىمان يەنە باشقا، بولۇر ساھىپقىرانلىق بۇ ئۈچ پەزىلەت كەلسە بىر باشقا. بۇنىڭ بىرلەن بەخت پۈتمەس،ئۇنىڭسىز كۆپتۇر ئامەتلەر، بەخت بابىدا قۇر ئاچساڭ،يېزىلمىش قىسمىتىڭ باشقا. بۇ يازمىنى ئاخىرىدا مەھەممەتجان تەھرىرلىگەن. ۋاقتى 2014-2-15 20:16

نەۋقۇت311 · ۋاقتى: 2014-9-25 13:53:24


	ئەجرىڭىز ئۇنتۇلماس!

qaraxan · ۋاقتى: 2014-9-25 16:30:52


	ساجىدە سۇلايمان سىزنىڭ ئەر كىشنى بېسىپ چۈشكىدەك غەيرىتىڭىزگە بارىكاللا،مەن ئىلگىرى بۇ توپلام ھەققىدە بىر ماقالا يازغاندىم سەۋىيىسى سەل تۆۋەنرەك ئۇنى ئىنكاس شەكلىدە يوللاپ قويسام بولغۇدەك،ھازىرچە مەرھۇم ئالىمغا بېغىشلانغان مۇنۇ مەرسىيە ئارقىلىق سىزگە مەدەت،ئالىمغا سائادەت تىلەي: ئاق چاچلىق بىر ئالىم چۈشۈمدە ھامان! (مەرھۇم ئالىم ئابدۇشۈكۈر مۇھەممەت ئىمىن تەۋەللۇتىنىڭ 80 يىللىقىغا) قاراخان بەختلىك ئۆتتۈڭمۇ ئۆيۈڭدە ،ئەلدە، بۇ بىزگە قاراڭغۇ زەبەردەست ئالىم. كىم سېنى ئىتتىردى دىسەم ئەجەلگە، سەن دىدىڭ ‹‹نادانلىق››ئۆسەكچى زالىم. تەگدىمۇ دىسەممەن ئىمانىڭ چەلگە، دىدىڭسەن ئۇ داغقا چىدىماس بېتىم. ھاياتلىق كانىنى قازغاندا تىنماي، تۆپەڭدە پىتنىخور ئاچتى يەرمەنكە بەزىلەر ئورىمۇ قازدى ئۇخلىماي، سەن ئاچقان راۋان يول،يېشىل چىمەنگە. چاپلاشتى ساڭا كۆپ مەلئۇن رۇدىپاي، سەن ئۇنى ئورىدىڭ يالقۇن كېپەنگە. باستى كۆپ سەۋدالىق ئەلىمى سېنى، تەئەججۈپ ئەيلىدىڭ ئۇنىڭغا يارقىن. ھەركىمنىڭ كۆرسىتىپ قويدۇڭ رىسقىنى، زاۋالدا قالغانغا بولدۇڭ نۇر - چېقىن. سەن بولدۇڭ تارىمنىڭ زۇمرەت تاشقىنى، سەن بىلەن ئۆركەشلەپ ئاقتى روھ ئېقىن. قەدىمجاي سېنىلا تۇغقاندەك پەقەت، ئېغىر يۈك يەلكەڭنى باستىغۇ بەتتەر. سەن بىلەن ئېچىلدى ئەلدە پاراسەت، سەن ئەينى سامادا چاقنىغان ئەختەر. ئەل كۈلسە بىلدىڭسەن ئۇنى پاراغەت، قويمىدىڭ ئىقلىمنى قىلچە بىنەزەر. ‹‹فارابى›› تىكىلەر ساڭا پەخىرلىك، ‹‹يۈسۈپ››مۇ سېنى دەر داستان خۇمارى. ‹‹مەھمۇد››نىڭ تىللىرى چىقتى تەسىرلىك، ئېسىلدى بوينۇڭغا ‹‹مەشرەپ›› تۇمارى. ئۇيغۇرنى تاپقۇزدۇڭ شۆھرەت ئەسىرلىك، چىقاردىڭ ‹‹ھەييام››دەك مەجنۇن شۇئارى. ‹‹رەسۇل››نىڭ يېشىدا توپتىن ئايرىلدىڭ ، قالدى توم،بەھىرلىك ئامانەتلىرىڭ. مەرىپەت يولىدا دەرۋىش، سائىلدىڭ ، قالدى كۆپ يېشىمسىز بىشارەتلىرىڭ. سەن غورۇر ،ۋىجدانغا تۇغما نائىلدىڭ، بەدەل كۆپ ،ئاز بولدى دارامەتلىرىڭ. تامادىن يىراقسەن مېھنەتكە مۇشتاق، مىننەتكە سەندە يوق قىلچىمۇ ئورۇن. قوغلاشماي ئۆتتۈڭغۇ سەپتە نام-ئاتاق، يۇلغۇندەك چاقنىدىڭ، تۇرمىدىڭ سولغۇن. بىلگەنگە بۇ ئالەم دىدىڭغۇ سىناق، نەپسىڭگە بىر كۈنمۇ بولمىدىڭ تۇتقۇن. كەلمەسكە كەتتىغۇ سېنىڭدەك زەكى، تاپالماس مىڭ يىلدا چەكسىمۇ پەرياد. مەيلى سەن ئۇيغۇر بول ياكى ئەجنەبى، ئالىمسىز بازىرىڭ بولار پات كاسات. ئاڭا كۆر ساھىبخان گۈمنام، تەجەللى، ئەي ئالىم چۈشۈمنى قىلىۋەر ئاۋات! 2013-يىلى 18-ئۆكتەبىر بۇ يازمىنى ئاخىرىدا qaraxan تەھرىرلىگەن. ۋاقتى 2014-9-25 16:32

ساجىدە سۇلايمان · ۋاقتى: 2014-9-27 18:26:13


	ئەسسالامۇ ئەلەيكۇم قاراخان، قەدەملىرىڭىز قۇت بولسۇن، مەرھۇم ئالىم ئابدۇشۇكۇر مۇھەممەدئىمىن تەۋەللۇتىنىڭ 80 يىللىقىغا بېغىشلانغان مەرسىيەڭىزنى ئوقۇپ چوڭقۇر تەسىرلەندىم، بۇ مەرسىيەڭىز ئارقىلىق ماڭا مەدەت بەرمەكچى بولغانلىقىڭىزغا رەھمەت، ئاللاھىم ھەر بەندىسىنى ئامان ئېسەن قىلغاي!

SADIKSIRDAX · ۋاقتى: 2014-10-10 16:25:12


	كۆپ رەھمەت ساچىدە خانىم