روبائىيات ‹1-قىسىم›ـــ ئابدۇشۇكۇر مۇھەممەدئىمىن

ساجىدە سۇلايمان · ۋاقتى: 2012-6-7 12:49:12


	81 سۈپسۈزۈك رۇمكا بەئەينى بىغۇبار پاك قەلبىڭىز، قىپقىزىل شەربەت سىماسى بىزگە ئوتتەك مېھرىڭىز. بۇ ۋاقىت توپانىدا دوستلۇق ئېزىز نوھتىنمۇ ھەم، قەستۇ-بوھتان دولقۇنىدا چوققىدەك تۇرغان ئېگىز. 82 سەھنىدە ئوينالدى ئىلھام بەخشىتەر خۇش سازىڭىز، بىر ئوماق ئاڭلاندى ھەيھات، ئۇ ــــ ئېزىز ئاۋازىڭىز. گەرچە سۇمرۇغقا قولىنى سوزسىمۇ ناكەس تالاي، بىزگە مەلۇمدۇر مۇرەككەپ دەۋرىدە پەرۋازىڭىز. 83 چوغ دىلىم ئەينەك، ئۇنىڭدا ئەكسىتەر گۈل ھۆسنىڭىز، بىر ئىپار قاپ، بۇي چېچىپ تۇرغان چىمەنناز قوينىڭىز. ئىشقىڭىز زىندانىغا گەر بەنت بولۇپ تۇرسام يانا، كام بىلىپ، تەنگە ئۇرالدى چاچتا ئەشكەن شوينىڭىز. 84 لالىزار تاغ باغرىغا سوغ قەھرىتان قار تۆكتى پەس، كەلمىكى تەس كېپىنەكنىڭ گۈل كۆرۈشكە بىر نەپەس. ئارچا، قارىغاي خىسلىتى ئاشقاي زىمىستاندىن ئۆتۈپ، ئېچىلىشقاي نەۋ باھاردا مىڭ چېچەك قوزغاپ ھەۋەس. 85 سۇمرۇغۇم بارما چىۋىنگە، كەيسىمۇ شاھلىق لىباس، شەپقەتىدىن يار-يۆلەك كۈتمەك ئەمەس ۋىژدانغا خاس. ئىچمە سۇ «ئۆلمەس بۇلاق»تىن گەر ئۇنى سورىسا پاقا، ئۆمرى نوھدەك(26) تەلمۈرۈش مەرتلىك شاراپقا پايلىماس 86 كەتمىسە سۇمرۇغ جاھاندىن لاپ ئۇرالمايتتى خوراز، غۇلىسا ژىلۋىز چىۋىن ئۈستىدە باتۇر دەپ قىقاس ـــ سالمىغى ئادەت جاھان مەغرۇرىنىڭ پەيلىگە خاس... بىلمىدىم قالغايكى ئاخىر قولىغا كىمنىڭ مىراس. 87 بولدى پىنھان ئەمدى يار، گوگۇمغا غەرق بولدى قۇياش، زەپىران مەڭزىمگە كۆزدىن خۇددى يۇلتۇز ئاقتى ياش. جەزب(27) ئېتىپ تۇرغان بىلەن سۇمبۇل چېچى بۇ خەستىنى، بىر كۆرۈندى ئاچمىدى ئىككىنچى دىدار باغرى تاش. 88 ئالما رەڭ مەڭزىڭدىكى زىناقلىرىڭ شۇنچە ئۇماق، لەۋلىرىڭ رەڭگى گىلاس، باقسام چىشىڭ قەنتتىنمۇ ئاق. گەر مۇھەببەت ھاكىمى قۇرسا شىپاخانە ساڭا، بار ۋۇجۇدۇمنى ئاتاپ قويسام بولۇشقا بىر قوناق.(28) 89 ئارىزۇلۇق تويىڭىزغا بارمىساممۇ مەن بىراق، چۈمدى قەلبىم سىز بىلەن شاتلىققا تەڭ چۈمگەن سىياق. تۇلپىرىم ئوخچۇپ تۇرار ئوغلاق ئېلىشقا ھەر قاچان، گەرچە مەن چوڭ بەيگىدىن تۇرساممۇ يۈز يىلچە يىراق. 90 بىر ناۋايى، بىر نىزامى سەن ئەگەر بىلسەڭ تولۇق، سەددى ئىسكەندەر ۋە «داۋۇت» قورغىنىدىن ھەم ئۇلۇق.‹7› مەرىپەتنىڭ، نەزمىنىڭ ھەر ۋارىغى، ھەر قەترىسى، يەرنى گۇمران قىلغىدەك ئوت بىرلە توپاندىن ئۇلۇق.

ساجىدە سۇلايمان · ۋاقتى: 2012-6-7 14:04:53


	91 كۆزلىرىڭ سۈلكەت ماكانى، كىرپىكىڭ ئوقيا بىراق، خۇددى بۇت ئىكرامىدەك ياندى دىلىمدا ئىشتىياق... قامىتىڭ باغۇ-ئېرەم، ئۆمرۈم ئۆتەر تارتىپ پىراق، ئېخ! ئەشۇ مۇشپىق (29) تىلىڭدىن بىر قوشۇق يۇتسام تاماق. 92 بۈدرە-دولقۇن چاچلىرىڭغا مەن بولاي يەلكەن تاراق، مەھلىيا قىلسۇن مېنى چىققان چېچىڭدىن خۇش پۇراق. بەختىياركەن شۇ چېچىڭنىڭ ئاستىغا مۈككەن قۇلاق، دانچىلىك شاتلىق بېغىشلار، مەنمۇ مۈكسەم بىرلا ۋاق؟ 93 تۈكۈرۈك يانماس ئېغىزغا قايتىدۇ ئەمما ساداق،(30) ئىز بېسىپ قوغلار سېنى قاچساڭمۇ ئاتلىق يا، ياياق. كەلسە پۇرسەت يۈرمىگىل غاپىل ھەۋەسنىڭ كەينىدە، قۇت شارابىنى ئىچەردە، ئەھدىسىز دەۋرانغا باق. 94 ئەتىرگۈلدەك ھۆسنىڭىزدە خۇددىي رەيھاندەك پۇراق، قاپ-قارا نازلىق كۆزىڭىز چاچىدۇ ئوت-ئىشتىياق. كۆرگىنىمدە مەن بىلەلمەسمەن كۈلۈش، يىغلاشنى ھەم، كۆرمىسەم قەلبىمدە تىنماي چاقىدۇ چاقماق...بىراق. 95 گۈلگە ئوخشاتسام سېنى كەلمەس ئۇنىڭدىن نۇر بىراق، ئايغا ئوخشاتسام سېنى، چىقماس ئۇنىڭدىن خۇش پۇراق. رىشتىمىز بىر سىنە رىشتى بولسىمۇ، مەنزىل يىراق، بىر -بىرىگە دىل قوناق بولغاچقا گۈلشەن ھەممە ۋاق. 96 قىپقىزىل كۆينەك كېيىپسەن خۇددى گۈل رەڭگى سىياق، بىر كۆرۈپ رەڭ شوئلىسىدىن ياندى باغرىمدا چىراق. بىۋاپالىق تۇرسىمۇ جادۇ كۆزىڭدە ناز بىلەن، نە ئىلاج يەتسە ۋاپاسىزلىق يۈزۈڭگە باشتىراق. 97 ياپرىقى كۆپتۇر دەرەخنىڭ غۇنچىسى چەكلىك بىراق، بەزىدە مېھرىگىيا‹8›دىن ھەم شىپا قاقشال قىياق. قايغۇلۇق دەريادا مەن قاينام بولۇپ ئاقساممۇ گەر، دوستلۇرۇمنىڭ رايىدىن ئۆتتۈمكى ئارماندىن يىراق. 98 ئاقلىقىڭنى ئاي دېسەم، ئايمۇ ئەمەس، رەڭگىڭچە ئاق، قامىتىڭ گۈللۈك دەرەخ قىش -ياز چاچار ئۇ خۇشپۇراق. بارمىغىڭ ناز، كىرپىكىڭ سۈلكەت بىلەن تولغان سېنىڭ، تۈن چېچىڭدىن، كۈن يۈزۈڭدىن ئالدى رەڭ-ئالدى بوياق. 99 ھېلىگەر توشقان بولۇپتۇر ئىت ئۈچۈن ئاۋقەت- ئوزۇق، ماختىنار مويلۇق لىباستىن قونسا قامغاققا توزۇق. كىم ئادالەت قىلمىسا ئاخىرى ئۆزى ناھەق ئۆلەر... ئەھدىسىز ئالەم، پەقەت تۇپراق ۋە ئەل ئالتۇن قوزۇق. 100 ساقىيا تۇتقىن شاراب تولغان قەدەھنى ئەمدى نەق، ئەكس ئەتسۇن مەيدە سەرۋى قامىتى، ھۆسنى شەپەق. لەۋلىرىم تەگكەندە مەيگە، ئۇمۇ كەلسۇن لەرزىگە... قىلمىسۇن جانان لېۋىدىن جامى مەي ھېچقانچە پەرق.

تەبەسسۇم · ۋاقتى: 2012-6-7 14:42:27


	پاھ! ئەزىزلەرنىڭ خالىسانە ئەمگىكىدىن قەۋەتلا سۆيۈندۈم. ھەممىنى كۆچۈرۈپ ساقلىۋالاي، ئەجرىڭلارغا رەھمەت!

سائادەت ساتتار · ۋاقتى: 2012-6-7 15:11:51


	بەزى مىسرالارنى قايتا-قايتا ئوقۇپ ھوزۇرىغا چۆمۈلگەن بولسام ، بەزىلىرىدە يېڭى-يېڭى تەپەككۈرلەرگە ئېرىشىۋاتىمەن... ئوماق دوستۇم ساجىدە، قىممەتلىك ئەجرىڭىز ئۈچۈن ھازىرچە رەھمەتلا دەپ تۇراي جانىم! دىدارلاشقاندا ھاردۇق سورىۋالىمەن.

ئاينۇرى · ۋاقتى: 2012-6-7 15:38:24


	ئەزىزىم، چىۋەر بارماقلىرىڭىزغا سۆيۈپ قويغۇم كېلىۋاتىدۇ. ھارمىغايسىز.

ساجىدە سۇلايمان · ۋاقتى: 2012-6-7 15:51:44


	سائادەت ساتتار يوللىغان ۋاقتى 2012-6-7 15:11 بەزى مىسرالارنى قايتا-قايتا ئوقۇپ ھوزۇرىغا چۆمۈلگەن ب ... رەھمەت ئەزىزىم شۇ سىلەرگە ئازراق بولسىمۇ نەپ ئېلىپ كېلەرمىكىن دېگەن ئۈمىدتە يوللاۋاتىمەن، ھەم ئۆزۈممۇ بەھر ئېلىۋاتىمەن قايتىدىن، ھوزۇرى ئالەمچە بولىۋاتىدۇ. ئاينۇرى، تەبەسسۈم، سىلەرگىمۇ رەھمەت. ئىنكاستىن ئايرىپ ساقىۋېلىپ، جىمجىت ئولتۇرۇپ ئوقۇساڭلار ئەزىزلەر، بۇنىڭ ئىچىدىكى ھېكمەتنى ئاندىن بىلىسىلەر، بىر روبائىيدا مىىڭ ھېكمەت مۇجەسسەمكەن.

ساجىدە سۇلايمان · ۋاقتى: 2012-6-7 16:20:50


	101 تۇرىدۇ قورقۇنچ سېلىپ تەنھا ھەشەمەتلىك تېرەك، شاخلىرى گويا دېۋە ئەلپازىدىن بېرىپ دېرەك. يۈزلىگەن شاپتۇل، ئاناردىن ئاشسىمۇ گەر ھەيۋىتى، ئىچى پور بولغاچ ئوتاندىن ئۆزگىگە بولماس كېرەك. 102 بىر گۈزەلكى ئاق يۈزىگە قايتا قانماي باققىدەك، ئىشقىۋاز تايىر سۈپەت دەريا-دېڭىزدا ئاققىدەك، يوق سادا ھېچبىر ناۋا، ھېچ بىر مۇقەم، مەشرەپ ئارا، كۈلكىسى جانانىدەك ــــ تەشنا كۆڭۈلگە ياققىدەك. 103 سەرۋى قەددىم قامىتىمنى قىلدى خاك چەرخى پەلەك، باقمىدى زىبا دىلىمگە يەردە يار كۆكتە مەلەك (31)... ئەھرىمەننىڭ (32) پېرى بەرھەم، نەۋ باھار كۈلگەندە شات، كۈلگۈسى كۆرگەن زىمىستان بۇلبۇلۇڭ ئاندىن بۆلەك. 104 تاغ، مۇنار ئۈستىگە چىقساڭ كۆرۈسەن ئەتراپنى كەڭ، بىلىسەن كەتكەن دىيار ھۆسنىنى زەن قويغاندا ئەڭ. ئاڭلىماق ئەمما قىيىن ھەر ھوجرىنىڭ پەريادىنى، ئىس-تۈتەكلەر ئۈستىگە شەلپەر بۇلۇت سالغاچقا رەڭ. 105 كۈن يۈزۈڭنىڭ تاۋىدىن مەڭزىم قىزىل لالە مېنىڭ، قەن لېۋىڭ قۇيسا شاراپ، لېۋىمكى پىيالە مېنىڭ. خۇددى گۈلشەندەك سېنىڭ كۆكسۈڭدىكى ياقۇت يۈرەك، مېھرى شەپقەت ئەيلىسە، ئۆمرۈمدە نە نالە مېنىڭ؟! 106 تال چىۋىقتەك بويلىرىڭدا غۇنچىدەك رەڭدار يۈزۈڭ، قاپقارا تۈندەك چېچىڭنىڭ قوينىدا ئايدەك ئۆزۈڭ. يوقمۇ كۆكرەك قەپىزىڭدە مىسلى پەرۋانە يۈرەك، ياكى ئەمادەك پىراق شەمئىينى كۆرمەمدۇ كۆزۈڭ. 107 سۈبھىدە تاڭغا بېقىپ، خۇشبۇي چېچىڭنى تارىساڭ، قوش قاناتىڭنى قېقىپ، گوياكى بۇلبۇل سايرىساڭ. شاخلىرى سۇنماي چىدارمۇ بۇ مېنىڭ سەرۋى تېنىم، گۈل-چېچەكنى تاققىلى ئۇشتۇپ شېخىنى قايرىساڭ؟ 108 سۇمرۇغۇم ئەرشى سامادا ئوينىتىپ سەييارە قىل، يا-مېنى كۆكتىن قىياغا دەس ئېتىپ مىڭ پارە قىل. مەشۇغۇم مېھرى شارابىڭدىن تىرىلدۇر ـــ دارى قىل، يا-مېنى بىر جام زەھەردە ئۆلتۈرۈپ سەدپارە قىل. 109 يا قەپەز ئىلكىدە بۇلبۇل، يا - تىكەن قوينىدا گۈل، يا-ۋاپا باغىدا يىغلا، يا - جاپا تاغىدا كۈل! كۆز يېشى تۆكمەك ئۆمۈرنىڭ زىننىتى بولغاندا ھەم، بىلمىدىم خالار مۇشەققەت ئىچرە كۈلمەكنى كۆڭۈل... 110 نۇر چېچىپ تۇرغان قولۇمدا، مەيدە مەس بولغان باكال، بولمىسا ئىلھامى مەينىڭ، ئۇ قۇرۇق شىشە-شاكال. چىقمىسا دوستلۇق خېرىدار، جىسمىمىز بىر باغ پاخال، بۇ ئەقىدەم شەربىتىن خۇشناز قىلىپ ئىلكىڭگە ئال.

ساجىدە سۇلايمان · ۋاقتى: 2012-6-8 16:20:16


	111 لالە- چېھرىڭدىن خۇنۈك، سۇمبۇل چېچىڭ ئالدىدا لال.(33) زۆھرەدىن نۇرلۇق كۆزۈڭ، قاشىڭنى دورايدۇ ھىلال.(34) بولسا گەر مەڭزىڭ ئانار، لەبزىڭ سېنىڭ بال ئىچرە بال، نى ئۈچۈن تاپماس يېشىم، ئالدىڭدا مەن قويغال سوئال؟ 112 كىرسە گۈلشەنگە ئۈزۈشكە گۈلنى گۈل رەڭلىك گۈزەل، ئىنىسى گۈل(35)دىن قالدى ھەيران باغدا قۇش ئەھلى تۈگەل... قەلبى يوق گۈلگە تەقەززا تۇرسا گۈللەر سۈلكىتى، نە ئۈچۈن بولغاي گۇناھ، مەدھىڭگە كۆپ يازسام غەزەل؟ 113 بىر قىيا باقساڭ گۈلۈم! كۆز نۇرى بولغايمۇ ھارام؟ لەۋزىدىن قۇيساڭ شاراب، مەي غەزنىسى بولغايمۇ كام؟ باش قويۇپ ھۆسنۈڭگە كۆپ يىل تاپمىدىم كۆز ياش بىلەن ـــ زەپىرەڭ مەڭزىمنى يۇماقتىن بۆلەك ھېچبىر ئارام... 114 نامىڭىز بىرلە كۆزۈمگە كەلدى تەڭ مەرھۇم ئاتام، ئەسلىدىم ئۆسمۈر چېغىمنى تولدۇرۇپ چىن ئېھتىرام. ئۇچتى تورغاي شۇ قەپەزدە سايرىدىم كاككۇك بولۇپ، زەينىۋىم قوغۇن قېقى، قاندەك ئانار، شىرىن قىيام. 115 مىسرىنىم كەستى قولۇمنى، مېنى ئالدى تايغىنىم... مىڭ قاداق يىڭنە ئۆسۈپ، سانچىلدى تاققان قالقىنىم. ھۆركىرەپ شىردەك يىقىلدىم، ئۆچمىدى قەلبىم شېمى، تاڭ ساباسىدا شەپەق پۈركەر جاھانغا يالقىنىم. 116 قەھرىماننى ئانا يۇرت تۇغقان، بۇنىڭدا يوق گۇمان، قەھرىمان بەرپا قىلۇر ئۆز يۇرتىدا ساقلار ئامان. تۇغسا باتۇرنى ۋەتەن، تۇغقاي ۋەتەننى قەھرىمان، بىل ۋەتەن مۇردا ئەمەس ــــ بى جانۇ، بى ئەركە، بى زۇۋان. 117 شاتلىقىمدا ھەر كۈنى كىرسەم ئەگەر جەننەتكە مەن، قايغۇدىن دوزاخ ئىچىگە بەزىدە پەيۋەندە مەن(36)... ئىككىسى دەۋران قىلۇر كۈن-تۈن كەبى ئۆمرۈم ئارا، بەزى شاھدەك، بەزى قۇلدەك ياشىدىم بىر تەندە مەن. 118 بولمىسا ئىلھامچى جانان، جامدىكى مەي مىسلى قان، بولمىسا باغرىمدا ئوت، جانانمۇ بىر بۇت ئوخشىغان. بولمىسا سەۋدا ئىشق، تەمسىز قۇرامتاش بۇ جاھان، بۇتقا جان، تاشقا گۆھەرلىك بەردى ئۇ-ئىشقى پىغان. 119 باغنى كۈيلەپ ئالمىدىم بىر ئازمۇ گۈلنىڭ بەھرىدىن، چىقمىدىم يۇلغۇن سۈپەت چۆل ئۆركىشى، ئوت بەھرىدىن. بەزمىدە قىلماق تەپەككۇر بولدى زېھنىم زىننىتى... ئېھتىيات قىل دەيدۇ دىل: تىلسىز غەزەپنىڭ نەرىدىن (37). 120 لالەنىڭ خۇشنازىدىن ئەقلى-ھۇشۇم بولدى جۇنۇن، مۇترەبىم (38) شوخ سازىدىن ئەنقا قۇشۇم بولدى جۇنۇن. مەن كىرىپ گۈلشەن ئارا قىلسام شىكايەت ئىشقىدىن، تېخى كۆرمەي گۈل يۈزۈڭنى مۇڭدۇشۇم بولدى جۇنۇن.

غازى ئوغلى · ۋاقتى: 2012-6-11 22:06:58


	ساجىدە خانىم قېنى ئاخىرى؟

ساجىدە سۇلايمان · ۋاقتى: 2012-6-12 00:27:40


	121 ئەي قەلەم تىزسام سىيا رىشتىڭگە سۆزلەر گەۋھەرىن، ۋەسلى باغىغا ئۇچۇرسام، دەشتى ھىجران كەپتەرىن. بىلمىدىم گەردۇنى ئالەم (39) ھىجرىدىن بىزار ئەمەس، زەۋقمىدۇر تولدۇرمىغى ھەر پەسلى ھىجران دەپتىرىن. 122 تۈزگىلى كىرسەم چىمەنگە، ھۆسنىلەر ئانارىدىن، چۆچىدىم بوينۇڭدىكى مارجان تىزىلغان دار-دىن... قەترە مەي ئىچمەك بولۇپ، سۇنسام لېۋىمنى چەشمىگە، قورقىمەن ۋەسلىڭنى دەپ كۆيمەككە دوزاخ نارىدىن(40) 123 مەن گۈلىستان ئىچرە كىرسەم، سەن ئۇنىڭ گۈلنارىسەن، مىڭ گۈزەللەر بەيگىسىدە سەن ئۇنىڭ سەردارىسەن. گەر پۈتۈلگەن بولسىمۇ غۇربەت بولۇپ قىسمەت ماڭا، مىڭ مەئىشەت باغىدىن ئۈستۈن كۆڭۈل گۈلنارىسەن. 124 ئۆتتى كۆپ يىل نۇر ئالالماي، ھۆسنىڭىز ئاپتاۋىدىن، قايتمىدى بىردەم ئەقىدەم سۆيگۈڭىز گىرداۋىدىن. گۈلسۇرۇقتەك(41) ئىچمىسەممۇ باغى پىردەۋىس ئابىدىن، قىزىرىپ يۇلغۇن چېچەك ئاچتىم ھارارەت تاۋىدىن. 125 ئەشۇ ناكەس ئەپسۇنىنى ئوقىغان تەتۈر ئۆكۈن، نامىلىق ئىقرار بىلەن گۇم بولدى كۆپ يىللىق تۈگۈن... مەن قۇياشقا تەلمۈرۈپ كۈتكەن ئىدىم تاڭ لۇتپىنى، ئۆرلىدى باشىمنى ئاسمانچە قىلىپ باشىمدا كۈن. 126 قارىلاپ سۇمرۇغنى قاغا، ئۆزىنى زىننەت بىلەن ــــ بىزىمەك بولدى تالاي ئىبلىس زۇۋان تۆھمەت بىلەن... قاپقارا داغ سۈركىمەك ياقۇتقا چوڭ بىمەنىلىك، قالىمەن سىزگە يەنە قەلبىمدىكى ھۆرمەت بىلەن. 127 ھۆسنى تەختىدە تۇرار، بىر نازىنىن شاھى جاھان، زۇلپى زەنجىرىدە بەنت، ئالدىدا بىر ساھىپ قىران. ئىشقىدىن ئوت ياندۇرۇپ تۇرسا ۋاپاسىز قاشلىرى، كۆزىدىن كەۋسەرنى ئىچكەي ئاھۇ يەڭلىغ مېھرىۋان. 128 ساق يېرى يوقتۇر دىلىمنىڭ دىلبىرىمنىڭ دەستىدىن، ئۆرتىنەر جان، ئۆتسە ئويناپ... بۇ گۈزەل چوڭ رەستىدىن. ئايرىما بىر دەممۇ تەڭرىم، لەۋزى قەن پەيۋەستىدىن، ساقلىغىن ئۈلپەتلىكىدىن بىۋاپا ناكەستىدىن. 129 قەدرىگە يەتمەك ئۈچۈن قىينال ئۇنىڭ دەردىدە سەن، بەر قارار تۇر بىر ئۆمۈر، بەخشەيلىگەن ئەھدىدە سەن! مەيلى كۈلپەت ياكى راھەت قىينىسۇن يا، ئالدىسۇن، تاغ كېسىپ پەرھاد كەبى ياشنا گۈزەل بەھرىدە سەن. 130 شۇم لەھەڭ چايقاپ دېڭىزنى قانچە ئۇپقۇن قوزغىسۇن، ئەجدىھا ھوۋلاپ ساماغا جاڭ سېلىپ يايسۇن جۇدۇن. يەر ۋە كۆكنى تولدۇرۇپ ئالەمگە زەر چاچقاي قۇياش، چۈنكى تارىخ تاڭ باھارى ئالدىدا تۇرغان بۈگۈن.

ساجىدە سۇلايمان · ۋاقتى: 2012-6-12 00:29:09


	غازى ئوغلى يوللىغان ۋاقتى 2012-6-11 22:06 ساجىدە خانىم قېنى ئاخىرى؟ سەل جىددىي بولۇپ قېلىپ نەچچە كۈن يوللىياماي قالدىم. ئۆزرلۈكمەن.

ساجىدە سۇلايمان · ۋاقتى: 2012-6-12 00:56:19


	131 زەئپىران رەڭگىم قىزاردى تاڭ شەپەق ئىلھامىدىن، ئىچتى بۇلبۇل شەربىتى شەبنى گۈلنىڭ جامىدىن. يۇلتۇزى ساپ-ساپ ئۈزۈمدەك ئاشۇ ئاسمان تەكتىدە،(42) جۈرئىتىڭدىن بەخت تىلە، كۈتمە پەلەك ئىنئامىدىن. 132 بىر زامان بولدۇڭ يېنىمدا، سىردىشىم يارىممۇ سەن، ھەم مەدەتكار، ھەم خۇمارىم ھەمدە گۈلزارىممۇ سەن... ئارزۇيۇم جامىغا ئاغۇ قۇيۇپ قەست قىلغۇچە، ئاشكار بولساڭچۇ، باشتا جاللىتىم، دارىممۇ سەن. 133 بۇلبۇلۇڭ شەيدا بېغىڭغا، گۈلباھارىم قايدا سەن؟ گۈلرۇخىم(43) ــــ سەرۋى زىبا، لالىزارىم قايدا سەن؟ سۆيگۈدىن تاشتى تىلىمدا ئارزۇلار دولقۇنى... كەتتى ئاھ سەبرىم مېنىڭ، سەبرى قارارىم قايدا سەن؟ 134 بىر پەرى چىقتى ئىشىكتىن ھۆسنى گۈل پەيزى بىلەن، كۆكرىكىدە ئىككى تەخت، يىگانە شاھ پەرزى بىلەن. مەن تەئەججۈپ ئەيلىدىم، بىلمەي مۇھەببەت دۆلىتىن ـــ شاھىلار ئاۋارە چۆلدە تەخت ئۈچۈن نەيزە بىلەن. 135 چاچلىرىڭ ئوينايدۇ كۆكسۈڭدە سېنىڭ سۈلكەت بىلەن، كۈلدى غۇلمانلىقتا بەختىم ھۆر كەبى ئۈلپەت بىلەن. ئەترى گۈلدەك رۇمكىدا مەي تۇتمىقىم بولدى نېسىپ، رۇمكىلار مەيلى سۆيۈشسۇن ۋەزنى چوڭ ھۆرمەت بىلەن. 136 لەرزىگە كەلدى دىلىم «شەيخ سەئىد»نىڭ داستانىدىن، بىر زامان ئالەمنى خۇشبۇي ئەيلىگەن«بوستانى»ىدىن.‹9› كەينىدىن ئىشتىم شاراب مەن «جامى»نىڭ مەي جامىدىن،‹10› چىقمىدىم يىللارغىچە قوش «خەمسە»نىڭ زەر كانىدىن.‹11› 137 سۆز غەزىنەم كەلدى ئاجىز، قەددىڭىز تەسۋىرىدىن، گۈلباھارىغا ئېرىشتىم مېھرىڭىز تەسىرىدىن... ئەتىرگۈلنىڭ بەرگىگە ئاقىل قىشى سۈرتمەيدۇ رەڭ، ئەڭ گۈزەل نام سىزگە ئىنئام ئەسرىلەر تەھرىرىدىن. 138 دىلغا سەن بىر كاتتا ئارام، ھەر قاچان كۈلكەڭ بىلەن، چۆل چىمەنزار بولدى گويا مېھرىۋان كۈلكەڭ بىلەن... ئاي يۈزۈڭنىڭ قەلئەسىدە ئىككى قاش جەڭ ئۈستىدە ـــ تۇرسا ھەم، دەرھال ئىناق نازۇك زۇۋان كۈلكەڭ بىلەن. 139 غۇنچىدەك مەڭزىڭ قىزاردى بۇلبۇلۇم خەندانىدىن، دىل كۆرۈپ بولدى خالاس، غەم - قايغۇنىڭ زىندانىدىن. گۈل ۋىسالىڭ تۇرسىمۇ ئالدىمدا نۇر شۇئلا چېچىپ، ئالمىدىم قەنتۇ-گېزەكنى لەۋزىڭىز قەندانىدىن. 140 بىر پەرى چۈشتى سامادىن، مېنى قان قىلماق ئۈچۈن، باغرى كۆكسۈمنى قېشىنىڭ قايچىدا تىلماق ئۈچۈن. ھۆسنىنى مەن تۇتىيا بىلسەم كۆزۈمگە ئۇ، بىراق، قانلىرىمدىن لاك-خىنە قىلماق ئىكەن تىرناق ئۈچۈن.

ساجىدە سۇلايمان · ۋاقتى: 2012-6-13 01:08:41


	141 چىقمىغايسەن ئەي گۈزەل، پىنھان بولۇپ رەستىگە سەن، ياكى پەيۋەنمۇ ئۆزۈڭ سەۋدايى ئىشق دەستىگە سەن؟ شۇنچە رەڭگىڭدىن جاھان لەززەت ئالالماس بىۋاپا، ياكى چۈشكەنمۇ بولۇپ بەنت جادۇنىڭ قەستىگە سەن. 142 قىدى گۈليار كىرپىكىڭنىڭ زىخچىسى دىلنى ماكان، تىلدى قاشىڭ قايچىسى باغرىمنى شەمشەر ئوخشىغان. دادۇ-پەرياد، چىن مۇھەببەت بابىدا شەرمەندىلىك، ئوتتىن ئالدىڭ، سۇغا سالدىڭ، قىلدى قەستىڭ قەھرىمان. 143 ئالسا بۇلبۇل ئىچكىلى شەبنەم مېيى، جام لالەسىدىن، قان ئىچەر تەن تولدۇرۇپ، ھەر دەم يۈرەك پىيالەسىدىن. شۇنچە دىدار داسقىنىدا خۇش تەۋەرۈك مەي ئىچىش، يادلىماڭ رىزۋاننى سىز، چەكمەي جەھەننەم نالەسىدىن. 144 بىر گۈزەل ئۆتتى كوچامدىن كۆرسىتىپ رۇخسارىسىن، يەلپۈنۈپ تۇرغان چېچى چەكتى كۆڭۈلنىڭ تارىسىن. قايتا كۆرمەك ئىستىسەم، ئۇندىن يېقىن پۇرسەت ئارا، بىر ئۆمۈر چاغلاڭ ــــ دېدى، دىلبەر ــــ ۋىسالنىڭ ئارىسىن. 145 مىسلى ئۇچقۇن قار چېچەكنىڭ پەسلى قىش ئاق قانىمەن، جۇت-شىۋىرغان، قەھرىماننىڭ بىگۇنا قۇربانىمەن. گۈل-چېچەك بوي كۆرسىتۇر پەسلى باھار رەڭدار بولۇپ، تەرىپىم سورىساڭ ھاياتلىق چەشمىسى ـــ زەركانىمەن. 146 شاھى سۇلتان دىل خۇمار، سىزدىن ئېزىز بولغان قاچان، قايسى دىل مەنچە مۇھەببەت شەۋقىغە تولغان قاچان. بىر قىيا باققان شۇ «سىر»نى، ساقلىدىم بىر قەرنىچە، ياش تۆكەر شام ھالىنى شەمئى ساما(44) ئۇققان قاچان؟ 147 مىڭ پاراڭدىن ئاشتى قەدرىڭ، جىلۋىدە سۈرمەي زۇۋان، بال كىيىملىك ھىلىدىن سەندە كۆرۈنمەس ھىچ گۇمان. بىر ئەقىدە، بىر ساداقەتتىن يورۇپ تۇرغاچقا دىل، ئەقلىمىز بولمايدۇ ئەما، باسسا ئالەمنى تۇمان... 148 توسسا مەڭزىنى پەرى شاپتۇل چېچەك رومال بىلەن، ئىككى قاشنىڭ لەشكىرى سۈلھى قىلۇر بىر خال بىلەن... كۆزلىرى ئەپسۇن(45) ئوقۇپ، گەر قىلسا مەجنۇن قورقمىغىن، لەۋلىرى لوقمان ئۇنىڭ مەلھەم ياسايدۇ بال بىلەن. 149 ېەڭمۇ رەڭ گۈللەر ئېچىلدى خۇش باھارنىڭ تەپتىدىن، تولدى بۇلبۇل قەلبى روققا گۈل چىچەكلەر تەپتىدىن. ئاشۇ كۆكنار زەھىرىنى بىلسەم سېنىڭدە ياخشىراق، كۆرمەس ئەردىم، سۆيمەس ئەردىم، چاقماس ئەردىم قەنتىدىن. 150 ئاي دېسەم سەن ئاي ئەمەس، ئاق لايغا چۈشكەن شوئلا سەن، قارچۇغا كۆزلۈك دېسەم، گوياكى قەلبى كورلا سەن. مە سېنى ئالتۇن قەدەھ -جام دەپ بىلىپ قۇيسام شاراپ، قىممەتى ئىخلاس كۆتەرمەس چىغدا ئەشكەن چويلا سەن.

Abdulla071130 · ۋاقتى: 2012-6-13 12:42:50


	روھ ئېدى شۇنداق بۆيۈك، ۋاقتىدا قەدرى بىلمىگەن.... قالمىدى ئەمدى ئۇنى دەۋراندا ئادەم سۆيمىگەن. سىزگە ھەم رەھمەت دېمەس «رۇبائىيات»نى كۆرمىگەن، تاپالماس بۇنداق ساۋابنى ئاۋامغا دىلدىن كۆيمىگەن.

ساجىدە سۇلايمان · ۋاقتى: 2012-6-13 21:29:04


	Abdulla071130 يوللىغان ۋاقتى 2012-6-13 12:42 روھ ئېدى شۇنداق بۆيۈك، ۋاقتىدا قەدرى بىلمىگەن.... قالمى ... شۇ بۈيۈك روھنى شۇچاغ بىلمەسلىكىم نادانلىقىم، ئاھ بۈگۈن بىلگەندە قايدىن ئىزدىسەم تاپالمىدىم. بىر «روبائىيات»تا جەمكەن مىڭ ئۇلۇغ ھىكمەتلىرىم، مۇددىئايىم:« بەھر ئالسا تەڭ ئەزىز دىلكەشلىرىم.»

روبائىيات ‹1-قىسىم›ـــ ئابدۇشۇكۇر مۇھەممەدئىمىن

باھالاش