روبائىيات ‹1-قىسىم›ـــ ئابدۇشۇكۇر مۇھەممەدئىمىن [ئۇلانما كۆچۈرۈش]

ئەسسالامۇ ئەلەيكۇم ئەزىزلەر!

مۇھەممەد قادىر بارخان ئۇستاز مەرھۇم ئالىم  ئابدۇشۇكۇر مۇھەممەدئىمىننىڭ  ‹روبائىيات›ىنىڭ  1- قىسىمى ئۆزىدە بولمىغانلىقى ئۈچۈن  2- قىسىمىنى يوللىغانلىقى ئىزاھاتى بىلەن مەرھۇم ئالىم ئابدۇشۇكۇر مۇھەممەدئىمىننىڭ  روبائىيلىرىنى مۇنبەرداشلارنىڭ ھوزۇرىغا سۇنغان ئىدى،   بىر قىسىم ئوقۇرمەنلەرنىڭ بۇ كىتابنى تاپالمايۋاتقانلىقىنى كۆزدە تۇتۇپ، ئۆزۈمدە بار ئەۋزەللىكتىن مۇنبەرداشلارنىمۇ بەھر ئالغۇزۇش مۇددىئاسىدا، يەنە بىر تەرەپتىن ئۇستاز مۇھەممەد  قادىر بارخاننىڭ  ساۋابلىق ئىشىدىنى ‹قىزغىنىپ›  مەزكۇر ‹روبائىيات› نىڭ 1- قىسمىنى  ھوزۇرۇڭلارغا سۇندۇم، ھەم شۇ باھانىدە مەنمۇ بىر قېتىم كۆچۈرۈپ چىقىش ئارقىلىق ئۆزۈمنى كۈچلەندۈرۈشكىمۇ مەنپەئىتى يېتىپ قالار دېگەن ئۈمىدىممۇ يوق ئەمەس!


روبائىيدىنلا باشلىدىم:


1


ئارۇز ۋەزنىنىڭ بەھرى رەمەل شەكلىدە يېزىلغان روبائىيلار


1

مېھمىنىم! بۇ مەينى سۇندۇم سىز ئۈچۈن مەن ئىپتىدا،
زېھنىمىز ھەم قەلبىمىز قىلغاچقا بىر خل ئىقتىدا (1).
شۇنچە ھۆرمەت سىزگە ئىنئام، بۇ شاراب ساقىيسىدىن،
باغرىڭىزدا ئېرىگەن مەيدىن كېلۇر قالمىش سادا.

2

نەدىن ئالسۇن نەۋباھار زىننەتنى ئۇ گۈل بولمىسا،
كىم يېتەر گۈل قەدرىگە شەرھىيچى بۇلبۇل بولمىسا.
ئەشۇ بىر قەرنىدە(2) سىزگە كەلدى دۇچ ھەر خىل رەقىب،
شۇنچە ياۋنى كىم يېڭەر، قەلبىدە نۇر يول بولمىسا.

3

مەن گۈزەللىك ئاختۇرۇپ، رەسسام كەبى ئالەم ئارا،
ھەمدە شىرىنللىكنى ئىزلەپ، كېپىنەك بولدۇم يانا...
تەلپۈنۈپ كۈيلەشكە شادلىقنى بولۇپ شائىر گويا،
ئاقىۋەت بىلدىم بۇلار ئۆتكۈنچى، نىسپىي، بىۋاپا.

4

رۇمكىنى كۆزئەينىكى قىلدىم، ئېشىپ مەيخور ھاۋا،
چايقىلىپ تۇرغان قەدەھتىن ئاختۇرۇپ بىر مەھلىقا.(3)
غەرق ئىدىم زېھنىم ئارا...كۆزۈمدە پەرھاد ئەينىكى،
مەيدە كۆردۈم ئەنە شىرىن! كەلمىدى ئەمما سادا.

5

بولمىسا قەلبىڭدە شام، تۈندە قالۇرسەن بىزىيا، (4)
يانمىسا باغرىڭدا بىر ئوت، نەزمە بولمايدۇ سىيا...
ئەلنى سەن كۈيلەپ، سېنى ئەل كۈيلىسە ئۆلمەس ئىشىڭ،
بەرق ئۇرار ھەسەن-ھۈسەن گويا بولۇپ ئاسماندا يا.

6

بىر پەرى كۆردۈم سەھەر شەلپەر ئۇپۇقنىڭ قوينىدا،
سايىدىن زىننەت ياساپ، زۇمرەت ئېقىننىڭ بوينىدا.
ئاپىرىن ئالەم سېنىڭ زىبالىرىڭ چوغلۇق، بىراق،
سالما چاچى ئەركىلەر قايسى ئېزىزنىڭ بوينىدا.

7

شۇنچە كۆركەم تاغۇ -دەريا ئۈستىدە قۇتلۇق ھاۋا،
گۈل -گۈلىستان باغۇ -بوستان قوينىدا قايناق ناۋا.
بۇ ھاياتنىڭ رەڭگىگە مەردانىلەر زىننەت بېرەر...
بەختۇ-شەۋكەت تىز پۈكۈر دىللاردا يانسا ئوت لاۋا.

8

مۇنتەزىرمەن قۇي ماڭا، رۇخسار شارابى ساقىيا!
جامى ئەينەكتە كۆرۈنسۇن شۇ گۈزەل شىرىن قىيا...
بىر كۆرۈش بىرلە دىلىمنى قىلدى مەپتۇن جادۇ كۆز...
بەرمىدى تۈن ئۇيقۇسى ئۇ قىچقىرىپ بۇلبۇلگويا.(5)

9

گۈل ئەمەس گەر بەرگىدە جۇش ئۇرمىسا خۇش بۇي ھاۋا،
يوق ئىكەن بۇلبۇل ئەمەس، گەر لەۋزىدە كەيپى ناۋا.
باتۇر ئەرمەس تەقدىرى،  گەر كەلمىسە مۈشكۈلگە دۇچ،
بولمىسا ئاي ۋە قۇياش، گۈمبەز بىلەن پەرقسىز ساما.(6)

10

ئەگىدىم مېھرىڭ شېخىنى زوق بىلەن تاڭ ۋاقتىدا،
تەلپۈنۈپ باقتىم چېچەككە خۇددىي كۈتكەندەك نىدا.(7)
مايسىلار ئۈستىدە قاپتۇ تۈنكى سۆھبەتتىن ماكان،
ئاقتى مەڭزىمگە يېشىم، سىماپ بولۇپ كۆزدىن جۇدا.

11

قىسمىتى قامۇس ھاياتنىڭ ھەر بېتى قامۇس ماڭا؛
مەيلى قايغۇ، مەيلى شادلىق، كەلگىنى -ئامەت ماڭا.
بولسا گەر قەلبىڭدە ھىكمەت قىلغۇلۇق جۇتنى باھار،
بولمىسا قەلبىمدە ھىكمەن ئامىتىم ئاپەت ماڭا.

12

ئىنتىزارمەن قۇي ماڭا، لەۋ جامىدىن مەي ساقىيا!
ئوت بولۇپ كۆيگەن يۈرەككە شەربىتى لەۋدۇر شىپا.
بىر قەدەھ ئىچمەك بىلەن بولسام جۇنۇن (8) بىلمەڭ گۇنا،
نەئىلاج؟ تۈن ئۇيقۇدىن كەچكىن دېسە، بۇلبۇلگويا.

13

ئەرك ئۈچۈن جاندىن جۇدا بوماق شەرەپكە ئىپتىدا،
لەنىتى كۈندۇر ياشاش بولماي خالايىققا پىدا؛
ئۆز ئۆيىنىڭ راھىتى ئالدارمۇ مەردنىڭ قەلبىنى،
تېخى غۇربەت زەنجىرى تۇرسا غېرىبنىڭ بوينىدا.

14

خۇنپۇرۇش (9) بولدۇم ھامان، ئەي خۇنپەرەرس جانان ساڭا،
مەيپۇرۇش(10) بولدۇڭ ھامان، بۇ مەي  پەرەس بولغان ماڭا.
گۈل يۈزۈڭ خۇشتارلىغى، خۇنسىزغازاڭ بولدى يۈزۈم،
قىلدىمۇ بەخشەندە ئالەم بىھېساب ئەپغان ماڭا؟


15

گۆھەرۇ  زۇمرەت ۋەياقۇت جەم بولۇپ بىر قۇتىدا،
نۇر چېچىپ تۇرغان كەبى ئالماس پارىلداپ ئورتىدا...
جەم بولۇپ مەي ئىچمىكى دەنا ۋە رەنانىڭ ھوزۇر...
تۇرسادىل رىشتى نەھاجەت تاڭغىلى زەر پوتىدا.(11)

16

ئالمىلار شاخىدا كۆردۈم مەن سېنى ئاي ئورنىدا،
ئايدا يوق مۇنچە چىراي، شىرىن سۇخەن(12) شاتۇتىدا.
كېپىنەك ئاشىقلىقى، سەنچە ئەمەس گۈل ھۆسنىگە،
زەۋقمىدۇر ئۆرتەنمىكى پەرۋانىنىڭ ئىشق ئوتىدا؟

17

مىڭ تەشەككۇر، مەي قۇيۇپ سۇنغان ئېزىز ساقى ساڭا،
ئىشقىدىن مەندەك شېخى سۇنغان ئېزىز ساقى ساڭا.
روھىيەتتە قىلمىدى لوقمانمۇ ساقىچە پىكىر...
تۇرپە(13) جام-ئەسلىيۈرەك سۇنغان ئېزىز ساقى ساڭا.

18

تىغ تۇتۇپ سەن ئوۋغا چىقما، زۇلپىقارىڭ(14) بولمىسا،
قەستىكار سەيلىگە بارما، گەر تۇمارىڭ بولمىسا...
تۇت قولۇڭدا شەربىتى تولغان قەدەھنى ئەتىۋا،
مەيلى تۆك يەرگە ئىچىشكە دىلخۇمارىڭ بولمىسا.

19

ھۆرى-غۇلمانلار كېلىپ، بولدى ئۆيۈم جەننەت گويا،
ئۇندا بار لوقمان، سۇلايمان، بىلقىس ھەم بۇلبۇل گويا ‹1›
ھىكمىتى ــــ دەناغا ئۇستاز، ھۆسنى ــــ رەنا ئۈلگىسى،
بۇ ئېزىزلەرگە دىلىمدىن شەربىتى قۇتلۇق گىيا.

20

بىر قەدەھ شەربەتنى تۇتتۇم ئىككى لەبنىڭ جامىغا،
تەڭ كۈلۈپ قىلدى تەبەسسۇم، ساقىنىڭ ئىنئامىغا.
خۇش نەزەر سالسام بېغىمغا ھەممە گۈللەر مەئنىدار،
ئىچمىگەن لەۋلەرمۇ تولدى سۆيگۈنىڭ ئىلھامىغا.

داۋامى بار

يوللىغۇچىنىڭ ئەجرىگە مىڭلارچە رەخمەتلەر ياغقاي.
1-رۇبائىنىڭ 2-مىسراسىدىكى «بولغاچقا» دىگەن سۆز«قىلغاچقا»دىگەن سۆزگە ئۆزگەرتىۋىتىلسە...

21-
قولىڭىزدا سايرىغان گۆھەر غىجەك بۇلبۇل گويا،
ناخشىڭىز ماھىر تىۋىپ،دىل رەنجىگە بەرگەي شىپا.
كۈلكىڭىز بولسا ئادالەتنىڭ زەپەر قۇچقان تىڭى،
سۆزىڭىزدە يادلىنار ئالەمدە ئۆتكەن ئەۋلىيا.

21

قولىڭىزدا سايرىغان  گۆھەر، غىجەك بۇلبۇل گويا،
ناخشىڭىز ماھىر تېۋىپ، دىل رەنجىگە بەرگەي شىپا...
كۈلكىڭىز بولسا ئادالەتنىڭ زەپەر قۇچقان تېڭى،
سۆزىڭىزدە يادلىنار ئالەمدە ئۆتكەن ئەۋلىيا.

22

ئىپتىخار قىلدىم كۆرۈپ ئۇستازنى مەي داستىخانىدا،
خۇددى كۆرگەندەك قۇياشنى تاڭ سەھەر ئاسمانىدا...
مەينى ھۆرمەتتىن تۇتۇپ كۆردۈم قۇياش رەڭگى بىلەن،
مەندىكى رەڭگى خىجىللىق ئەكسىنى مەي جامىدا.

23

قارچۇغا كۆزلۈك دېسەم، كۆزۈڭ ئۇنىڭدىنمۇ قارا،
بىر كۆرۈپ مەستانىلىققا بولدى باشىم مۇپتىلا.
مەن كۆتەردىم بۇ قەدەھنى سۆيگۈنىڭ سىماسى(15)دەپ،
ئىچ! باھاسىز مېھمىنىم، گەر كەلسىمۇ مىڭ بىر بالا.

24

سۈرىتىڭىز بولسا مەبۇد(16)، مەن بۇلاي بىر شەيخ ئاڭا،
ئېتىكاپتا(17) ئولتۇرۇپ سىزگە ئېگىلگەندۇ ساما...
چىھرىڭىز نۇرانە دەريا، چېچىڭىز زەرباپ قاما،
ھۆسنىڭىزنىڭ شوئلىسىدىن كۆزلىرىم بولدى خۇما.

25

ئىستىقامەت ئەيلىمەككە جامنى دەس تۇتتۇم مانا،
غەملىرىم سۈتتەك دىلىمگە بولدى بىر غەشلىك گۇيا.
مەن ساۋابلىق ئىزلىبان مەيلەر كۆتەردىم تولدۇرۇپ،
قايغۇدىن بولماق خالاس شول دەم ساۋابلىقتۇر ماڭا.

26

دىلبىرىم ئاھۇ كۆزۈڭ قىلدى تەبەسسۇم بىر قىيا،
بولدى قەقنۇستەك ئاۋازىڭ خەستە كۆڭلۈمگە شىپا.
يۈزلىرىڭ باغۇ ئىرەم‹2›، كۆز بىرلە قاشىڭ ئوق ۋە يا،
خۇش ئىپار چاچىڭ مېنى قىلدى جۇنۇنى مەھلىيا.

27

ئالما رەڭگىم زەپىران بولدى پىراق ئاپتاۋىدا،
گۈل سۈمەن قەددىم پۈكۈلدى ئىشتىياق گىرداۋىدا.
مەن سېنىڭ قوينۇڭنى قىلسام باغۇ-جەننەتتەك ماكان،
كۆيدۈرۈپ قىلدىڭ مېنى كۈل، ئوت تونۇرنىڭ تاۋىدا.

28

تۇتى قەددىڭ تەلپۈنۈپ تۇرغاچ يېنىمدا دائىما،
رام قىلىپ ئالدىڭ دىلىمنى ماگنىت تاشتەك گويا،
نازۇ كۈلكەڭدە سېنىڭ يۈزمىڭ ئوماقلىق سۈللكىتى...
گۈل يۈزۈڭ بەختىم مېنىڭ باقسا يۈزۈمگە بىر قىيا.

29

ياپرىقىڭ يالقۇنمۇيا، ئەتلەس ساڭا يالقۇن گويا،
كېپىنەك توننى كېيىپ، بولدۇم بۇ ئوتقا ئاشىنا.
كىرپىكىڭنىڭ ئوقلىرىدىن كىرپىدەك بولسا تېنىم،
بولمىدىڭ لەب ساقىسى، مەغرۇر قاقاقلاپ بىۋاپا.

30

مەيلى يامغۇر جۇت - شىۋىرغان، مەيلى قار بولسۇن ھاۋا،
قىشتا گۈلخان، يازدا  فۇنتان دىلدا كەيپى شوخ ناۋا...
قىسمىتى ئادەمگە ھەر خىل، ئىقلىمى مىڭ بىر ساما،
ئەۋج ئېتەر قەلبىمدە قەلبىڭ تەھتىدىن كەلگەن سادا.


داۋامى بار

غازى ئوغلىغا مىڭلارچە تەشەككۇر،  ئېھتىياتسىزلىقتىن خاتا كېتىپ قاپتۇ.
باشقۇرغۇچىلار شۇنداق ئۆزگەرتىپ قويغان بولسا، مەن ئۆزگەرتسەم يەنە باشقۇرۇش سۇپىسىغا ئۆتۈپ كېتىدىكەن.

      بۇ بەك بەلەن ئىش بولۇپتۇ،بىزدەك «روبائىيات»نىڭ جامالى ھەم كامالىغا ئاشىقى بىقارار بولۇپ يۈرگەنلەرگە ۋېسال قىيامىنى تارتۇق قىپسىز.ئەجرىڭىزگە ئەرزىمەس رەھمىتىم بار!

31

ئەي پەرى يۈزلۈك! ئەقىلنىڭ تەڭپۇڭىنى بۇزدىلا،
خۇددى چولپاندەك ساما يۇلتۇزىدىن ئۇزدىلا،
تاڭ بىلەن كۈلگەن چېچەكتەك  گۈلى رەنا دەستىسىن،
يا، بىلىپ - بىلمەي پېقىرنىڭ ئىلكىگە تۇتقۇزدىلا.

32

«قادىر ئاللا» ئوت ئەمەس، تۇپراقتا تەن قىلسا بىنا،
خۇددى ئوت كەتكەن بىنادەك، مەن پىراققا مۇپتىلا.
گەرچە سۇ ئوتنى ئۆچۈرسە، كۆزدە ياشىم ياغ پەقەت...
كۆز يېشىم ئوت ئۈستىگە ئوتنى قوشۇپ بولدى بالا...

33

بىر پەرى كۆردۈم قىيالىق شاقىراتما قاشىدا،
نەقىش ئەتكەندەك ئۇنىڭ جىسمىنى ياقۇت تاشىدا.
يۈزلىرى باغۇ ئېرەمدە ئەشۇ «ئۆلمەس ئالمىسى»‹3›،
بىر كۆرۈپ پەيدا قىلۇر شەيتاننى ھەر كىم باشىدا.

34

گۈلپەرى ناز بىرلە ئەقلىم تەڭپۇڭىنى بۇزدىلا،
قاشلىرىنىڭ ياسىنى مىسكىنگە بەتلەپ سوزدىلا؛
ئوق تېگىپ ئاققان قىزىل قانىمنى سۇنسام رۇمكىدا،
رۇمكىنى ھەقسىز قولۇمغا قايتىدىن تۇتقۇزدىلا.

35

كەلدى قاپساپ قاپ-قارا، قات-قات بۇلۇت ئاسمان ئارا،
يالتىراق مىس نەيزىلەر قاپتال بىلەن ئايۋان ئارا.
ئىخ، جاھاننىڭ قىسمىتى...يازغايكى تارىخ ھەيئىتى:
ياغمىدى يامغۇر بىراق ئالەم يۇيۇندى قان ئارا.

36

چەرخى تۈگمەندەك تېنىمگە سوقسىمۇ مىڭ بىر بالا،
تۇرسىمۇ تاش ئۈستىدە تاش پىرە ئويناپ شۇنچىلا...
نو بىلەن چۈشكەن بېلىقنىڭ زارىدىن باغرىم يارا،
قىلدى كىم دەيمەن يانا، قاينامغا سىزنى مۇپتىلا؟

37

تىلغا ئالدىم نامىڭىزنى سۇمرۇ قۇش سىماسىدا،
تاپمىدىم ئۇندىن گۈزەلرەك نامنى سۆز دەرگاھىدا.
يامىشىپ باققان بىلەن ئەجدار چىنارغا ئاقىۋەت،
كۈلدى غالىپ سۇمرۇ قۇش شۇم ئەجدىھا گۇمراسىدا.

38

نەزمىڭىز مەزمۇنى دەريا، تەسۋىرى كۆركەم يانا،
زەر قەلەمنىڭ ئات ئىزى باسقان يىراق يول شۇنچىلا.
بال-ھەسەلنىڭ تەمى شىرىن، خۇشبۇيى يەشكەي خۇمار،
ھەرىڭىز ئىلھام ئېلىپ يۈرگەچ گۈزەل گۈلشەن ئارا...

39

ئىچ ۋىسال داستىخانىدا، مەينى خوشال ھالەت بىلىپ،
تۇرمىغاي جان تەندە، مەي جامدا ھامان ئادەت بىلىپ.
گۈل قەدەھ قالغاي قۇرۇپ، سەرۋى بەدەن سۇنغاي سۇلۇپ،
قەدىرلە نىسپىي جاھاندا،  ۋەسلىنى ئامەت بىلىپ.

40

سەن تەكەببۇر ئەيلىمە ئەقلىم پاراسەت ئايى دەپ،
لەۋھەلەر ئاسما بويۇڭغا، نەزمىلەر دەرگاھى دەپ.
قانۇنىي ئالەمنى سەن پىكرىمگە بەيئەت (18) قىل دېسەڭ،
مەسخىرە ئەيلەر جاھان بىر تۈپ قوناقنىڭ پايى دەپ.

داۋامى بار

ئەرزىمەس ئەمگىكىم بىلەن ئەزىزلەرگە زەررىچە نەپ ئېلىپ كېلەلىسەم، پەخىرلىك ھېس قىلغان بولاتتىم.

ئۇستازىم مۇھەممەد  قادىر بارخان، غازى ئوغلى ۋە باشقا مۇشۇ كىتاب قولىدا بار ئېزىزىلەرنىڭ ۋاقتى يار بەرگەن شارائىتتا يازمىلارغا نازارەتتە بولۇشىنى تولىمۇ ئارزۇ قىلىمەن، خەتنى ئۇرۇش جەريانىدا غازى ئوغلى ئېيتقاندەك خاتالىقلاردىن خالى بولغىلىي بولمايدىكەن.
شۇنداق ئەھۋاللار كۆرۈلسە ۋاقتىدا ئەسكەرتمە بېرىشلىرىنى تۆۋەنچىلىك بىلەن ئۈمىد قىلىمەن.

ئەسسالامۇئەلەيكۇم ساجىدە خانىم

    بىز پەقەت سىزگە رەھمەت ئېيتقۇچى خالاس، بۇخالىسانە ئىشىڭىزنىڭ ساۋابىنى ئالاھ بەرگەي... چۈنكى، سىز تورغا ئۇزىتىۋاتقان مەزكۇر رۇبائىيات، ھەممىمىزنى توغرا يولغا ئۈندەيدىغان، كىشىلىك پەزىلىتىمىزنى تېپىۋېلىشىمىزغا تۈرۈتكە بولىدىغان ياخشى ئەسەردۇر...

بەك ياخشى بولدى.رەھمەت سىلەرگە!!!

ۋاھ ......يەنە بىر خۇشاللىق، رەھمەت ساجىدە خانىم ،ئەمىسە سىزگە قارايمىز ،چاققانراق بولارسىز ھە ......

مۇھەممەت بارخان ئەپەندىممۇ كۆپ جاپا چەككەن ئىدى ......سىز ۋارىسى بولۇپسىز .......ئەجرىڭلار يەردە قالماس!

مەن 35- رۇبائىنى مۇشۇ رۇبائىياتنى قولغا ئالغان ۋاقتىمدىن باشلاپ يادلاپ يۇرەتتىم.ھېلىمۇ ئېسىمدە.(1983-يىللىرى)

دېگەنلىرىڭىز كەلگەي مۇھەممەد قادىر بارخان ئۇستاز!
ماھىرە،  ئەسلى قىزغىنلىقىمغا تۈرتكە بولغان سىزمۇ بار.

قالتىس ئىش قىلىپتىكەنسىز، مۇمكىن بولسا ھەممىنى يادقا ئېلىۋالسا ئەرزىيدىغان گۆھەرلەر دەڭە بۇ.

41

تۇرمىغاي بوستاندا چىم يوللار ھامان سىزنى كۈتۈپ،
چەرخى دەۋران بەزم ئېتەر باغ ئۈستىگە قارلار تۆكۈپ.
كىم سانالايدۇ زېمىن تەھتىدە ياتقان تاج لىنى.
ئەنە تۇرماقتا مۇنارلار بوينىچې قۇمغا چۆكۈپ.

42

جىگدە چاچتى چېچىكىدىن خۇش ئىپار بىھۇش قىلىپ،
سەنمۇ تاقتىڭ چاچلىرىڭغا لىنتەنى قىزغۇچ قىلىپ...
ئېتىكىڭ توزدىنمۇ ئۇش(19)، بوينۇڭنى تۇتى قۇش قىلىپ،
ئۆتكىنىڭدە تار كوچامدىن يوقلاپ ئۆتكىن خۇش قىلىپ.

43

ئاي يۈزۈڭ مەي تەپتىدە گويا قىزىل لالە بولۇپ،
زەر سۇخەن زىبا لېۋىڭ شەربەتكە پىيالە بولۇپ.
قاينىسا سۈلكەت بىلەن ھۆسنۈڭدە شادلىق، زەۋقى كەيىپ؛
چۈشىدۇ كۆكسۈمگە توزدەك، قامىتىڭ سايە بولۇپ.

44

سەن خىيال ئاسمانىغا چىقتىڭ گويا ئايدەك بولۇپ،
مەرھابا!(20)دەپ مەي قۇيۇپ دىل جامىغا لىق تولدۇرۇپ.
سۆيگۈنىڭ مەسخۇشۇغى ئىزلەپ سېنى چىقسام بۈگۈن،
ئىزلىرىڭدا ئۇچرىدى رەيھان گۈلى غۇزمەك بولۇپ.

45

مەن ــــ قاراڭغۇ تۈن ئىچىدىن پارلىدىم چولپان بولۇپ،
چاقنىدىم گوياكى كۈندەك زەرسىمان نۇرغا تولۇپ؛
سۈبھىدىن گوگۇمغىچە بىلدىم جاھاننىڭ مەنىسىن،
ئۇ: ئۇ كۆپۈك، بۇزغۇن ۋەشوئلا، نۇر، چىچەك تۇرغان سولۇپ.

46

ئاق بېلىق ئويناپ يۈرۈپسىز كوچىنى دەريا بىلىپ،
ھەممە خەخنىڭ كۆزى سىزدە، بىر ئەجەپ دۇنيا بىلىپ...
سۇغا غەرق بولمايمۇ بىلدۇق، ھۆسنىڭىزنى شوخ بېلىق،
يانداپ ئۆتمەڭ بىزنى خۇددى سۇدىكى گىيا بىلىپ...

47

قولغا ئالدىم رۇمكىنى گۈلنارىڭىزگە ئوخشىتىپ،
مەيگە باقتىم لالىدەك رۇخسارىڭىزگە ئوخشىتىپ.
گەر تەۋەرۈك بولسا مەي داستىخانىدا گۈل ھۆسنىڭىز،
ئايغا باقماق ئادىتىم دىدارىڭىزگە ئوخشىتىپ.

48

تاشلىدى كۆركەم تەبىيئەت شۇ كېچە يۈزدىن نىقاب،
تولغان ئاي كۈزگى پىراقتا نۇر چاچار بىزگە قاراپ...
مەنمۇ مىندىم خۇشناۋا ئوت سۆيگۈنىڭ تۇلپارىغا،
لەۋلىرىدىن يارنىڭ ئىچكەچكە گۈل رەڭلىك شاراپ.

49

بىر پەرى چىقتى كۆرۈڭكىم باغچىدىن سەيلان قىلىپ،
كالپۇكىمنى چىشلىدىم دىلدا ھەۋەس جەۋلان قىلىپ.
كەينىگە باقسام ئىپار بوي چاچرىتىپ خۇشتار ئېتىپ،
توختىماي ئوينار ئۇنىڭ ئەژدار چېچى لەرزان قىلىپ.

50

شۇم خەۋەر يۇمران تېنىمنى ئۆرتىدى چاقماق بولۇپ،
ياتمىدىم تۈنلەر بويى كۆيگەن يىلاندەك تولغۇنۇپ...
سەھنىدە تۇتى ئىدى سەنئەتتە چولپان پارلىغان،
ياش چېچەكنى ئېخ ئەجەل، قىلدى غازاڭ بىۋاخ بولۇپ.