«كروران»دىكى روزى كېرەم يارى(20) [ئۇلانما كۆچۈرۈش]

يېزىدا شۇنداق ياخشى تېمىلار بار . ئۆزلىرى يېزىلىپ تەييارلا تۇرغان .... شۇ تېمىلارنى كۆپرەك يېزىڭ ....ئىجادىيتىڭىزگە ئۇتۇقلار يار بولسۇن !!!

ئادىمىيلىك خىسلىتىنى يۇقاتمىغان كىشىلەرگە ئىھتىرام بىلدۈرىمەن!

ئىجادىيتىڭىزگە ئۇتۇقلار يار بولسۇن .

ئەيىپناقمۇ سىز ؟ (فىليەتون)



ئاساسى قاتلامدا ئىشلەش - جاپاسى كۆپ ، ھالاۋىتى ئاز خىزمەت . ئاساسىي قاتلام پۇقرالارغا يەنى دۆلىتىمىزدىكى ئەڭ كۆپ ساننى ئىگەللەيدىغان دېھقانلار ياكى خەلق ئاممىسىغا  ئەڭ يېقىن بىر ئىستېھكام .

ئەمما بۇئىستېھكامدىكى كۈڭۈل بۈلۈپ ھەل قىلىشقا تىگىشلىك ئەڭ ھالقىلىق مەسىلە دېھقانلار ياكى خەلق ئاممىسى بىلەن قانداق مۇناسىۋەتتە بۇلۇش ۋە ئۇنى قانداق بىر تەرەپ قىلىش بولماستىن ، بەلكى يوقىرى دەرىجىلىك رەھبەرگە قانداق ماسلىشىش ۋە ئۇلار بىلەن بولغان مۇناسىۋەتنى قانداق تەڭشەپ تۇرۇش مەسىلىسىدۇر . چۈنكى ، بۇ ھالقا سىزنىڭ ھوقۇق - ئەمىلىڭىزنىڭ ئۆسۈشى ، نام - مەنپەئەتىڭىزنىڭ ئېشىشى ۋە يەنە ئاللىقانداقتۇر ئىمتىيازلىرىڭىزنى ساقلاپ قېلىش ياكى كېڭىيتىشىڭىزگە بىۋاستە تەسىر كۆرسىتىدۇ .

مېنىڭچە ئاساسىي قاتلامدىكى كۆپ قىسىم رەھبىرى كادىرلار قول ئاستىدىكىلەرنىڭ <ئەيىپناق> بۇلۇشىنى بەكرەك ياقتۇرىدۇ . مېنىڭ بۇ مەسىلىنى ياكى قارشىمنى كۆتىرىپ چىقىشىم - ئىستېھكامدىكى تاكتىكا مەسىلىسىدۇر .

مېنىڭ بايقىشىمچە ، ئاساسىي قاتلامدىكى كۆپ قىسىم رەھبەرلەر قول ئاستىدىكىلەرنىڭ تۆۋەندىكىدەك بىر قاتار جەھەتلەردە <ئەيىپناق>  بۇلۇشىنى ياقتۇرىدۇ  .

1 . ئەڭ ئالدى بىلەن ئۇلارنىڭ <كۆزىنىڭ كۆرمەس> بۇلۇشىنى ياقتۇرىدۇ .

كۈزى كۆرىدىغان تۇرۇپ ، كۆرمەسكە سېلىش ؛ كۆرسىمۇ كۆرمىگەن بۇلۇۋېلىش ... ياقتۇرۇشقا ئېرىشىشنىڭ ئالدىنىقى شەرتى بۇلۇشى مۇمكىن . مانا مۇشۇنداق بولغاندا رەھبەر سالاپىتىدىن چۈشۈپ كەتمەيدۇ . ئىش - ھەركىتى مەڭگۈ يوللۇق بۇلۇپ قېلىۋېرىدۇ .

ئەگەر سىز <ئەيىپناق> بولماي ، كۆرمەسلىككە تىگىشلىك بىر ئىشنى كۈرۈپ قالسىڭىز ئەڭ سىر ساقلىيالايدىغان ئادەم بولسىڭىزمۇ يەنىلا ئۈچ كۈن ئىچىدە بۇ مەخپىيەتلىكنى ئەڭ بولمىغاندا ئايالىڭىزغا دەپ قۇيۇشىڭىز مۇمكىن .

  2 . <سۆزلىيەلمەس> بۇلۇشىنى ياقتۇرىدۇ .

چۈنكى سۆزلىيەلەيدىغان ئادەم - ئامما ئالدىدا ، رەھبەر ئالدىدا ھەقنى ھەق ، ناھەقنى ناھەق دىيەلەيدۇ . بۇنداق ئادەم ھەق ناھەق  مەسىلىسىدە ئاياپ ئولتۇرمايدىغان بولغاچقا ، ناھايىتى كۆپ ئادەم ئېھتىيات قىلىدىغان ئادەم بۇلۇپ قالىدۇ .

  3 . <قۇلىنىڭ تۇتماس ، پۇتىنىڭ باسماس> بۇلۇشىنى ياقتۇرىدۇ .

بۇنداقلار باشلىق بەلگىلەپ بەرگەن ئۇرۇندىلا ئولتۇرىدۇ . ئۇلارنىڭ تۆۋەندە ئامما ئارىسىغا بېرىش ، يوقىرىدا يوقىرى دەرىجىلىك رەھبەرلەر بىلەن ئۇچرىشىش پۇرسىتى بولمايدۇ . بۇنداق بولغاندا ، بۇئادەمنىڭ باشلىق دىگەننى قىلىشتىن باشقا ئىش بىجىرىش ئۇسۇلى ، باشلىق دەپ بەرگەندىن ئۆزگە تەپەككۇر قىلغۇدەك يۈرىكى بولمايدۇ .

  4 . <قۇلىقىنىڭ ئاڭلىماس> بۇلۇشىنى ياقتۇرىدۇ .

بۇنداق بولغاندا ئىچكى جەھەتتىكى <كۇس - كۇس> لارنى ؛ سىرىتتىكى <مىش - مىش> لارنى ؛ يوقىرىدىن تارقىلىدىغان <ئاخبارات> لارنى بىلمەيدۇ .

<ئاللاھ ، ئەڭ يېقىن بەندىلىرىنى قۇلاقتىن ئايرىيمىش ...> . بۇ سىزنى ھەرخىل ۋەسۋەسە ۋە ئىنتىلىشلەردىن ساقلاپ قالىدۇ .

  5 . <چىشى بولماسلىق> ىنى ياقتۇرىدۇ .

ئەلۋەتتە ، كىم ئۆزىنى چىشى بارلارنىڭ چىشلىۋېلىشىنى ، ياخشى نەرسىللىرىنى تارتىۋېلىشىنى ياقتۇرىدۇ .

رەھبەرلىك بىزدىن ھەرۋاقىت <خەلق ئۈچۈن جان دىل بىلەن خىزمەت قىلىش> نى ئۈمىد قىلىدۇ .

ئەمما ، رەھبەر بىزدىن ھەرۋاقىت ئۆزى ئۈچۈن جان - دىل بىلەن خىزمەت قىلىشىمىزنى ئۈمىد قىلىدۇ .

قىسقىسى ، ئاساسىي قاتلامدا روناق تېپىشنى ئويلىغانلار <ئەيىپناق بۇلۇش> ى ياكى قايسى ۋاقىت ، قانداق ۋاقىتتا <ئەيىپناق بۇلۇۋېلىش> نى بىلىشى كېرەك .

ئەلۋەتتە ، سىز ئەيىپناق بولسىڭىز باشلىقنىڭ پۇت - قۇلى ؛ سەترەك ئېيىتقاندا قول - چومىقىغا ئايلىنىسىز - دە ، سىز ئۈچۈن ئىشلار ئوڭۇشلۇق ، يوللار داغدام ، كەلگۈسى پارلاق بولغۇسى ........



رۇزى كېرەم

كورلا شەھرى

2011.03.08

مەنبە : كونا مۇنبەر

يارى كۈچلۈك ئىشتىياق بىلەن ئۆز قەلبى ۋە قەلىمىگە خاس بولغان ئەسەرلەرنى بارلىققا كەلتۈرۈپتۇ.ئىجادىيىتىنىڭ روناق تېپىشىغا تىلەكداشمەن.

چىمەنىستاندىكى تىراگىدىيە  بەك ياخشى چىققان ئەسەركەن

قىزىمنىڭ 100 كۈنلۈك خاتىرىسىگە بېغىشلايمەن



تىكىلسە كۈزۈمگە قاپقارا كۈزۈڭ ،

قارىشىڭ يۈرەككە يىتىپ بارىدۇ .

قوللىرىڭ سىقىملاپ بارماقلىرىنى ،

جېنىمنى مېھىرگە چېتىپ ئالىدۇ .



جان قىزىم ، گۇڭرىغىن چۈچۈك ئاۋازدا ،

مەن سېزەي سېنىڭكى تەلەپلىرىڭنى .

بۇياقتىن ھىجىيىپ تاماسىز قاراپ ،

ئۇياقتىن ئۈمچەيگەن غەلەتلىرىڭنى .



جان قىزىم پۇت ئېتىپ تىپىچەكلەشلىرىڭ ،

يېڭى بىر ھاياتقا قىلغان تەنتەنەڭ .

سەن ئۈچۈن تىلىكىم نەپەسلىرىمدە ،

ئىلاھىم ، ئوڭ بولسۇن بەختى - پېشانەڭ .


دېھقان ۋە باھار



(ئابدۇرېھىم  ئۆتكۈرنىڭ «باھار كەلدى» ناملىق شېئىرىغا نەزىرە)



باھار كەلدى ، جاھان كۈلدى ، كۈلەر مەستانە - مەستانە ،

ئەمگەكنىڭ ئىشقىدا ساپ تەر ، ئاقار دۇردانە - دۇردانە .



جاھاننىڭ ئاتىسى دېھقان ، تۇتۇپ قۇلىدا گاڭ ساپان ،

ئېكىنزار باغرىنى تىلدى ، تىلار مەردانە - مەردانە .



چاچار تۇپراققا ئۇ ئۇرۇق ، ئۈنەر مايسا ئەجەپ بۇلۇق ،

نە مايسا بەلكى نېمەتلەر ، تۇلۇر پەيمانە - پەيمانە .



ئېيتار ئورما ناخشىسىنى ، تۈزۈپ ئايدىڭ بەزمىسىنى ،

قىز - يىگىتلەر يۈرەر جۈپ - جۈپ ، قىلىپ سەيلانە - سەيلانە .



دېھقاننىڭ دىلىدا شاتلىق ، ئاقار سايمۇ ساي تاشلىق ،

يۈرەكى ئەمدى ئاۋۋالىدەك ، ئەمەس غەمخانە - غەمخانە .



كۈرۈڭ مۆجىزىكار دېھقان ، تۈكۈپ بارىنى قىلار مېھمان ،

قۇيۇپ قول بارچە دېھقانغا ، بۇلۇر ھەيرانە - ھەيرانە .



باھار كەلدى ، دېھقان كۈلدى ، نە دېھقان ھەممە جان كۈلدى ،

دېھقاننىڭ چېھرىدە بەخىت ، قىلار جەۋلانە - جەۋلانە .



ئاتاي سەن ئۈچۈن جاننى ، ئالاي قولغا مەي - جامنى ،

بۇلۇپمەن بىر ئۆمۈر ساقى ، ئۆتەي مەيخانە - مەيخانە .



ياشاش ھەممە ئادەمگە ئاددىي بىر ھەۋەس


مەن چەكسىزلىك ئىچرە ھېچنىمىگە ئەرزىمەيمەن ،

مۇھەببەت مېنى ياشاپ قېلىشقا دەۋەت قىلىدۇ .

ئۇ ئاچكۆزلۈككە ئوخشايدۇ ،

چۈنكى ، مەن ئۇنىڭغا قانمىغان تۇرسام ....



ئۈتۈپ كەتكەن ۋاقىتنىڭ ئارقىسىدىن قارىدىم ،

جاننى مىڭ ئېلىپ ، بىر يەرگە قويدى .

سانغا ھەۋىسىم ئاشقانچە قانچە

ئوت بولدى ئۇنىڭ ھەر بىر جىلۋىگەر نازى !



مەن پاراسەتلىك ياشاشقا ئىنتىلگۈچى

ئەمما ، ھاقارەتكە چىداپ تۇرغۇچى ئەمەس !

«جان بىر قۇش ، تەن بىر قەپەس»

ياشاش ھەممە ئادەمگە ئاددىي بىر ھەۋەس ....


ياشاپ بەر ئوغلۇڭنىڭ بەختىگە ئانا





يوق ئىدىم ، ‹تۇغۇلسا ...› ئارمان قىلغانتىڭ ،

تولغاق يەپ يۈز ئەمەس ، يۈرەك تىلغانتىڭ ،

مۇشتۇمدەك بىر گۆشكە نەپەس سالغانتىڭ ،

ياشاپ بەر ئوغلۇڭنىڭ بەختىگە ئانا !



‹چوڭ بولسا ...› توختىماي غېمىمنى يەيتىڭ ،

‹ - يىتىلسە قانىتى ، ئۇچسىكەن !› دەيتىڭ ،

‹- ئارمىنىم يوق ئىدى ، ئېچىلسا بەختىڭ !›

ياشاپ بەر ئوغلۇڭنىڭ بەختىگە ئانا !



ئۇچسام ئاسماندا مەدەت بەر ماڭا ،

ئازغاشسام سامادا دەۋەت بەر ماڭا ،

كۆزۈڭدىن سۇ ئىچەي غەيرەت بەر ماڭا ،

ياشاپ بەر ئوغلۇڭنىڭ بەختىگە ئانا !



ئالدىمدا ئاددىي بىر ئايال تۇرىدۇ ،

ئويلىسام كۆزۈمگە ياشلار تولىدۇ ،

سەنسىز بۇ بەختىمگە كىملەر كۈلىدۇ !؟

ياشاپ بەر ئوغلۇڭنىڭ بەختىگە ئانا



ئازمىدى مەن ئۈچۈن تارتقان جاپايىڭ ،

ئاڭلىنىپ باقمىدى ھەسرەت نىدايىڭ ،

ئەي ئوغۇل ! بىلگىنكى ئۇ جان پىدايىڭ !

ياشاپ بەر ئوغلۇڭنىڭ بەختىگە ئانا !



گۈللەردەك ئېچىلسۇن سېنىڭمۇ بەختىڭ ،

تەمىنى تېتىپ كۆر سەنمۇ بىر نەقنىڭ ،

قەرزى بار مېنىڭدە تېخى كۆپ ھەقنىڭ ،

ياشاپ بەر ئوغلۇڭنىڭ بەختىگە ئانا !


بال ھەرىسى

  

تەبەسسۈمدە كەلدى بىر قىزچاق ،

ئۆزى ئوماق ، مەڭزىدە زىناق .

ئاۋايلاپلا ئۇ گۈلنى ئۈزدى

شەبنەملەرنى كۆرمىدى بىراق ...



كېپىنەكتەك لەيلىگەن سۆيگۈ

-    بال ھەرىسى ! پىچىرلىدى گۈل ...

شەبنەملەرگە ئايلاندى ھەسرەت

ئەتراپىنى قاپلىغان پۇراق

گۈل بەرگىدە قاتتى كۆپ شەبنەم

يۈرەكلىرىم زىڭىلداپ ئاغرار

كۆزلىرىمدە يانغان كىرىستال!



- بال ھەرىسى !!

- بال ھەرىسى !!!


مەنبە : كونا مۇنبەر

سالام روزى كېرەم!
چۈچۈك يازمىلىرىڭىزدىن كۆپ سۆيۈندۈم...
سىزنىڭ يېنىك، يېقىشلىق تىلىڭىز ماڭا ياقىدۇ.... كېيىنكى قەدەملىرىڭىزنىڭ يەنىمۇ ئۇتۇقلۇق بولۇشىنى تىلەيمەن...

رۇزى كېرەم يارىنىڭ ئىجادىيىتىگە ئۇتۇق تىلەيمەن !

تور يېڭىلانغاندىن بۇيان، كۈندە نەچچە مەرتەم «يېڭىلىق»ماراپ كىرىپ تۇرساممۇ، تىزىملىتىپ كىرەلمىگەن ئىدىم. بۈگۈن تېزىملىتىپ كىرىپ، تۇنجى ئىشىم ژۇرنالنىڭ مۇندەرجىسىنى يوللاش بولدى. ئاندىن دوستۇم ۋە قەلەمدىشىم روزى كېرەمنىڭ بۇ تېمىسىنى ئېسىمگە ئالدىم.
نۇرغۇنلىغان كىشىلەرگە ياكى ئوقۇرمەنلەرگە نىسبەتەن روزى كېرەم بۇرادەر ئانچە تونۇشلۇق ئەمەس، ئەمما مەن بۇ سىرداش قەلەمداش دوستۇمنى ئوبدان بىلىمەن. غەيۋەتتىن، تامادىن ۋە خۇشامەتتىن يىراق بۇ يىگىت ئۆزىنى بەك تونۇتۇپ كېتىشكە مۇشۇ كەمگچە ئالدىراپ كەتمىدى. شۇڭا بىزنىڭكىدىن باشقا مەتبۇئاتتا ئەسەرلىرى ئاز كۆرۈلدى. مۇئاۋىن سىكرىتارلىقتىن يۇقىرىغىمۇ ئۆرلەپ بولالمىدى. بۇنىڭ ئۈچۈن بەكمۇ ئاھ ئۇرۇپمۇ كەتمىدى. چۈنكى ئۇنىڭ ئۆزىنىڭ ياشاش مىزانى بار. بۇ مىزان ئۇنىڭ يوقاتقانلىرىغا يەنە يېڭى ئېرىشىشلەرنى ئاتا قىلدى. بۇ ئېرىشىلەر ئاخىرى بىزگە ھازىرقى روزى كېرەمنى، دوستلۇققا يارايدىغان، تىتىك، قەلبى ۋە تېنى پاكىز  روزى كېرەمنى يېقىنلاشتۇردى.
نۇرغۇنلىغان قەلەمداشلار بەلكىم روزى كېرەمنىڭ نەچچە توم شېئىر كىتابلارنى  پۈتۈپ قويغانلىقىنى بىلمەيدۇ. بىلىشنىڭغۇ  زۆرۈريىتىمۇ يوق.چۈنكى روزى كېرەم ئۆزىنىڭ يېزىقچىلىق قىلىۋاتقانلىقىنى بىلىدۇ. مۇشۇنىڭ ئۆزى بىر ئەدەبىيات ئاشناسى ئۈچۈن كۇپايە. مەگەر كۈنلەردىن بىر كۈن كېلىپ روزى كېرەم داڭلىق ئەدىبكە ئايلىنىپ كەتسە، ھەيران قالماسلىقىڭلارنى سورايمەن.  يەنە كۈنلەرنىڭ بىر كۈنى ئۇ قەلەمنى تەرك ئەتسىمۇ ھەيران قالمايمەن. بىزگە نىسبەتەن ئۇنىڭ شىېئىر يېزىش يازماسلىقى ئەمەس، بەلكىم ئەتراپىمىزدا تىرىك يۈرۈپ بەرگىنىنىڭ ئۆزى كۇپايە.
بۇرادەر ئەزىز ،  ژورنىلىمىزنىڭ ئەتراپىدا يۈرۈپ قىلىپ بەرگەن ھەربىر ئۇششاق چۆڭ ئىشلىرىغا ھەشقاللا! . تاماغا داۋاملىق بېرىلمەسلىكىڭنى  ھەم ئۆزەڭنىمۇ ئازىراق كۆرسۈتۈپ قويۇشىڭنى تىلەيمەن.

ياخشىلارغا ياخشىلىق يار بولسۇن...

ئۆمۈرنىڭ پايانسىز مۇڭ دالاسىدا

روزى كېرەم يارى

ئۆمۈرنىڭ پايانسىز مۇڭ دالاسىدا ،
خۇشلۇقتىن ئازاپنىڭ ئۆمرى ئۇزۇنراق .
سۈيۈملۈك ھاياتتىن بۇلۇپ ئۈمىدۋار ،
ئۇلۇغۋار زېمىنغان ئايلانغان تۇپراق .

تەسەللىي بېرىشكە يېتىدۇ قۇربىم ،
ئىشىنىپ كەلدىم ھەم يىراق ئۆتمۈشكە .
كەلگۈسى ئۈستىدە خىيالغا چۆكسەم ،
تەييارمەن ھەر سېكونت ، ھەر بىر كەلمىشكە .

ئەمما نەق ھاياتنىڭ ئۆزى بىر رەڭۋاز ،
ھەيرانلىق ئىلكىگە تاشلايدۇ سەرۋاز .
بىر نۆۋەت بەخت ۋە ئامىتىڭ بولسا ،
بىر نۆرى گۇناھىڭ بولار شۇ پەرۋاز .

ھېس قىلىپ قالىمەن شۇنداق مەۋھۇملۇق ،
پەلەكنىڭ چاقىدا بار بىر مۇقىملىق .
يىراققا باققۇم بار تۇرۇپ ئىگىزدە ،
سۆيىمەن ، ياشايمەن ئەي گۈلجانانىم !
بىر ئېغىز سۆزنىمۇ قىلىپ ئورۇنلۇق !

2010 – يىل
كورلا

ئىرادىڭىز ھەرزامان قەلىمىزگە يولداش بولسۇن ! ئادەم يۇقۇرى يۇقۇرى تۆۋەنلىكى بىلەن ئادەم ئەمەس بەلكى قانداق ئىجابىي ئىشلارنى ۋۇجۇتقا چىقىرالىغانلىقى ئۈچۈن ئادەم !  سىز چوقۇم تېخىمۇ نادىر تېمىلارنى ۋۇجۇتقا چىقىرالايسىز! قەلىمىزڭگە ھەر دەقىقە مەدەت تىلەيمەن ! تەپەككۈرىڭىزگە نەزەر سالغىنىمدا سىزنىڭ تېخى يېزىپ بولالمىغان نۇرغۇن ھېسلىرىڭىز باركەن، شۇ ھېسلىرىڭىزنى كەڭ ئاۋامغا تەقدىم قىلغايسىز !!!

يارى ئاكامنىڭ ئىجادىيتىگە ئۇتۇق يار بولسۇن.

شەھەرنىڭ مۇڭى : ئويغانغان قەلپ مەڭگۈ تىنىچلانمايدۇ


نۇرىمۇھەممەت توختىنىڭ «شەھەرنىڭ مۇڭى» ناملىق ھىكايىسىنى ئوقۇغاندىن كىيىن

رۇزى كېرەم يارى

بۇ ھىكايىنى ئۇقۇغاندىن كىيىن ، ھىكايە ئۆز ئىچىگە ئالغان بارلىق نوقتىلارنى ئوبدان شەرھىيلەپ ، ئاپتۇرنىڭ ئىجادىيەت ئۇتۇقلىرى توغرىسىدا جىقراق نەرسىلەرنى قېزىپ ئۆزەمنىڭ بۇندىن كىيىنكى يېزىقچىلىق نىشانىمغا ياخشى خۇرۇچلارنى تېپىش نىيتىم بار ئىدى . ئەمما ، تۇيغۇللىرىم مېنى يەنىلا شۇ ئالدىراش كەلگەن ئوي – خىياللاردىن ئازراق تەمەچ تېرىپ بېقىشقا ئالدىرىتىپ قالدى .
ھىكايە بىزگە ئارلاشما بايان بۇيىچە ئېيتىپ بىرىلىدۇ . ئاپتۇر ھىكايە ۋەقەلىكىگە ئانچە بەك مۇرەككەپ ۋەقەلىكلەرنى سىغدىمىغان . لېكىن ، تۇرمۇشقا ئەڭ يېقىن ئاددىي ۋەقەلىكلەرنى ئۆز – ئارا تەسىر كۆرسەتكۈزۈش ئارقىلىق ، ھىكايە راۋاجىنى شەكىللەندۈرۈپ ، بىزنى ئاددىيلىقنىڭ مۇرەككەپلىككە تۇيۇنغانلىقىدەك ھەقىقەت ئارقىلىق ، ساتتارنىڭ مۇرەككەپ ھايات كەچۈرمىشلىرىنى بىر قەدەر ئېنىق بىلىشكە يېتەكلىگەن . يەنى ئاپتۇر ۋەقەلىككە كۈچ سەرىپ قىلماستىن ھىكايىدە ئوتتۇرىغا قۇيۇلغان ئىدىيىۋى مەزمۇننى ئەڭ زور دەرىجىدە كۈچەيىتكەن .
ئاپتۇر بۇرۇنقى تىل ئىشلىتىش ئۇسلۇبىغا خاس ئاددىي رەڭسىز سۆزلەر ئارقىلىق ، ھىكايىغا كىرىپ كەلگەن ھەم باشتىن – ئاخىر بۇخىل ئىزچىللىقنى ساقلىغان . بۇلۇپمۇ ساتتارنىڭ خانىمى ئىشلىگەن «ئىدىيىۋى خىزمەت» تىلى ئەنئەنىۋى چۆچەك تىلىغا ئىنتايىن يېقىن بۇلۇپ ، ئىختىيارسىز ھالدا بۇ ئايالنىڭ تىل ماھارىتىگە قايىل بۇلۇپ قالىسىز .
ئاپتۇر بۇ ھىكايىنى سۆزلەپ بىرىش ئارقىلىق بىزگە نىمە دېمەكچى ؟

«- ئەگەر قىزىنى بەرمىسە ، قەرىز ئالغان پۇللارنى دەرھال قايتۇرسۇن ...»

بۇ تەھدىت ۋە ھاقارەت ئىگىسى ساتتار قانداق ئادەم ؟
ساتتار - «پۇلنى ئەمەلىدىن ، نەپنى شان – شەرەپتىن ئۈستۈن كۆرىدىغانلىقىنى ھەرگىز يۇشۇرمايتتى»
ساتتار - ئائىلىسىگە كۈيىنىدىغان ، بەخت ۋە ھوزۇر ھالاۋەتكە ئىنتىلىدىغان ، ئايالى ۋە ئىككى قىزى ئۈچۈن ھەتتا جېنىدىن كېچەلەيدىغان ئەر .
ساتتار - «ئاللىقاچان شەھەرلىشىشكە ئۈلگۈرگەن ئادەم» . شەھەردىكى ئىجتىمائىي تۇرمۇش ئۇنى يۇمشاتقان .

ساتتار – ئۆز خاسلىقىنى پۈتۈنلەي يوقاتقان ئادەم .
ساتتار – مەغلۇپ بولغان ئەر .
مەن ھىكايىغا كىرىپلا ساتتارنىڭ ئايالىنى ۋە قىزىنى ئۆلتۈرۈۋېتىشىدىن ئەنسىرىگەن ئىدىم . چۈنكى ، غورور ۋە نۇمۇس تۇيغۇسىدىن ئالغاندا ھاقارەتكە قالغان ئەرنىڭ پىسخىك تاللىشى ھاقارەت كەلتۈرگەن ئوبىكىتنى ۋەيران قىلىش ئاندىن ھاقارەت قىلغۇچىنى كۆزدىن يوقىتىش بۇلۇشى مۇمكىن .
ئەمما ، ھىكاينىڭ كىيىنكى بۆلەكلىرىنى ئۇقۇۋېتىپ ،ساتتارنىڭ قۇلىدىن بۇ ئىشلارنىڭ كىلىشىگە كۈزۈم يەتمىدى . نېمىشقا ؟ ئۇنىڭ جاھاندارچىلىق پەلسەپەسىدىن ئېيىتقاندا ، بۇ ھاقارات ۋە خورلۇقلارغىمۇ چىداپ كېتەلىشى ئەقەللىي بىر ئىش ئىدى .
ئاخىرىغا كەلگەندە ئۇ ئۆزىنى ئۆلتۈرىۋالدى . مەن يەنە ئۇ ئۆزى قىلالايدىغان ئىككى خىل تاللاشنىڭ بىرىنى ئەمەلگە ئاشۇردى دىگەن تۇنۇشقا كەلدىم .
ساتتارنىڭ شۇنداق تاللىشىنىڭ سەۋەبى نىمە ؟
«ئەمدى مانا تۈنۈگۈن ھېلىقى سەت گەپنى ئاڭلىغان چاغدا ئەشۇ نەرسە ئۇزۇن يىللاردىن بېرى شەھەرنىڭ چاڭ - توزانلىرىدا ، شەھەرنىڭ ۋاراڭ – چۇرۇڭلىرىدا ، شەھەرنىڭ پۇلدىن ئىبارەت باش مىلودىيىسىدە كۆمۈلۈپ قالغان ئەشۇ نەرسە قايتا باش كۆتۈرگەن ، قايتا ئويغانغانىدى . نومۇس تۇيغۇسى ئۇنى ئۇيغىتىۋەتكەنىدى . ئويغانغان قەلپ مەڭگۈ تىنىچلانمايدۇ .ئۇنىڭ شۇ بىر سوتكىدىن بىرى تىنىچلىنالماسلىقى شۇ سەۋەبتىن ئىدى .»
ھىكايىدە ئەڭ كۆپ دىيىلگىنى شەھەرلىشىش دىگەندىن ئىبارەت بىر ئۇقۇم . مانا شۇ سۆز ساتتارنىڭ ئادىمىيلىكىنى ئاخىرىغا بېرىپ ، ھايات ۋە ماماتىنىمۇ ئۆزگەرتىۋەتتى . شەھەرلىشىش - بۇ ئادەملەرنىڭ ئىجتىمائىي پائالىيەت دائىرىسىگە قارىتا ئېيتىلغان بىر ئۇقۇم بولسىمۇ ، ھىكايە ئۇنىڭغا يەنە تېخىمۇ بىرئېغىر مەزمۇننى يۈكلەپتۇ . خىزمەت ، ئەمەل ، پۇل ، رېستۇران ، پىكاپ ، ئاشنا ، مېھمانساراي ، مودا ، ئۆي بېزەش ، قەۋەتلىك ئۆي ، سوت ... بولار شەھەرگە خاس ئامىللار . داغۋازلىق ، ھەشەمەتخورلۇق ، ھەسەتخورلۇق ، غەيۋەتخورلۇق ، زىناخۇرلۇق ، شەھۋەتخورلۇق ، خوشامەتچىلىك ، تەخسىكەشلىك ، بۇزۇقچىلىقلار ئىنسان تەبىئىتىنىڭ قاراڭغۇ تەرىپى . ئەخلاقسىزلىق ، نۇمۇسسىزلىق ، غورورسىزلىق ، ئىمان – ئېتىقادسىزلىق ... ئادەملەر ئۆزلىرى پەيدا قىلغان روھى كىرزىس . ئەمما تىرىكچىلىك غېمى ھەر جايدا بار .
دېمەك ، بۇدۇنيادىكى بارلىق زىدىيەت توقۇنۇشلارنىڭ نەق سەۋەبكارى ئادەملەر ، ئادەم ئۆزى . ھەر بىر ئادەم ئۆزىدىكى مەينەتچىلىكلەرنى تۇلۇق تازلىماي تۇرۇپ ، باشقا شەيئىلەردىن ئەيىپ ئىزدەيدىغان نىمە ھەققى بار ؟
ھىكايە بەرگەن زوق مۇشۇ يەردە تامام بولدى . ھەربىر ئوقۇغۇچى ئۆز تۇرغۇسىدا تۇرۇپ ، ئەسەردىن ھوزۇرلانغان ۋاقتىدا قەلبىدە نۇرغۇنلىغان سۇئاللار تۇغۇلۇشى مۇمكىن . ئەمما ، ئۇ سۇئاللارغا مېنىڭ تەھلىلىم تۇلۇق جاۋاب بولالمايدۇ . جاۋابنى ئوقۇغۇچىنىڭ ھەر بىرى ئۆزى ئىزدىگەي . مەن پەقەت بۇ تەھلىل ئارقىلىق  ھىكايە ئاپتۇرىنىڭ «ئويغانغان قەلپ مەڭگۈ تىنىچلانمايدۇ» دىگەن پىكرىنى تېخىمۇ كۈچەيتەلىسەم شۇنىڭ ئۆزى كۇپايە !

مەنبە : كروران ژورنىلى