بارخاندىن ئاۋاز _ ئەزىز ھېيت [ئۇلانما كۆچۈرۈش]

             ئەڭ چىرايلىق گۈل

                  ئەزىز ھېيت كۈن

          سىز ئېچىلغان ئەڭ  چىرايلىق گۈل،
           مېنىڭ  گۈزەل كۆڭۈل  بېغىمدا.
           بەكمۇ تاتلىق كۈلگەن ئىدىڭىز،
           سىزنى تۇنجى سۆيگەن  چېغىمدا.

            ئەڭ چىرايلىق كەپتەر  سىز گويا،
            قەپىزىدىن  باققان  دۇنياغا.
             تاتلىق-تاتلىق  كۈلىشىڭىزگە،
            تېگىشىمەن  جېنىمنى  ھەتتا.

            سىز ئەڭ گۈزەل  يورۇق  ئالىمىم،
            تېپىلغۇسىز ئېسىل جەننىتىم.
            ئۆلۈپ كەتسەم  قۇچىقىڭىزدا،
            مەڭگۈلۈك بەخت،شىرىن لەززىتىم.

             سىز ئېچىلغان ئەڭ چىرايلىق گۈل،
             سولمايدىغان،توزىمايدىغان.
             شادلىغىمدۇر،ئوماق كۈلكىڭىز،
             تا مەڭگۈگە   يوقالمايدىغان.



                 2000-يىل.

بارلىق يېڭى ۋە كونا شئېىرلىرىمنى «بارخاندىن ئاۋاز» ناملىق مەزكۇر تېمامنىڭ ئاستىغا يىغىۋاتىمەن.بۇ ھەر جەھەتتە قولايلىق بولۇش ئۈچۈندۇر.

بارخانىڭ ئاۋازى ئۈزۈلۈپ قالمىسۇن!

پەرۇزان  ئەپەندىنىڭ  كۆڭۈل بۆلگىنىگە تەشەككۈر.

   تور يوق بولغىلى  7 كۈن بولدى.تورغا چىقالمىدىم. يوللانمىلىرىمنى يوللىيالمىدىم.

          كۆزۈمدە ئوت،كۆزىڭىزدە ئوت


            ئەزىز ھېيت كۈن


           توساتتىنلا ئۇچراشقاندا  كۆزىمىز،
            سەزمەستىنلا تەڭ  قاراشتۇق ئىككىمىز.
            غىل-پال ئۆتكەن شۇ مىنۇتتا-دەقىقتە،
            بىر-بىرىگە  چىڭ چىرماشتى كۆڭلىمىز.

            تاتلىق كۈلۈپ  سىز كەتتىڭىز  ئاستىلا،
            ماڭا پەقەت يەر تېگىدىن قاراپلا.
            شۇ ھالەتنى كۆرمەي قالدى ھېچكىممۇ،
            شۇ كۆرۈنۈش شۇ جايدىلا  قېپ-قالا.

            تونۇشمايمىز  ئەزەلدىنلا  ئىككىمىز،
            تونۇشمىغان پېتى  ئۇزاپ كېتىمىز.
            بىر-بىرىگە تارتىشسىمۇ  كۆڭلىمىز،
             ئىنتىلىشنى ئۆزىمىزلا بىلىمىز.

             قارىدىڭىز  ئۇزاپ بولۇپ  لەپپىدە،
             قىلدى شۇئان يۈرەكلىرىم  جىغغىدە.
             كۆزۈمدە ئوت،كۆزىڭىزدە  چاقنار ئوت،
             ئېرىپ كەتتى يۈرىكىمىز  شۇررىدە.

                  سۆيگۈ تۇتقۇنى

         
                 ئەزىز ھېيت كۈن

  
            ياستۇقنى سۇغاردى قىزنىڭ كۆز يېشى،
            چىققاچقا بىر كېچە ئىسەدەپ يىغلاپ.
            ئامبۇردەك موجۇيتى يۈرەك-باغرىنى،
            قەلبىگە ئەڭ چوڭقۇر ئورنىغان ئازاپ.

            مەغرۇرلۇق قىپ قويغاچ قىشتىكى قۇياش،
            ئاشىققا ياغدۇردى سوغۇق  تەبەسۈم.
            قاقلانغاچ ئاشىغى مۇزرەڭ  چېھىرگە،
            قاي چاغدا كېلىشى بولدى نامەلۇم.

            ئاشىغى سۆيگۈنىڭ بوپ دىۋانىسى
            يامغۇردا يۇيۇنغان دەرەخمۇ بولغان.
            تومۇزدا تەلمۈرۈپ مىڭ كۆزى بىلەن،
            پىژغىرىم  ئاپتاپتا  كاۋاپمۇ  بولغان.

            بار ئىدى شۇ سىما  ھەر بىر باھاردا،
            ئاشىغى قىلچىلىك  ئۈمىد ئۈزمىگەن.
            ھەر كۈنى ئوخشاشلا تاڭلار ئاتسىمۇ،
            ئۆزىگىلا تاڭنى ئاتتى دىمىگەن.
                    
            قىز سەزگەن ئۆزىنى ئاسماندىكى ئاي ،
            ئاشىقنى يەردىكى قارا  پاتقاق-لاي.
            ئاخىرى يوقالغان قىزنىڭ  كۆزىدىن،
            سوغۇق تەبەسۇمدا توڭلاپ چىدىماي.

             ئاي ۋە يىل ئۆتسىمۇ قويغاچ كۆرۈنمەي،
             قىز چۈشكەن ئاسماندىن سېرىلىپ يەرگە.
             ئۆزىمۇ سەزمەستىن تەلپۈنگەن چەكسىز،
              ئەشۇ ئاشىغىنى   كۆزگە سۈرەرگە.

              سېغىنىش ئىچىدە ئۆتتى ئۇزاق قىش،
              كۇلۈپ كەلدى يەنە يېڭى بىر باھار.
              ھەر كېچە چىقتى ئۇ ئېسەدەپ يىغلاپ،
              ئەشۇ ئاشىغىنى  ئاۋال كۆرگەچ خار.

              بىر كۈنى قىز قالدى كۆزگە  ئىشەنمەي،
              تۇراتى  ئاشىغى  كۆكتىن چۈشكەندەك.
              قىز بىر تۈپ دەرەخكە  قالدى يۆلنىپ،
              بولۇپ كۆكرىكىگە بىر  ئوق تەگكەندەك.

              قارىدى ئاشىقنىڭ  چېھرىگە  ئۇزاق،
                       
             چىن كۆڭلى،تۇتاشقان يۈرىكى بىلەن...
             ئۆزىنى ئۇنۇتتى  ئاشىغى  ئۇنى،
             كۆتۈرگەچ  توم ،بەردەم بىلىكى بىلەن.

             قىز شۇ تاپ پاخلاندەك قانچە مۇلايىم؟
             ئېرىگەن ۋۇجۇدى  سىماپتىن  ئارتۇق.
             پاختا  بەدىنىدەك  يۇمشاق ئەمەستۇر،
             ئۆپكىدەك جۈپ كۆكسى گوياكى ياستۇق.

             يۈرىكى چىن خالاپ بولغان بىر ئولجا،
              ئېرىشتە  يوقالغان  ئەس-ھۇشى پۈتۈن.
              كىم ئولجا ؟ كىم ئوۋچى؟ ئايرىش ھاجەتمۇ ؟
              تەڭدۇر جۈپ يۈرەكتە  دۈپۈلدىگەن ئۈن.

              كېلەر ئاشىغىغا  يۆلەنگەچ شۇ قىز،
               جۈپتىگە ئىچ-ئىچىدىن قىلىپ ئامراقلىق.
               قەلبىدىن ئېتىلار  بەخت كۈلكىسى،
               سۆيۈملۈك چېھرىدە باردۇر ئوماقلىق.



                   2003-يىل.

              نۇرلانسۇن ساپ گۈزەللىكىڭىز


                 ئەزىز ھېيت كۈن


               گۈزەللەشسە  ھۆسنىڭىز قانچە،
               تۈگەپ كەتسۇن  كۆزۈمنىڭ  يېغى.
               رازىدۇرمەن  چىقىپ  كەتسىمۇ
                سىزگە  كۈيۈپ پېقىرنىڭ  جېنى.

                ئەسىر قىلدى مېنى مەڭگۈلۈك،
                مۇلايىملىق،يېقىملىقلىغىڭىز.
                ئايلاندۇردى ئېرىگەن  شامغا،
                يۈرىكىمنى  ئىللىقلىغىڭىز.

                گۈزەللىشىپ سىزدىكى قامەت
                 بولسا مەيلى جانغا بىر ئاپەت.
                 چىن ئاشىقمەن پاك قەلبىڭىزگە،
                 شىرىن ۋەسلىڭىز  ماڭا بىر جەننەت.

                 نۇرلانسۇن ساپ گۈزەللىكىڭىز،
                 ئۇلغايسۇن چىن- تەبى كۈلكىڭىز.
                  مەن بىر ئۆمۈر سىزگىلا تەشنا،
                   شىپا ماڭا ئىللىق  مېھرىڭىز.



                          2000-يىل.

           پىنھان  سۆيگۈ

            ئەزىز ھېيت كۈن


     كېتىپ بارار بىر يىگىت خوشال،
     قىزدا يوقتۇر پەقەت ئەشۇ  ھال.
     ۋەدە بەرگەچ ھەمراھ بولماققا،
     بىللە ماڭماي قىزغا  نە ئامال؟

    كېتىپ بارار بىر يىگىت خوشال،
    قىز كۆڭلىدە باشقىچە خىيال.
    كۆزى،كۆڭلى قالغان كەينىدە،
    توختىيالماس بولمىغاچ  ئامال.

   كەينىدىن بىر قىز كېلەر خوشال،
   يىگىتىدە يوقتۇر  ئەشۇ ھال.
   ئالدىدىكى قىزدىلا  كۆزى،
   قىزمۇ پات-پات  بۇرۇلۇپ قارار.

  بىر يىگىت ۋە بىر قىز بەك خوشال،
  يارلىرىدا يوقتۇر ئەشۇ ھال.
بىر يىگىت ۋە بىر قىز غەمكىندۇر،
كۆرۈشمەسلىك بولالمايدۇ  دال!
        


      2000-يىل.

        دەردى كۆپتۇر چىرايلىق قىزنىڭ

          ئەزىز ھېيت كۈن

       دەردى كۆپتۇر چىرايلىق،قىزنىڭ،
         كۆزى چۈشۈپ قالار ھەركىمنىڭ.
         بىلەلمىسە خەقنىڭ كۆڭلىنى،
         بولالايدۇ  مەشۇغى  كىمنىڭ؟

         دەردى كۆپتۇر چىرايلىق قىزنىڭ،
         پۇرىغۇسى  كېلەر ھەر كىمنىڭ.
         بولۇپ قالسا مىجىلغان شاپتۇل،
         زوقى كېلەر يەنە كىم-كىمنىڭ؟

         دەردى كۆپتۇر چىرايلىق قىزنىڭ،
         زوقلانغۇسى كېلەر ھەركىمنىڭ.
         بىر شاللاققا ئايلانسا ئەگەر،
         مەسلىگى كېلەر يەنە كىم-كىمنىڭ؟

         دەردى كۆپتۇر چىرايلىق قىزنىڭ،
         قېنىپ سۆيگۈسى كېلەر ھەركىمنىڭ.
         بېرەلمىسە بىر ئەرگە كۆڭۈل،
         ۋاپاسىنى كۆرەر  كىم-كىمنىڭ؟


           
          2000-يىل.

                سېغىنىش

      
               ئەزىز ھېيت كۈن

          قاتارلىشىپ  ئۆتتى  تۇرنىلار،
          قۇچاق ئاچتى يەنە بىر باھار.
          ھەممە نىمەم  بولسىمۇ پۈتۈن،
          كۆز ئالدىمدا  سىزلا يوق نىگار.

          ئىككى جايدا تۇرۇپ  ئىككىمىز،
          ئۇنتالمىدۇق بىر-بىرىمىزنى.
          ئىختىيارسىز قىلىشقان تىلفۇن،
          قىلدى ئايان  دىل سىرىمىزنى.
  
           ئېغىزىمدا  كەچسەممۇ سىزدىن،
           كېچەلمىدىم  كۆڭلۈمدە پەقەت.
           ئۈزۈلمىدى سىز قىلغان  تىلفۇن،
           « سۆيەلمەيمەن » دەپمۇ ھەر نۆۋەت.

            جەم  قىلىدۇ  سېغىنىش  بىزنى،
            سۆزلەشمەيمىز ،قۇچاقلىشىمىز.
            توزۇپ كېتەر ئەلەم،رەنجىشلەر،
            سۆيۈش بىلەن  ئامراقلىشىمىز.


            2003-يىل.

                 تۇغۇلغان كۈن سوغىسى

               
                  ئەزىز ھېيت كۈن


              ئېرى قىلغاچ سىلىق ئىشارە،
              مەستخۇش ئايال  كۆزىنى يۇمدى.
              مەڭگۈ-مەڭگۈ كونىرمايدىغان
               بىر ئىنئامنى  يۈرىكى تۇيدى.

               كۈلەر ئىدى شىرىن لەۋلىرى
                شىرەدىكى بىر دەستە گۈلدەك.
                تۇتقىنىدا ئېرى بېلىنى،
                ئېرىپ كەتتى تېنى سىماپتەك.
   
                ئوتلۇق لەۋدە سۆيۈلگىنىدە،
                ئايال كەتتى ھەممىنى ئۇنتۇپ.
                گۆھەردىنمۇ ئېسىل سوغىغا
                 ئېرىشكەندەك گۈزەل تۇيۇلۇپ.

                 مەستخۇش كۈلەر شىرەدىكى گۈل،
                 خۇددى ئۆزى سۆيۈلگەن كەبى.
                 ئاددى قىزىل گۈل ئەمەستۇر ئۇ،
                 ئەسلى ئەشۇ جانان  يۈرىكى

            
                   2003-يىل.

                            سىزنى كۆرگەندە

         
                           ئەزىز ھېيت كۈن

               ھوشۇم يوقار  ھەر رەت  سىزنى كۆرگەندە،
                سىز تاڭدىكى نۇرلۇق كۈندەك  كۈلگەندە.
                سىز زەپ خۇش بۇي گۈلگۈن قەدەھ -جام كەبى،
                مەن ئېرىيمەن  كۆيىۋاتقان شام   كەبى.

                 چېھرىڭىزدىن ياققان ئىللىق  مېھىردە،
                 كۆزىڭىزدىن  ئېتىلغان  نۇر- سېھىردە،
                 يۈرىكىمگە  ئۇشتۇمتۇتلا  ئوت  كېتەر.
                 كۆڭلۈم قۇشتەك سىزگە قاراپ قاقار پەر.

                  مېنى سىزلا تارتىپ تۇرغان  ماگنت،
                  ئوق قېشىڭىز جانغا ئاپەت،بىر تەھدىت.
                  بېقىشىڭىز بەكمۇ  ئۆتكۈر  تىغ كەبى،
                  تولغىنىمەن ئوتقا چۈشكەن قىل  كەبى.

                  چوغنى قىلچە يوشۇرالمىغان  پاختىدەك،
                  گۈرۈلدەيدۇ،لاۋۇلدايدۇ  بۇ يۈرەك.
                   ئويلايمەنكى: ئۆلتۈرەمسىز كۆيدۈرۈپ؟
                   ياكى قىزغىن باغاشلىتىپ   سۆيدۈرۈپ؟!

   
                      2003-يىل.

        سىزنى كۆرسەم ،سىزگە تەلپۈنسەم


        ئەزىز ھېيت كۈن

       ئۇسسۇزلۇغۇم كېتەر  ھەر ياققا،
       قاراپ قويغۇم كەلمەس تاماققا،
       ئۇيقۇم كەلمەس كۆزگە-چاناققا،
       سىزنى كۆرسەم ،سىزگە تەلپۈنسەم.

        يولۇقمايمەن ئاغرىق-كېسەلگە،
        يولىمايمەن  خەتەر-پېشكەلگە.
        تۇتقۇن بولمايمەن مۇدھىش ئەجەلگە،
        سىزنى كۆرسەم،سىزگەتەلپۈنسەم.

         باھار كۈلۈپ كىرەر دىلىمغا،
          قوشۇلىدۇ مىڭ جان جېنىمغا،
         جېنىم سىغماي قالار تېنىمغا،
         سىزنى كۆرسەم سىزگە تەلپۈنسەم.
  
        بىر كۈنۈم  تەڭ كېلەر مىڭ كۈنگە،
        بېرىسىز شاد مەنا ئۆمرۈمگە،
        مەڭگۈ شادلىق ئورنار  كۆڭلۈمگە،
         سىزنى كۆرسەم،سىزگە تەلپۈنسەم.


          2003-يىل.

  سۆيگۈ قۇدىرتى

    ئاققىنى دەريامۇ؟ ياق، ئۇلۇغ سۆيگۈ،
    تاغلاردىن ئېتىلغان چەكسىز ھاياجان!
    چاقنىغان يۇلتۇزمۇ؟ ياق ،بۈيۈك سۆيگۈ،
    زىمىنغا تەلپۈنگەن  يۈكسەك بىر ئارمان.

   قوشۇلۇش دىمەكتۇر- سۆيگۈ  دىمەكلىك،
   سۆيۈشەر ئەبىدى يەر بىلەن  ئاسمان.
   ئۇلۇغلۇغ  تۇغۇلار ئۇلۇغ سۆيگۈدىن،
   سۆيگۈدە يارالغان مۆجىزە جاھان.

   سۆيگۈدە يارالدى ھىملەشكەن تاغلار،
   سۆيگۈدە كېڭەيدى  پايانسىز ئورمان.
   سۆيگۈدە ئۇلغايدى بارچە ھاياتلىق،
   سۆيگۈنىڭ مىۋىسى-ئەبەدى ئىنسان.

  ئۇلۇغلۇغ- سۆيگۈدە،قۇدرەت –سۆيگۈدە،
  ئەڭ ئۇلۇغ دەريادۇر خەلق سۆيگۈسى.
   بەھەيۋەت تاغلاردا خەلقنىڭ قەددى،
   سۆيگۈدە يارىلار جەننەت  كەلگۈسى.


     2003-يىل.

   چىن سۆيگۈ  بۇلاق گويا ئوخچىغان


      ئەزىز ھېيت كۈن


مەندىن ئوتلۇق  كۆزىڭىزنى قاچۇرماڭ،
بېسىلمايدۇ ئەمدى شىرىن تۇيغۇڭىز،
دەريا يېنىپ ئاقالمايدۇ كەينىگە،
سىزمۇ مەندەك دەردكە  دۇچار بولدىڭىز.

قاچۇرمايلى كۆزىمىزنى ئۆز-ئارا،
تەڭ كۆيدۇق بىر-بىرىمىزگە يۈرەكتىن.
نى چاغ ئۆتۈپ چىڭ تۇتاشتى رىشتىمىز،
ئايرىلمايدۇ خەمەك ھامان پىلەكتىن.

ۋىسال  سەھرى قوغلار تۈننى-ھىجراننى،
يۈرىكىمىز،تىنىقىمىز قوشۇلسۇن.
شۇ دەقىقتە بىز ئۇنتۇيلى دۇنيانى،
جەننەتتە بىز راست تۇرغاندەك تۇيۇلسۇن.

چىن-پاك سۆيگۈ بۇلاق گويا ئوخچىغان،
توسالمايدۇ  قارا كېچە تاڭلارنى.
قىينىمايلى تەشنا،ئوتلۇق يۈرەكنى،
يارىتايلى گۈزەل،خوشال چاغلارنى.


  2003-يىل.