شائىر ئوسمانجان ساۋۇت تۇنجى شېئىرى ئېلان قىلىنغان 1961 – يىل ئۆكتەبىردىن بۇيان ، شېئىر ئىجادىيىتى بىلەن ئۈنۈملۈك شۇغۇللىنىپ، شېئىرخۇمار خەلقىمىزگە مول مېۋە بېرىۋاتقان، خەلقىمىزنىڭ ئالقىشىغا ئېرىشكەن ئىقتىدارلىق شائىرلىرىمىزنىڭ بىرى. ئۇ مەملىكەت ۋە ئاپتونوم رايون بويىچە، شۇنداقلا ھەرقايسى گېزىت – ژۇرناللار بويىچە ئۆتكۈزۈلگەن مۇنەۋۋەر ئەدەبىي ئەسەرلەرنى باھالاش پائالىيەتلىرىدە مۇكاپاتقا ئېرىشكەن ‹‹ۋەتىنىم سۈت بەرگەن ھالال ۋە ئاپئاق››، ‹‹توزان قەسىدىسى››، ‹‹ياڭرا ئەجەم›› ھەمدە ‹‹ئالمىدەك يۈرەكتە ئالەمچە سۆيگۈ››، ‹‹يۈرىكىم — سېنىڭ قېپىڭ››، ‹‹دالىلارنى باشلاپ كەلدىم قۇچاقلىرىڭغا››، ‹‹كەچۈرگىن مېنى سەن، ئالا بوينىقىم››، ‹‹قورۇق تام››، ‹‹تاڭ لىرىكىلىرى››، ‹‹سۆيگۈ — كۈي›› دېگەندەك شېئىرلىرى بىلەن ئېلىمىز ئىچىدىكىلا ئەمەس، خەلقئارادىكى جامائەتچىلىكنىڭمۇ دىققىتىنى قوزغىدى. ‹‹ئالمىدەك يۈرەكتە ئالەمچە سۆيگۈ››، ‹‹تاڭ لىرىكىلىرى›› ناملىق شېئىر توپلاملىرى، بىر مۇنچىلىغان تەرجىمە ئەسەرلىرى نەشىر قىلىندى.
ئوسمانجان ساۋۇت 1945 – يىلى ماناس ناھىيىسىدە تۇغۇلدى. 1961 – يىلى ساۋەن ناھىيىلىك ئوتتۇرا مەكتەپتە 10 – سىنىپنى تاماملاپ، شىنجاڭ ئۇنىۋېرسىتېتىنىڭ تىل – ئەدەبىيات فاكۇلتېتىغا ئوقۇشقا كىردى. ئۇنىۋېرسىتېتنى پۈتتۈرۈپ قۇمۇل، ساۋەنلەردىكى ئوتتۇرا مەكتەپلەردە ئوقۇتقۇچىلىق قىلدى. 1986 – يىلى شىنجاڭ ئۇيغۇر ئاپتونوم رايونلۇق ئەدەبىيات – سەنئەتچىلەر بىرلەشمىسىگە يۆتكىلىپ كېلىپ، دەسلەپتە ‹‹ئەدەبىي تەرجىمىلەر›› ژۇرنىلىدا تەھرىر بولۇپ ئىشلىدى.
شائىر ئوسمانجان ساۋۇتنىڭ شېئىرىيەت ئىجادىيىتىدە لىرىكا ئاساسىي ئورۇندا تۇرىدۇ. ئۇنىڭ شېئىرلىرىنىڭ ئالاھىدىلىكلىرىنى تېما دائىرىسى كەڭ، پەلسەپىۋى پىكىر چوڭقۇر، ھېسسىيات قايناق ۋە ئويناق، قۇرۇلما پۇختا، تىل رەڭدار ۋە راۋان، تۇراق ۋە قاپىيىلەر تولۇق، دەپ يەكۈنلەش مۇمكىن.
ۋەتەنپەرۋەرلىك ئوسمانجان شېئىرىيىتىدە مۇھىم ئورۇن ئىگىلەيدىغان تېما. ئۇ ‹‹ئالمىدەك يۈرەكتە ئالەمچە سۆيگۈ››، ‹‹يۈرىكىم — سېنىڭ قېپىڭ››، ‹‹ۋەتىنىم سۈت بەرگەن ھالال ۋە ئاپئاق››، ‹‹توزان قەسىدىسى›› دېگەندەك زور بىر تۈركۈم شېئىرلىرىدا ۋەتەنپەرۋەرلىكنى خىلمۇخىل نۇقتىلاردىن كۈيلىدى.
شائىر ئوسمانجان شېئىرلىرىدا، شېئىر توغرىسىدىكى ئومۇمىي قائىدە – پرىنسىپلارغا ئەھمىيەت بېرىش بىلەن بىللە، شېئىرىيەتنىڭ ئىچكى قانۇنىيەتلىرىگە، مەسىلەن، شېئىرىي تىل ئىشلىتىش، شېئىرىي شەكىل، شېئىرىي جۈملە تۈزۈش، تۇراق، قاپىيە، رېتىم گۈزەللىكى، ئۆزئارا ئاھاڭدارلىق قاتارلىقلارغىمۇ ئالاھىدە دىققەت قىلىدۇ.
شائىر ئوسمانجان ئەدەبىي تەرجىمە ساھەسىدىمۇ خېلى كۈچ سەرپ قىلدى. جۇڭگو ۋە چەت ئەلنىڭ مەشھۇر شائىرلىرىنىڭ شېئىرلىرىنى تەرجىمە قىلىپ ئۇيغۇر كىتابخانلىرىغا تونۇشتۇردى.
بىز ئۇنىڭ ئىجادىيىتىگە ئۇتۇق، تېنىگە سالامەتلىك تىلەيمىز!
