ئاياللار چىرايلىق بولمىسىمۇ، ناز-كەرەشمىلىك بولسىلا ئوخشاشلا ئەرلەرنىڭ كۆڭلىنى ئۇتالايدۇ. ئەركىلەشنىڭ سېھرىي كۈچى ھەقىقەتەنمۇ گۈزەل رۇخساردىن ئۈستىن تۇرىدۇ. ئاياللار ھەمىشە ئېرىدىن تېخىمۇ كۆپ سۆيگۈ تەلەپ قىلىدۇ. بۇ خىل سۆيگۈنى خۇددى بۇلاق سۈيىگە ئوخشاش تۈگىمىسىكەن دەپ ئويلايدۇ، بىراق ئەرلەر بولسا «سىزنى ياخشى كۆرىمەن» دېگەن سۆزنى داۋاملىق قىلىشنى خالاپ كەتمەيدۇ، ئۇلار سۆيگۈسىنى قۇرۇق سۆز بىلەن ئەمەس، بەلكى ئەمەلىي ھەرىكىتى بىلەن ئىپادىلەشنى ھەممىدىن ئەۋزەل بىلىدۇ.
تويدىن كېيىن ئەرلەرنىڭ مۇھەببەتلىشىۋاتقان ۋاقىتتىكى رومانتىكلىقى تۈگەپ، مۇھەببەتكە بارلىقىنى بېغىشلاش ھېسياتى تەدرىجىي سۇسلىشىدۇ، بىراق ئاياللار ئېرىدىكى بۇ ئۆزگىرىشنى يامان تەرەپتىن چۈشىنىپ، كۆڭلىگە گۇمان چۈشىدۇ-دە، ئېرىنىڭ كۆزىگە كىرىۋالىدۇ، بۇنىڭ بىلەن گاھىدا يوق يەردىن تۈك ئۈندۈرسە، گاھىدا يامانلاپ قالىدۇ، گاھىدا بىشەملىك قىلىدۇ، ئەرلەر دەسلەپتە خوتۇنىنىڭ بۇ ئەركىلەشلىرىگە يول قويۇپ، چۈشەندۈرۈشكە تىرىشىدۇ، بىراق بۇ ئىش داۋاملىشىۋېرىدىكەن، ئەرنىڭ بىزارلىقىنى قوزغايدۇ، چۈنكى سەۋر-تاقەتنىڭ چېكى بار.
ئەركىلەش ئاياللارنىڭ بىر خىل زىننىتى، شۇڭا بۇنى ھەقىقىي زىننەت سۈپىتىدە ئىپادىلەش ئىنتايىن مۇھىم، لېكىن ئاياللار 30 ياشقا كىرگەندە 20 ياشلىق قىزنىڭ قىلىقىنى قىلماسلىقى كېرەك، نىمىلا دېگەن بىلەن 30 ياشلىق ئايال 20 ياشلىق قىزدىن خېلىلا پىشقان بولىدۇ. زىيادە ئەركىلەش، رومانتىكىلىقنى قوغلىشىش ئەرلەرنىڭ ئامراقلىقىنى ئەمەس، بىزارلىقىنى قوزغاپ، بىئەپلىك تۇيغۇسى پەيدا قىلىدۇ، ئەتراپتىكىلەرگە بەرگەن تەسىرىمۇ ياخشى بولمايدۇ.
ـــ شىنجاڭ قانۇنچىلىق گېزىتى
