يانفوننىڭ كىشىلەرنىڭ تۇرمۇشىغا قولايلىق ئېلىپ كەلگەنلىكى دەرھەقىقەت، بىراق سەل قاراشقا بولمايدىغىنى شۇكى، يانفون ئىشلەتكۈچىلەرنىڭ يانفونىدىن كېلىدىغان ھەر خىل زىيانلىق تەسىرگە ئۇچرايدىغانلىقىمۇ بەرھەق...
قاتناش ھادىسىسىنىڭ كۆپىيىشى. ئامېرىكىدىكى تەتقىقاتچىلار سىناق قىلىپ مۇنداق ئەھۋاللارنى بايقىدى: ئاپتوموبىل ھەيدەۋاتقاندا يانفون ئىشلەتكەندە، ئاپتوموبىل ھەيدەش ھەرىكىتىگە قوماندانلىق قىلىدىغان چوڭ مېڭە رايونىنىڭ جانلىقلىق دەرىجىسى %37 چۈشۈپ كېتىدىكەن، بىراق زىيارەتنى قوبۇل قىلغان شوپۇرلارنىڭ %80 ى ئاپتوموبىل ھەيدىگەندە تېلېفون بېرىدىغانلىقىنى يوشۇرۇپ ئولتۇرمىدى. ئەمما كېلىپ چىقىدىغان نەتىجە شۇكى، بۇ خىل ئادەت تاسادىپىي قاتناش ھادىسىسىنىڭ يۈز بېرىشىنى تۆت ھەسسە ئۆرلىتىۋەتتى.
«كۆز پارقىراپ تۇرغان بىلەن ھېچنەرسە كۆرمەيدۇ». يولدا كېتىۋاتقاندا يانفون ئىشلەتكەن ئادەملەرنىڭ ئاز بولغاندىمۇ %75ى ئەتراپىدا بولۇۋاتقان ئىشلارغا، بولۇپمۇ ئۆتۈپ كېتىۋاتقان ئاپتوموبىللارغا دىققەت قىلمايدىكەن، ئەمما يانفوننى بۇنداق چاغدا ئىشلەتمەيدىغانلار بۇنداق بىپەرۋالىقتىن خالىي ئىكەن.
«خىيالىي تەۋرىنىش»نىڭ بىسەرەمجانلىقى. ئادەم يانفونغا تايىنىپ قالغاندا، يانفون بۇ ئادەمنىڭ بىر قىسمىغا ئايلىنىپ كېتىدۇ، بەزىدە يانفوننى ئېلىۋېلىشنى ئۇنتۇغان چاغدىمۇ خۇددى يانفون يېنىدا باردەك تۇيغۇدا بولۇپ، دائىم «يانفون تەۋرىنىشى»تۈپەيلىدىن بىسەرەمجان بولۇپ تۇرىدىكەن. بۇ خىل «خىيالىي تۇيغۇ» پەيدا بولۇشنىڭ تۈپ سەۋەبى شۇكى، كىشىلەر يانفون ئىشلىتىشكە ئادەتلىنىپ قالغان بولغاچقا، ئۇنىڭ چوڭ مېڭە ھۈجەيرىلىرىدە قالدۇرغان تەسىرى كۈچىيىپ، ئادەمنى ئىستىخيلىك ھەرىكەت قىلىدىغان «ماشىنا»غا ئايلاندۇرۇپ قويغان.
قىسقا ئۇچۇر ۋە بارماق. يانفوندا قىسقا ئۇچۇر يېزىش قېتىم سانىنىڭ كۆپىيىشىگە ئەگىشىپ، بارماقلارنىڭ قايتا–قايتا ھەرىكەتلىنىش قېتىم سانى كۆپىيىپ كېتىدۇ، ئۇچۇر ئەۋەتىش قېتىم سانى كۆپىيىپ كەتسە بارماقلار يارىلىنىدۇ ۋە ھەر خىل قاپارتمىلار ئۆرلەپ كېتىدۇ. بۇ خىل يارىلىنىش ئاساسەن قايتىلىنىش بېسىمىنىڭ كۈچىيىشى ۋە قايتىلانما ھەرىكەتنىڭ نەتىجىسى بولۇپ، كۆپ ھاللاردا ياشلاردا كۆرۈلىدۇ.
ئاڭلاش ئىقتىدارىنىڭ زىيانكەشلىككە ئۇچرىشى. ئامېرىكىدىكى %12.5 ياش ۋە ئۆسمۈرلەر بىلەن %17 قۇرامىغا يەتكەن كىشىلەرنىڭ ئاڭلاش سېزىمى يانفون پەيدا قىلغان شاۋقۇن تۈپەيلىدىن مەڭگۈلۈك زىيانكەشلىككە ئۇچرىغان، بۇنداق كىشىلەرنىڭ سانى ئاز بولغاندىمۇ 30 مىليوندىن كەم ئەمەسكەن.
