مەھمۇدجان خوجا ئۈمىدۋار
سۆيگىنىم قەلبىمگە سۇلتان بولۇپتۇ،
كۆكسۈمدە پىراقى گۈلخان بولۇپتۇ.
ئەڭ يىراق جايلاردىن كەلسەم دىدار دەپ،
ئۇ ئەجەب ئۆزگىگە جانان بولۇپتۇ.
ئاھۇنى لال قىلغان جۈپ كۆزى خۇمار،
ئانچىكى باقسىمۇ گۈللەر ئويغىنار،
كۆكتىكى ئاي سۈپەت كۆرۈنگەن نىگار،
ئاھ ، ئەمدى مەن ئۈچۈن پىنھان بولۇپتۇ.
مەن ئۇنى دۇنيادىن ئىزلىگەن ئىدىم،
دەردىمنى قۇشلارغا سۆزلىگەن ئىدىم،
قىزلار كۆپ، بىر ئۇنى كۆزلىگەن ئىدىم،
ۋىسالى مەن ئۈچۈن ئارمان بولۇپتۇ.
سۆيگىنىم ئۆزگىگە جانان بولۇپتۇ،
شادلىقىم بىر ئۆمۈر ۋەيران بولۇپتۇ.
مەن سەبىي چېغىمدا شاھزادە ئىدىم،
دىل قەسىرىم ياشلىقتا گۇمران بولۇپتۇ.
( سۆيگىنىم ئۆزگىگە جانان بولۇپتۇ.)
2009 -يىل 2-ئىيۇل پەيشەنبە،ئۈرۈمچى.
ئىنكاس يوللغۇچى : 
