مەھمۇدجان خوجا ئۈمىدۋار
ئەلمىساقتا مەن يارالغاندا ،
قوندۇڭ شەكسىز غەمكىن روھىمغا .
سېنى سۆيۈش گۇناھىم، بەلكىم ،
ئامالىم يوق كۆيمەسكە ئەمما .
كىرىۋالساڭ چۈشلىرىمگە گاھ ،
تەمتىرەيمەن كوچىلار ئارا .
ئۇچرىمايسەن تىمتاستۇر دۇنيا ،
مەنمۇ غەرق ھىجران قوينىغا .
تەمكىنلىكتىن يىراق بىر جايدا ،
ياش تۆكىدۇ يۈرىكىم تەنھا .
غېرىبلىقتا قالىمەن جەزمەن ،
قايتمىسا گەر قەلبىڭدىن سادا .
ئىنتىلىمەن يۇلتۇزۇم ساڭا ،
كۈتەلەيمەن يۈز يىللاپ ھەتتا .
ھەم سۆيىمەن ئەبەدكىچە تا ،
ئالىيجاناب ، ئەڭ پاك تۇيغۇدا .
2002-يىل 13-ئىيۇل شەنبە كېچە، باي .
