ئاپتونوم رايونىمىزنىڭ 2012- يىللىق ئادەتتىكى ئالىي مەكتەپ ئىمتىھان قەغىزىنى تەكشۈرۈش خىزمىتى باشلانغىلى ئۈچ كۈن بولدى. ئاپتونوم رايونلۇق پارتكوم دائىمىي كومىتېتىنىڭ ئەزاسى ئەركىنجان تۇراخۇن، ئاپتونوم رايوننىڭ مۇئاۋىن رەئىسى جىن نو تۈنۆگۈن چۈشتىن بۇرۇن، ئىمتىھان قەغىزى تەكشۈرۈش نەق مەيدانىغا بېرىپ خىزمەتلەرنى تەكشۈردى. ئەركىنجان تۇراخۇن مۇنداق دېدى:- ئالىي مەكتەپ ئىمتىھان قەغىزىنى تەكشۈرۈشكە قاتناشقان ھەر بىر خادىم ئومومىيلىق ئېڭى، سىياسىي ئېڭى، مەسئۇلىيەت ئېڭىنى چىڭ تۇرغۇزۇپ، بىخەتەرلىكنى ھەقىقىي چىڭ تۇتۇپ، پۈتۈن كۈچ بىلەن ئىمتىھان قەغىزىنى تەكشۈرۈش خىزمىتىنى ياخشى ئىشلىشى، ئىمتىھان قەغىزىنى تەكشۈرۈشتە، نومۇر قويۇش ئۆلچىمىگە قاتتىق رىئايە قىلىپ، نومۇر قويۇشتىكى خاتالىقنى ئەڭ تۆۋەن چەككە چۈشۈرىشى كېرەك. ئىگىلىنىشىچە، ئاپتونوم رايونىمىزنىڭ 2012- يىللىق ئادەتتىكى ئالىي مەكتەپ ئىمتىھانى قەغىزىنى تەكشۈرۈش خىزمىتى مۇشۇ ئاينىڭ 15- كۈنى باشلانغان. ئاپتونوم رايونىمىزنىڭ بۇ يىلقى ئالىي مەكتەپ ئىمتىھانىدا 620 مىڭدىن كۆپ جاۋاپ كارتىسى بولۇپ، 870 ئوقۇتقۇچى توردا قەغەز تەكشۈرۈش خىزمىتىگە قاتناشقان. ئاپتونوم رايون بۇ يىل ئالىي مەكتەپ ئىمتىھان قەغىزىنى تەكشۈرۈش خىزمىتىگە دائىر قائىدە-تۈزۈملەرنى يەنىمۇ مۇكەممەللەشتۈرۈش بىلەن بىرگە، قەغەز تەكشۈرگۈچى خادىملارغا بولغان تەربىيلەشنى كۈچەيتىپ، قەغەز تەكشۈرگۈچى خادىملارنى سىناقتىن ئۆتكەندىن كېيىن، قەغەز تەكشۈرۈش خىزمىتىگە قاتناشتۇرۇش تۈزۈمىدە چىڭ تۇرغان. ئىگىلىنىشىچە، ئىمتىھان قەغىزىنى تەكشۈرۈش خىزمىتى مۇشۇ ئاينىڭ 25- كۈنى ئۈرۈمچى ۋاقتى كەچ سائەت 4 تە ئاخىرلىشىدىكەن، مۇشۇ ئاينىڭ 28- كۈنى ئەتراپىدا ھەرقايسى تۈركۈمدىكى ئوقۇغۇچى قوبۇل قىلىش ئەڭ تۆۋەن نومۇر چېكى ئېلان قىلىنىدىكەن. ئوقۇغۇچىلار ۋە ئاتا- ئانىلارنىڭ شىنجاڭ ئوقۇغۇچى قوبۇل قىلىش تورىغا دېققەت قىلىشىنى ئۈمىد قىلىمىز.
http://www.xjzs.edu.cn