باياتىن بىر بۇرادىرىمدىن يارمۇھەممەد تاھىر تۇغلۇق ئاكىمىزنىڭ ۋاپات بولغانلىق خەۋىرىنى ئاڭلاپ، ئىشەنمەي قالدىم- دە، دەرھال يەنە بىر بۇرادىرىمگە تېلېفون قىلىپ، يارمۇھەممەد ئاكىمىزنىڭ بۈگۈن ئەتىگەن دوختۇرخانىغا ۋاپات بولغانلىقى، مېيىتىنى قېرىنداشلىرىنىڭ ئاتۇشقا ئېلىپ كەتكەنلىكىنى ئۇقتۇم. يارمۇھەممەت ئاكىمىزنىڭ ئۈرۈمچىدىكى تونۇش- بىلىشلىرى بۇ خەۋەرنى ئۇقۇپ بولغۇچە بولغان ئارىلىقتا مېيىتى جېددىيلا ئېلىپ مېڭىلىپتۇ. ئاكىمىزنىڭ ياتقان يېرى جەننەتتە بولغاي! ئاكىمىزنىڭ مېيىتى بۈگۈن ئاتۇشقا يەتكۈزۈلسە ئەتە نامىزى چۈشۈرۈلۈشى مۇمكىن، ئاتۇش ۋە قەشقەردىكىلەر ئىمكانىيىتى بولسا ئالاقىلىشىپ نامىزىغا ئىشتىراك قىلالىشى مۇمكىن.

يارمۇھەممەت تاھىر تۇغلۇق 1958-يىلى 12-ئاينىڭ 23-كۈنى ئاتۇشنىڭ شورۇق كەنتىدە تۇغۇلغان. 1983-يىلى شىنجاڭ ئۇنىۋېرسىتېتى ئەدەبىيات فاكۇلتېتىنى پۈتتۈرگەن. 1997-يىلغىچە قەشقەر پېداگوگىكا ئىنستىتۇتىدا ئوقۇتقۇچىلىق قىلغان. كېيىن ئۆز ئالدىغا تەتقىقات بىلەن شۇغۇللانغان.
«قۇتادغۇبىلىك»شۇناس، پېداگوگ يارمۇھەممەت تاھىر تۇغلۇق «قۇتادغۇبىلىك» تەتقىقاتى، ئۇيغۇر كلاسسىك ئەدەبىياتى تەتقىقاتى، مەدەنىيەت تەتقىقاتى ۋە پېداگوگىكىغا ئائىت تېمىلاردا يازغان نۇرغۇن ماقالىلىرى، «ئوغلۇم، ئالدىڭغا قارا»، «ھايات ۋە مۇۋەپپەقىيەت» ناملىق كىتابلىرى بىلەن جامائەتچىلىككە تونۇشلۇق، ئىرادىلىك ۋە جاسارەتلىك ئاپتور بۇ يىل يەنە پەلسەپىۋى ئەسەر «قۇتادغۇبىلىك»نى رومانلاشتۇرۇپ ئىشلەپ جەمئىيەتكە سۇندى. «بوۋام شۇنداق ئۆگەتكەن» دېگەن تېمىدىكى بىر يۈرۈش كىتابلىرىدىن «ھايات بوسۇغىسىدا»، «قۇتادغۇبىلىك دەرسخانىسى» دېگەن قىسىملىرىنى نەشر قىلدۇرغان. «ئۇيغۇرلاردا پەرزەنت تەربىيىسى» ناملىق بۇ كىتابى ئۇنىڭ 21-ئەسىردىكى پەرزەنتلىرىمىزنىڭ بەخت-سائادىتى ئۈچۈن سوۋغا قىلغان خالىس تۆھپىلىرىنىڭ بىرى ھېسابلىنىدۇ. ئاپتور كىتابتا خەلقىمىز كۈتۈۋاتقان ئەڭ نازۇك مەسىلىلەرگە ماھىرلىق بىلەن جاۋاب بېرىپ، كىتابنى يېتەكلەش خاراكتېرى يۇقىرى ئاممىباب مەسلىھەتچىگە ئايلاندۇرغان.
بىلىشىمىزچە، ئاكىمىزنىڭ قولىدا تېخى تاماملانمىغان ئىلمىي ئەمگەكلەر بولۇپ، بۇ ئەمگەكلەر «قۇتادغۇبىلىك» ۋە «دىۋانى لۇغاتىت تۈرك» نىڭ شەرھىيسىگە ئائىت قىممەتلىك ئەمگەكلەر ئىدى. ئاللاھ ئۇنىڭ ياتقان يېرىنى جەننەتتە قىلسۇن. قالۇئىننەللاھى ۋە ئىننا ئىلەيھى راجىئون!