گاۋۋا خەۋەر قىلىدۇ: زىيادە داۋالاشنى چەكلەپ، شەھەر ئاھالىلىرىنىڭ كېسەل كۆرسىتىشى تەس بولۇش مەسىلىسىنى ھەل قىلىش ئۈچۈن، بۇ يىل ئۈرۈمچى شەھەرلىك ئىجتىمائىي سۇغۇرتا باشقۇرۇش ئىدارىسى نۇقتىلىق بەلگىلەنگەن داۋالاش ئاپپاراتلىرى بىلەن داۋالاش مۇلازىمىتى كېلىشىمى ئىمزالىغاندا قوشقان ئالاقىدار ماددىلار بويىچە، نۇقتىلىق بەلگىلەنگەن داۋالاش ئاپپاراتلىرىنىڭ كىلىنىكىلىق تەكشۈرۈش تۈرلىرىنى ‹‹يۈرۈشلۈك›› تەكشۈرۈشى قاتتىق چەكلىنىپ، زىيادە تەكشۈرۈش ۋە داۋالاشقا يول قويۇلمايدىكەن. ئۇنداق بولمىغاندا ئىجتىمائىي سۇغۇرتا تارماقلىرى داۋالىنىش سۇغۇرتا فوندىدىن زىيادە تەكشۈرۈش ۋە داۋالاش ھەققىنى ئاتچوت قىلىشنى رەت قىلىدىكەن، بۇ ھەقلەرنى دوختۇرخانا ئۈستىگە ئالىدىكەن.
   يېڭى ئىمزالانغان داۋالاش مۇلازىمىتى كېلىشىمدە مۇنداق بەلگىلەندى: نۇقتىلىق بەلگىلەنگەن داۋالاش ئاپپاراتلىرى سۇغۇرتىلانغۇچىنىڭ كېسەللىك ئەھۋالىغا ئاساسەن، تەكشۈرۈش تۈرىنى مۇۋاپىق تاللايدۇ، كىلىنىكىلىق تەكشۈرۈش تۈرلىرىنى ‹‹يۈرۈشلەشكەن›› تەكشۈرۈش قىلىۋېلىشقا، زىيادە تەكشۈرۈش ۋە داۋالاشقا يول قويۇلمايدۇ؛ B تىپلىق ئۇلترا ئاۋاز دولقۇنىلىق رەڭلىك تەكشۈرۈش ئاپپاراتى، CT، يادرو ماگنىتلىق رېزونانىسلىق تەكشۈرۈش ئۈسكۈنىلىرىدە تەكشۈرۈش تۈرلىرىنى قائىدىلىك تەكشۈرۈش دائىرىسىگە كىرگۈزۈشكە بولمايدۇ، ئالاھىدە تەكشۈرۈش تۈرىنى ئىچكى قىسىمدا ئىلتىماس قىلىش، تەكشۈرۈش تۈزۈمىنى ئورنىتىش كېرەك. يېڭى كېلىشىمدە يەنە مۇنۇلار تەلەپ قىلىندى: نۇقتىلىق بەلگىلەنگەن داۋالاش ئاپپاراتلىرى ئادەم ئورگانىزمىغا كۆچۈرۈلىدىغان داۋالاش ئۈسكۈنىلىرىنى ئىشلىتىشنى ئىچكى قىسىمدا ئىلتىماس قىلىشى، تەكشۈرۈش تۈزۈمى ئورنىتىشى ھەم بۇنى ئىشلىتىش خاتىرىسىنى مەڭگۈ ساقلىشى ۋە ئاغرىقنى بۇ خاتىرە بىلەن تەمىنلىشى كېرەك. ئىچكى ئورگانىزمغا كۆچۈرۈلگەن داۋالاش ماتېرىياللىرى كېسەللىك مىسالىغا كېسەللىك ئەھۋالى، ئىشلىتىلىش تۈرى ۋە مىقدارى توغرا خاتىرىلىنىشى ھەم ئىشلىتىلگەن ماتېرىيالنىڭ سىزىقلىق كود بەلگىسى چاپلىنىشى كېرەك.
   بۇنىڭدىن سىرت، نۇقتىلىق بەلگىلەنگەن داۋالاش ئاپپاراتلىرىدا تەكشۈرۈش ۋە داۋالاش قېتىم سانى ئۆلچەمدىن ئېشىپ كېتىش، تەكرار ھەق ئېلىش، تەكشۈرۈش ۋە داۋالاش تۈرى بىلەن دىياگنوز ماس كەلمەسلىك ياكى دىياگنوز ئىسپاتى كەمچىل بولۇش، سەھىيە مەمۇرىي تارماقلىرى تەستىقلىغان تەكشۈرۈش ۋە داۋالاش تۈرلىرى ھەم ئىجازەتلىك داۋالاش تېخنىكىسى بىلەن داۋالاش مۇلازىمىتىدىن ئېشىپ كېتىش قىلمىشلىرى كۆرۈلسە، ئىجتىمائىي سۇغۇرتا تارماقلىرى بۇنى قائىدىگە خىلاپ ھەق دەپ تۆلەشنى رەت قىلىدۇ، شۇنداقلا قائىدىگە خىلاپ ھەق سوممىسىنىڭ بىر ھەسسىسى بويىچە كېلىشىمگە خىلاپلىق قىلىش جەرىمانىسى قويىدۇ.
   ئىگىلىنىشىچە، ئۈرۈمچىدە ھازىر تەكشۈرۈشتە لاياقەتلىك بولغان 400دىن ئارتۇق نۇقتىلىق بەلگىلەنگەن داۋالاش ئاپپاراتى بولۇپ، ئۈرۈمچى شەھەرلىك ئىجتىمائىي سۇغۇرتا باشقۇرۇش ئىدارىسى ھازىرغىچە %95كە يېقىن نۇقتىلىق بەلگىلەنگەن داۋالاش ئاپپاراتى بىلەن بۇ يىللىق داۋالاش مۇلازىمىتى كېلىشىمى ئىمزالىغان.