2015-يىللىق ئىچكىرى ئۆلكە تولۇق ئوتتۇرا مەكتەپلىرىگە ئوقۇغۇچى قوبۇل قىلىش ئىمتىھانى 20-چېسلادىن 22-چېسلاغىچە ئېلىپ بېرىلىدۇ. ئۈرۈمچىدە جەمئىي 5265 نەپەر ئوقۇغۇچى ئىمتىھانغا قاتنىشىدۇ.
شەھەرلىك مائارىپ ئىدارىسى ئىچكىرى ئۆلكە تولۇق ئوتتۇرا مەكتەپ سىنىپ مۇدىرى ما جۇڭخۇا (中华介) نىڭ تونۇشتۇرۇشىچە، بۇ يىل ئۈرۈمچىدە قەشقەر، تۇرپان قاتارلىق جايلاردىن كەلگەن 1766 نەپەر ئوقۇغۇچى، شۇنداقلا بىر قىسىم بىڭتۈەن ئوقۇغۇچىلىرى ئىمتىھانغا قاتنىشىدىكەن. پۈتۈن شىنجاڭدا ئىمتىھانغا قاتناشقۇچىلارنىڭ سانى 40939 نەپەر بولۇپ، بۇلتۇرقىدىن 4199 ئوقۇغۇچى كۆپەيگەن.
ئىگىلىنىشىچە، بۇ يىل ئىچكىرى ئۆلكە تولۇق ئوتتۇرا مەكتەپلىرى شىنجاڭدىن 9880 ئوقۇغۇچى قوبۇل قىلىشنى پىلانلىغان بولۇپ، يەرلىكتىن 9530 نەپەر، بىڭتۈەندىن 350 نەپەر ئوقۇغۇچى قوبۇل قىلىدىكەن. بۇندىن كېيىن ئوقۇغۇچى قوبۇل قىلىش كۆلىمى 9880 نەپەر بىلەن چەكلىنىدىغان بولۇپ، ئەمدى كېڭەيتىلمەيدىكەن.
2000-يىلىدىن باشلاپ، دۆلەت ئىچكىرى ئۆلكىلەردىكى تەرەققىي تاپقان رايونلاردىكى مۇنەۋۋەر تولۇق ئوتتۇرا مەكتەپلەردە شىنجاڭ تولۇق ئوتتۇرا سىنىپى تەسىس قىلغان بولۇپ، مەخسۇس شىنجاڭدىن ئوقۇغۇچى قوبۇل قىلغان، بۇنىڭ ئىچىدە ئاز سانلىق مىللەت ئوقۇغۇچىلىرى %70 تىن ئارتۇقنى تەشكىل قىلغان.
