4-ئاينىڭ 6-كۈنى، «فوربېس» ژۇرنىلىنىڭ خەۋىرىگە ئاساسلانغاندا، ئىستېمال تەكشۈرۈش ئورگىنى Kantar Worldpanel ComTech نىڭ ئەقلىي ئىقتىدارلىق يان تېلېفون بازىرىغا بولغان تەكشۈرۈش نەتىجىسىدە كۆرسىتىلىشىچە، iPhone نىڭ بازار ئۈلۈشى ئامېرىكا، ياپونىيە، گېرمانىيە، ئەنگلىيە، ئىتالىيە ۋە ئىسپانىيەدە ئۇدا 2 ئاي تۆۋەنلىگەن، لېكىن جۇڭگو بازىرىدا ئۇدا 4 ئاي كۈچلۈك ئېشىشنى ساقلاپ قالغان.

بۇ يىل بىرىنچى ۋە ئىككىنچى ئايدا، تەرەققىي قىلغان 7 دۆلەتتىكى iPhone نىڭ ئەقلىي ئىقتىدارلىق يان تېلېفون بازىرىدىكى بازار ئۈلۈشى تۆۋەنلىگەن، بۇنىڭ ئىچىدە، ئامېرىكىدىكى بازار ئۈلۈشى ئەسلىدىكى %47.7 تىن %38.8 كە تۆۋەنلىگەن، ياپونىيەدە ئەسلىدىكى %60.2 تىن %49.8 كە تۆۋەنلىگەن، گېرمانىيەدە ئەسلىدىكى %20.9 تىن %17.4 كە تۆۋەنلىگەن، ئەنگلىيەدە ئەسلىدىكى %42 تىن %38.6 تۆۋەنلىگەن، فىرانسىيەدە ئەسلىدىكى %23 تىن %21.6 كە تۆۋەنلىگەن، ئىتالىيەدە ئەسلىدىكى %18.3 تىن %17.5 كە تۆۋەنلىگەن، ئىسپانىيەدە ئەسلىدىكى %12.9 تىن %8.7 كە تۆۋەنلىگەن.

جۇڭگو بازىرىدىكى بازار ئۈلۈشى ئەكسىچە بولغان، بۇنىڭ سەۋەبى بەلكىم iPhone6 نىڭ بۇلتۇر 10-ئايدا ئاندىن بازارغا چىقىشى، 2-ئايدا باھار بايرىمىنىڭ ئۆتكۈزۈلۈشى ۋە جۇڭگو كۆچمە خەۋەرلىشىشىنىڭ 4G تورىنى ئوتتۇرىغا چىقىرىشى قاتارلىقلار بولۇشى مۇمكىن. بۇ ئامىللار iPhone نىڭ بىرىنچى پەسىلدىكى كەسىپ نەتىجىسىگە تەسىر كۆرسەتكەن، شۇنىڭ ئۈچۈن كەلگۈسى بىر قانچە ئايدىكى سېتىلىش ئەھۋالى دىققەت قىلىشقا ئەرزىيدۇ. ئالمىنىڭ جۇڭگو شەھەرلىرىدىكى بازار ئۈلۈشى بۇلتۇر 11-ئايدىكى %18.1 تىن يۇقىرىلاپ بۇ يىل 2-ئايدىكى %27.6 كە يەتكەن.

Kantar Worldpanel ComTech نىڭ باش ئانالىزچىسى كارولىنا مىلانىس (Carolina Milanesi) نىڭ دېيىشىچە، iPhone6 Plus بولسا iPhone6  ۋە شياۋمىنىڭ خۇڭمى Note دىن قالسا سېتىلىشى ئەڭ تېز بولۇۋاتقان ئۈچىنچى يان تېلېفون تىپى ئىكەن. بۇنىڭ بىلەن بىرگە كونا نۇسخىدىكى iPhone مۇ كۆپ سېتىلىۋاتقان بولۇپ، سېتىلىش مىقدارى جەھەتتە ئالما بىرىنچى ئورۇندا تۇرغان، شياۋمى ئىككىنچى ئورۇندا تۇرغان.