ئۈرۈمچى كەچلىك گېزىتى خەۋىرى:
پۇراش سەزگۈسىنى يوقىتىشنىڭ سەۋەبى ئاددىي بولمايدۇ. چۈنكى ئۇ مۇستەقىل كېسەللىك ئالامىتى ئەمەس، ئۇنى بەلكىم ئۆسمە كەلتۈرۈپ چىقىرىشى مۇمكىن. پۇراش سەزگۈسىنى يوقىتىشنىڭ يەنە بۇرۇن ئىتىلىپ قېلىش، پۇراش نېرۋىسى ياكى مېڭە زەخىملىنىشكە ئوخشاش سەۋەبلىرىمۇ بار.
مۇتەخەسسلەر مۇنداق دېيىشتى: بۇرۇننىڭ ئىچىگە ئۆسمە ئۆسۈش ياكى ياللۇغلىنىش، سەزگۈرلۈكى ئېشىپ كېتىش سەۋەبىدىن بۇرۇن توسۇلۇپ قالغان بولسا، پۇراق نېرۋا تالالىرىغا بارالمايدۇ-دە، ئادەم پۇراق پۇرىماس بولۇپ قالىدۇ. بۇرۇن ياللۇغى ياكى بۇرۇن كاۋىكى ياللۇغىغا گىرىپتار بولغانلارنىڭ ھەر ئىككى بۇرۇن تۆشۈكىنىڭ، پۇراش سەزگۈسى بۇرۇندا ئۆسمە ئۆسۈپ قالغانلارنىڭ تاق تۆشۈكىدىكى پۇراش سەزگۈسى تۆۋەنلەيدۇ؛ بۇرۇن كاۋىكى ياللۇغى ۋە نېرۋا كېسىلىگە گىرىپتار بولغانلار دائىم باشقىلاار پۇرىيالمايدىغان سېسىق پۇراقلارنى پۇرىيالايدۇ، مېڭىسىگە ئۆسمە ئۆسۈپ قالغانلارنىڭمۇ پۇراش سەزگۈسى يوقايدۇ.
