مەكتەپتىكى مۇھەببەت
مۇختار بۇغرا
شېرىنلىكى بەك شېرىن،
ئازابى بار ۋە لېكىن.
قېلىشمايدۇ ناخشىدىن،
مەكتەپتىكى مۇھەببەت.
تەڭ ئىشلەيمىز تاپشۇرۇق،
بەتلىرىمىز قۇپقۇرۇق.
كەپسىزلىكتىن ئەسەر يوق،
مەكتەپتىكى مۇھەببەت.
بىر پارتىداش، ساۋاقداش،
بىزدە قوپال ياتسىراش.
شادلىق قايغۇ ئارىلاش،
مەكتەپتىكى مۇھەببەت.
گەپ تاپماق تەس كۆرۈشۈپ،
يۈردۇق بەزەن كۈلۈشۈپ.
نادانلارچە كۈنلىشىپ،
مەكتەپتىكى مۇھەببەت.
قېنىپ بولماس ئۆزئارا،
تىنىپ بولماس ئۆزئارا.
ئېغىزلاندى دىل يارا،
مەكتەپتىكى مۇھەببەت.
